হৰমুজত এখন বাণিজ্যিক জাহাজত ড্ৰোন আক্ৰমণৰ পিছতে ইৰাণৰ বিৰুদ্ধে প্ৰতিশোধমূলক সামৰিক ব্যৱস্থা গ্ৰহণ কৰিছে আমেৰিকাই।

মধ্য প্ৰাচ্যত পুনৰ উত্তেজনা চৰম সীমাত উপনীত হৈছে। হৰমুজ প্ৰণালীত এখন বাণিজ্যিক জাহাজত ড্ৰোন আক্ৰমণৰ পিছত আমেৰিকাই ইৰাণৰ বিৰুদ্ধে এক বৃহৎ সামৰিক পদক্ষেপ গ্ৰহণ কৰিছে। আমেৰিকাৰ চেণ্ট্ৰেল কমাণ্ডৰ দাবী অনুসৰি, তেওঁলোকে ইৰাণৰ বহুকেইটা সামৰিক ঘাটিত প্ৰত্যুত্তৰস্বৰূপে বিমান আক্ৰমণ চলাইছে। আমেৰিকাৰ মতে, বাণিজ্যিক জাহাজখনত হোৱা আক্ৰমণৰ প্ৰত্যুত্তৰ হিচাপে এই ব্যৱস্থা লোৱা হৈছে।

CENTCOM-এ সামাজিক মাধ্যম প্লেটফৰ্ম ‘এক্স’ত প্ৰকাশ কৰা এক বিবৃতিত কয় যে ২৬ জুনত আমেৰিকান সেনাই ইৰাণৰ বিৰুদ্ধে এই প্ৰত্যুত্তৰমূলক আক্ৰমণ চলায়। বিবৃতি অনুসৰি, ২৫ জুনত হৰমুজ প্ৰণালীৰ পৰা ওমান উপকূলৰ সমীপৱৰ্তী অঞ্চলত পাৰ হৈ যোৱা এখন বাণিজ্যিক জাহাজক লক্ষ্য কৰি চলোৱা আক্ৰমণৰ প্ৰতিক্ৰিয়া স্বৰূপে এই ব্যৱস্থা লোৱা হৈছে।

আমেৰিকান সেনাই জনোৱা মতে, তেওঁলোকে ইৰাণৰ মিছাইল আৰু ড্ৰোন সংৰক্ষণ কেন্দ্ৰৰ লগতে উপকূলীয় ৰাডাৰ ঘাটিসমূহতো আক্ৰমণ চলাইছে। আমেৰিকাৰ তথ্য অনুসৰি, ছিংগাপুৰৰ পতাকা অংকিত মালবাহী জাহাজ ‘এম/ভি এভাৰ লাভলী’ (M/V Ever Lovely) যেতিয়া হৰমুজ প্ৰণালীৰ পৰা ওলাই আছিল, তেতিয়া ইয়াক এখন একপক্ষীয় আক্ৰমণকাৰী ড্ৰোনেৰে লক্ষ্য কৰি লোৱা হৈছিল। CENTCOM-এ কয় যে বাণিজ্যিক জাহাজখনৰ ওপৰত ইৰাণী বাহিনীৰ এই আক্ৰমণ সম্পূৰ্ণৰূপে অপ্ৰৰোচিত আৰু এয়া যুদ্ধবিৰতি চুক্তিৰ স্পষ্ট উলংঘন।

CENTCOM-এ লগতে কয় যে আমেৰিকান সেনাই হৰমুজ প্ৰণালীৰে পাৰ হৈ যোৱা বাণিজ্যিক জাহাজসমূহৰ বাবে সুৰক্ষিত পথ নিশ্চিত কৰিবলৈ আৰু সমন্বয় ৰক্ষা কৰিবলৈ কাম কৰি যাব। আমেৰিকাই কয় যে ইৰাণৰ সৈতে হোৱা চুক্তিৰ সম্পূৰ্ণ পৰিপালন নিশ্চিত কৰিবলৈ তেওঁলোকৰ সেনা উক্ত অঞ্চলত সম্পূৰ্ণ সতৰ্ক অৱস্থাত মোতায়েন হৈ আছে।

আন্তঃৰাষ্ট্ৰীয় সামুদ্ৰিক সংগঠনে (IMO) পাৰস্য উপসাগৰত আৱদ্ধ জাহাজসমূহৰ প্ৰস্থান সাময়িকভাৱে বন্ধ কৰি দিছে। সংগঠনে জনাইছে যে আন জাহাজসমূহৰ সুৰক্ষাৰ গেৰাণ্টি নোপোৱালৈকে প্ৰস্থান প্ৰক্ৰিয়া পুনৰ আৰম্ভ কৰা নহ’ব। IMO-ৰ সচিব প্ৰধান আৰ্চেনিঅ’ ডমিংগুৱেজৰ মতে, শেহতীয়া দিনবোৰত প্ৰায় ১১৫ খন জাহাজে প্ৰণালীটো পাৰ হৈ গৈছে, আনহাতে প্ৰায় ৫০০ খন জাহাজ এতিয়াও সেই অঞ্চলত উপস্থিত আছে।

