সাৱধান, যোৰাবাটত পুনৰ কৃত্ৰিম বান । বহুসময় ধৰি আৱদ্ধ শ শ যান-বাহন ।

-পুনৰ প্ৰচণ্ড বানত বুৰিল যোৰাবাট

-মুষলধাৰ বৰষুণত হো-হোৱাই নামিছে পানী

-মুহূৰ্তৰ ভিতৰতে বুৰ গৈছে ৰাজপথ

-ন মাইল, দহ মাইল , যোৰাবাটত ভয়াবহ কৃত্ৰিম বান

-ব্যাহত হৈ পৰিছে উজনি-নামনিৰ যাতায়াত

-ভয়ংকৰ বান পৰিস্থিতিৰ মাজতে যোৰাবাটত নিশা প্ৰচণ্ড যান-জঁট

-বহুসময় ধৰি আৱদ্ধ শ শ যান বাহন

-উজনি-নামনি দুযো ফালৰ পৰাই আৱদ্ধ হৈছে যান-বাহন

-হাহাকাৰ পৰিস্থিতি

-এজাক বৰষুণতে বানত ডুব গৈছে যোৰাবাট

লগতে পঢ়ক : যোৰাবাটত ভয়ংকৰ কৃত্ৰিম বান, পৃথক পথ নিৰ্দেশনা জাৰি মহানগৰ প্ৰশাসনৰ

প্ৰবল বৰষুণকো নেওচি উত্তৰ গুৱাহাটীত হাজাৰ হাজাৰ ভক্তৰ অংশগ্ৰহণেৰে ১৪ সংখ্যক শ্ৰী জগন্নাথ ৰথযাত্ৰা সম্পন্ন

প্ৰতিকূল বতৰকো নেওচি এক অপূৰ্ব আধ্যাত্মিক পৰিৱেশৰ মাজত উত্তৰ গুৱাহাটীত সফলতাৰে উদযাপিত হ’ল ১৪তম শ্ৰী জগন্নাথ ৰথযাত্ৰা মহোৎসৱ । ‘হৰে কৃষ্ণ মুভমেণ্ট’, উত্তৰ গুৱাহাটীৰ উদ্যোগত আয়োজিত এই মহোৎসৱত হাজাৰ হাজাৰ ভক্তই অংশগ্ৰহণ কৰি শ্ৰীজগন্নাথদেৱ, শ্ৰী বলদেৱ আৰু দেৱী সুভদ্ৰাৰ আশীৰ্বাদ গ্ৰহণ কৰে ।

ধাৰাষাৰ বৰষুণ সত্ত্বেও ভক্তসকলৰ উৎসাহ আৰু ভক্তিভাৱত অকণো যতি পৰা দেখা নগ’ল । বৰঞ্চ বহু ভক্তই এই বৰষুণক ভগৱান জগন্নাথৰ আশীৰ্বাদ হিচাপেহে গ্ৰহণ কৰে । আবাল-বৃদ্ধ-বনিতা সকলোৱে হৰিনাম সংকীৰ্তন আৰু হৰে কৃষ্ণ মহামন্ত্ৰৰ ধ্বনিৰে আকাশ-বতাহ কঁপাই সুসজ্জিত ৰথ টানি অগ্ৰসৰ হয় ।

বিশিষ্ট ব্যক্তিসকলৰ উপস্থিতি আৰু পৱিত্ৰ শোভাযাত্ৰা:

এই পৱিত্ৰ অনুষ্ঠানত গুৱাহাটী বিশ্ববিদ্যালয়ৰ অধ্যাপক তথা বিশিষ্ট শিক্ষাবিদ শ্ৰী ননী গোপাল মহন্ত, শ্ৰী অজয় পোদ্দাৰ আৰু কামৰূপ জিলাৰ উপায়ুক্ত শ্ৰী দেব মিশ্ৰকে ধৰি বহু গণ্যমান্য ব্যক্তি, শুভাকাংক্ষী তথা বিশিষ্ট ভক্তপ্ৰাণ ৰাইজ উপস্থিত থাকে ।

ৰথযাত্ৰাৰ পৱিত্ৰ শোভাযাত্ৰা উত্তৰ গুৱাহাটীস্থিত হৰে কৃষ্ণ মন্দিৰৰ পৰা আৰম্ভ হৈ ঐতিহাসিক শ্ৰীশ্ৰী দৌল গোবিন্দ মন্দিৰলৈ গতি কৰে । সমগ্ৰ যাত্ৰাপথ ভক্তিৰসেৰে বুৰ গৈ পৰে । উৎসৱ উপলক্ষে সমবেত হোৱা হাজাৰ হাজাৰ ভক্তৰ মাজত মহাপ্ৰসাদো বিতৰণ কৰা হয় ।

