অসম বিধানসভা নিৰ্বাচনৰ ভোটদানে এক অভিলেখ সৃষ্টি কৰিছে । অসমে ৮৫.৩৮% ভোটদানৰ হাৰৰ সৈতে সৰ্বকালৰ সৰ্বাধিক ভোটগ্ৰহণৰ অভিলেখ ভংগ কৰিছে ।

বৃহস্পতিবাৰে অনুষ্ঠিত হৈ যোৱা অসম বিধানসভা নিৰ্বাচনত সৰ্বকালৰ সৰ্বাধিক ভোটদানৰ হাৰ ৰেকৰ্ড হোৱাৰ লগে লগে মুখ্যমন্ত্রী ড০ হিমন্ত বিশ্ব শৰ্মাই কয় যে “অবৈধ অনুপ্ৰৱেশ আৰু জনগাঁথনিগত আক্ৰমণৰ পৰা আমাৰ ভূমি, আমাৰ পৰিচয় আৰু আমাৰ সংস্কৃতিক সুৰক্ষিত কৰাৰ” এক স্পষ্ট সংকল্পৰে জনসাধাৰণে ভোটদান কৰিছে । তেওঁ কয় যে এয়া কেৱল এটা নিৰ্বাচনেই নহয়, বৰঞ্চ এয়া “অসমৰ ইতিহাসত এক টাৰ্নিং পইণ্ট বা ঐতিহাসিক ক্ষণ”।

মুখ্যমন্ত্ৰীগৰাকীয়ে কয়- “আমি যি কৰিবলৈ ওলাইছিলোঁ সেয়া কেৱল এটা নিৰ্বাচনত যুঁজ দিয়াটোৱেই নাছিল, বৰঞ্চ ইয়াক এক আন্দোলনলৈ ৰূপান্তৰিত কৰাটোহে আছিল—আমাৰ সভ্যতাৰ মূল্যবোধ, আমাৰ সংস্কৃতি আৰু আমাৰ ভূমি ৰক্ষা কৰাৰ এক আন্দোলন । আজি প্ৰথমবাৰৰ বাবে আমাৰ ৰাইজ অভূতপূৰ্ব সংখ্যাত ওলাই আহিছে—কান্ধত কান্ধ মিলাই ভোটদান কৰি আমাৰ বিৰোধীৰ ভোটদানৰ হাৰৰ সৈতে সমানে যুঁজ দিছে আৰু আনকি অতিক্ৰমিও গৈছে । বহু ভোটকেন্দ্ৰত ভোটদানৰ হাৰ ৯৫% অতিক্ৰম কৰিছে । এয়া সাধাৰণ নহয় । এয়া ঐতিহাসিক ।”

তেওঁ লগতে কয়- “অসম ভাষা আৰু জাতিৰ ঊৰ্ধ্বত উঠিছে । আমাৰ জনসাধাৰণে এক স্পষ্ট সংকল্পৰে ভোটদান কৰিছে—অবৈধ অনুপ্ৰৱেশ আৰু জনগাঁথনিগত আক্ৰমণৰ পৰা আমাৰ ভূমি, আমাৰ পৰিচয় আৰু আমাৰ সংস্কৃতিক সুৰক্ষা দিবলৈ । এয়া কেৱল এটা নিৰ্বাচন নহয় । এয়া অসমৰ ইতিহাসৰ এক ঐতিহাসিক ক্ষণ ।”

মুখ্যমন্ত্ৰী ড০ শৰ্মাই কয় যে এই নিৰ্বাচনৰ ফলাফল ইতিমধ্যে “আমাৰ জনসাধাৰণৰ মুখৰ আশা, গৌৰৱ আৰু আনন্দত” দৃশ্যমান হৈছে । আৰু বাৰ্তাটো অতি স্পষ্ট: অসমে কেতিয়াও আত্মসমৰ্পণ নকৰে । অসমে যুঁজ দিব । অসম জীয়াই থাকিব ।”  

উল্লেখ্য যে, বৃহস্পতিবাৰে অনুষ্ঠিত হোৱা অসম বিধানসভা নিৰ্বাচনৰ ভোটদানে এক অভিলেখ সৃষ্টি কৰিছে । অসমে ৮৫.৩৮% ভোটদানৰ হাৰৰ সৈতে সৰ্বকালৰ সৰ্বাধিক ভোটগ্ৰহণৰ অভিলেখ ভংগ কৰিছে ।

লগতে পঢ়ক : বিধানসভা নিৰ্বাচনত অভিলেখ সংখ্যক ভোটদান : অসমত ৮৫.৩৮% আৰু পুডুচেৰীত ৮৯.৮৩%ৰে ভংগ হ’ল সৰ্বকালৰ অভিলেখ

