চিৰদিনৰ বাবে মৌন হ’ল কোটি কোটি হৃদয় জয় কৰা সুৰীয়া কণ্ঠ! স্তব্ধ হৈ পৰিল সংগীত জগত, শোকস্তব্ধ সমগ্ৰ দেশ ।
ভাৰতীয় সংগীত জগতৰ বাবে এক অত্যন্ত দুখদায়ক তথা মৰ্মান্তিক খবৰ । দক্ষিণ ভাৰতৰ ‘নাইটিংগেল’ (Nightingale of South India) নামেৰে সমগ্ৰ বিশ্বতে পৰিচিত তথা কোটি কোটি সংগীতপ্ৰেমীৰ হৃদয়ৰ স্পন্দন, প্ৰবীণ প্লেবেক ছিংগাৰ এছ. জানকীৰ ৮৮ বছৰ বয়সত দেহাৱসান ঘটিছে । সংগীত জগতত সকলোৰে মাজত অতি মৰম আৰু শ্ৰদ্ধাৰে ‘জানকী আম্মা’ নামেৰে জনপ্ৰিয় থকা এই মহান শিল্পীগৰাকীৰ বিয়োগত কেৱল দক্ষিণৰ চিনেমা জগততে নহয়, সমগ্ৰ ভাৰতীয় সংগীত উদ্যোগতে গভীৰ শোকৰ ছাঁ পৰিছে ।
সুৰৰ মল্লিকা আৰু স্পষ্টবাদী জানকী আম্মা
কেৱল জাদুকৰী কণ্ঠই নহয়, জানকী আম্মা তেওঁৰ স্পষ্টবাদী স্বভাবৰ বাবেও চৰ্চাত আছিল । সুদীৰ্ঘ সংগীতৰ যাত্ৰাত নিজৰ স্থিতিৰ সৈতে তেওঁ কেতিয়াও আপোচ কৰা নাছিল ।
২০১৩ চনত তেওঁ সমগ্ৰ দেশবাসীক আচৰিত কৰি ভাৰত চৰকাৰে আগবঢ়োৱা দেশৰ তৃতীয় সৰ্বোচ্চ অসামৰিক সন্মান ‘পদ্মভূষণ’ প্ৰত্যাখ্যান কৰিছিল । তেওঁৰ স্পষ্ট মত আছিল যে সংগীতলৈ তেওঁ আগবঢ়োৱা ঐতিহাসিক অৱদানৰ তুলনাত তেওঁক বহু পূৰ্বেই দেশৰ সৰ্বোচ্চ সন্মান আগবঢ়াব লাগিছিল ।
তামিলনাডুৰ মুখ্যমন্ত্ৰী বিজয়ৰ শোক প্ৰকাশ
প্ৰখ্যাত গায়িকা গৰাকীৰ মৃত্যুত গভীৰ শোক প্ৰকাশ কৰিছে তামিলনাডুৰ মুখ্যমন্ত্ৰী তথা জনপ্ৰিয় অভিনেতা বিজয়ে । সামাজিক মাধ্যমত এক পোষ্টযোগে তেওঁ কয়:
“জানকী আম্মাৰ বিয়োগত ভাৰতীয় সংগীত জগতৰ এক অপূৰণীয় ক্ষতি হ’ল । মই তেওঁৰ শোকসন্তপ্ত পৰিয়াল, চলচ্চিত্ৰ উদ্যোগ, সহ-শিল্পী আৰু বিশ্বজুৰি থকা কোটি কোটি অনুৰাগীৰ প্ৰতি গভীৰ সমবেদনা জ্ঞাপন কৰিছোঁ । তেওঁৰ অমৰ আত্মাৰ সদগতি কামনা কৰি ঈশ্বৰৰ ওচৰত প্ৰাৰ্থনা জনাইছোঁ ।”
কিয় প্ৰত্যাখ্যান কৰিছিল ‘পদ্মভূষণ’?
২০১৩ চনত যেতিয়া কেন্দ্ৰীয় চৰকাৰে এছ. জানকীক পদ্মভূষণ বঁটাৰে বিভূষিত কৰাৰ কথা ঘোষণা কৰিছিল, তেতিয়া তেওঁ সেয়া গ্ৰহণ কৰিবলৈ স্পষ্টভাৱে অস্বীকাৰ কৰিছিল । তেওঁ কৈছিল যে ভাৰতীয় সংগীতলৈ তেওঁ যি বিশাল আৰু যুগান্তকাৰী অৱদান আগবঢ়াইছে, তাৰ বাবে তেওঁ দেশৰ সৰ্বোচ্চ অসামৰিক সন্মান ‘ভাৰত ৰত্ন’ লাভ কৰিব লাগিছিল । জীৱনৰ শেষ বয়সত আহি পদ্মভূষণ গ্ৰহণ কৰাৰ কোনো অৰ্থ নাই বুলি তেওঁ ক্ষোভ প্ৰকাশ কৰিছিল ।
বঁটা আৰু সন্মানেৰে ভৰপূৰ এক সোণালী কেৰিয়াৰ
জানকী আম্মাৰ কেৰিয়াৰ আছিল সফলতাৰে পৰিপূৰ্ণ । তেওঁৰ কণ্ঠৰ যাদুৱে যিকোনো শ্ৰোতাকে মন্ত্ৰমুগ্ধ কৰিব পাৰিছিল । তেওঁ লাভ কৰা কেইটামান উল্লেখযোগ্য স্বীকৃতি হৈছে:
৪ বাৰ ৰাষ্ট্ৰীয় চলচ্চিত্ৰ বঁটা: শ্ৰেষ্ঠ কণ্ঠশিল্পী হিচাপে ৪ বাৰকৈ লাভ কৰিছিল এই সন্মানীয় বঁটা ।
৩৩ টা ৰাজ্যিক চলচ্চিত্ৰ বঁটা: ভাৰতৰ বিভিন্ন ৰাজ্য চৰকাৰৰ তৰফৰ পৰা লাভ কৰিছিল অভিলেখসংখ্যক ৩৩ টা বঁটা ।
লগতে পঢ়ক : ভাৰতত নহয়, আমেৰিকাত মুক্তি পাব ৪০০০ কোটিটকীয়া ‘ৰামায়ণ’ৰ ট্ৰেইলাৰ!
