ফিফা বিশ্বকাপ ২০২৬ এতিয়া একেবাৰে অন্তিম পৰ্যায়ত উপনীত হৈছেহি
৪৮ টা দলেৰে আৰম্ভ হোৱা ফিফা বিশ্বকাপ ২০২৬ (FIFA World Cup 2026) এতিয়া একেবাৰে অন্তিম পৰ্যায়ত উপনীত হৈছেহি । তীব্ৰ উত্তেজনাপূৰ্ণ কোৱাৰ্টাৰ ফাইনেলৰ খেলসমূহ সমাপ্ত হোৱাৰ পিছত এতিয়া খিতাপ দখলৰ দৌৰত মাত্ৰ ৪ টা দলহে বাকী ৰৈছে । বিশ্ব ফুটবলৰ এই চাৰি মহাশক্তি হ’ল- ফ্ৰান্স, স্পেইন, ইংলেণ্ড আৰু ডিফেণ্ডিং চেম্পিয়ন আৰ্জেণ্টিনা ।
কোৱাৰ্টাৰ ফাইনেলৰ মেচসমূহত দলকেইটাৰ প্ৰদৰ্শন আছিল অতি চমকপ্ৰদ । দেওবাৰে অনুষ্ঠিত হোৱা কোৱাৰ্টাৰ ফাইনেলত ইংলেণ্ডে নৰৱেক ২-১ গ’লত পৰাস্ত কৰি ছেমিৰ টিকট কাটে । আনহাতে, আৰ্জেণ্টিনাই চুইজাৰলেণ্ডক ৩-১ গ’লত ধূলিস্যাৎ কৰে, যদিও লিয়’নেল মেছিয়ে এই মেচত কোনো গ’ল কৰিব নোৱাৰিলে । ইয়াৰ পূৰ্বে শুকুৰবাৰে ফ্ৰান্সে মৰক্কোক ২-০ গ’লত আৰু শনিবাৰে স্পেইনে বেলজিয়ামক ২-১ গ’লত পৰাস্ত কৰি শেষ চাৰিত স্থান সুৰক্ষিত কৰিছিল ।
যদি আপুনি এজন ফুটবল প্ৰেমী আৰু ভাৰতৰ পৰা এই মেচসমূহ উপভোগ কৰিব বিচাৰে, তেন্তে আপোনাৰ বাবে লৈ অহা হৈছে দুয়োখন ছেমিফাইনেল আৰু ফাইনেল মেচৰ সম্পূৰ্ণ সময়সূচী ।
প্ৰথম ছেমিফাইনেল: ফ্ৰান্স বনাম স্পেইন
বিশ্বকাপৰ প্ৰথমখন ছেমিফাইনেলত মুখামুখি হ’ব ইউৰোপৰ দুই অন্যতম শক্তিশালী দল ফ্ৰান্স আৰু স্পেইন । এইখন এখন অতি ৰোমাঞ্চকৰ মেচ হ’ব বুলি আশা কৰা হৈছে, কিয়নো এফালে থাকিব ফ্ৰান্সৰ তাৰকা ষ্ট্ৰাইকাৰ কিলিয়ান এমবাপে আৰু আনফালে থাকিব স্পেইনৰ যুৱ বিস্ময় বালক লামিন ইয়ামাল । ভাৰতীয় সময় অনুসৰি ১৫ জুলাই (বুধবাৰ) মাজনিশা ১২:৩০ বজাত আমেৰিকাৰ টেক্সাছৰ আৰ্লিংটনত অৱস্থিত আইকনিক ‘এটি এণ্ড টি ষ্টেডিয়াম’ত (ডলাছ ষ্টেডিয়াম) এই যুঁজখন অনুষ্ঠিত হ’ব ।
দ্বিতীয় ছেমিফাইনেল: ইংলেণ্ড বনাম আৰ্জেণ্টিনা
ইফালে ১৬ জুলাই (বৃহস্পতিবাৰ) মাজনিশা আন এক হাইভল্টেজ মেচত মুখামুখি হ’ব ইংলেণ্ড আৰু আৰ্জেণ্টিনা । ভাৰতীয় সময় অনুসৰি এই মেচখনো নিশা ১২:৩০ বজাত আৰম্ভ হ’ব । বিগত বৰ্ষৰ চেম্পিয়ন আৰ্জেণ্টিনাই একেৰাহে দ্বিতীয়টো খিতাপ অৰ্জনৰ লক্ষ্যৰে পথাৰত নামিব, আনহাতে থমাছ টুচেলৰ প্ৰশিক্ষণত ইংলেণ্ড দলেও ধাৰাবাহিক ট্ৰফীৰ খৰাং অন্ত পেলাবলৈ সাজু হৈছে । জৰ্জিয়াৰ আটলাণ্টা চহৰৰ ‘মাৰ্চিডিজ-বেঞ্জ ষ্টেডিয়াম’ত (আটলাণ্টা ষ্টেডিয়াম) অনুষ্ঠিত হ’ব এই মহাৰণ ।
কেতিয়া হ’ব ২০২৬ ফিফা বিশ্বকাপৰ ফাইনেল?
ছেমিফাইনেলত বিজয়ী হোৱা দল দুটাই ২০ জুলাইত খিতাপৰ বাবে যুঁজ দিব । তাৰ পূৰ্বে ছেমিফাইনেলত পৰাজিত হোৱা দল দুটাৰ মাজত ১৯ জুলাই, ২০২৬ তাৰিখে ভাৰতীয় সময় অনুসৰি নিশা ২:৩০ বজাত ফ্ল’ৰিডাৰ মিয়ামী ষ্টেডিয়ামত তৃতীয় স্থানৰ বাবে মেচ অনুষ্ঠিত হ’ব ।
আনহাতে, সকলোৰে বহুল প্ৰত্যাশিত ফিফা বিশ্বকাপ ২০২৬-ৰ মেগা ফাইনেল মেচখন ২০ জুলাই, ২০২৬ (সোমবাৰ) তাৰিখে ভাৰতীয় সময় অনুসৰি নিশা ১২:৩০ বজাত নিউ জাৰ্চিৰ বিখ্যাত মেটলাইফ ষ্টেডিয়ামত অনুষ্ঠিত হ’ব ।
লগতে পঢ়ক : উইম্বলডনত ভাৰতীয় ক্ৰিকেটৰ তিনি প্ৰজন্ম: চিনাৰৰ প্ৰশংসাত পঞ্চমুখ মাষ্টাৰ ব্লাষ্টাৰ