পাতালৰ পৰা হ’লেও অসম আৰক্ষীয়ে পৱন খেড়াক বিচাৰি উলিয়াব । এই মন্তব্য মুখ্যমন্ত্ৰী ড০ হিমন্ত বিশ্ব শৰ্মাৰ ।

পাতালত লুকাই থাকিলেও ৰক্ষা নাপাব পৱন খেড়াই । পাতালৰ পৰা হ’লেও অসম আৰক্ষীয়ে পৱন খেড়াক বিচাৰি উলিয়াব । এই মন্তব্য মুখ্যমন্ত্ৰী ড০ হিমন্ত বিশ্ব শৰ্মাৰ । মঙলবাৰে সংবাদ মাধ্যমৰ এক প্ৰশ্নত পৱন খেড়া সন্দৰ্ভত মুখ্যমন্ত্ৰীগৰাকীয়ে এই মন্তব্য কৰে ।

সত্য নজনাকৈ কিয় এই অভিযোগ উত্থাপন কৰিবা লাগে বুলি প্ৰশ্ন কৰি মুখ্যমন্ত্ৰী ড০ শৰ্মাই কয় যে, অসম লাচিত বৰফুকনৰ দেশ । কোন এই পৱন খেড়া । তেওঁ উষ্মাৰে কয় যে, পাতালত লুকালেও পৱন খেড়াই ৰক্ষা নাপাব । অসম আৰক্ষীক চিনিব পৰা নাই । পাতালৰ পৰা হ’লেও খেড়াক বিচাৰি উলিয়াব অসম আৰক্ষীয়ে ।

মুখ্যমন্ত্ৰীগৰাকীয়ে এই ষড়যন্ত্ৰৰ আঁৰত ৰাহুল গান্ধী জড়িত হৈ আছে বুলি অভিযোগ কৰে । সেয়েহে তেওঁ এই গোচৰে ৰাহুল গান্ধীলৈকে সাঙুৰি লব বুলি মন্তব্য কৰে । মুখ্যমন্ত্ৰীগৰাকীয়ে কয়-“মোক ভয় খুৱাবলৈ চেষ্টা নকৰিব । এইখন অসম হয় । আমি ১৭ বাৰকৈ মুছলমান আগ্ৰাসনৰ বিৰুদ্ধে যুঁজ দিছিলো । আমি বেলেগ এখন পৃথিৱীৰ পৰা অহা । খাৰ্গেক আমি কোনো কেয়াৰ নকৰোঁ ।“

ইয়াৰ পূৰ্বে শিৱসাগৰত নিৰ্বাচনী প্ৰচাৰ চলাই সাংবাদিকৰ আগত মুখ্যমন্ত্ৰী ড০ হিমন্ত বিশ্ব শৰ্মাই কয় যে চলি থকা পাছপোৰ্ট বিতৰ্কৰ মাজতে ৰাষ্ট্ৰীয় ৰাজধানীত থকা তেওঁৰ বাসগৃহত অসম আৰক্ষীয়ে তালাচী চলোৱাৰ পিছতে কংগ্ৰেছ নেতা পৱন খেড়া নতুন দিল্লীৰ পৰা হাইদৰাবাদলৈ পলাই গৈছে । মুখ্যমন্ত্ৰীয়ে কয় যে, সংবাদ মাধ্যমৰ জৰিয়তেহে তেওঁ এই ঘটনাৰ বিষয়ে জানিব পাৰিছে আৰু লগতে কয় যে এই ক্ষেত্ৰত আইনে নিজৰ গতিৰে কাম কৰিব ।

মুখ্যমন্ত্ৰী ড০ শৰ্মাই কয়, “তেওঁ কালি গুৱাহাটীৰ পৰা পলাই গৈছিল । মই সংবাদ মাধ্যমৰ জৰিয়তে জানিব পাৰিছো যে আৰক্ষী দিল্লীত থকা তেওঁৰ বাসগৃহলৈ গৈছিল, কিন্তু তেওঁ হায়দৰাবাদলৈ পলাই গৈছে । আইনে নিজৰ কাম কৰিব ।”

উল্লেখ্য যে, মুখ্যমন্ত্ৰী হিমন্ত বিশ্ব শৰ্মাৰ পত্নীৰ হাতত তিনিখনকৈ পাছপোৰ্ট থকা বুলি কংগ্ৰেছে কৰা দাবীৰ মাজতে, দিল্লীত কংগ্ৰেছ নেতা পৱন খেড়াৰ বাসগৃহত অসম আৰক্ষীয়ে তালাচী চলায় । সোমবাৰে মুখ্যমন্ত্ৰী ড০ শৰ্মাৰ পত্নী ৰিণিকি ভূঞা শৰ্মাই এই সন্দৰ্ভত দাখিল কৰা এজাহাৰৰ ভিত্তিত এই তালাচী চলাই আৰক্ষীয়ে ।