আমেৰিকাৰ ৰাষ্ট্ৰপতি ড’নাল্ড ট্ৰাম্পে ইয়াৰ পূৰ্বে হৰমুজ প্ৰণালীত মালবাহী জাহাজত হোৱা আক্ৰমণক যুদ্ধবিৰতি চুক্তিৰ এক মূৰ্খামিভৰা উলংঘন বুলি অভিহিত কৰে। ট্ৰাম্পে ‘ট্ৰুথ ছ’চিয়েল’ত লিখে যে জাহাজখনৰ ফালে নিক্ষেপ কৰা চাৰিটা ড্ৰোনৰ ভিতৰত এটাই তাৰ ওপৰৰ অংশত ক্ষতিসাধন কৰে, কিন্তু জাহাজখনে তাৰ যাত্ৰা অব্যাহত ৰখাত সফল হয়। তেওঁ কয় যে আমেৰিকান সেনাই বাকী তিনিটা ড্ৰোন গুলীয়াই মাৰিবলৈ সক্ষম হয়।

শুক্ৰবাৰে অ’ভেল অফিচত সাংবাদিকৰ সৈতে হোৱা কথা-বতৰাৰ সময়ত ট্ৰাম্পক প্ৰশ্ন কৰা হৈছিল যে শেহতীয়া ড্ৰোন আক্ৰমণৰ পিছত ইৰাণে কিবা পৰিণাম ভুগিব লাগিব নেকি। ইয়াৰ উত্তৰত তেওঁ কয়, “আপোনালোকে অতি সোনকালেই জানিব পাৰিব।” ট্ৰাম্পে কয় যে ইৰাণে জাহাজখনত আক্ৰমণ কৰাৰ প্ৰচেষ্টা চলোৱাটো তেওঁৰ মুঠেই ভাল লগা নাই। তেওঁ কয়, “তেওঁলোকে চাৰিটা ড্ৰোন পঠিয়াইছিল, তাৰে তিনিটা আমি ধ্বংস কৰিলো। তেওঁলোকে এনে কৰা উচিত নাছিল। এতিয়া আগলৈ কি হ’ব, সেয়া আপোনালোকে অতি সোনকালে জানিব পাৰিব।”

লগতে পঢ়ক: হৰমুজ প্ৰণালীৰ মাজেৰে পাৰ হৈ যোৱা জাহাজত ইৰাণৰ ড্ৰ’ন আক্ৰমণ; ট্ৰাম্পৰ পুনৰ সতৰ্কবাণী

ড’নাল্ড ট্ৰাম্পৰ ইৰাণ নীতিৰ বিৰুদ্ধে আমেৰিকাৰ চেনেটে এক প্ৰস্তাৱ গৃহীত কৰিছে।ইয়াৰ পৰা পোনপটীয়াকৈ বুজা যায় আমেৰিকাৰ ৰাষ্ট্ৰপতিৰ বিৰুদ্ধে আমেৰিকাত মতামত গঢ় লৈ উঠিছে।

আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ইৰাণ নীতিক লৈ আমেৰিকাত  পুনৰ এবাৰ তীব্ৰ বিতৰ্কৰ সূচনা হৈছে। মাৰ্কিন চিনেটে ট্ৰাম্প প্ৰশাসনক ইৰাণৰ বিৰুদ্ধে সামৰিক অভিযান সমাপ্ত কৰিবলৈ দাবী জনাই এটা প্ৰস্তাৱ গ্ৰহণ কৰিছে। যদিও এই প্ৰস্তাৱৰ কোনো আইনী বাধ্যবাধকতা নাই, তথাপিও ইয়াক ৱাইট হাউচৰ সামৰিক ৰণনীতিৰ বিৰুদ্ধে মাৰ্কিন সংসদ ‘কংগ্ৰেছ’ৰ বৰ্ধিত অসন্তুষ্টি আৰু ৰাজনৈতিক চাপ হিচাপে চোৱা হৈছে।

চিনেটত এই প্ৰস্তাৱটো ৫০-৪৮ ৰ এক কঠিন ব্যৱধানত গৃহীত হয়। প্ৰস্তাৱটোত কোৱা হৈছে যে যদিহে মাৰ্কিন সেনাই ইৰাণৰ বিৰুদ্ধে যিকোনো ধৰণৰ সামৰিক কাৰ্যকলাপ অব্যাহত ৰাখে, তেন্তে তাৰ বাবে কংগ্ৰেছৰ স্পষ্ট অনুমতিৰ প্ৰয়োজন হ’ব। যেতিয়ালৈকে কংগ্ৰেছে আনুষ্ঠানিকভাৱে সামৰিক শক্তি প্ৰয়োগৰ অনুমতি নিদিয়ে, তেতিয়ালৈকে ৰাষ্ট্ৰপতিয়ে ইৰাণৰ সৈতে জড়িত সামৰিক অভিযানৰ পৰা মাৰ্কিন বাহিনীক প্ৰত্যাহাৰ কৰিব লাগে।

