বিয়া বাতিলৰ পিছত প্ৰথমবাৰৰ বাবে দেখা গ’ল স্মৃতি মন্ধানাক; ভাইৰেল হৈ পৰিল ফটো
পলাশ মুছল আৰু স্মৃতি মন্ধানাৰ বহু চৰ্চিত বিয়া অৱশেষ বাতিল হয় । দুয়োজনে দেওবাৰে সামাজিক মাধ্যমত আনুষ্ঠানিকভাৱে এই কথা ঘোষণা কৰিছে । ইফালে বিয়া ভগাৰ পিছতেই নেট অনুশীলনত দেখা গ’ল স্মৃতি মন্ধানাক ।
ভাৰতীয় মহিলা দলৰ সহ-অধিনায়ক স্মৃতি মন্ধানাই সংগীত সুৰকাৰ পলাশ মুছলৰ সৈতে সম্পৰ্ক শেষ কৰাৰ সিদ্ধান্ত লৈছে । বিয়া ভগাৰ পিছত এতিয়া স্মৃতিয়ে নিজৰ আগন্তুক মেচৰ ওপৰত মনোনিৱেশ কৰিছে । বিবাহ বিতাল ঘোষণা কৰাৰ পিছদিনা (৮ ডিচেম্বৰ) স্মৃতি পুনৰ ক্ৰিকেট খেলপথাৰলৈ উভতি আহিছে । ট্ৰেইনিং কিট পিন্ধি নেটত বেটিং কৰা দেখা গৈছে স্মৃতি মন্ধানাক ।
স্মৃতি মন্ধানাৰ ভাতৃ শ্ৰৱণ মন্ধানাই ইনষ্টাগ্ৰামত তেওঁৰ প্ৰেকটিছৰ ফটো শ্বেয়াৰ কৰে আৰু এই পোষ্ট শীঘ্ৰে ভাইৰেল হৈ পৰে । অনুৰাগীয়ে স্মৃতিৰ পেছাদাৰিত্ব আৰু মনোভাৱক প্ৰশংসা কৰে । ৭ ডিচেম্বৰ দেওবাৰে স্মৃতিয়ে ইনষ্টাগ্ৰাম পোষ্টত স্পষ্ট কৰি দিয়ে যে পলাশ মুছল আৰু তেওঁৰ বিয়া আনুষ্ঠানিকভাৱে বাতিল কৰা হৈছে ।
স্মৃতিয়ে সকলোকে দুয়োটা পৰিয়ালৰ গোপনীয়তাক সন্মান জনাবলৈ আহ্বান জনায় । ভাৰতৰ হৈ খেলাটো এতিয়া তেওঁৰ শীৰ্ষ অগ্ৰাধিকাৰ বুলিও কয় স্মৃতিয়ে । একেদিনাই পলাশ মুছলেও এই সম্পৰ্কৰ পৰা আঁতৰি যোৱা বুলি পোষ্ট কৰি প্ৰচাৰ হৈ থকা ভুৱা উৰাবাতৰিৰ বিৰুদ্ধে আইনী ব্যৱস্থা লোৱাৰ হুংকাৰ দিয়ে ।
উল্লেখ্য যে, ২০২৫ চনৰ ২৩ নৱেম্বৰত স্মৃতি মন্ধানা আৰু পলাশ মুছলৰ বিবাহৰ কথা আছিল যদিও সেইদিনা অসুস্থতাৰ বাবে স্মৃতিৰ পিতৃক চিকিৎসালয়ত ভৰ্তি কৰোৱা হয় । তাৰ পিছতে খবৰ ওলাইছিল যে পলাশ মুছলকো মানসিক চাপৰ বাবে চিকিৎসালয়ত ভৰ্তি কৰোৱা হৈছিল । ইয়াৰ পিছত কোনো পক্ষই বিয়াৰ তাৰিখ সন্দৰ্ভত কোনো প্ৰকাশ কৰা নাছিল আৰু অৱশেষত সম্পৰ্কটো শেষ কৰা বুলি দুয়োগৰাকী তাৰকাই দেওবাৰে আনুষ্ঠানিকভাৱে প্ৰকাশ কৰে ।
ইফালে তাৰকা ক্ৰিকেটাৰ স্মৃতি আৰু পলাশ মুছলে ছ’চিয়েল মিডিয়াত ইজনে সিজনক আনফ’ল’ কৰি বিয়াৰ পূৰ্বৰ সকলো ফটো ডিলিট কৰিছে । কিছুমান নিশ্চিত নোহোৱা পোষ্টত পলাশে স্মৃতিক প্ৰতাৰণা কৰা বুলি দাবী কৰা হৈছিল যদিও এইবোৰ কেৱল উৰাবাতৰি হৈয়েই থাকিল । এতিয়া, এই সকলোবোৰৰ পৰা তেওঁলোকে আগবাঢ়ি যোৱা বুলি উল্লেখ কৰিছে ।
লগতে পঢ়ক : বিয়া ভাগিল…! অৱশেষত ছ’চিয়েল মিডিয়াযোগে মৌনতা ভংগ কৰিলে স্মৃতি মন্ধানাই