জুবিন গাৰ্গক এজনে মাৰিছে বাকীসকলে সহযোগ কৰিছে
জুবিন গাৰ্গৰ মৃত্যু সন্দৰ্ভত মুখ্যমন্ত্ৰী হিমন্ত বিশ্ব শৰ্মাই মঙলবাৰে এক উল্লেখযোগ্য বিবৃতি প্ৰকাশ কৰিছে । মুখ্যমন্ত্ৰী হিমন্ত বিশ্ব শৰ্মাই মঙলবাৰে বিধানসভাৰ মজিয়াত ছিংগাপুৰত মৃত্যু হোৱা জুবিন গাৰ্গক হত্যা কৰা হৈছিল বুলি স্পষ্টকৈ উল্লেখ কৰে । তেওঁ কয় যে, সেয়েহে বিশেষ তদন্তকাৰী দলে এই গোচৰত হত্যাৰ অভিযোগ সংযোজন কৰিছে ।
সদনত মুখ্যমন্ত্ৰী ড০ শৰ্মাই কয়, ‘প্ৰাথমিক তদন্তৰ অন্তত অসম আৰক্ষী নিশ্চিত হৈছিল যে এয়া হত্যাৰ গোচৰ নহয়, স্পষ্ট হত্যাকাণ্ড । তেওঁ কয় যে শিল্পীগৰাকীৰ মৃত্যুৰ তিনিদিনৰ ভিতৰতে ভাৰতীয় ন্যায় সংহিতাৰ ১০৩ ধাৰা সংযোজন কৰা হৈছে ।
তেওঁ কয়,’ জুবিন গাৰ্গক হত্যা কৰা হৈছিল । ফেচবুক লাইভৰ জৰিয়তে সেইবাবেই মই ইয়াক হত্যা বুলি উল্লেখ কৰিছিলো । ইয়াক লৈ কোনো সন্দেহ নাই । জুবিনক এজন ব্যক্তিয়ে হত্যা কৰিছে বাকীকেইজনে সহযোগিতা কৰিছে । ইয়াৰ বাবেই ৪ৰ পৰা ৫ জন ব্যক্তিক হত্যাৰ গোচৰত গ্ৰেপ্তাৰ কৰা হৈছে ।‘
উল্লেখ্য যে, জুবিন গাৰ্গৰ মৃত্যুৰ গোচৰত এতিয়ালৈকে SIT য়ে ৭ জন লোকক গ্ৰেপ্তাৰ কৰিছে, ২৫২ জনক সোধা-পোচা কৰিছে আৰু ২৯ টা সামগ্ৰী জব্দ কৰিছে ।
মুখ্যমন্ত্ৰী হিমন্ত বিশ্ব শৰ্মাই পুনৰ কয় যে ডিচেম্বৰ মাহত হত্যাকাণ্ডৰ গোচৰৰ চাৰ্জশ্বীট দাখিল কৰাৰ পিছত তদন্তক সম্প্ৰসাৰিত কৰি গাফিলতি, অপৰাধমূলক আস্থা ভংগ আৰু অন্যান্য দিশসমূহ অন্তৰ্ভুক্ত কৰা হ’ব । মুখ্যমন্ত্ৰী ড০ শৰ্মাই দাবী কৰে যে এছ আই টিয়ে কঠোৰ অভিযোগনামা দাখিল কৰিব আৰু অপৰাধৰ আঁৰৰ উদ্দেশ্যেই ৰাজ্যবাসীক স্তম্ভিত কৰিব ।
মুখ্যমন্ত্ৰীয়ে কয়,’ ‘জুবিনৰ হত্যাকাণ্ডৰ দুটা দিশ আছে । জুবিনক মৃত্যুৰ আগতে অৱহেলা আৰু বিশ্বাস ভংগ কৰা হৈছিল । SIT-এ প্ৰথমতে ছিংগাপুৰৰ ঘটনাৰ চাৰ্জশ্বীট দিব । চাৰ্জশ্বীট দিয়াৰ পিছতে আন ঘটনাৰ ওপৰত চলিব তদন্ত । ক’ভিডৰ আগৰে পৰা জুবিনৰ লগত ষড়যন্ত্ৰ কৰা হৈছিল । প্ৰায় ৮ বছৰ ধৰি অব্যাহত আছিল ষড়যন্ত্ৰ । ইয়াৰ প্ৰমাণ আমি লাভ কৰিছো । জুবিন গাৰ্গক জীৱিতকালত এজনেও যদি অন্যায় কৰিছে তেঁও সাৰি যাব নোৱাৰিব ।’
উল্লেখ্য যে, আজিৰে পৰা আৰম্ভ হৈছে অসম বিধানসভাৰ পঞ্চদশ শীতকালীন অধিৱেশন । সদনৰ কাৰ্যবিধিৰ আৰম্ভ হোৱাৰ পূৰ্বে জুবিন গাৰ্গৰ মৃত্যুৰ তদন্ত সন্দৰ্ভত বিৰোধীয়ে অসম বিধানসভা স্থগিত ৰখাৰ প্ৰস্তাৱ আগবঢ়াইছিল । মুখ্যমন্ত্ৰী হিমন্ত বিশ্ব শৰ্মাৰ অনুৰোধত অধ্যক্ষই এই প্ৰস্তাৱ গ্ৰহণ কৰে । মুখ্যমন্ত্রী হিমন্ত বিশ্ব শৰ্মাই চৰকাৰে এই বিষয়ে অৱগত বুলি উল্লেখ কৰি অধ্যক্ষক সদন স্থগিতৰ প্রস্তাৱ মানি ল’বলৈ অনুৰোধ জনায় ৷
শৰ্মাই লগতে কয় যে বিতৰ্কত কোনো শাসকীয় দলৰ সদস্যই কথা নকয় আৰু কেৱল চৰকাৰেহে ইয়াৰ উত্তৰ দিব । অধ্যক্ষই সদন স্থগিতৰ প্ৰস্তাৱ গ্ৰহণ কৰি কয় যে বিতৰ্কৰ শেষত সদনত বিধেয়ক আৰু অনুদানৰ পৰিপূৰক দাবী উত্থাপন কৰা হ’ব ।
লগতে পঢ়ক : আজিৰে পৰা আৰম্ভ অসম বিধানসভাৰ শীতকালীন অধিৱেশন