‘শান্তি আৰু ঐক্যৰ বাৰ্তা’ – উদ্যোক্তা মণ্ডলী:

সমগ্ৰ অনুষ্ঠানটি শান্তিপূৰ্ণ আৰু আধ্যাত্মিক গাম্ভীৰ্যৰে সম্পন্ন কৰাত সহায়-সহযোগিতা কৰা অসম চৰকাৰ, কামৰূপ জিলা প্ৰশাসন, আৰক্ষী বিভাগ, স্বেচ্ছাসেৱক বাহিনী, দাতা, সংবাদ মাধ্যম আৰু স্থানীয় ৰাইজৰ প্ৰতি হৰে কৃষ্ণ মুভমেণ্টে আন্তৰিক কৃতজ্ঞতা জ্ঞাপন কৰিছে ।

মহোৎসৱ সন্দৰ্ভত হৰে কৃষ্ণ মন্দিৰৰ সভাপতি শ্ৰী জনাৰ্দন দাসে কয়—

“শ্ৰী জগন্নাথ ৰথযাত্ৰা বিশ্বৰ অন্যতম প্ৰাচীন আৰু আটাইতকৈ শ্ৰদ্ধাৰ আধ্যাত্মিক উৎসৱ । এই উৎসৱে সমাজলৈ শান্তি, দয়া, ঐক্য আৰু ভক্তিৰ চিৰন্তন বাৰ্তা কঢ়িয়াই আনে । এই বাৰ্ষিক মহোৎসৱৰ জৰিয়তে হৰে কৃষ্ণ মুভমেণ্টে কৃষ্ণভাৱনামৃতৰ প্ৰচাৰ আৰু সমাজত আধ্যাত্মিক তথা নৈতিক মূল্যবোধ বিস্তাৰ কৰাৰ বাবে অহৰহ প্ৰয়াস চলাই আহিছে ।”

লগতে পঢ়ক : বলীউডত জিলিকিব লাচিতৰ বীৰগাথা! নিৰ্মাণ হ’ব বিগ বাজেটৰ ছবি

অহা ২-৩ দিনৰ বাবে গুৱাহাটী আৰু ইয়াৰ সমীপৱৰ্তী এলেকাসমূহত বজ্ৰপাতৰ সৈতে মধ্যমীয়াৰ পৰা ধাৰাষাৰ বৰষুণ হোৱাৰ সম্ভাৱনা ব্যক্ত কৰি এক সতৰ্কবাণী জাৰি কৰা হৈছে

মহানগৰী গুৱাহাটীসহ ইয়াৰ কাষৰীয়া অঞ্চলসমূহৰ বাবে আহিছে এক গুৰুত্বপূৰ্ণ বতৰৰ খবৰ । ভাৰতীয় বতৰ বিজ্ঞান বিভাগে (IMD) অহা ২-৩ দিনৰ বাবে গুৱাহাটী আৰু ইয়াৰ সমীপৱৰ্তী এলেকাসমূহত বজ্ৰপাতৰ সৈতে মধ্যমীয়াৰ পৰা ধাৰাষাৰ বৰষুণ হোৱাৰ সম্ভাৱনা ব্যক্ত কৰি এক সতৰ্কবাণী জাৰি কৰিছে ।

অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ (ASDMA) তৰফৰ পৰা প্ৰকাশ কৰা এক চৰকাৰী বিবৃতিত কোৱা হৈছে যে ৰাজধানী চহৰখন আৰু ইয়াৰ আশেকাপাশে অহা ৪৮ ৰ পৰা ৭২ ঘণ্টাত নেৰানেপেৰা বৰষুণ অব্যাহত থাকিব পাৰে । বতৰ বিজ্ঞান বিভাগৰ অনুমান অনুসৰি, এই সময়ছোৱাত ২৪ ঘণ্টাত প্ৰায় ৬ ৰ পৰা ১২ চেণ্টিমিটাৰ পৰ্যন্ত মধ্যমীয়াৰ পৰা ধাৰাষাৰ বৰষুণ হোৱাৰ সম্ভাৱনা আছে । ধাৰাষাৰ বৰষুণৰ লগতে প্ৰচণ্ড বিজুলী-ঢেৰেকণি আৰু বজ্ৰপাতো হ’ব পাৰে ।

