প্ৰথমখন টি-২০ আন্তঃৰাষ্ট্ৰীয় খেলত ভাৰতে ইংলেণ্ডক ৩৮ ৰানৰ বৃহৎ ব্যৱধানত পৰাস্ত কৰি তিনিখনীয়া শৃংখলাটোত ১-০ অগ্ৰগতি লাভ কৰিবলৈ সক্ষম হৈছে

ইংলেণ্ড ভ্ৰমণৰ আৰম্ভণিতেই নিজৰ আধিপত্য বিস্তাৰ কৰিলে ভাৰতীয় মহিলা ক্ৰিকেট দলে । চেমছফ’ৰ্ডত অনুষ্ঠিত প্ৰথমখন টি-২০ আন্তঃৰাষ্ট্ৰীয় খেলত ভাৰতে ইংলেণ্ডক ৩৮ ৰানৰ বৃহৎ ব্যৱধানত পৰাস্ত কৰি তিনিখনীয়া শৃংখলাটোত ১-০ অগ্ৰগতি লাভ কৰিবলৈ সক্ষম হৈছে । দলৰ বেটিং, বলিং আৰু ফিল্ডিং— প্ৰতিটো দিশতে দেখুওৱা অনবদ্য প্ৰদৰ্শনে জয়ৰ বাট প্ৰশস্ত কৰে ।

বিশাল স্কোৰ গঢ়িলে ভাৰতে-

টছত পৰাজিত হৈ প্ৰথমে বেটিং কৰিবলৈ অহা ভাৰতীয় দলে আৰম্ভণিতেই স্মৃতি মান্ধানাৰ উইকেট হেৰুৱাই চাপত পৰিছিল । অৱশ্যে, য়াস্তিকা ভাটিয়া আৰু জেমিমাহ ৰড্ৰিগেজে অতি সাৱধানতাৰে আৰু আক্ৰমণাত্মকভাৱে খেল আগবঢ়াই নি দলক বিপদৰ পৰা উদ্ধাৰ কৰে । য়াস্তিকাই ৪০ বলত ৫৪ ৰান আৰু জেমিমাহে ৪০ বলত ৬৯ ৰানৰ এক দৰ্শনীয় ইনিংছ খেলে । শেষৰ ফালে দীপ্তি শৰ্মাৰ বিস্ফোৰক বেটিঙে ভাৰতক নিৰ্ধাৰিত ২০ অভাৰত ৭ উইকেটৰ বিনিময়ত ১৮৮ ৰানৰ এক বিশাল স্কোৰ গঢ়াত সহায় কৰে । ইংলেণ্ডৰ হৈ লৰেন বেলে ৩টা উইকেট দখল কৰে ।

ইংলেণ্ডৰ বেটিং লাইন-আপৰ অৱনতি-

১৮৯ ৰানৰ বিশাল লক্ষ্য অনুসৰণ কৰিবলৈ আহি ইংলেণ্ড আৰম্ভণিৰ পৰাই ভাৰতীয় বলাৰসকলৰ হেঁচাত পৰে । ক্ৰান্তি গৌড়ে ইনিংছৰ আৰম্ভণিতেই দুটা গুৰুত্বপূৰ্ণ উইকেট দখল কৰি ইংলেণ্ডক প্ৰাৰম্ভিক খুন্দা দিয়ে । ইংলেণ্ডৰ হৈ এমী জোন্সে ৬৭ ৰানৰ যুঁজাৰু ইনিংছ খেলিলেও দলটোক জয়ৰ দিশে লৈ যোৱাত ব্যৰ্থ হয় ।

নন্দিনী শৰ্মাৰ বিধ্বংসী বলিং-

ভাৰতীয় জয়ৰ মূল নায়ক আছিল নন্দিনী শৰ্মা । তেওঁ মাত্ৰ ২৩ ৰান খৰচ কৰি ৩টা গুৰুত্বপূৰ্ণ উইকেট দখল কৰে, যিয়ে ইংলেণ্ডৰ মিডল অৰ্ডাৰৰ মেৰুদণ্ড ভাঙি পেলায় । ইয়াৰ উপৰিও দীপ্তি শৰ্মা আৰু ক্ৰান্তি গৌড়ৰ নিয়ন্ত্ৰিত বলিঙৰ আগত ইংলেণ্ডৰ বেটছমেনসকলে আঠু ল’বলগীয়া হয় । ফলস্বৰূপে, ইংলেণ্ড নিৰ্ধাৰিত লক্ষ্যৰ পৰা বহুদূৰত ৰৈ যায় আৰু ৩৮ ৰানত পৰাজয় স্বীকাৰ কৰে ।

