এডিলেইডত পৰাজয়ৰ সন্মুখীন ভাৰতীয় দল
এডিলেইডত অনুষ্ঠিত দ্বিতীয়খন এদিনীয়াটো পৰাজয়ৰ সন্মুখীন হৈছে ভাৰতীয় দল । মেথিউ শ্বৰ্ট আৰু কুপাৰ কনলিৰ শক্তিশালী ইনিংছৰ সহায়ত এই মেচত কেংগেৰু বাহিনীয়ে ভাৰতীয় দলক দুই উইকেটত পৰাস্ত কৰে । ইয়াৰ লগে লগে অষ্ট্ৰেলিয়াই তিনিখন মেচৰ শৃংখলাত ২-০ অপ্ৰতিৰোধ্য অগ্ৰগতি লাভ কৰাৰ লগতে শৃংখলা দখল কৰিছে । প্ৰথমে বেটিং কৰি ভাৰতে ৫০ অভাৰত ৯ উইকেটত ২৬৪ ৰান সংগ্ৰহ কৰে । প্ৰত্যুত্তৰত ২২টা বল বাকী থকা অৱস্থাত অষ্ট্ৰেলিয়াই ৮ উইকেটত জয়লাভ কৰে । উল্লেখ্য যে, ১৭ বছৰৰ পাছত প্ৰথমবাৰৰ বাবে এডিলেইডত ভাৰতীয় দল এদিনীয়া মেচত পৰাস্ত হৈছে ।
এদিনীয়াৰ অধিনায়ক হিচাবে অভিষেক ঘটোৱা শুভমন গীলৰ বাবে এই শৃংখলা সুখকৰ নাছিল । দ্বিতীয়খন মেচত পৰাস্ত হোৱাৰ লগে লগে অধিনায়ক হিচাপে তেওঁ প্ৰথমটো শৃংখলা হেৰুৱাইছে । ভাৰতীয় বলাৰসকলে ২৬৪ ৰান ৰক্ষা কৰাত ব্যৰ্থ হয় । ৰোহিত শৰ্মা (৭৩) আৰু শ্ৰেয়াছ আয়াৰ (৬১)ৰ অৰ্ধশতকো এই পৰাজয়ৰ লগ লগে অখলে যায় ।
মেথিউ শ্বৰ্ট আৰু কুপাৰ কনলিৰ শক্তিশালী ইনিংছ-
২৬৫ ৰানৰ লক্ষ্য অনুসৰণ কৰা অষ্ট্ৰেলিয়াৰ আৰম্ভণি দুৰ্বল আছিল । অধিনায়ক মিচেল মাৰ্ছে ১১ ৰান আৰু ট্ৰেভিছ হেডে ২৮ ৰানত নিজৰ উইকেট বিসৰ্জন দিয়ে । অনভিজ্ঞ মিডল অৰ্ডাৰৰ প্ৰতি লক্ষ্য ৰাখি ভাৰতীয় বলাৰসকলে অষ্ট্ৰেলিয়াৰ বেটছমেনসকলক লক্ষ্যত উপনীত হ’বলৈ দিয়াৰ সম্ভাৱনা কম যেন লাগিছিল যদিও তৃতীয় নম্বৰৰ শ্বৰ্টৰ লগতে মেট ৰেনশ্ব’ (৩০ বলত ৩০) প্ৰথমে তৃতীয় উইকেটৰ বাবে ১৫৫ ৰান সংগ্ৰহ কৰি নিজৰ দলটোক বিপদৰ পৰা মুক্ত কৰে ।
অৱশ্যে ইয়াৰ পাছত খেলৰ গতি পুনৰ ভাৰতৰ হাতলৈ যায় । ৰেনশ্ব’ আউট হোৱাৰ পিছত এলেক্স কেৰীয়েও মাত্ৰ ৯ ৰানতে পেভিলিয়নমুখী হয । ১৩২ ৰানত ৪ উইকেট হেৰুৱাই কেংগাৰু বাহিনীয়ে । ভাৰতে পুনৰ মেচখনত প্ৰত্যাৱৰ্তন কৰিব যেন লাগিছিল যদিও কিন্তু কুপাৰ কনলিয়ে এই আশাত চেঁচা পানী ঢালে । শ্বৰ্টে তৃতীয়টো এদিনীয়া অৰ্ধশতক অৰ্জন কৰে । তেওঁ ৭৮টা বলত ৭৪ ৰান সংগ্ৰহ কৰি পেভিলিয়নমুখী হয় । তেওঁৰ এই ইনিংছত ২ টা ছয় আৰু চাৰিটা চাৰি আছিল ।
শ্বৰ্ট আউট হোৱাৰ পিছত ভাৰতৰ আশা পুনৰ সজীৱ হৈ উঠিছিল যদিও মিচেল ওৱেনে প্ৰত্যাক্ৰমণ কৰে । মাত্ৰ ২৩টা বলত দুটা চাৰি আৰু তিনিটা ছয়ৰ সহায়ত ৩৬ ৰান সংগ্ৰহ কৰে তেওঁ । কুপাৰ কনলিয়ে ৫৩টা বলত অপৰাজিত ৬১ ৰান সংগ্ৰহ কৰি ৫টা চাৰি আৰু এটা ছয় কৰে । অপৰাজিত হৈ থকা কনলিয়ে এই মেচত অষ্ট্ৰেলিয়াৰ জয় নিশ্চিত কৰে ।
ভাৰতৰ হৈ অৰ্শদীপ সিং, হৰ্ষিত ৰানা, ৱাশ্বিংটন সুন্দৰে ২টাকৈ আৰু মদম্মদ ছিৰাজ, অক্ষৰ পেটেলে এটাকৈ উইকেট দখল কৰে ।
অথলে গ’ল ৰোহিত-শ্ৰেয়াছৰ অৰ্ধশতক-
ইয়াৰ পূৰ্বে টছ হেৰুৱাই প্ৰথমে বেটিং কৰে ভাৰতীয় দলে । ৰোহিত শৰ্মাই ৯৭ বলত ৭৩ ৰান, শ্ৰেয়াছ আয়াৰে ৭৭ বলত ৬১ ৰান আৰু অক্ষৰ পেটেলৰ ৪১ বলত ৪৪ ৰানৰ সহায়ত ভাৰতে ৫০ অভাৰত ৯ উইকেটত ২৬৪ ৰান সংগ্ৰহ কৰে । লেগ স্পীনাৰ এডাম জাম্পাই অষ্ট্ৰেলিয়াৰ হৈ ৬০ ৰানত ৪টা উইকেট দখল কৰে । বেটছমেনৰ অধিকাংশই তেওঁক আক্ৰমণ কৰিবলৈ চেষ্টা কৰি আউট হৈছিল । বেগী বলাৰ জেভিয়াৰ বাৰ্টলেটে ৩৯ ৰানত তিনিটা উইকেট দখল কৰে । বিৰাট কোহলীৰ বহুমূলীয়া উইকেটটোও তেওঁ লয় ।
লগতে পঢ়ক : ছন্দপতন ! দ্বিতীয় এদিনীয়াটো ব্যৰ্থ বিৰাট কোহলী
