জল্পনা-কল্পনাৰ অন্ত পেলাই শেহতীয়াকৈ মুখ্যমন্ত্ৰী নীতিশ কুমাৰৰ এক বিবৃতি প্ৰকাশ পাইছে

বিগত ২৪ ঘন্টা ধৰি বিহাৰৰ মুখ্যমন্ত্ৰী নীতিশ কুমাৰক লৈ যথেষ্ট জল্পনা-কল্পনাৰ সৃষ্টি হৈছে । মুখ্যমন্ত্ৰী পদৰ পৰা পদত্যাগ কৰি ৰাজ্যসভালৈ যাব বুলি তেওঁক লৈ চৰ্চা চলিছে । এই জল্পনা-কল্পনাৰ অন্ত পেলাই শেহতীয়াকৈ মুখ্যমন্ত্ৰী নীতিশ কুমাৰৰ এক বিবৃতি প্ৰকাশ পাইছে । বিবৃতিত তেওঁ ৰাজ্যসভালৈ যাব বুলি স্পষ্ট কৰি দিছে । ছ’চিয়েল মিডিয়া পোষ্টৰ জৰিয়তে তেওঁ মুখ্যমন্ত্ৰীৰ পদ ত্যাগ কৰাৰ কথা ঘোষণা কৰে ।

নীতিশ কুমাৰে লিখিছে যে সংসদীয় জীৱনৰ আৰম্ভণিৰে পৰাই তেওঁৰ বিহাৰ বিধানসভা আৰু সংসদ দুয়োটা সদনৰ সদস্য হোৱাৰ হেঁপাহ আছিল । ফলস্বৰূপে তেওঁ এই নিৰ্বাচনত ৰাজ্যসভাৰ সদস্য হোৱাৰ মনস্থ কৰিছে । তেওঁ বিহাৰৰ নতুন চৰকাৰক সমৰ্থন কৰিব ।

নীতিশ কুমাৰে ছ’চিয়েল মিডিয়াৰ এটা পোষ্টত লিখিছে, “দুটা দশকৰো অধিক সময় ধৰি আপোনালোকে মোৰ সৈতে ধাৰাবাহিকভাৱে আপোনালোকৰ আস্থা আৰু সমৰ্থন ৰাখিছে আৰু সেই শক্তিৰে মই বিহাৰৰ লগতে আপোনালোক সকলোকে সম্পূৰ্ণ ভক্তিৰে সেৱা আগবঢ়াইছো । আপোনালোকৰ আস্থা আৰু সমৰ্থনৰ বাবেই আজি বিহাৰে উন্নয়ন আৰু সন্মানৰ এক নতুন মাত্ৰা দাঙি ধৰিছে । মই আপোনালোকৰ প্ৰতি কৃতজ্ঞতা প্ৰকাশ কৰিছো ।”

তেওঁ আৰু লিখিছে যে মোৰ সংসদীয় জীৱনৰ আৰম্ভণিৰে পৰাই মোৰ বিহাৰ বিধানসভাৰ দুয়োটা সদন আৰু সংসদৰ দুয়োটা সদনৰ সদস্য হোৱাৰ হেঁপাহ আছিল । সেয়েহে মই এই নিৰ্বাচনত ৰাজ্যসভাৰ সদস্য হ’ব বিচাৰিছো ।

নীতিশে কয় যে, “মই আপোনালোকক সকলো আন্তৰিকতাৰে আশ্বাস দিব বিচাৰো যে ভৱিষ্যতেও আপোনালোকৰ সৈতে এই সম্পৰ্ক অব্যাহত থাকিব আৰু উন্নত বিহাৰ গঢ়াৰ বাবে একেলগে কাম কৰাৰ মোৰ সংকল্প অক্ষুণ্ণ থাকিব । যিখন নতুন চৰকাৰ গঠন হ’ব, তাৰ প্ৰতি সম্পূৰ্ণ সমৰ্থন থাকিব ।”

লগতে পঢ়ক : নিৰ্বাচনৰ পূৰ্বে ৩ কংগ্ৰেছী বিধায়কে বাজপেয়ী ভৱনত পিন্ধিলে গেৰুৱা বসন

তিয়া নীতিশ কুমাৰৰ বিদায়ৰ পিছত বিহাৰৰ মুখ্যমন্ত্ৰীৰ পদ কোনে গ্ৰহণ কৰিব তাকে লৈ প্ৰশ্ন উত্থাপন হৈছে

