শনিবাৰে সন্ধিয়া হোৱা প্ৰবল বৰষুণজাকৰ পিছৰে পৰা চহৰখনৰ কেইবাটাও অংশ কৃত্ৰিম বানৰ কৱলত পৰে
দেওবাৰে হোৱা ধাৰাসাৰ বৰষুণৰ ফলত গুৱাহাটী মহানগৰীৰ স্বাভাৱিক জনজীৱন পুনৰ ব্যাহত হৈ পৰিছে । বিশেষকৈ চহৰখনৰ ৯ মাইল আৰু ১০ মাইল এলেকাত তীব্ৰ কৃত্ৰিম বানৰ সৃষ্টি হৈছে । ৰাস্তাত পানী জমা হোৱাৰ বাবে সৃষ্টি হোৱা যান-জঁট নিয়ন্ত্ৰণ কৰিবলৈ আৰু যাত্ৰীসকলৰ সুৰক্ষা নিশ্চিত কৰাৰ স্বাৰ্থত প্ৰশাসনে কেইবাটাও গুৰুত্বপূৰ্ণ পথ সলনি কৰিছে ।
ক’ত ক’ত সলনি কৰা হৈছে যান-বাহনৰ পথ?
প্ৰশাসনৰ তৰফৰ পৰা জনোৱা মতে, গুৱাহাটী চহৰৰ দিশে আহিবলগীয়া লঘু যান-বাহন সমূহক ডিগাৰু হৈ প্ৰৱেশৰ নিৰ্দেশ দিয়া হৈছে । একেদৰে, চহৰৰ পৰা ওলাই যোৱা বাহনসমূহক কইনাধৰা পইণ্টৰ পৰা ঘূৰাই দিয়া হৈছে । গুৱাহাটীৰ পৰা বাহিৰলৈ যাবলগীয়া যাত্ৰীসকলক পানীৰে বুৰ গৈ থকা মূল পথ আৰু যান-জঁট পৰিহাৰ কৰিবলৈ বিকল্প হিচাপে নাৰেংগী পথ ব্যৱহাৰ কৰিবলৈ পৰামৰ্শ দিয়া হৈছে ।
কৃত্ৰিম বানৰ কৱলত মহানগৰী
শনিবাৰে সন্ধিয়া হোৱা প্ৰবল বৰষুণজাকৰ পিছৰে পৰা চহৰখনৰ কেইবাটাও অংশ কৃত্ৰিম বানৰ কৱলত পৰে । বাৰিষাৰ সময়ছোৱাত গুৱাহাটীৰ বাবে ই এক ডাঙৰ প্ৰত্যাহ্বান হৈ পৰিছে । এই কৃত্ৰিম বানৰ বাবে স্থানীয় বাসিন্দাসকল চৰম অসুবিধাৰ সন্মুখীন হৈছে আৰু মুখ্য পথসমূহত যান-বাহন চলাচল প্ৰায় স্তব্ধ হৈ পৰিছে ।
বতৰ বিজ্ঞান বিভাগৰ সতৰ্কবাণী: জাৰি ‘অৰেঞ্জ এলাৰ্ট’
পৰিস্থিতি অনাগত সময়ত অধিক জটিল হোৱাৰ সম্ভাৱনা আছে । ভাৰতীয় বতৰ বিজ্ঞান বিভাগে (IMD) অহা কেইটামান ঘণ্টাত ধাৰাসাৰ বৰষুণৰ সম্ভাৱনা প্ৰকাশ কৰি মহানগৰীত ‘অৰেঞ্জ এলাৰ্ট’ জাৰি কৰিছে । বতৰৰ পূৰ্বানুমান অনুসৰি ধাৰাবাহিকভাৱে বৰষুণ হোৱাৰ সম্ভাৱনা ৫০ শতাংশতকৈও অধিক । ইয়াৰ ফলত পথত অধিক পানী জমা হোৱা আৰু যান-বাহন চলাচলত অধিক ব্যাঘাত জন্মাৰ আশংকা বৃদ্ধি পাইছে ।
প্ৰশাসনৰ আহ্বান: সাৱধানতা অৱলম্বন কৰক
কৰ্তৃপক্ষই সমগ্ৰ পৰিস্থিতিৰ ওপৰত তীক্ষ্ণ নজৰ ৰাখিছে আৰু মহানগৰবাসীক যাত্ৰা কৰাৰ সময়ত বিশেষ সাৱধানতা অৱলম্বন কৰিবলৈ আহ্বান জনাইছে । পৰিস্থিতি স্বাভাৱিক নোহোৱালৈকে জনসাধাৰণক পানী জমা হোৱা এলেকাসমূহ পৰিহাৰ কৰিবলৈ, যাত্ৰাৰ পৰিকল্পনা আগতীয়াকৈ কৰিবলৈ আৰু চৰকাৰী যান-বাহন নিৰ্দেশনাৱলী কঠোৰভাৱে মানি চলিবলৈ অনুৰোধ জনোৱা হৈছে ।
লগতে পঢ়ক : যোৰাবাটত ভয়ংকৰ কৃত্ৰিম বান, সাগৰসদৃশ পৰিৱেশ
