মুক্তি পালে ‘ৰৈ ৰৈ বিনালে’ৰ ট্ৰেইলাৰ
বহু প্ৰতীক্ষাৰ অন্তত বৃহস্পতিবাৰে সন্ধিয়া মুক্তি পালে প্ৰিয় শিল্পী জুবিন গাৰ্গৰ সপোনৰ ছবি ৰৈ ৰৈ বিনালেৰ ট্ৰেইলাৰ । এই ট্ৰেইলাৰে মুকলিৰ হোৱাৰ লগে লগেই সামাজিক মাধ্যমত আলোড়নৰ সৃষ্টি কৰিছে । মুক্তিৰ লগে লগে সামাজিক মাধ্যমত এই ট্ৰেইলাৰ ব্যাপক শ্বেয়াৰ হোৱা পৰিলক্ষিত হৈছে ।
উল্লেখ্য যে, জুবিন গাৰ্গৰ বহু আশাৰ, সপোনৰ ছবি আছিল ৰৈ ৰৈ বিনালে । এই ছবিখনৰ মুক্তিৰ তাৰিখ ৩১ অক্টোবৰ হিচাবে নিজেই নিৰ্ধাৰণ কৰিছিল প্ৰিয় শিল্পী জুবিন গাৰ্গে । কিন্তু ছবিখনৰ দৃশ্যগ্ৰহণ সম্পূৰ্ণ হোৱাৰ পূৰ্বেই ১৯ ছেপ্টেম্বৰত অসমবাসীক কন্দুৱাই সূদূৰ ছিংগাপুৰত অকাল মৃত্যুক সাৱটি লয় হিয়াৰ আমঠু শিল্পীগৰাকীয়ে ।
অৱশ্যে শিল্পীগৰাকীৰ আদ্যশ্ৰাদ্ধ আদি অনুষ্ঠিত হৈ যোৱাৰ পিছতেই ছবিখনৰ বাকী ৰৈ যোৱা দৃশ্যগ্ৰহণকে ধৰি আন কামসমূহ সম্পূৰ্ণ হয় । পৰিচালক ৰাজেশ ভূঞা আৰু জুবিন গাৰ্গৰ পত্নী গৰিমা শইকীয়া গাৰ্গে শিল্পীগৰাকীয়ে নিজে নিৰ্ধাৰণ কৰা তাৰিখটোতেই ছবিখনে মুক্তি লাভ কৰিব বুলি কৈছিল । য়েয়েহে ছবিখনৰ অসম্পূৰ্ণ সকলো কাম সম্পূৰ্ণ কৰি মুক্তিৰ বাবে সাজু কৰি তোলা হয় । ইয়াৰ পিছতে আজি সন্ধিয়া মুক্তি দিয়া হয় বহু প্ৰতিক্ষীত এই ছবিখনৰ ট্ৰেইলাৰ ।
আনহাতে ৰৈ ৰৈ বিনালেৰ ট্ৰেইলাৰে মুক্তি লাভৰ পিছতে সামাজিক মাধ্যমত ব্যাপক আলোড়নৰ সৃষ্টি কৰিছে । ট্ৰেইলাৰ চাই আবেগিক হৈ বহু জুবিন অনুৰাগী । লগে লগে ট্ৰেইলাৰত জুবিন গাৰ্গৰ মুখত শুনা ছবিখনৰ বহুকেইটা সংলাপো জনপ্ৰিয় হৈ পৰাৰ লগে লগে সামাজিক মাধ্যমত বিয়পি পৰিছে । উল্লেখ্য যে, ৰৈ ৰৈ বিনালে প্ৰথমখন অসমীয়া মিউজিকেল ছবি লগতে প্ৰাণৰ শিল্পী জুবিন গাৰ্গৰ অন্তিমখন চলচ্চিত্ৰ ।
ইফালে ৰৈ ৰৈ বিনালেৰ ট্ৰেইলাৰ মুক্তিৰ পিছতে সামাজিক মাধ্যমত এই ট্ৰেইলাৰ শ্বেয়াৰ কৰি জুবিন গাৰ্গৰ পত্নী গৰিমা শইকীয়া গাৰ্গে এক আৱেগিক পোষ্ট কৰে । আপোন মানুহজনক স্মৰণ কৰি ফেচবুক পোষ্টত গৰিমাই লিখিছে-“ চোৱা গ’ল্ডী.. তোমাৰ বহুত হেঁপাহৰ, বহুত মৰমৰ “ৰৈ ৰৈ বিনালে” সাজু হৈ উঠিছে লাহে লাহে !
তোমাৰ ইচ্ছা, তোমাৰ সপোন সাকাৰ কৰিবলৈ তোমাৰ কথামতেই সকলোৱে চেষ্টা কৰিছে কামবোৰ ভালকৈ কৰিবলৈ । তুমি আশীৰ্বাদ কৰি থাকিবা … বাট দেখুৱাই থাকিবা ।“
উল্লেখ্য যে, ৰৈ ৰৈ বিনালে ছবিখনৰ কাহিনী আৰু সংগীত জুবিন গাৰ্গৰ । ছবিখন ৰাজেশ ভূঞাই পৰিচালনা কৰিছে আৰু প্ৰযোজনা জুবিন গাৰ্গ, গৰিমা শইকীয়া গাৰ্গ আৰু শ্যামন্তক গৌতমৰ । ৩১ অক্টোবৰত ছবিখনে ছবিগৃহত মুক্তি লাভ কৰিব । শুকুৰবাৰৰ পৰা আৰম্ভ হ’ব ছবিখনৰ অনলাইন বুকিং ।
লগতে পঢ়ক : মন গ’লেই যাব নোৱাৰিব জুবিন গাৰ্গ ক্ষেত্ৰলৈঃ জাৰি হ’ল নিয়মাৱলী
