কেন্দ্ৰীয় গৃহমন্ত্ৰী অমিত শ্বাহে অহা কেইটামান দিনৰ ভিতৰত দেশৰ কেইবাটাও গুৰুত্বপূৰ্ণ সীমান্তৱৰ্তী অঞ্চল ভ্ৰমণ কৰিব
ভাৰতৰ সীমান্ত সুৰক্ষা ব্যৱস্থা অধিক শক্তিশালী কৰাৰ উদ্দেশ্যেৰে কেন্দ্ৰীয় গৃহমন্ত্ৰী অমিত শ্বাহে অহা কেইটামান দিনৰ ভিতৰত দেশৰ কেইবাটাও গুৰুত্বপূৰ্ণ সীমান্তৱৰ্তী অঞ্চল ভ্ৰমণ কৰিব । এই ভ্ৰমণকালত গৃহমন্ত্ৰীগৰাকীয়ে উচ্চস্তৰীয় নিৰাপত্তা সম্পৰ্কীয় বৈঠকত মিলিত হৈ সীমান্তৰ শেহতীয়া স্থিতিৰ পৰ্যালোচনা কৰিব। দেশৰ সাৰ্বভৌমত্ব আৰু সুৰক্ষাৰ দিশৰ পৰা গৃহমন্ত্ৰীৰ এই সমগ্ৰ ভ্ৰমণসূচীক অত্যন্ত গুৰুত্বপূৰ্ণ বুলি ধাৰণা কৰা হৈছে ।
প্ৰথম কাৰ্যসূচী : ৰাজস্থানৰ বিকানেৰ আৰু ‘সাঁচু’ সীমান্ত চকী
নিৰ্ধাৰিত কাৰ্যসূচী অনুসৰি, গৃহমন্ত্ৰী অমিত শ্বাহে আজি (২৫ মে’) নিশা ৰাজস্থানৰ বিকানেৰত উপস্থিত হ’ব । কাইলৈ ৰাতিপুৱা ঠিক ১০ বজাত তেওঁ ভাৰত-পাকিস্তান সীমান্তত অৱস্থিত বি এছ এফৰ সীমান্ত চকী ‘সাঁচু’ পৰিদৰ্শন কৰিব । তাত তেওঁ কৰ্তব্যৰত নিৰাপত্তাৰক্ষী জোৱানসকলৰ সৈতে পোনপটীয়া বাৰ্তালাপত মিলিত হোৱাৰ লগতে জোৱানসকলৰ কল্যানৰ্থে কেইবাখনো বিশেষ আঁচনিৰ শুভাৰম্ভ কৰিব ।
ইয়াৰ পিছত, দিনৰ ২ বজাত বিকানেৰত এক গুৰুত্বপূৰ্ণ সীমান্ত নিৰাপত্তা পৰ্যালোচনা বৈঠক অনুষ্ঠিত হ’ব । এই বৈঠকত গৃহ মন্ত্ৰালয়ৰ উচ্চপদস্থ বিষয়া, ৰাজস্থান চৰকাৰৰ প্ৰতিনিধি, বি এছ এফৰ জ্যেষ্ঠ বিষয়া আৰু সীমান্তৱৰ্তী ৫খন জিলাৰ জিলা উপায়ুক্ত (DM) তথা আৰক্ষী অধীক্ষকসকল উপস্থিত থাকিব ।
ড্ৰোন আৰু হাইব্ৰিড যুদ্ধৰ বিৰুদ্ধে ‘স্মাৰ্ট বৰ্ডাৰ প্ৰজেক্ট’-