ইয়াৰ পূৰ্বে সোমবাৰে গুৱাহাটীত এক সংবাদমেল সম্বোধন কৰি মুখ্যমন্ত্ৰী হিমন্ত বিশ্ব শৰ্মাই পৱন খেড়াৰ বিৰুদ্ধে “কঠোৰ ব্যৱস্থা” গ্ৰহণ কৰাৰ হুংকাৰ দিছিল । ড০ শৰ্মাই কৈছিল, “মই কংগ্ৰেছ নেতা পৱন খেৰাৰ বিৰুদ্ধে কঠোৰ ব্যৱস্থা গ্ৰহণ কৰিম । মাত্ৰ কেইদিনমান অপেক্ষা কৰক । নিৰ্বাচনত আমি অন্ততঃ ১০০ খন আসনত জয়লাভ কৰিম ।”

লগতে পঢ়ক : গ্ৰেপ্তাৰৰ আশংকাত দিল্লীৰ পৰা পলায়ন কংগ্ৰেছ নেতা পৱন খেড়াৰ

গ্ৰেপ্তাৰৰ আশংকাত দিল্লীৰ পৰা পলায়ন কৰিছে কংগ্ৰেছ নেতা পৱন খেড়াই

যিকোনো মুহুৰ্ততে গ্ৰেপ্তাৰ হ’ব পাৰে কংগ্ৰেছ নেতা পৱন খেড়া । ইতিমধ্যে অসম আৰক্ষীৰ এটা দল ৭ এপ্ৰিলত দিল্লীস্থিত পৱন খেড়াৰ বাসগৃহত উপস্থিত হয় । মুখ্যমন্ত্ৰী ড০ হিমন্ত বিশ্ব শৰ্মাৰ পত্নীৰ বিৰুদ্ধে অনা অভিযোগৰ সৈতে জড়িত এটা গোচৰ সন্দৰ্ভত আৰক্ষীৰ দলটো পুৱাই খেড়াৰ বাসগৃহত উপস্থিত হয় ।

জানিব পৰা মতে অসম আৰক্ষীৰ দলটোৱে ৰাষ্ট্ৰীয় ৰাজধানীত উপস্থিত হৈছে আৰু দিল্লী আৰক্ষীয়ে তেওঁলোকক সহযোগিতা আগবঢ়াইছে । নিয়ম অনুসৰি, অভিযান চলোৱাৰ পূৰ্বে স্থানীয় আৰক্ষীক এই বিষয়ে অৱগত কৰা হৈছিল ।

ইফালে শেহতীয়া বাতৰি অনুসৰি গ্ৰেপ্তাৰৰ আশংকাত দিল্লীৰ পৰা পলায়ন কৰিছে কংগ্ৰেছ নেতা পৱন খেড়াই । গ্ৰেপ্তাৰৰ ভয়ত খেড়াই দিল্লীৰ পৰা হায়দৰাবাদলৈ পলায়ন কৰা বুলি জানিব পৰা গৈছে ।

উল্লেখ্য যে, মুখ্যমন্ত্ৰীৰ পত্নী ৰিণিকি ভূঞা শৰ্মাই যোৱা ৬ এপ্ৰিলত কংগ্ৰেছ নেতাজনৰ বিৰুদ্ধে দাখিল কৰা এক এজাহাৰৰ ভিত্তিত এই তদন্ত আৰম্ভ হৈছে । মুখ্যমন্ত্ৰীৰ পত্নীৰ বিৰুদ্ধে একাধিক বিদেশী পাছপ’ৰ্ট লগতে বিদেশত সম্পত্তি থকাৰ মিছা অভিযোগ উত্থাপন কৰিছিল পৱন খেড়াই । কংগ্ৰেছ নেতাগৰাকীয়ে উত্থাপন কৰা এই অভিযোগ মিছা প্ৰমাণিত হোৱাৰ পিছতে এতিয়া পৱন খেড়াই গ্ৰেপ্তাৰৰ ভয়ত পলায়ন কৰিছে বুলি জানিব পৰা গৈছে ।  

কংগ্ৰেছ নেতাগৰাকীয়ে উত্থাপন কৰা এই অভিযোগসমূহ প্ৰত্যাখ্যান কৰি ৰিণিকি ভূঞা শৰ্মাই ইয়াক “ভিত্তিহীন” বুলি অভিহিত কৰে আৰু বিৰোধীয়ে তেওঁক বদনাম কৰিবলৈ “AI-ৰ দ্বাৰা নিৰ্মিত ভুৱা নথিপত্ৰ” প্ৰচাৰ কৰা বুলি অভিযোগ কৰে । মুখ্যমন্ত্ৰী ড০ শৰ্মাইও এই অভিযোগসমূহক “মিছা আৰু ৰাজনৈতিক উদ্দেশ্যপ্ৰণোদিত” বুলি অভিহিত কৰিছে ।