বিহাৰত এক বৃহৎ ৰাজনৈতিক পৰিৱৰ্তনৰ ইংগিত দেখা গৈছে । জানিব পৰা মতে বিহাৰৰ মুখ্যমন্ত্ৰী নীতিশ কুমাৰ ৰাজ্যসভালৈ নিৰ্বাচিত হ’ব পাৰে । ইয়াৰ পিছতে এতিয়া নীতিশ কুমাৰৰ বিদায়ৰ পিছত বিহাৰৰ মুখ্যমন্ত্ৰীৰ পদ কোনে গ্ৰহণ কৰিব তাকে লৈ প্ৰশ্ন উত্থাপন হৈছে ।

প্ৰকাশিত বাতৰি অনুসৰি ৰাজ্যসভাৰ আসনৰ বাবে মনোনয়ন দাখিল কৰিবলৈ সাজু হৈছে নীতিশ কুমাৰ । দলে নীতিশৰ মনোনয়নৰ বাবে প্ৰয়োজনীয় সকলো নথি প্ৰস্তুত কৰিছে আৰু বৃহস্পতিবাৰে ​​তেওঁ মনোনয়ন দাখিল কৰিব । ১৬ মাৰ্চৰ পিছত নীতিশ কুমাৰে মুখ্যমন্ত্ৰী পদৰ পৰা পদত্যাগ কৰিব পাৰে বুলিও খবৰ প্ৰকাশ পাইছে । ১৬ মাৰ্চত ৰাজ্যসভাৰ নিৰ্বাচন অনুষ্ঠিত নোহোৱালৈকে তেওঁ বিহাৰৰ মুখ্যমন্ত্ৰী হৈ থাকিব ।

২০২৫ চনৰ বিহাৰ বিধানসভা নিৰ্বাচনত বিজেপিয়ে আধিপত্য বিস্তাৰ কৰি ৮৯খন আসন লাভ কৰিছিল । দ্বিতীয় স্থানত আছে ৮৫খন আসন লাভ কৰা মুখ্যমন্ত্ৰী নীতিশ কুমাৰৰ জেডিইউ । এন ডি এৰ মিত্ৰতাত চিৰাগ পাছোৱানৰ দল (এল জে পি-আৰ ভি), জিতন ৰাম মাঝীৰ এইচ এ এম, উপেন্দ্ৰ কুশৱাহাৰ আৰ এল এম আদিও আছিল ।

নীতিশ কুমাৰৰ পিছত কোন হ’ব বিহাৰৰ মুখ্যমন্ত্ৰী ?

বিহাৰৰ ক্ষমতাৰ গাঁথনিত বিজেপিৰ আধিপত্য সৰ্বোচ্চ সেয়া স্পষ্ট । এই কাৰণেই নীতিশ কুমাৰৰ পাছত বিজেপিয়ে ৰাজ্যখনৰ মুখ্যমন্ত্ৰীৰ পদ লাভ কৰিব পাৰে বুলি চৰ্চা চলিছে । এনে হ’লে বিহাৰৰ ইতিহাসৰ এটা ডাঙৰ টাৰ্নিং পইণ্ট হ’ব, কিয়নো বহুদিনৰ মূৰত মুখ্যমন্ত্ৰীৰ চকীখন দখল কৰিব এজন বিজেপি নেতাই ।

ইফালে জানিব পৰা মতে নীতিশ কুমাৰৰ পুত্ৰ নিশান্ত কুমাৰেও বিশেষ দায়িত্ব ল’বলৈ সাজু হৈছে । তেওঁক বিহাৰৰ উপ-মুখ্যমন্ত্ৰী হিচাপে নিযুক্তি দিয়া হ’ব পাৰে ।

উল্লেখ্য যে, ভাৰতীয় সংবিধানত উল্লেখ আছে যে কোনো ব্যক্তি একেলগে দুটা সদনৰ সদস্য হ’ব নোৱাৰে । বৰ্তমান নীতিশ কুমাৰ বিহাৰ বিধানসভাৰ সদস্য আৰু ৰাজ্যৰ মুখ্যমন্ত্ৰী । ৰাজ্যসভালৈ নিৰ্বাচিত হ’লে বিহাৰ বিধানসভাৰ সদস্যপদৰ পৰা পদত্যাগ কৰি মুখ্যমন্ত্ৰী পদৰ পৰা পদত্যাগ কৰিব লাগিব তেওঁ ।

লগতে পঢ়ক : ঘোষণা কৰা হ’ল ৰাইজৰ দলৰ প্ৰথমখন প্ৰাৰ্থীৰ তালিকা;কোন সমষ্টিত কাক প্ৰাৰ্থিত্ব ?