লগতে পঢ়ক : ‘ৰেকৰ্ড নহয়, আই পি এল ট্ৰফীহে লাগে’, শতক বঞ্চিত বৈভৱ সূৰ্যবংশীৰ ডাঙৰ মন্তব্য

এদিনীয়া ৰেংকিঙত ভাৰতীয় তাৰকাৰ দপদপনি । ভাৰতৰ তাৰকা বেটছমেন স্মৃতি মন্ধানা এদিনীয়াত বিশ্বৰ প্ৰথম স্থানৰ বেটছমেন হিচাবে পৰিগণিত হৈছে

আইচিচিয়ে প্ৰকাশ কৰিছে মহিলা এদিনীয়া বেটছমেনৰ শেহতীয়া ৰেংকিং । ভাৰতৰ তাৰকা বেটছমেন স্মৃতি মন্ধানা এদিনীয়াত বিশ্বৰ প্ৰথম স্থানৰ বেটছমেন হিচাবে পৰিগণিত হৈছে । অষ্ট্ৰেলিয়াৰ এলানা কিং মহিলাৰ এদিনীয়াত বিশ্বৰ ১ নম্বৰ বলাৰ হিচাপে পৰিগণিত হৈছে । শেহতীয়াকৈ অষ্ট্ৰেলিয়াৰ বিৰুদ্ধে তিনিখন মেচৰ এদিনীয়া শৃংখলাত ভাৰতৰ তাৰকা অ’পেনাৰ স্মৃতি মন্ধানাই উজ্জ্বল প্ৰদৰ্শন আগবঢ়াইছিল । অষ্ট্ৰেলিয়াৰ বিৰুদ্ধে এদিনীয়া শৃংখলাত ৫৮ আৰু ৩১ ৰান সংগ্ৰহ কৰা স্মৃতিৰ পইন্ট ৭৯০ । দক্ষিণ আফ্ৰিকাৰ ল’ৰা উলভাৰ্ডক অতিক্ৰম কৰি তেওঁ এদিনীয়াৰ ১ নম্বৰ বেটছমেন হিচাপে পৰিগণিত হৈছে । এতিয়া উলভাৰ্ডৰ হাতত আছে ৭৮২ পইণ্ট ।

অন্তিমখন এদিনীয়া মেচত শতক অৰ্জন কৰা অষ্ট্ৰেলিয়াৰ এলিছা হিলীয়ে চতুৰ্থ স্থানত থাকি ৱান ডে ইণ্টাৰনেশ্যনেলৰ পৰা অৱসৰ গ্ৰহণ কৰে । অষ্ট্ৰেলিয়াৰ বেথ মুনী তৃতীয় স্থানত থকাৰ বিপৰীতে এছলি গাৰ্ডনাৰ (৭২৪) পঞ্চম স্থানত আছে । ভাৰতীয় অধিনায়ক হৰমনপ্ৰীত কৌৰে নৱম স্থান দখল কৰাৰ বিপৰীতে জেমিমাহ ৰড্ৰিগোজ দ্বাদশ স্থানত আছে । তিনিখন মেচৰ ছিৰিজত ক্লীন ছুইপৰ পাছতো ভাৰতে হৰমনপ্ৰীতে (৬৫২) চাৰিটা স্থান আগুৱাবলৈ সক্ষম হয় । এই শৃংখলাত তেওঁ ৫৩, ৫৪ আৰু ২৫ ৰান সংগ্ৰহ কৰে ।

অষ্ট্ৰেলিয়াৰ তাৰকা বলাৰ আলানা কিঙে (৭৭৫ পইণ্ট) বলাৰৰ ৰেংকিঙৰ শীৰ্ষত স্থান লাভ কৰিছে । প্ৰায় চাৰি বছৰ ধৰি শীৰ্ষস্থান দখল কৰা ছফী এক্লেষ্টনক অতিক্ৰম কৰিছে তেওঁ । তৃতীয় স্থানত আছে গাৰ্ডনাৰ । বলিং তালিকাৰ শীৰ্ষ ১০ ৰ ভিতৰত একমাত্ৰ ভাৰতীয় বলাৰ দীপ্তি শৰ্মা । তেওঁ দশম স্থানত আছে । ভাৰতৰ বিৰুদ্ধে এদিনীয়া শৃংখলাত অষ্ট্ৰেলিয়াৰ আলানাই ১৬.৭১ গড়ে ৭টা উইকেট দখল কৰিছিল । তৃতীয় আৰু অন্তিম এদিনীয়াত ৩৩ ৰানত চাৰিটা উইকেট দখল কৰিছিল তেওঁ ।

লগতে পঢ়ক : কেতিয়া আৰু ক’ত অনুষ্ঠিত হ’ব ছেমি ফাইনেলৰ মেচ ? কোন দলৰ মুখামুখি হ’ব ভাৰত ?

