বিশ্বকাপ ফাইনেলৰ পূৰ্বে আৱেগিক লিয়নেল মেছি
এই ঐতিহাসিক মহাৰণৰ ঠিক আগে আগে আৰ্জেণ্টিনাৰ অধিনায়ক লিয়নেল মেছিয়ে সমগ্ৰ দলটোৰ উদ্দেশ্যে প্ৰেৰণ কৰা এটা আৱেগিক বাৰ্তাই এতিয়া জোকাৰি গৈছে ছচিয়েল মিডিয়া
ফিফা বিশ্বকাপ ২০২৬-ৰ খিতাপ যুঁজত স্পেইনৰ মুখামুখি হোৱাৰ পূৰ্বে সমগ্ৰ বিশ্বৰ ফুটবল অনুৰাগীৰ চকু এতিয়া আৰ্জেণ্টিনাৰ ওপৰত । কিন্তু এই ঐতিহাসিক মহাৰণৰ ঠিক আগে আগে আৰ্জেণ্টিনাৰ অধিনায়ক লিয়নেল মেছিয়ে সমগ্ৰ দলটোৰ উদ্দেশ্যে প্ৰেৰণ কৰা এটা আৱেগিক বাৰ্তাই এতিয়া জোকাৰি গৈছে ছচিয়েল মিডিয়া । ট্ৰফী জয় কৰাতকৈও ৰাষ্ট্ৰীয় দলটোৰ সৈতে কটোৱা দীৰ্ঘদিনীয়া যাত্ৰা আৰু সম্পৰ্ককহে মেছিয়ে আটাইতকৈ গুৰুত্বপূৰ্ণ বুলি অভিহিত কৰিছে ।
খিতাপতকৈ যাত্ৰাটো শ্ৰেষ্ঠ
নিজৰ অফিচিয়েল ছচিয়েল মিডিয়া হেণ্ডেলত মেছিয়ে লিখিছে:
“এই বছৰবোৰৰ আটাইতকৈ ধুনীয়া কথাটো কেৱল খিতাপবোৰেই নাছিল, বৰঞ্চ এই গোটেই যাত্ৰাটো আছিল । এই দলটোৰ সৈতে প্ৰতিটো দিন অতিবাহিত কৰা, একেলগে সংগ্ৰাম কৰা, কঠিন সময়ত ইজনে সিজনক সহায় কৰা আৰু প্ৰতিটো পল উপভোগ কৰাটোৱেই আছিল আটাইতকৈ বিশেষ ।”
সহকৰ্মী আৰু কোচিং ষ্টাফক ধন্যবাদ
মেছিয়ে খেলপথাৰৰ যুঁজখনৰ লগতে আঁৰত থাকি অহৰহ পৰিশ্ৰম কৰা কোচিং ষ্টাফ আৰু সহযোগী কৰ্মচাৰীসকলৰ প্ৰতিও গভীৰ কৃতজ্ঞতা প্ৰকাশ কৰে । তেওঁ উল্লেখ কৰে যে আৰ্জেণ্টিনা দলটো কেৱল এটা ফুটবল দল নহয়, বৰঞ্চ এটা পৰিয়ালৰ দৰে । এই অভেদ একতায়েই দলটোৰ ধাৰাবাহিক সফলতাৰ মূল চাবিকাঠী । মেছিয়ে লিখিছে, “মোৰ সকলো সতীৰ্থ, কোচিং কৰ্মচাৰী আৰু সেই সকলো লোককে ধন্যবাদ, যিসকলে প্ৰতিদিনে এই ৰাষ্ট্ৰীয় দলটোক এটা পৰিয়াল কৰি ৰাখিবলৈ কাম কৰে ।”
‘ফলাফল যিয়েই নহওক, আমি ইতিহাস ৰচনা কৰিলোঁ’
মেগা ফাইনেলৰ পূৰ্বে জয়-পৰাজয়ৰ স্বাৰ্থপৰ অংকৰ উৰ্ধলৈ গৈ মেছিয়ে কয় যে এই দলটোৱে ইতিমধ্যে ফুটবলৰ ইতিহাসত নিজৰ নাম স্বৰ্ণাক্ষৰে লিখি থৈছে । ফাইনেল খেলখনৰ ফলাফলক লৈ তেওঁ চিন্তিত নহয় । বাৰ্তাটোৰ শেষৰফালে তেওঁ লিখিছে, “ফাইনেলত যিয়েই নহওক কিয়, এই দলটোৱে এনে এক কাহিনী লিখি থৈছে যাৰ কথা আমি কেতিয়াও পাহৰি নাযাম আৰু যাক কোনেও মচি পেলাব নোৱাৰিব ।”
অনুৰাগীৰ মাজত বিদায়ৰ গুণগুণনি, আৱেগিক পত্নী এণ্টোনেলা
মেছিৰ এই প’ষ্টটো মুহূৰ্তৰ ভিতৰত ভাইৰেল হৈ পৰে আৰু সমগ্ৰ বিশ্বৰ কোটি কোটি অনুৰাগীয়ে মেছিক শুভেচ্ছা জ্ঞাপন কৰে । অৱশ্যে, এই আৱেগিক বাৰ্তাটোৱে অনুৰাগীসকলৰ মনত এক আশংকাৰো সৃষ্টি কৰিছে । বহুতেই ধাৰণা কৰিছে যে এয়া মেছিৰ আন্তঃৰাষ্ট্ৰীয় কেৰিয়াৰৰ সামৰণিৰ এক ইংগিত হ’ব পাৰে । আনহাতে, মেছিৰ এই হৃদয়স্পৰ্শী প’ষ্টটো পঢ়ি আৱেগিক হৈ পৰিছে তেওঁৰ পত্নী এণ্টোনেলা ৰোকুজো । তেওঁ ইমোজিৰ জৰিয়তে প’ষ্টটোত নিজৰ মৰম আৰু আৱেগ প্ৰকাশ কৰা দেখা গৈছে ।
এক ঐতিহাসিক বিদায়ৰ ক্ষণ?
ফুটবল বিশেষজ্ঞসকলৰ মতে, যদি আৰ্জেণ্টিনাই ফাইনেলত স্পেইনক পৰাস্ত কৰি পুনৰ বিশ্ব চেম্পিয়ন হ’বলৈ সক্ষম হয়, তেন্তে লিয়নেল মেছিৰ ফুটবল জীৱনৰ বাবে ইয়াৰকৈ ডাঙৰ আৰু স্মৰণীয় বিদায়ৰ মুহূৰ্ত আন একো হ’ব নোৱাৰে। এতিয়া সমগ্ৰ বিশ্বই অপেক্ষা কৰিছে কাইলৈৰ সেই ঐতিহাসিক খিতাপ যুঁজখনলৈ ।
লগতে পঢ়ক : কিলিয়ান এমবাপ্পেৰ বিশ্ব অভিলেখ; গোল্ডেন বুটৰ দৌৰত মেছিক অতিক্ৰম