লগতে পঢ়ক : বটদ্ৰৱালৈ আহি গীতা চুই শপত খাবলৈ গৌৰৱ গগৈক প্ৰত্যাহ্বান মুখ্যমন্ত্ৰীৰ

কংগ্ৰেছক তীব্ৰ সমালোচনা কৰি ফেচবুক লাইভত গৌৰৱ গগৈৰ প্ৰত্যাহ্বান গ্ৰহণ কৰি বটদ্ৰৱালৈ আমন্ত্ৰণ জনালে মুখ্যমন্ত্ৰীয়ে

কংগ্ৰেছ নেতা গৌৰৱ গগৈৰ প্ৰত্যাহ্বান গ্ৰহণ মুখ্যমন্ত্ৰী ড০ হিমন্ত বিশ্ব শৰ্মাৰ । কংগ্ৰেছক তীব্ৰ সমালোচনা কৰি ফেচবুক লাইভত গৌৰৱ গগৈৰ প্ৰত্যাহ্বান গ্ৰহণ কৰি বটদ্ৰৱালৈ আমন্ত্ৰণ জনালে মুখ্যমন্ত্ৰীয়ে । লগতে গৌৰৱ গগৈক বটদ্ৰৱা থানত উপস্থিত হৈ শপত ল’বলৈ মুখ্যমন্ত্ৰীগৰাকীয়ে মুকলি প্ৰত্যাহ্বান জনায় ।

ফেচবুক লাইভৰ জৰিয়তে মুখ্যমন্ত্ৰী ড০ শৰ্মাই কয় যে তেওঁ নিজৰ সম্পত্তি, পৰিয়ালৰ সৈতে জড়িত যিকোনো বিদেশী সম্পত্তি, বেংক একাউণ্ট আৰু পাছপ’ৰ্ট সন্দৰ্ভত গীতাত হাত থৈ শপত ল’বলৈ গৌৰৱ গগৈয়ে জনোৱা প্ৰত্যাহ্বান গ্ৰহণ কৰিছে । লগতে তেওঁ দুয়োগৰাকী নেতাই বুধবাৰে পুৱা ৯ বজাত ৰাজহুৱা শপত গ্ৰহণৰ বাবে বটদ্ৰৱা থানত উপস্থিত হোৱাৰ প্ৰস্তাৱ দিয়ে ।

ইফালে মুখ্যমন্ত্ৰীগৰাকীয়ে গৌৰৱ গগৈ আৰু তেওঁৰ পত্নীৰ নামতো বিদেশত সম্পত্তি নাই বুলি শপত খোৱাৰ প্ৰত্যাহ্বান জনালে মুখ্যমন্ত্ৰী ড০ হিমন্ত বিশ্ব শৰ্মাই । গৌৰৱ গগৈৰ পত্নীৰ বিৰুদ্ধে উত্থাপিত ইংলেণ্ডৰ বিদেশী বেংক একাউণ্ট আৰু সম্পত্তিৰ সবিশেষ ৰাজহুৱা কৰিবলৈ কয় । ইয়াৰ উপৰিও মুখ্যমন্ত্ৰী ড০ শৰ্মাই গৌৰৱ গগৈৰ পাকিস্তান ভ্ৰমণৰ খবৰক লৈও প্ৰশ্ন উত্থাপন কৰি বিশেষকৈ ৰাৱালপিণ্ডিত থকা আৰু সাতদিনীয়া ভ্ৰমণৰ সময়ত তেওঁৰ কাম-কাজৰ বিষয়ে ৰাজহুৱা কৰিবলৈ কয় ।

ফেচবুক লাইভত মুখ্যমন্ত্ৰী ড০ হিমন্ত বিশ্ব শৰ্মাই কয়- “এইবাৰ কংগ্ৰেছে সীমা চেৰাই গ’ল । যোৱা দুদিন ধৰি বিভিন্ন পাছপোৰ্ট, ভিছা, সম্পত্তি, ফটোষ্টেট, এআই আদিৰে সীমা চেৰাই গ’ল । এতিয়া কোনো কথাকে প্ৰমাণ কৰিব নোৱাৰি কোনো সাৰসুৰ নোহোৱাকৈ গাঁতৰ ভিতৰত সোমাবলৈ বাধ্য হ’ল ।“

