ভাৰতীয় বতৰ বিজ্ঞান বিভাগে অহা কেইদিনমান ধৰি সমগ্ৰ অসমতে ধাৰাসাৰ বৰষুণ অব্যাহত থকাৰ আগজাননী দিছে

মন্ত্ৰী জয়ন্ত মল্লবৰুৱাই গুৱাহাটীত হোৱা ধাৰাসাৰ বৰষুণৰ ফলত সৃষ্টি হোৱা কৃত্ৰিম বান পৰিস্থিতিৰ পৰিপ্ৰেক্ষিতত জনসাধাৰণক সজাগ হ’বলৈ আৰু সহযোগ কৰিবলৈ আহ্বান জনাইছে ।

সামাজিক মাধ্যমত শ্বেয়াৰ কৰা এটা পোষ্টত মন্ত্ৰীগৰাকীয়ে উল্লেখ কৰে যে সন্ধিয়াৰ পৰা গভীৰ নিশালৈ হোৱা “অভূতপূৰ্ব বৰষুণৰ” ফলত চহৰখনৰ বহু ঠাই জলমগ্ন হৈ পৰিছে, যাৰ ফলত স্বাভাৱিক জীৱনযাত্ৰা ব্যাহত হৈছে । তেওঁ লগতে কয় যে সংশ্লিষ্ট কৰ্তৃপক্ষই পৰিস্থিতি নিয়ন্ত্ৰণলৈ আনিবলৈ দিনে-ৰাতিয়ে কাম কৰি আছে আৰু নাগৰিকসকলক সতৰ্ক তথা সহযোগিতামূলক হৈ থাকিবলৈ অনুৰোধ জনাইছে ।

আনহাতে, ভাৰতীয় বতৰ বিজ্ঞান বিভাগে অহা কেইদিনমান ধৰি সমগ্ৰ অসমতে ধাৰাসাৰ বৰষুণ অব্যাহত থকাৰ আগজাননী দিছে, যাৰ লগতে কেইবাখনো জিলাত বিজুলী-ঢেৰেকণি আৰু ধুমুহা বতাহৰ সম্ভাৱনা আছে । অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই সতৰ্ক কৰি দিছে যে চলিত এই বৰষুণৰ ফলত কৃত্ৰিম বান, যাতায়তত ব্যাঘাত আৰু স্পৰ্শকাতৰ অঞ্চলসমূহত ভূমিস্খলন হ’ব পাৰে ।

ইফালে বিগত ২৪ ঘণ্টাত গুৱাহাটীৰ কেইবাটাও অঞ্চলত প্ৰবল বৰষুণ হোৱা পৰিলক্ষিত হৈছে । এই ভয়াৱহ পৰিস্থিতিৰ মাজতে ১৯ এপ্ৰিলৰ নিশা প্ৰবল কৃত্ৰিম বানৰ ফলত এটি পথৰ দাঁতিৰ মুকলি নলাত পৰি পায়েল নাথ নামৰ এগৰাকী মহিলাৰ মৃত্যু হয় । গুৱাহাটী মহানগৰ আৰক্ষী আৰু ৰাজ্যিক দুৰ্যোগ সঁহাৰি বাহিনীৰ উদ্ধাৰকাৰী দলে এক তালাচী অভিযান চলায় আৰু পাছত ঘটনাস্থলীৰ পৰা প্ৰায় ১৫০ মিটাৰ দূৰত তেওঁৰ মৃতদেহ উদ্ধাৰ কৰা হয় ।

অহা কেইদিনমানলৈ প্ৰতিকূল বতৰ অব্যাহত থকাৰ সম্ভাৱনা থকাৰ বাবে কৰ্তৃপক্ষই সকলোকে সতৰ্ক হৈ থাকিবলৈ আহ্বান জনাইছে ।

লগতে পঢ়ক : পুৱাই ৰাজ্যত ভূমিকম্পৰ জোকাৰণি