আজিকালি ক্ৰমান্বয়ে বৃদ্ধি পোৱা ড্ৰোন তথা হাইব্ৰিড যুদ্ধৰ প্ৰত্যাহ্বানৰ মোকাবিলা কৰিবলৈ ভাৰত চৰকাৰে এক নতুন কৌশল হাতত লৈছে । বিকানেৰ ভ্ৰমণৰ সময়ত অমিত শ্বাহে পাকিস্তান সীমান্তৰ বাবে ‘স্মাৰ্ট বৰ্ডাৰ প্ৰজেক্ট’ আৰু ‘নতুন সীমান্ত সুৰক্ষা ৰণনীতি’ৰ চূড়ান্ত ৰূপৰেখা প্ৰস্তুত কৰিব । এই প্ৰস্তাৱিত ‘স্মাৰ্ট বৰ্ডাৰ প্ৰজেক্ট’ৰ অধীনত সীমান্তত আধুনিক ড্ৰোন, ৰাডাৰ, হাই-টেক কেমেৰা আৰু অত্যাধুনিক প্ৰযুক্তি মোতায়েন কৰা হ’ব, যাৰ জৰিয়তে শত্ৰুপক্ষৰ বাবে এক অভেদ্য সীমান্ত গ্ৰীড গঢ়ি তোলা হ’ব ।
অনাগত দিনৰ ভ্ৰমণসূচী: গুজৰাট, ত্ৰিপুৰা আৰু বংগ-
ৰাজস্থান ভ্ৰমণৰ সামৰণি মাৰি গৃহমন্ত্ৰীগৰাকী অহা ২৯ মে’ত গুজৰাটৰ ভুজ ভ্ৰমণলৈ যাব । তাত তেওঁ বি এছ এফৰ সীমান্ত চকী পৰিদৰ্শন কৰাৰ উপৰিও অতি স্পৰ্শকাতৰ বুলি বিবেচিত ‘হাৰামীনালা’ অঞ্চলৰ বুজ ল’ব । ইয়াৰ পিছত অহা মাহৰ ০৫ জুনত ত্ৰিপুৰাৰ সীমান্ত অঞ্চল আৰু ১৫ জুনৰ আশে-পাশে পশ্চিম বংগৰ সীমান্তৱৰ্তী অঞ্চলসমূহ পৰিদৰ্শন কৰি নিৰাপত্তা ব্যৱস্থাৰ বুজ ল’ব গৃহমন্ত্ৰী শ্বাহে ।
ভ্ৰমণৰ পূৰ্বে প্ৰস্তুতি সম্পূৰ্ণ-
গৃহমন্ত্ৰীৰ এই হাই-প্ৰফাইল ভ্ৰমণক লৈ সীমান্তৱৰ্তী জিলাসমূহত প্ৰশাসনিক তৎপৰতা তীব্ৰতৰ হৈ পৰিছে । মুখ্য সচিব ভি. শ্ৰীনিবাসৰ অধ্যক্ষতাত যোৱা শনিবাৰে সচিবালয়ত এক বিশেষ প্ৰস্তুতি বৈঠক অনুষ্ঠিত হৈ যায় । এই বৈঠকত জয়ছালমেৰ, বাৰমেৰ, বিকানেৰ, শ্ৰীগংগানগৰ আৰু ফলোডীৰ জিলা উপায়ুক্ত আৰু আৰক্ষী অধীক্ষকসকলে ভিডিঅ’ কনফাৰেন্সিঙৰ জৰিয়তে অংশগ্ৰহণ কৰি নিৰাপত্তা তথা প্ৰশাসনিক দিশসমূহৰ পৰ্যালোচনা কৰে । প্ৰশাসনৰ তৰফৰ পৰা জনোৱা অনুসৰি, গৃহমন্ত্ৰীৰ ভ্ৰমণক লৈ সকলো ধৰণৰ প্ৰস্তুতি ইতিমধ্যে সম্পূৰ্ণ কৰি তোলা হৈছে ।
লগতে পঢ়ক : বংগত অবৈধ অনুপ্ৰৱেশকাৰীৰ বিৰুদ্ধে ডাঙৰ পদক্ষেপ: স্থাপন হ’ব বিশেষ ‘হোল্ডিং চেন্টাৰ’