কংগ্ৰেছ নেতা গৌৰৱ গগৈয়ে মুখ্যমন্ত্ৰী আৰু তেওঁৰ পত্নীৰ বিদেশত কোনো সম্পত্তি নাই বুলি গীতাত ধৰি শপত খাবলৈ জনোৱা প্ৰত্যাহ্বানো গ্ৰহণ কৰে হিমন্ত বিশ্ব শৰ্মাই । তেওঁ গৌৰৱ গগৈৰ এই প্ৰত্যাহ্বান স্বীকাৰ কৰা বুলি উল্লেখ কৰি ৮ এপ্ৰিল, বুধবাৰে পুৱা ৯ বজাত বটদ্ৰৱা থানত উপস্থিত হোৱাৰ প্ৰস্তাৱ দিয়ে ।

গৌৰৱ গগৈক প্ৰত্যাহ্বান জনাই মুখ্যমন্ত্ৰীয়ে কয়-“মই ভাগৱত গীতাত হাত থৈ, গীতা মূৰত লৈ মোৰ শপত বাক্য পাঠ কৰিম আৰু মই মোৰ, পত্নীৰ, মোৰ পৰিয়ালৰ যিমান বেংক একাউন্ট আছে, পাছপোৰ্ট আছে সকলোবোৰ দাঙি ধৰিম । মোৰ মাত্ৰ এটাই অনুৰোধ একেটা কাম কৰিবলৈ আপুনি প্ৰস্তুত আছে নে নাই । আপোনাৰ পত্নীৰ পাকিস্তাৰ বেংক একাউন্ট, ইংলেণ্ডৰ সম্পত্তি এই সকলোবোৰ আপুনিও দেখুৱাব লাগিব আৰু ভাগৱত গীতাত হাত থৈ আপুনিও শপত ল’ব লাগিব যে, পাকিস্তানত থকা সময়োছোৱাত আপুনি কাৰ কাৰ আতিথ্য লৈছিল । লগতে কি ধৰণে পাকিস্তানত ৭ দিন অতিবাহিত কৰিছিল আৰু ৰাৱালপিণ্ডিলৈ কিয় গৈছিল ।“

আনহাতে বটদ্ৰৱা থানৰ সলনি গুৱাহাটীৰ কোনো স্থানো যদি গৌৰৱ গগৈয়ে নিৰ্ধাৰণ কৰে তাৰ বাবেও মুখ্যমন্ত্ৰী প্ৰস্তুত আছে বুলি উল্লেখ কৰে ।

লগতে পঢ়ক : আজি সমাপ্ত হ’ব নিৰ্বাচনী প্ৰচাৰ, বিয়লি ৫ বজাৰ পৰা ৪৮ ঘণ্টীয়া ‘চাইলেন্ট পিৰিয়ড’

লগতে মুখ্যমন্ত্ৰীগৰাকীয়ে এই সন্দৰ্ভত জ্যেষ্ঠ কংগ্ৰেছ নেতা পৱন খেৰাৰ বিৰুদ্ধে আইনী ব্যৱস্থা গ্ৰহণ কৰিব বুলিও উল্লেখ কৰিছে

পত্নী ৰিণিকি ভূঞা শৰ্মাৰ বিৰুদ্ধে ৩খন দেশৰ পাছপৰ্ট ৰখা বুলি কংগ্ৰেছে অনা অভিযোগ খণ্ডন মুখ্যমন্ত্ৰী ড০ হিমন্ত বিশ্ব শৰ্মাৰ । লগতে মুখ্যমন্ত্ৰীগৰাকীয়ে এই সন্দৰ্ভত জ্যেষ্ঠ কংগ্ৰেছ নেতা পৱন খেৰাৰ বিৰুদ্ধে আইনী ব্যৱস্থা গ্ৰহণ কৰিব বুলিও উল্লেখ কৰিছে । খেৰাই মুখ্যমন্ত্ৰীৰ পত্নী ৰিণিকি ভূঞা শৰ্মাই তিনিখনকৈ বিদেশৰ বৈধ পাছপৰ্ট ৰখা বুলি কৰা দাবীক ড০ শৰ্মাই “অভিপ্ৰায়মূলক, মিছা আৰু ৰাজনৈতিক উদ্দেশ্যপ্ৰণোদিত” বুলি অভিহিত কৰিছে ।

এক্স যোগে মুখ্যমন্ত্ৰী ড০ শৰ্মাই কয়, “মই আৰু মোৰ পত্নীয়ে অহা ৪৮ ঘণ্টাৰ ভিতৰত শ্ৰী পৱন খেৰাৰ বিৰুদ্ধে ফৌজদাৰী আৰু দেৱানী উভয় ধৰণৰ মানহানিৰ গোচৰ তৰিম । তেওঁৰ এই দায়িত্বহীন আৰু মানহানিকাৰক মন্তব্যৰ বাবে তেওঁক সম্পূৰ্ণৰূপে জবাবদিহি কৰা হ’ব ।”

