আই চি চিয়ে শেহতীয়াকৈ প্ৰকাশ কৰা ৰেংকিঙত ভাৰতীয় অ’পেনাৰৰ দপদপনি অব্যাহত আছে । সমান্তৰালভাৱে ভাৰতীয় বলাৰেও তালিকাত দীঘল জাঁপ মাৰিবলৈ সক্ষম হৈছে…
আই চি চিৰ শেহতীয়া ৰেংকিঙত ভাৰতীয় মহিলা খেলুৱৈয়ে যথেষ্ট অগ্ৰগতি লাভ কৰিছে । শেহতীয়াকৈ শ্ৰীলংকাৰ বিৰুদ্ধে টি-২০ শৃংখলাত দুৰ্দান্ত প্ৰদৰ্শনৰ পিছত এতিয়া বিশ্বৰ ষষ্ঠ স্থানৰ টি-২০ বেটছমেন হিচাপে পৰিগণিত হৈছে শ্বেফালী বাৰ্মা । অৱশ্যে ৰেংকিঙত অৱনৱমিত হৈছে জেমিমাহ ৰড্ৰিগোজ । টি-২০ ফৰ্মেটত ভাৰতৰ স্মৃতি মন্ধানাই তৃতীয় স্থান নিজৰ দখলত ৰাখিছে ।
লাভান্বিত শ্বেফালী বাৰ্মা, অৱনমিত ৰড্ৰিগোজ-
ভাৰতৰ অ’পেনিং বেটছমেন শ্বেফালী বাৰ্মাই ২০২৫ চনৰ মহিলা এদিনীয়া বিশ্বকাপৰ পৰাই দুৰ্দান্ত ফৰ্মত আছে । আই চি চিৰ টি-২০ বেটিং ৰেংকিঙত চাৰিটা স্থান আগুৱাই ষষ্ঠ স্থান লাভ কৰিছে তেওঁ । বিশ্বকাপৰ ফাইনেলত ৮৭ ৰানৰ মেচ বিজয়ী ইনিংছ খেলিছিল শ্বেফালীয়ে । শ্ৰীলংকাৰ বিৰুদ্ধে চলিত টি-২০ ছিৰিজতো তেওঁ আগশাৰীৰ ৰান সংগ্ৰহকাৰী হিচাপে পৰিগণিত হৈছে । এতিয়ালৈকে চাৰিখন মেচত ২৩৬ ৰান সংগ্ৰহ (১১৮ গড়) কৰিছে তেওঁ ।
জেমিমাহ ৰড্ৰিগোজ এটা স্থান অৱনমিত হৈ দশম স্থানত আছে । স্মৃতি মন্ধানা ভাৰতৰ টি-২০ৰ শীৰ্ষ বেটছমেন, বৰ্তমান ৰেংকিঙত ৭৬৭ ৰেটিং পইণ্টেৰে তৃতীয় স্থানত আছে । এগৰাকী শক্তিশালী বেটছমেন হিচাপে নিজকে প্ৰতিষ্ঠা কৰিছে উইকেটকীপাৰ-বেটছমেন ৰিচা ঘোষে । ৭টা স্থান আগুৱাই তেওঁ যৌথভাৱে ২০ নম্বৰ স্থানত আছে ।
বলাৰৰ ৰেংকত আগুৱালে ৰেনুকা ঠাকুৰ-
ৰেনুকা ঠাকুৰে টি-২০ বলিং ৰেংকিঙত ৮টা স্থান জপিয়াই শীৰ্ষ দহটা স্থানত প্ৰৱেশ কৰিছে । এতিয়া দক্ষিণ আফ্ৰিকাৰ ম্লাবাৰ সৈতে যৌথভাৱে ষষ্ঠ স্থানত আছে তেওঁ । ৰেনুকা শীৰ্ষ ১০ গৰাকী বলাৰৰ ৰেংকিঙত একমাত্ৰ ভাৰতীয় । ৰাধা যাদৱ আৰু শ্ৰেয়ংকা পাটিলো লোকচানৰ সন্মুখীন হৈছে । ভাৰতীয় দলটোৱে নিজৰ বলিঙৰ উন্নতিৰ দিশত চকু ৰাখিব, অহা বছৰৰ জুন মাহত অনুষ্ঠিত হ’ব মহিলা টি-২০ বিশ্বকাপ ।
লগতে পঢ়ক : নিউজীলেণ্ডৰ বিৰুদ্ধে এদিনীয়া শৃংখলাৰ বিৰুদ্ধে ডাঙৰ সিদ্ধান্ত ল’লে বিৰাট কোহলীয়ে…