এই মেচতে তাৰকা বেটছমেন স্মৃতি মন্ধানাই অষ্ট্ৰেলিয়াৰ বিৰুদ্ধে এক উজ্জ্বল ইনিংছেৰে এক নতুন অভিলেখ গঢ়িবলৈ সক্ষম হয় ।

চলি থকা টি-২০ শৃংখলাত ভাৰতৰ ওচৰত আত্মসমৰ্পণ কৰিছে অষ্ট্ৰেলিয়া দলে । শনিবাৰে অনুষ্ঠিত হোৱা শৃংখলাৰ তৃতীয় তথা নিৰ্ণায়ক মেচত ১৭ ৰানত বিজয় সাব্যস্ত কৰে ভাৰতীয় দলে । ইফালে এই মেচতে ভাৰতীয় দলৰ তাৰকা বেটছমেন স্মৃতি মন্ধানাই অষ্ট্ৰেলিয়াৰ বিৰুদ্ধে এক উজ্জ্বল ইনিংছেৰে এক নতুন অভিলেখ গঢ়িবলৈ সক্ষম হয় ।

২১ ফেব্ৰুৱাৰীত এডিলেইড অভেলত অনুষ্ঠিত হৈছিল এই মেচখন । প্ৰথমে বেটিং কৰি ভাৰতে ২০ অভাৰত ৬ উইকেটৰ বিনিময়ত ১৭৬ ৰান সংগ্ৰহ কৰে । ইয়াৰ প্ৰত্যুত্তৰত অষ্ট্ৰেলিয়াই মাত্ৰ ১৫৯ ৰানহে সংগ্ৰহ কৰিবলৈ সক্ষম হয়  আৰু ভাৰতে ১৭ ৰানত খেলখনত জয়লাভ কৰি শৃংখলা হস্তগত কৰে ।

এই জয়েৰে টিম ইণ্ডিয়াই ঘৰুৱা মাটিত অষ্ট্ৰেলিয়াক ২-১ ব্যৱধানত পৰাস্ত কৰে । মন্ধানাই ৫৫টা বলত ৮২ ৰানৰ বিস্ফোৰক ইনিংছ খেলে । তেওঁৰ এই ইনিংছত ৮টা চাৰি আৰু ৩টা ছয় আছিল । তেওঁৰ এই ইনিংছ দলটোৰ বাবে গুৰুত্বপূৰ্ণ বুলি প্ৰমাণিত হয় ।

৬ বছৰীয়া অভিলেখ ভংগ মন্ধানাৰ-

অষ্ট্ৰেলিয়াত এগৰাকী ভাৰতীয় বেটছমেনে সৰ্বাধিক ব্যক্তিগত স্ক’ৰ সংগ্ৰহত মন্ধানাই ৬ বছৰীয়া অভিলেখ ভংগ কৰে । ইয়াৰ পূৰ্বে ২০২০ চনত মেলবৰ্ণ ক্ৰিকেট খেলপথাৰত ৩৭টা বলত ৬৬ ৰান সংগ্ৰহ কৰিছিল তেওঁ । ৮২ ৰান সংগ্ৰহ কৰি এতিয়া অষ্ট্ৰেলিয়াৰ মাটিত ভাৰতীয় মহিলা বেটছমেনৰ সৰ্বাধিক ব্যক্তিগত স্ক’ৰ ৰেকৰ্ড কৰিছে মন্ধানাই ।

ইয়াৰ লগে লগে তেওঁ ৩৩ সংখ্যক টি-২০ আন্তঃৰাষ্ট্ৰীয় অৰ্ধশতকো সম্পূৰ্ণ কৰে । অষ্ট্ৰেলিয়াৰ বিৰুদ্ধে এইটোৱেই আছিল মন্ধানাৰ অষ্টমটো ৫০+ স্ক’ৰ, যিটো নিজৰ বাবেই এক অভিলেখ ।

