শ্বাহে কয়, মই নিশ্চিত যে এখন বা দুখন ৰাজ্যক বাদ দি অহা বছৰ আমি সমগ্ৰ উত্তৰ-পূবৰ পৰা AFSPA প্ৰত্যাহাৰ কৰিম
অহা বছৰৰ ভিতৰত সমগ্ৰ উত্তৰ-পূৰ্বাঞ্চলৰ প্ৰায় সকলো অংশৰ পৰাই সশস্ত্ৰ বাহিনী (বিশেষ ক্ষমতা) আইন চমুকৈ ‘আফস্পা’ (AFSPA) প্ৰত্যাহাৰ কৰাৰ সম্ভাৱনা আছে । ১১ জুনত এই গুৰুত্বপূৰ্ণ ঘোষণা কৰে কেন্দ্ৰীয় গৃহমন্ত্ৰী অমিত শ্বাহে । অঞ্চলটোত আফস্পাৰ অধীনত থকা এলেকা ক্ৰমান্বয়ে হ্ৰাস পোৱাটো শান্তি আৰু সুস্থিৰতা বৃদ্ধিৰ এক ডাঙৰ সূচক বুলি তেওঁ বৰ্ণনা কৰে ।
অসম আৰু নাগালেণ্ড চৰকাৰ আৰু কেন্দ্ৰীয় চৰকাৰৰ মাজত বিবাদমান সীমান্ত অঞ্চলত খনিজ তেল অন্বেষণৰ বাবে এক ত্ৰিপাক্ষিক বুজাবুজিৰ চুক্তি (MoU) স্বাক্ষৰিত হোৱাৰ পিছত এক অনুষ্ঠানত গৃহমন্ত্ৰীগৰাকীয়ে এই মন্তব্য কৰে । তেওঁ আস্থা প্ৰকাশ কৰি কয় যে সমগ্ৰ উত্তৰ-পূৰ্বাঞ্চলৰ মাত্ৰ “এখন বা দুখন ৰাজ্যত”হে অনাগত দিনত AFSPA বলবৎ হৈ থাকিব পাৰে ।
শ্বাহে কয়, “মই নিশ্চিত যে এখন বা দুখন ৰাজ্যক বাদ দি অহা বছৰ আমি সমগ্ৰ উত্তৰ-পূৰ্বাঞ্চলৰ পৰা AFSPA প্ৰত্যাহাৰ কৰিম ।”
তিনি দশকৰ অন্তত স্থবিৰতাৰ অন্ত :
এই ত্ৰিপাক্ষিক চুক্তিয়ে অসম-নাগালেণ্ড সীমান্তৰ বিবাদমান এলেকা বেল্টত (DAB) তেল আৰু খনিজ অন্বেষণৰ কাৰ্যসূচী দীৰ্ঘদিনৰ মূৰত পুনৰ আৰম্ভ কৰিব । উল্লেখ্য যে ক্ষেত্ৰাধিকাৰ সম্পৰ্কীয় বিবাদ আৰু নিৰাপত্তাজনিত উদ্বেগৰ বাবে বিগত তিনিটা দশকতকৈও অধিক সময় ধৰি এই অঞ্চলটোত সকলো ধৰণৰ কাম-কাজ স্থবিৰ হৈ আছিল ।
এই বুজাবুজিৰ চুক্তিক এক “ঐতিহাসিক মুহূৰ্ত” বুলি অভিহিত কৰি অমিত শ্বাহে কয় যে এই চুক্তিয়ে প্ৰধানমন্ত্ৰী নৰেন্দ্ৰ মোদীৰ “উন্নত উত্তৰ-পূৰ্বাঞ্চল”ৰ সপোনৰ ক্ষেত্ৰত থকা এক ডাঙৰ হেঙাৰ দূৰ কৰিলে। তেওঁ লগতে কয় :
“উত্তৰ-পূৰ্বাঞ্চলত তেল, প্ৰাকৃতিক গেছ আৰু খনিজ পদাৰ্থৰ বুজন পৰিমাণৰ ভাণ্ডাৰ আছে । কিন্তু দীৰ্ঘদিনীয়া আইন-শৃংখলাজনিত প্ৰত্যাহ্বানৰ বাবে এইবোৰ বৃহৎ পৰিমাণে অব্যৱহৃত হৈ আছিল । এই চুক্তিয়ে খনিজ অন্বেষণৰ এক নতুন পথ মুকলি কৰিব ।”
উন্নয়নৰ মূল চাবিকাঠী : ‘সমবায় যুক্তৰাষ্ট্ৰবাদ’
গৃহমন্ত্ৰী শ্বাহে এই চুক্তিক উত্তৰ-পূৰ্বাঞ্চলৰ সামগ্ৰিক শান্তি প্ৰক্ৰিয়াৰ এক অংশ বুলি উল্লেখ কৰে । তেওঁ জনায় যে ২০১৯ চনৰ পৰা এতিয়ালৈকে বিভিন্ন সশস্ত্ৰ গোট আৰু ৰাজ্য চৰকাৰসমূহৰ মাজত ১২খনকৈ গুৰুত্বপূৰ্ণ শান্তি চুক্তি স্বাক্ষৰিত হৈছে । যাৰ ফলত অঞ্চলটোত হিংসাত্মক ঘটনাৰ মাত্ৰা প্ৰায় ৮০ শতাংশ হ্ৰাস পাইছে ।
প্ৰধানমন্ত্ৰী মোদীৰ প্ৰশংসা কৰি তেওঁ কয় যে কেন্দ্ৰীয় চৰকাৰৰ ধাৰাবাহিক গুৰুত্বৰ বাবেই আজিয়েই ঐতিহাসিক দিনটো সম্ভৱ হৈ উঠিছে । পূৰ্বে কোনো সহমতত উপনীত হ’ব নোৱাৰাৰ বাবে অসম আৰু নাগালেণ্ড দুয়োখন ৰাজ্যৰে উন্নয়ন ব্যাহত হৈ আছিল । আজিয়ে মুকলি হোৱা এই পথ দুয়োখন ৰাজ্যৰ বাবে সমৃদ্ধিৰ দুৱাৰস্বৰূপ হ’ব আৰু ই ভাৰতৰ ‘সমবায় যুক্তৰাষ্ট্ৰবাদ’ (Cooperative Federalism)-ৰ এক উৎকৃষ্ট উদাহৰণ হৈ ৰ’ব ।
লগতে পঢ়ক : অসম-নাগালেণ্ড সীমা বিবাদৰ ঐতিহাসিক সমাধান; স্বাক্ষৰিত হ’ল বুজাবুজি চুক্তি