হ’ব পাৰে কৃত্ৰিম বান আৰু ভূমিস্খলন

প্ৰাধিকৰণে সকীয়াই দিছে যে এই ধাৰাষাৰ বৰষুণৰ ফলত গুৱাহাটীৰ বিভিন্ন স্থানত তীব্ৰ কৃত্ৰিম বান আৰু হঠাতে অহা বান আদি সমস্যাই দেখা দিব পাৰে । ইয়াৰ ফলত ৰাজপথত যান-বাহন চলাচল ব্যাহত হোৱাৰ লগতে স্পৰ্শকাতৰ আৰু পাহাৰীয়া এলেকা সমূহত স্থানীয়ভাৱে ভূমিস্খলন হোৱাৰো তীব্ৰ আশংকা আছে । সমগ্ৰ পৰিস্থিতিৰ প্ৰতি লক্ষ্য ৰাখি জিলা কৰ্তৃপক্ষ আৰু ASDMA-ই ক্ষিপ্ৰ পৰ্যবেক্ষণ চলাই আছে আৰু যিকোনো জৰুৰীকালীন পৰিস্থিতিৰ মুখামুখি হ’ব পৰাকৈ সঁহাৰি ব্যৱস্থাসমূহ সাজু কৰি ৰখা হৈছে ।

সজাগ আৰু সতৰ্ক থাকিবলৈ ৰাইজক আহ্বান

পৰিস্থিতিৰ গুৰুত্ব বিবেচনা কৰি ASDMA-ই গুৱাহাটীৰ বাসিন্দাসকলক যাৱতীয় সাৱধানতা অৱলম্বন কৰিবলৈ আৰু সতৰ্ক হৈ থাকিবলৈ আহ্বান জনাইছে । বিশেষকৈ তলত উল্লেখ কৰা নিৰ্দেশনাসমূহ মানি চলিবলৈ অনুৰোধ জনোৱা হৈছে :

যাত্ৰীসকলৰ বাবে: দৈনিক যাতায়াত কৰা লোক আৰু দূৰণিবটীয়া যাত্ৰীসকলক বতৰৰ অৱস্থা চাইহে যাত্ৰাৰ সময়সূচী তৈয়াৰ কৰিবলৈ কোৱা হৈছে । প্ৰচণ্ড বৰষুণৰ সময়ত প্ৰয়োজন নহ’লে ঘৰৰ পৰা নোলাবলৈ আহ্বান জনোৱা হৈছে ।

দ আৰু পাহাৰীয়া অঞ্চলৰ বাসিন্দা: নামনি বা দ অঞ্চল আৰু পাহাৰীয়া অঞ্চলত বসবাস কৰা লোকসকলক বান বা ভূমিস্খলনৰ যিকোনো লক্ষণ দেখা পালেই তৎকালিনভাৱে সতৰ্ক হ’বলৈ কোৱা হৈছে ।

বতৰৰ আপডেটৰ বাবে চৰকাৰী মাধ্যমৰ সহায় লওক

প্ৰাধিকৰণে জনোৱা মতে, সাধাৰণ ৰাইজৰ সজাগতাৰ বাবে বতৰ আৰু বান পৰিস্থিতিৰ শেহতীয়া তথ্যসমূহ সময়মতে ASDMA-ৰ অফিচিয়েল ৱেবছাইট asdma.assam.gov.in, asdma.assam.gov.in আৰু ইয়াৰ আটাইকেইটা ছচিয়েল মিডিয়া একাউণ্টত আপডেট কৰা হ’ব । এই দীৰ্ঘদিনীয়া বৰষুণৰ সময়ছোৱাত নিজৰ সুৰক্ষা নিশ্চিত কৰিবলৈ ৰাইজক যিকোনো উৰাবাতৰিত ভোল নগৈ চৰকাৰী বতৰৰ আপডেটৰ সৈতে জড়িত থাকিবলৈ আৰু প্ৰশাসনৰ নীতি-নিৰ্দেশনাসমূহ নিষ্ঠাৰে পালন কৰিবলৈ আহ্বান জনোৱা হৈছে ।

লগতে পঢ়ক : আকৌ দিছে বৰষুণ, মহানগৰীত হাহাকাৰ পৰিস্থিতি!