অ’পেনিঙৰ চতুৰ্থ বলত এটা চাৰিৰে মন্ধানাই ইনিংছৰ আৰম্ভণি কৰে । তৃতীয় অভাৰত মাত্ৰ ৭ ৰান সংগ্ৰহ কৰি শ্বেফালী বাৰ্মাক আউট হয় । ইয়াৰ পাছত মন্ধানাই দায়িত্বশীল ইনিংছেৰে জেমিমাহ ৰড্ৰিগোজৰ সৈতে ৮২টা বলত দ্বিতীয় উইকেটৰ বাবে ১২১ ৰানৰ এক উজ্জ্বল অংশীদাৰিত্ব গঢ়ে ।

পাৱাৰপ্লেৰ অন্তিম অভাৰত মন্ধানাই ছফী মলিনেক্সৰ বলত একেৰাহে তিনিটা চাৰি কোবাই । ৩৮ বলত এটা ছয়ৰে অৰ্ধশত সংগ্ৰহ কৰে মন্ধানাই ।

লগতে পঢ়ক : দক্ষিণ আফ্ৰিকাৰ বিৰুদ্ধে মেচৰ পূৰ্বে বিপদত ভাৰতীয় দল, আঘাতপ্ৰাপ্ত এইগৰাকী তাৰকা খেলুৱৈ

খিতাপৰ যুঁজত অৱতীৰ্ণ হ’ব স্মৃতি মন্ধানা আৰু জেমিমাহ ৰড্ৰিগোজৰ দল । মহিলা প্ৰিমিয়াৰ লীগৰ আজি ফাইনেলৰ মহাৰণ ।

বৃহস্পতিবাৰে মহিলা প্ৰিমিয়াৰ লীগৰ হাইভল্টেজ ফাইনেল মেচত মুখামুখি হ’ব ৰয়েল ছেলেঞ্জাৰ্ছ বেংগালুৰু (আৰ চি বি) আৰু দিল্লী কেপিটেলছ (ডি চি) । স্মৃতি মন্ধানা নেতৃত্বাধীন আৰ চি বিয়ে দ্বিতীয়বাৰৰ বাবে খিতাপ দখল কৰিবলৈ চেষ্টা কৰাৰ বিপৰীতে দিল্লী কেপিটেলছে ফাইনেলত তিনিবাৰ পৰাস্ত হোৱাৰ অভিশাপৰ পৰা মুক্ত হোৱাৰ লক্ষ্য ৰাখিব ।

অৰ্থাৎ মহিলা প্ৰিমিয়াৰ লীগৰ আজি নতুন চেম্পিয়ন হ’ব, অন্যথা ইতিহাসৰ সমতা স্থাপন হ’ব । গুৰুত্বপূৰ্ণ কথাটো হ’ল দুয়োটা দলৰ দুই ঘনিষ্ঠ বান্ধৱী আৰু অধিনায়ক স্মৃতি মন্ধানা আৰু জেমিমাহ ৰড্ৰিগোজ এই খেলৰ সময়ত মুখামুখি হ’ব ।

এই ছিজনত আৰ চি বিৰ এই যাত্ৰা সপোনতকৈ কম নহয় । একেৰাহে পাঁচখন মেচত জয়লাভ কৰি দলটোৱে ডব্লিউ পি এলৰ ইতিহাসত এক নতুন অভিলেখ স্থাপন কৰিছে । কঠিন পৰিস্থিতিত কামবেক কৰাৰ বাবে দলটোৰ সুনাম পৰিচিত হৈ পৰিছে । অষ্ট্ৰেলিয়াৰ গ্ৰেচ হেৰিছে ইউ পি ৱাৰিয়ৰ্ছৰ বিৰুদ্ধে ৭৫ ৰানৰ বিস্ফোৰক ইনিংছেৰে অভইলেখ স্থাপন কৰাৰ বিপৰীতে গুজৰাট জায়েণ্টছৰ বিৰুদ্ধে গৌতমী নাইকে ৭৩ ৰান সংগ্ৰহ কৰি ৬১ ৰানৰ ব্যাপক জয়ৰ ভেটি স্থাপন কৰে ।