মুখ্যমন্ত্ৰীগৰাকীয়ে এই সংবাদমেলক বিৰোধীৰ দুৰ্বলতাৰ লক্ষণ হিচাপে আখ্যা দিয়ে । তেওঁ লিখিছে, “আজি পৱন খেৰাই সম্বোধন কৰা সংবাদমেলখনে কংগ্ৰেছ দলৰ গভীৰ হতাশা আৰু আতংককে প্ৰতিফলিত কৰিছে ।” লগতে তেওঁ কয় যে অসম এক ঐতিহাসিক নিৰ্বাচনী জনমতৰ দিশে আগবাঢ়ি যোৱাৰ সময়ত এনে আক্ৰমণে কেৱল তেওঁলোকৰ “খহি পৰা ভেটিটোহে উদঙাই দিছে ।” মুখ্যমন্ত্ৰী ড০ শৰ্মাই আৰু কয়, “ন্যায়পালিকাৰ ওপৰত মোৰ সম্পূৰ্ণ আস্থা আছে । আদালতত সত্য প্ৰতিষ্ঠা হোৱাৰ পিছত শ্ৰীপৱন খেৰাই নিজৰ কৰ্মৰ ফল ভোগ কৰিব লাগিব ।”

পৱন খেৰাই সাংবাদিকৰ আগত কৰা দাবীৰ পিছতেই এই বিতৰ্কৰ সূত্ৰপাত হয় । খেৰাই দাবী কৰিছিল যে তেওঁৰ হাতত নথি-পত্ৰ ভিত্তিক প্ৰমাণ আছে যাৰ দ্বাৰা প্ৰমাণ হয় যে ৰিণিকি ভূঞা শৰ্মাই একে সময়তে ইউএই, ইজিপ্ট, এন্টিগুয়া আৰু বাৰ্বুডাৰ বৈধ পাছপৰ্ট ৰাখিছে ।

ইয়াৰ পিছতে মুখ্যমন্ত্ৰী ড০ হিমন্ত বিশ্ব শৰ্মাই কংগ্ৰেছে অনা এই অভিযোগৰ দৃঢ়তাৰে খণ্ডন কৰে আৰু পৱন খেৰাৰ বিৰুদ্ধে ৪৮ ঘণ্টাৰ ভিতৰত এই জালিয়াতি তথা পবন খেড়াৰ বিৰদ্ধে মানহানি আৰু অপৰাধমূলক গোচৰ ৰুজু কৰিব বুলি উল্লেখ কৰিছে ।

লগতে পঢ়ক : নিৰ্বাচনৰ পিছতে কুংকী চৌধুৰীৰ পিতৃ-মাতৃৰ ওপৰত ব্যৱস্থা লোৱা হ’বঃ মুখ্যমন্ত্ৰীৰ প্ৰতিক্ৰিয়া

অজাপ প্ৰাৰ্থী কুংকী চৌধুৰীৰ পিতৃ-মাতৃৰ বিৰুদ্ধে নিষিদ্ধ মাংস ভক্ষণৰ সৈতে জড়িত থকাৰ অভিযোগত আইনী ব্যৱস্থা গ্ৰহণ কৰা হ’ব বুলি মন্তব্য মুখ্যমন্ত্ৰীৰ

নিৰ্বাচন সমাপ্ত হোৱাৰ পিছত অসম জাতীয় পৰিষদৰ প্ৰাৰ্থী কুংকী চৌধুৰীৰ পিতৃ-মাতৃৰ বিৰুদ্ধে “নিষিদ্ধ মাংস” ভক্ষণৰ সৈতে জড়িত থকাৰ অভিযোগত আইনী ব্যৱস্থা গ্ৰহণ কৰা হ’ব বুলি মন্তব্য কৰিছে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই । শনিবাৰে মুখ্যমন্ত্ৰী ড০ শৰ্মাই কয় যে তেওঁ আইনৰ দ্বাৰা নিষিদ্ধ মাংস এই “পবিত্ৰ ভূমিত” ভক্ষণ কৰিবলৈ নিদিয়ে । চৌধুৰীয়ে নিজকে সনাতন ধৰ্মৰ অনুগামী বুলি কৰা দাবীক উল্লেখ কৰি মুখ্যমন্ত্ৰীগৰাকীয়ে তেওঁৰ স্থিতিৰ ওপৰত প্ৰশ্ন উত্থাপন কৰে আৰু তেওঁৰ পৰিয়ালৰ খাদ্যভ্যাসক লৈ সমালোচনা কৰে । মুখ্যমন্ত্ৰীগৰাকীয়ে লগতে দাবী কৰে যে নিৰ্বাচনী প্ৰক্ৰিয়া সম্পূৰ্ণ হোৱাৰ পিছত গো সুৰক্ষা আইনৰ বিধানৰ অধীনত চৌধুৰীৰ পিতৃ-মাতৃৰ বিৰুদ্ধে এজাহাৰ পঞ্জীয়ন কৰা হ’ব ।

