মহাকাশচাৰীৰ চন্দ্ৰ প্ৰদক্ষিণৰ পৰা আৰম্ভ কৰি ব্যক্তিগত মহাকাশ ষ্টেচনলৈ… কেইবাটাও বৃহৎ মহাকাশ অভিযানৰ সাক্ষী হ’ব ২০২৬
নাছা, স্পেচএক্স, ব্লু অৰিজিন, চীন, ইউৰোপীয় মহাকাশ সংস্থাৰ দৰে সংস্থাই কেইবাটাও ডাঙৰ অভিযানৰ বাবে সাজু হৈছে । এই অভিযানসমূহে আমাক মহাকাশ ক্ষেত্ৰত আগুৱাই নিয়াত সহায় কৰিব ।
২০২৬ বৰ্ষটো মহাকাশ বিজ্ঞান আৰু অন্বেষণৰ ক্ষেত্ৰত এক গুৰুত্বপূৰ্ণ বছৰ হ’ব । এই বৰ্ষটোত নাছা, স্পেচএক্স, ব্লু অৰিজিন, চীন, ইউৰোপীয় মহাকাশ সংস্থা, ইছৰোৰ দৰে সংস্থাই কেইবাটাও ডাঙৰ অভিযান আৰম্ভ কৰাৰ বাবে সাজু হৈছে । ইয়াৰ ভিতৰত চন্দ্ৰৰ চাৰিওফালে মহাকাশচাৰী প্ৰদক্ষিণ কৰা, গ্ৰহাণুৰ পৰা নমুনা সংগ্ৰহ কৰা, বুধ গ্ৰহক প্ৰদক্ষিণ কৰা, শক্তিশালী নতুন মহাকাশ দূৰবীণ উৎক্ষেপণ কৰা আদি অন্যতম । এই অভিযানসমূহে আমাক সৌৰজগতৰ গভীৰতা বুজিবলৈ, বিশ্বব্ৰহ্মাণ্ডৰ ৰহস্যসমূহ উন্মোচন কৰাত আৰু মানুহক মহাকাশলৈ আগুৱাই নিয়াত সহায় কৰিব ।
আৰ্টেমিছ ২: চন্দ্ৰৰ চাৰিওফালে প্ৰদক্ষিণ কৰিব মহাকাশচাৰীয়ে
নাছাৰ আৰ্টেমিছ ২ অভিযান ২০২৬ চনৰ ফেব্ৰুৱাৰী মাহত উৎক্ষেপণ হোৱাৰ সম্ভাৱনা আছে । চাৰিজন মহাকাশচাৰী – ৰিড ৱাইজমেন, ভিক্টৰ গ্লভাৰ, ক্ৰীষ্টিনা কোচ আৰু জেৰেমি হেনচেনে অৰিয়ান মহাকাশযানত উঠি চন্দ্ৰক প্ৰদক্ষিণ কৰি উভতি আহিব । ১৯৭২ চনত এপ’ল’ ১৭ৰ পিছত পৃথিৱীৰ নিম্ন কক্ষপথৰ পৰা যাত্ৰা কৰা এইটোৱেই হ’ব প্ৰথমটো ক্ৰুযুক্ত অভিযান । এই অভিযানত ভৱিষ্যতে চন্দ্ৰত অৱতৰণৰ বাবে প্ৰয়োজনীয় ব্যৱস্থা পৰীক্ষা কৰা হ’ব ।
স্পেচএক্সৰ ষ্টাৰশ্বিপ: অৰবিটাল ফ্লাইট আৰু ৰিফিউলিঙৰ পৰীক্ষণ
স্পেচএক্সৰ ষ্টাৰশ্বিপ মেগা-ৰকেটে ২০২৬ চনত প্ৰথমবাৰৰ বাবে পৃথিৱীৰ কক্ষপথত উপনীত হ’ব পাৰে । কোম্পানীটোৱে কক্ষপথৰ ভিতৰত প্ৰপেলেণ্ট ট্ৰেন্সফাৰ (ৰিফিউলিং) প্ৰদৰ্শন কৰিব বিচাৰিছে, যিটো চন্দ্ৰ আৰু মংগল গ্ৰহ অভিযানৰ বাবে অতি গুৰুত্বপূৰ্ণ । ইলন মাস্কে মংগল গ্ৰহত উৎক্ষেপণৰ সম্ভাৱনা উত্থাপন কৰিছে যদিও প্ৰধান লক্ষ্য হৈছে অৰবিটাল অপাৰেশ্যন আৰু পুনৰ ব্যৱহাৰযোগ্যতা ।
ব্লু অৰিজিনৰ ব্লু মুন এম কে ১ লুনাৰ লেণ্ডাৰ-