স্মৃতি মন্ধানা, ৰিচা ঘোষ, জৰ্জিয়া ভল, হেৰিছৰ দৰে বেটছমেনৰ ধাৰাবাহিকতাৰ অভাৱ যদিও সময়োপযোগী অৱদানে দলটোক শক্তিশালী কৰি ৰাখিছে । বলিংত নাডিন ডি ক্লাৰ্ক আৰু ছায়ালি সাতঘাৰে গুৰুত্বপূৰ্ণ মুহূৰ্তত প্ৰভাৱ পেলাইছে । ডি ক্লাৰ্কে ৮খন মেচত ১৫ উইকেট দখল কৰি টুৰ্ণামেণ্টৰ তৃতীয় সফল বলাৰ হিচাপে পৰিগণিত হোৱাৰ বিপৰীতে গুজৰাটৰ বিৰুদ্ধে শ্ৰেয়াংকা পাটিলে ৫ উইকেট দখল কৰি দলটোক আন এক গতি প্ৰদান কৰিছে ।

এই ফাইনেলখন দিল্লী কেপিটেলছৰ বাবে অতিশয় গুৰুত্বপূৰ্ণ । নতুন অধিনায়ক জেমিমা ৰড্ৰিগোজৰ অধীনত দলটোৱে প্ৰথমটো খিতাপ জয় কৰাৰ লক্ষ্য ৰাখিব । বলিং বিভাগত চিনেলে হেনৰী আৰু নন্দিনী শৰ্মাই নতুন বলেৰে বিধ্বংসী ৰূপ ধাৰণ কৰিছে । ১৬টা উইকেটৰে দ্বিতীয় সৰ্বাধিক উইকেট দখল কৰা নন্দিনী ভাৰতীয় দলত স্থান লাভৰ বাবে এক শক্তিশালী প্ৰতিদ্বন্দ্বী হিচাপে পৰিগণিত হৈছে ।

বেটিঙত লিজেল লি আৰু শ্বেফালি বাৰ্মাই এলিমিনেটৰত এক গুৰুত্বপূৰ্ণ অংশীদাৰিত্ব গঢ়ি তুলিছিল, আনহাতে ল’ৰা উলভাৰ্ডে সমগ্ৰ ছিজনটোত দলৰ মেৰুদণ্ড হিচাপে প্ৰমাণিত হৈছে । দক্ষিণ আফ্ৰিকাৰ খেলুৱৈৰ এক শক্তিশালী সমন্বয়ে দিল্লীক চাপ সহ্য কৰিবলৈ শক্তি প্ৰদান কৰিছে । সেয়েহে এতিয়া মন্ধানাৰ আৰ চি বিয়ে ইতিহাস সৃষ্টি কৰিব নে জেমিমাহৰ দিল্লীয়ে অৱশেষত খিতাপ জয়ৰ সপোন পূৰণ কৰিব সেয়া হ’ব লক্ষ্যণীয় ।

দিল্লী কেপিটেলছ : জেমিমা ৰড্ৰিগোজ (অধিনায়ক), টানিয়া ভাটিয়া (উইকেটকীপাৰ), লুচি হেমিল্টন, চিনেলে হেনৰী, মাৰিজান কাপ, আলানা কিং, লিজেল লি, মিন্নু মণি, নিকি প্ৰসাদ, স্নেহ ৰানা, শ্বেফালী বাৰ্মা, নন্দনী শৰ্মা, শ্ৰী চৰানী, প্ৰগতি সিং, আদিলা সৃজানা, ল’ৰা উলভাৰ্ড ।

ৰয়েল চেলেঞ্জাৰছ বাংগালুৰু : স্মৃতি মন্ধানা (অধিনায়ক), লৰেন বেল, নাডিন ডি ক্লাৰ্ক, ৰিচা ঘোষ (উইকেটকীপাৰ), গ্ৰেচ হেৰিছ, দয়ালন হেমালাথা, গৌতমী নাইক, শ্ৰেয়ংকা পাটিল, কুমাৰ প্ৰত্যুষ, প্ৰেমা ৰাৱট, অৰুন্ধতী ৰেড্ডী, সয়ালি সাতঘৰ, লিন্সি স্মিথ, পূজা বষ্ট্ৰকাৰ, জৰ্জিয়া ৱাল, ৰাধা যাদৱ ।

লগতে পঢ়ক : ঈশান কিষণৰ বিস্ফোৰক বেটিং : বিশ্বকাপৰ ৱাৰ্ম-আপ মেচত দক্ষিণ আফ্ৰিকাক ধৰাশায়ী কৰিলে ভাৰতে