মুখ্যমন্ত্ৰী ড০ শৰ্মাই কয়, “অসমত গো সুৰক্ষাৰ এক আইন আছে । ৰাজহুৱাভাৱে গো-মাংস ভক্ষণ কৰিলে ৩ বছৰৰ জেলৰ বিধান আছে । যিসকলে গো-মাংস ভক্ষণ কৰে তেওঁলোকক মই ক্ষমা নকৰোঁ । আইন অনুসৰি মই তেওঁলোকৰ বিৰুদ্ধে আৰক্ষী থানাত এজাহাৰ দাখিল কৰিবলৈ গৈ আছোঁ ।”

২ এপ্ৰিলত অসমৰ মুখ্যমন্ত্ৰী ড০ হিমন্ত বিশ্ব শৰ্মাই অসম জাতীয় পৰিষদক তীব্ৰ সমালোচনা কৰি দলটোৰ চেন্ট্ৰেল গুৱাহাটী সমষ্টিৰ প্ৰাৰ্থী কুংকী চৌধুৰীৰ পটভূমি আৰু ছচিয়েল মিডিয়াত তেওঁৰ মাতৃৰ নামত চলা মন্তব্যক লৈ অভিযোগ উত্থাপন কৰিছিল । সংবাদ মাধ্যমক সম্বোধন কৰি মুখ্যমন্ত্ৰী ড০ শৰ্মাই কয় যে কুংকী চৌধুৰীৰ মাতৃ সুজাতা গুৰুং চৌধুৰী ছিকিমৰ বাসিন্দা হোৱাত তেওঁৰ কোনো আপত্তি নাই, কিন্তু তেওঁৰ ছচিয়েল মিডিয়াৰ কাৰ্যকলাপে “আৱেগক আঘাত দিছে” বুলি অভিযোগ কৰে ।

তেওঁ দাবী কৰে যে তেওঁ ইনষ্টাগ্ৰামত গো-মাংস ভক্ষণৰ ফটো দিছিল আৰু কিছুমান মন্তব্য কৰিছিল যিবোৰে তেওঁৰ মতে সনাতন ধৰ্মক প্ৰত্যাহ্বান জনাইছিল । মুখ্যমন্ত্ৰীগৰাকীয়ে লগতে অভিযোগ কৰে যে তেওঁ ছচিয়েল মিডিয়াত চাৰ্জিল ইমাম আৰু ওমৰ খালিদৰ দৰে ব্যক্তিসকলক সমৰ্থন কৰিছিল, যিসকল অতীতৰ বিতৰ্কৰ কেন্দ্ৰবিন্দু হৈ আহিছে ।

তেওঁ দাবী কৰে যে তেওঁৰ পোষ্টবোৰত “চিকেন নেক” কৰিডৰ সম্পৰ্কীয় বক্তব্যক সমৰ্থন কৰা আৰু ভগৱান কৃষ্ণৰ প্ৰসংগসহ ধৰ্মীয় বিশ্বাসৰ ওপৰত প্ৰশ্ন উত্থাপন কৰা মন্তব্য অন্তৰ্ভুক্ত আছিল । মুখ্যমন্ত্ৰী ড০ শৰ্মাই লগতে অভিযোগ কৰে যে পাকিস্তান সঁচাকৈয়ে ভাৰতৰ শত্ৰু নেকি সেই লৈয়ো তেওঁ প্ৰশ্ন উত্থাপন কৰি মন্তব্য কৰিছিল, যিটো তেওঁৰ মতে উদ্বেগৰ বিষয় । তেওঁ কয় যে এনে স্থিতি আৰু পদক্ষেপে প্ৰক্ষেপ কৰা প্ৰাৰ্থীসকলৰ পটভূমিৰ ওপৰত গুৰুতৰ প্ৰশ্ন উত্থাপন কৰে ।