ব্লু অৰিজিনৰ ৰবটিক লুনাৰ লেণ্ডাৰ এম কে ১, ২০২৬ চনৰ আৰম্ভণিতে চন্দ্ৰৰ দক্ষিণ মেৰুত অৱতৰণ কৰিব । নিউ গ্লেন ৰকেটত উৎক্ষেপণ কৰা এই বৃহৎ কাৰ্গো লেণ্ডাৰে চন্দ্ৰলৈ গধুৰ সামগ্ৰী প্ৰেৰণ কৰিব আৰু নিখুঁত অৱতৰণ প্ৰযুক্তি পৰীক্ষা কৰিব ।
বয়িঙৰ ষ্টাৰলাইনাৰ-১ অভিযান-
বয়িঙৰ ষ্টাৰলাইনাৰ মহাকাশযানখনে ২০২৬ চনৰ এপ্ৰিল মাহত আন্তঃৰাষ্ট্ৰীয় মহাকাশ কেন্দ্ৰ (আই এছ এছ)লৈ মানৱবিহীন অভিযান আৰম্ভ কৰিব।ইয়াত কাৰ্গো আৰু পৰীক্ষা ব্যৱস্থা উন্নীতকৰণ কঢ়িয়াই নিব।
ভাষ্টৰ হেভেন-১: প্ৰথম ব্যক্তিগত মহাকাশ ষ্টেচন
কেলিফৰ্ণিয়াস্থিত কোম্পানী ভাষ্টে ২০২৬ চনৰ মে’ মাহত হেভেন-১ নামেৰ প্ৰথমটো ব্যক্তিগত মহাকাশ কেন্দ্ৰ উৎক্ষেপণ কৰিব । স্পেচএক্স ফেলকন ৯ত উৎক্ষেপণ হ’ব লগা কেন্দ্ৰটোৱে ক্ষুদ্ৰ ক্ৰু অভিযানৰ পৃষ্ঠপোষকতা কৰিব ।
চীনৰ টিয়ানৱেন-২: গ্ৰহাণুৰ নমুনা সংগ্ৰহ
চীনৰ টিয়ানৱেন-২ অভিযান ২০২৬ চনৰ জুলাই মাহত পৃথিৱীৰ ওচৰৰ কামোলেভা নামৰ গ্ৰহাণু এটাত উপস্থিত হ’ব । এই অভিযানে গ্ৰহাণুটোৰ নমুনা সংগ্ৰহ কৰি ২০২৭ চনত পৃথিৱীলৈ উভতি আহিব ।
ৰকেট লেবৰ নিউট্ৰন ৰকেট-
২০২৬ চনৰ মাজভাগত ৰকেট লেবে নিজৰ নতুন নিউট্ৰন ৰকেট উৎক্ষেপণ কৰিব । ই আংশিকভাৱে পুনৰ ব্যৱহাৰযোগ্য হ’ব আৰু বৃহৎ উপগ্ৰহ কক্ষপথলৈ কঢ়িয়াই নিব ।
চীনৰ চাং’ই-৭: চন্দ্ৰৰ দক্ষিণ মেৰু অন্বেষণ
চীনৰ চাং’ই-৭ অভিযানে ২০২৬ চনৰ মাজভাগৰ পৰা শেষৰ ফালে চন্দ্ৰৰ দক্ষিণ মেৰুলৈ লেণ্ডাৰ, ৰভাৰ আৰু হপিং প্ৰ’ব প্ৰেৰণ কৰিব । এই অভিযানে পানী আৰু বৰফৰ সন্ধান কৰিব ।
বেপিকলম্বো: বুধৰ কক্ষপথ
ই এছ এ আৰু জে এক্স এৰ বেপিকলম্বোৱে ২০২৬ চনৰ নৱেম্বৰ মাহত বুধ গ্ৰহৰ কক্ষপথত প্ৰৱেশ কৰিব । দুখন অৰ্বিটাৰে বুধ গ্ৰহৰ পৃষ্ঠ, আভ্যন্তৰীণ গঠন আৰু চুম্বকীয় ক্ষেত্ৰ অধ্যয়ন কৰিব ।
ড্ৰিম চেজাৰ: প্ৰথম কক্ষপথৰ উৰণ
ছিয়েৰা স্পেচৰ ড্ৰিম চেজাৰ মহাকাশযানে ২০২৬ চনৰ শেষৰ ফালে প্ৰথমবাৰৰ বাবে উৰিব । এইখন পুনৰ ব্যৱহাৰযোগ্য হ’ব আৰু কাৰ্গো লৈ ৰাণৱেত অৱতৰণ কৰিব ।
নাছাৰ নেন্সি গ্ৰেচ ৰোমান মহাকাশ টেলিস্কোপ-
নাছাৰ ৰোমান টেলিস্কোপ ২০২৬ত উৎক্ষেপণ কৰাৰ সম্ভাৱনা আছে । ইয়াৰ যোগেদি ডাৰ্ক এনাৰ্জি, ডাৰ্ক মেটাৰ আৰু এক্স’প্লেনেটৰ ওপৰত অধ্যয়ন কৰা হ’ব ।
লগতে পঢ়ক : গগণযানৰ পৰা ব্যক্তিগত ৰকেট উৎক্ষেপণলৈকে… মহাকাশত আধিপত্য বিস্তাৰ কৰিব ভাৰতে