গুৱাহাটীৰ পাৰ্কক লৈ মন্ত্ৰী জয়ন্ত মল্ল বৰুৱাৰ ঘোষণা
এতিয়াৰে পৰা গুৱাহাটী মহানগৰীৰ পাৰ্কত বিনামূলীয়াকৈ প্ৰৱেশ কৰিব পাৰিব আপুনি । গুৱাহাটীৰ পাৰ্কত প্ৰৱেশ কৰিবলৈ আপুনি ভৰিব নালাগে কোনোধৰণৰ মাচুল । আনকি বাহন পাৰ্কিঙৰ বাবেও মাচুল দিব নালাগে আপুনি । শনিবাৰে এই ঘোষণা কৰে ৰাজ্য চৰকাৰৰ মন্ত্ৰী জয়ন্ত মল্ল বৰুৱাই । গুৱাহাটীৰ সকলো পাৰ্ক তথা উদ্যানৰ বাবে প্ৰজোয্য হ’ব এই ঘোষণা ।
শনিবাৰে মাছখোৱাৰ আই টি এ অডিটৰিয়ামত অনুষ্ঠিত হোৱা স্বচ্ছ গুৱাহাটী অভিযান ২.০ উন্মোচন আৰু ২০২৫ বৰ্ষৰ স্বচ্ছ দুৰ্গা পূজা মণ্ডপ প্ৰতিযোগিতাৰ পুৰস্কাৰ বিতৰণ অনুষ্ঠানত এই ঘোষণা কৰে মন্ত্ৰীগৰাকীয়ে ।
এই সন্দৰ্ভত মন্ত্ৰীগৰাকীয়ে কয় যে, ‘পৰিচালনা প্ৰক্ৰিয়াৰ অংশ হিচাপে দৰ্শকে এণ্ট্ৰি পাছ সংগ্ৰহ কৰিব লাগিব, কিন্তু ইয়াৰ বাবে কোনো মাচুল লোৱা নহ’ব । দৰ্শকে কেৱল নিজৰ নাম আৰু ফোন নম্বৰ দিব লাগিব ।’ অৱশ্যে এই সুবিধা চলিত বৰ্ষৰ ১ ডিচেম্বৰৰ পৰা অহা বছৰ বহাগ বিহুলৈহে প্ৰযোজ্য হ’ব বুলি কয় মন্ত্ৰী জয়ন্ত মল্ল বৰুৱাই ।
আজিৰ এই অনুষ্ঠানত মন্ত্ৰীগৰাকীৰ লগতে গুৱাহাটী পৌৰ নিগমৰ মেয়ৰ মৃগেন শৰণীয়া, জি এম চিৰ অধ্যক্ষ ভূপেন বৰুৱা, উপাধ্যক্ষ ৰত্না সিং আৰু জি এম চি আয়ুক্ত চিন্ময় ফুকন উপস্থিত থাকে ।
লগতে পঢ়ক : মিঞাৰ বিৰুদ্ধে উচ্ছেদ চলোৱাত কংগ্ৰেছৰ আপত্তি কিয় ? মুখ্যমন্ত্ৰীৰ প্ৰশ্ন
