আইপিঅ-ৰ জৰিয়তে ৭৫ বিলিয়ন ডলাৰ সংগ্ৰহ এলন মাস্কৰ স্পেচএক্সৰ । লগে লগে এলন মাস্ক আজি বিশ্বৰ প্ৰথমগৰাকী ট্ৰিলিয়নাৰ হিচাপে পৰিগণিত হ’ব ।
বিশ্বৰ অন্যতম শীৰ্ষ ধনী উদ্যোগী এলন মাস্কৰ মহাকাশ গৱেষণা প্ৰতিষ্ঠান ‘স্পেচএক্স’ (SpaceX)-এ আমেৰিকা যুক্তৰাষ্ট্ৰৰ ইতিহাসত আটাইতকৈ ডাঙৰ আইপিঅ’ (IPO) মুকলি কৰি এক নতুন অভিলেখ ৰচনা কৰিছে । অক্সিঅ’চৰ এক প্ৰতিবেদন অনুসৰি, বৃহস্পতিবাৰে কোম্পানীটোৱে ইয়াৰ প্ৰাৰম্ভিক ৰাজহুৱা উপহাৰ বা আইপিঅ’ৰ জৰিয়তে ৭৫ বিলিয়ন ডলাৰ সংগ্ৰহ কৰে । ইয়াৰ লগে লগে স্পেচএক্সৰ মুঠ বজাৰ মূল্যায়ন প্ৰায় ১.৭৭ ট্ৰিলিয়ন ডলাৰ স্পৰ্শ কৰিছে । এই ঐতিহাসিক ব্যৱসায়িক সফলতাৰ ফলত এলন মাস্ক আজি বিশ্বৰ প্ৰথমগৰাকী ‘ট্ৰিলিয়নাৰ’ হিচাপে পৰিগণিত হ’ব ।
আমেৰিকাৰ সপ্তম আটাইতকৈ মূল্যৱান কোম্পানী
চিএনবিচি-এ আমেৰিকাৰ ছিকিউৰিটিজ এণ্ড এক্সচেঞ্জ কমিছনৰ নথিপত্ৰৰ উদ্ধৃতি দি প্ৰকাশ কৰিছে যে, স্পেচএক্সে প্ৰতিটো শ্বেয়াৰ ১৩৫ ডলাৰ দৰত মুঠ ৫৫৫.৬ মিলিয়ন (৫৫.৫৬ কোটি) শ্বেয়াৰ বিক্ৰী কৰিছে । এই বৃহৎ বজাৰ মূলধনৰ সৈতে স্পেচএক্স বৰ্তমান আমেৰিকা যুক্তৰাষ্ট্ৰৰ সপ্তম আটাইতকৈ মূল্যৱান কোম্পানী হৈ পৰিছে । উল্লেখনীয় যে, মূল্যায়ণৰ দৌৰত স্পেচএক্সে মাস্কৰে মালিকানাধীন আন এক প্ৰখ্যাত মটৰ গাড়ী নিৰ্মাতা প্ৰতিষ্ঠান ‘টেছলা’কো পিছ পেলাই থৈছে ।
শুকুৰবাৰে বিশ্বৰ অন্যতম বৃহৎ শ্বেয়াৰ বজাৰ ‘নাচদাক’-ত স্পেচএক্সে আনুষ্ঠানিকভাৱে ব্যৱসায় আৰম্ভ কৰিব । ইয়াৰ পিছতে আইপিঅ’ত অংশ লব নোৱাৰা সাধাৰণ বিনিয়োগকাৰীসকলেও মুকলি বজাৰৰ পৰা কোম্পানীটোৰ শ্বেয়াৰ ক্ৰয় কৰিব পাৰিব । বজাৰ বিশেষজ্ঞসকলৰ মতে, স্পেচএক্সৰ এই সফলতাই ভৱিষ্যতে ৰাজহুৱা বজাৰলৈ আহিবলগীয়া আন দুটা বৃহৎ কৃত্তিম বুদ্ধিমত্তা প্ৰতিষ্ঠান- ‘অ’পেনএআই’ আৰু ‘এনথ্ৰ’পিক’ৰ বাবে এক দিশনিৰ্ণায়ক বা বেলৱেদাৰ হিচাপে কাম কৰিব ।
বিত্তীয় স্থিতি: বৃদ্ধি পাইছে ৰাজহ, কিন্তু লোকচানো অব্যাহত
এছইচি ফাইলঙত স্পেচএক্সে সদৰী কৰা অনুসৰি, চলিত বৰ্ষৰ প্ৰথম ত্ৰৈমাসিকত কোম্পানীটোৰ বিত্তীয় ভেটি যথেষ্ট শক্তিশালী হৈছে । যোৱা বছৰৰ প্ৰথম ত্ৰৈমাসিকৰ ৪.০৭ বিলিয়ন ডলাৰৰ তুলনাত এইবাৰ ৰাজহ ১৫% বৃদ্ধি পাই ৪.৬৯ বিলিয়ন ডলাৰ হৈছে । ২০২৫ বৰ্ষত ৪.৯৪ বিলিয়ন ডলাৰ লোকচান ভৰাৰ পিছত, শেহতীয়া ত্ৰৈমাসিকত কোম্পানীটোৱে ৪.২৮ বিলিয়ন ডলাৰৰ লোকচান পঞ্জীয়ন কৰিছে ।
স্পেচএক্সত মাস্কৰ একছত্ৰী নিয়ন্ত্ৰণ আৰু ভৱিষ্যতৰ লক্ষ্য
নিউয়ৰ্ক টাইমছৰ প্ৰতিবেদন অনুসৰি, স্পেচএক্সত এলন মাস্কৰ ৫০ শতাংশ অংশীদাৰিত্ব বা শ্বেয়াৰ আছে, যাৰ বৰ্তমান মূল্য প্ৰায় ৭৫২ বিলিয়ন ডলাৰতকৈও অধিক । কেৱল সেয়াই নহয়, ‘ছুপাৰ-ভোটিং’ শ্বেয়াৰৰ জৰিয়তে কোম্পানীটোৰ ৮৫ শতাংশতকৈও অধিক ভোটদানৰ ক্ষমতা মাস্কৰ হাতত সুৰক্ষিত আছে । অৱশ্যে চৰকাৰী নিয়ম অনুসৰি, কোম্পানীটোৱে কিছুমান নিৰ্দিষ্ট কাৰ্যক্ষম লক্ষ্যত উপনীত নোহোৱালৈকে মাস্কৰ একাংশ শ্বেয়াৰ বিক্ৰী কৰাৰ ওপৰত নিষেধাজ্ঞা থাকিব ।
মূলধন ক’ত ব্যৱহাৰ হ’ব?
আইপিঅ’ৰ জৰিয়তে সংগৃহীত ৭৫ বিলিয়ন ডলাৰৰ এক বুজন অংশ মহাকাশত কক্ষপথীয় তথ্য কেন্দ্ৰ স্থাপন, চন্দ্ৰত এক বিশেষ কাৰখানা নিৰ্মাণ আৰু ভৱিষ্যতৰ অভিলাষী মংগল গ্ৰহৰ অভিযানৰ পুঁজি হিচাপে ব্যৱহাৰ কৰা হ’ব ।
লগতে পঢ়ক : পশ্চিম এচিয়াৰ সংঘাতৰ আশংকাৰ মাজতো ভাৰতৰ অৰ্থনীতিৰ বাবে আশাব্যঞ্জক খবৰ