লগতে পঢ়ক : অখিল গগৈ বিধানসভাৰ আটাইতকৈ ডাঙৰ কাৰ্টুনঃ মুখ্যমন্ত্ৰীৰ কটাক্ষ

মুখ্যমন্ত্ৰী ড০ শৰ্মাই অভিযোগ কৰে যে অখিল গগৈৰ ৰাজহুৱা আচৰণ অপ্ৰত্যাশিত

অখিল গগৈক অসম বিধানসভাৰ আটাইতকৈ ডাঙৰ কাৰ্টুন আখ্যা মুখ্যমন্ত্ৰী ড০ হিমন্ত বিশ্ব শৰ্মাৰ । শনিবাৰে এক নিৰ্বাচনী প্ৰচাৰ কাৰ্যসূচীত অংশ লোৱাৰ পিছত সাংবাদিকৰ সৈতে হোৱা কথা-বতৰাত অখিল গগৈক উদ্দেশ্যি এই তীৰ্যক মন্তব্য কৰে মুখ্যমন্ত্ৰীগৰাকীয়ে ।

‘বিধানসভাৰ আটাইতকৈ ডাঙৰ কাৰ্টুন অখিল গগৈ’

মুখ্যমন্ত্ৰীগৰাকীয়ে কয়- ‘আমাৰ যেতিয়া মন বেয়া লাগে তেতিয়া পীযুষ হাজৰীকাক অখিল গগৈক কিবা এটা কবলৈ পঠাই দিওঁ ।‘ ৰাইজৰ দলৰ সভাপতিগৰাকীক ফেচবুক লাইভ চোৱা বুলি উল্লেখ কৰি ‘অখিল গগৈ এজন ডাঙৰ এন্টাৰটেইনাৰ’ বুলি উল্লেখ কৰে মুখ্যমন্ত্ৰীয়ে । তেওঁ লগতে কয় যে, অখিল গগৈ আৰু কাৰ্টুন একেই । সৰু ল’ৰাই যদি কান্দে তেন্তে অখিল গগৈৰ ফেচবুক লাইভ দেখাই দিব লাগে, কন্দা  লগে লগে বন্ধ হৈ যাব ।

‘১০–১৫ বাৰ ফোন কৰে অখিল গগৈয়ে’

সাংবাদিকৰ আগত মুখ্যমন্ত্ৰী ড০ শৰ্মাই কয় যে তীব্ৰ ৰাজনৈতিক মতভেদ থকা সত্ত্বেও অখিল গগৈয়ে তেওঁৰ সৈতে ব্যক্তিগত যোগাযোগ ৰাখিছে । মুখ্যমন্ত্ৰীয়ে কয়- “অখিল গগৈয়ে মাহত ১০–১৫ বাৰ মোলৈ ফোন কৰে । কংগ্ৰেছৰ সৈতে মিত্ৰতা কৰাৰ আগদিনাও তেওঁ মোৰ আৰু পীযুষ হাজৰীকা দুয়োৰে সৈতে প্ৰায় ১০ মিনিটকৈ কথা পাতিছিল । তেওঁ জীৱনৰ সুখ-দুখৰ লগতে ৰাজনীতিৰ বিষয়েও কথা পাতিছিল ।”

‘অখিল গগৈক চিকিৎসাৰ প্ৰয়োজন’

অখিল গগৈক সমালোচনা কৰি মুখ্যমন্ত্ৰীগৰাকীয়ে কয় যে তেওঁক “চিকিৎসাৰ প্ৰয়োজন”, লগতে তেওঁ ৰাইজৰ দলৰ সভাপতিগৰাকীৰ ৰাজহুৱা আচৰণ আৰু মন্তব্যৰ ধাৰাবাহিকতাক লৈয়ো প্ৰশ্ন উত্থাপন কৰে ।

মুখ্যমন্ত্ৰী ড০ শৰ্মাই অভিযোগ কৰে যে অখিল গগৈৰ ৰাজহুৱা আচৰণ অপ্ৰত্যাশিত । তেওঁ কয়, “অখিল গগৈয়ে কি কয় বা মুহূৰ্তৰ ভিতৰতে কেনে প্ৰতিক্ৰিয়া প্ৰকাশ কৰে সেই বিষয়ে তেওঁ নিজেই নিশ্চিত নহয় । যদি তেওঁ এটা লাইভ সম্প্ৰচাৰত হাঁহে, তেন্তে পৰৱৰ্তী মুহূৰ্ততে তেওঁ কান্দিব পাৰে আৰু তাৰ পাছতেই তৎক্ষণাত তেওঁৰ বিৰোধীৰ বিৰুদ্ধে কঠোৰ অভিযোগ উত্থাপন কৰিবলৈ আৰম্ভ কৰিব পাৰে । সেয়েহে অখিল গগৈক চিকিৎসাৰ প্ৰয়োজন আছে ।”

লগতে পঢ়ক : ‘বিহু আৰু দুৰ্গা পূজাত ৰাইজে পাব বিনামূলীয়াকৈ চিলিণ্ডাৰ’;অসমবাসীলৈ মুখ্যমন্ত্ৰীৰ বিহুৰ উপহাৰ