এই প্ৰস্তাৱটো ইয়াৰ পূৰ্বে মাৰ্কিন প্ৰতিনিধি সভা (হাউচ অৱ ৰিপ্ৰেজেন্টেটিভচ)তো গৃহীত হৈছিল। দুয়োটা সদনতে এই প্ৰস্তাৱ অনুমোদিত হোৱাটোৱে এই সংকেত প্ৰদান কৰে যে ডেম’ক্ৰেট আৰু ৰিপাব্লিকান দুয়োটা দলৰে কেইবাগৰাকীও সাংসদে ৰাষ্ট্ৰপতিৰ যুদ্ধ সম্পৰ্কীয় ক্ষমতাক লৈ গুৰুতৰ প্ৰশ্ন উত্থাপন কৰিছে।

যিহেতু এই প্ৰস্তাৱটো ১৯৭৩ চনৰ ‘ৱাৰ পাৱাৰ্চ এক্ট’ (War Powers Act)-ৰ অধীনত গৃহীত কৰা হৈছে, সেয়েহে ইয়াত ৰাষ্ট্ৰপতিৰ স্বাক্ষৰৰ প্ৰয়োজন নাই আৰু ই আইনৰ ৰূপো নলয়। এই কাৰণেই প্ৰশাসনৰ ওপৰত ইয়াৰ কোনো প্ৰত্যক্ষ আইনী প্ৰভাৱ নপৰিব। ৱাইট হাউচে ইতিপূৰ্বে এই প্ৰস্তাৱটোক অসাংবিধানিক বুলি অভিহিত কৰি কৈছে যে ৰাষ্ট্ৰপতিৰ সাংবিধানিক অধিকাৰক এইদৰে সীমিত কৰিব নোৱাৰি।

প্ৰস্তাৱটো সমৰ্থন কৰা সাংসদসকলৰ মতে, আমেৰিকাক কোনো দীৰ্ঘম্যাদী সামৰিক সংঘাতত লিপ্ত কৰাৰ অধিকাৰ কেৱল ৰাষ্ট্ৰপতিৰ হাতত থাকিব নালাগে। তেওঁলোকৰ যুক্তি হ’ল যে সংবিধান অনুসৰি যুদ্ধ বা দীৰ্ঘদিনীয়া সামৰিক অভিযানৰ সিদ্ধান্ত কংগ্ৰেছৰ সন্মতিৰ হে হ’ব লাগে। সংসদীয় স্বীকৃতি অবিহনে সামৰিক ব্যৱস্থা গ্ৰহণ কৰিলে আমেৰিকা এক বৃহৎ আঞ্চলিক সংঘাতত সোমাই পৰিব পাৰে, যাৰ প্ৰভাৱ সমগ্ৰ পশ্চিম এছিয়াৰ সুস্থিৰতাৰ ওপৰত পৰিব বুলি সাংসদসকলে আশংকা প্ৰকাশ কৰিছে।  আনহাতে, ট্ৰাম্প প্ৰশাসনৰ মতে, ৰাষ্ট্ৰীয় নিৰাপত্তা আৰু মাৰ্কিন স্বাৰ্থ ৰক্ষাৰ বাবে প্ৰয়োজনীয় পৰিস্থিতিত সামৰিক ব্যৱস্থা গ্ৰহণ কৰাৰ সাংবিধানিক অধিকাৰ ৰাষ্ট্ৰপতিৰ আছে। প্ৰশাসনে দাবী কৰিছে যে বৰ্তমানৰ পৰিস্থিতিত ৰাষ্ট্ৰপতিয়ে গ্ৰহণ কৰা পদক্ষেপসমূহ সম্পূৰ্ণ সাংবিধানিক আৰু ইয়াৰ বাবে কোনো অতিৰিক্ত সংসদীয় অনুমতিৰ প্ৰয়োজন নাই।

ইয়াৰ মাজতে ট্ৰাম্প প্ৰশাসনে ইৰাণৰ সৈতে এক বিতং শান্তি চুক্তি ৰূপায়ণৰ দিশত আগবাঢ়িছে। দুয়োখন দেশৰ মাজত চুক্তিক লৈ সহমত প্ৰকাশ পাইছে আৰু শেহতীয়াকৈ চুইজাৰলেণ্ডৰ জেনেভাত এই সন্দৰ্ভত এক গুৰুত্বপূৰ্ণ বৈঠক অনুষ্ঠিত হৈ গৈছে। বৰ্তমান দুয়োখন দেশৰ মাজত যুদ্ধবিৰতি বাহাল আছে আৰু কেইবাটাও বিষয়ত দুয়োপক্ষই সন্মতি প্ৰকাশ কৰিছে।

ৰাজনৈতিক বিশ্লেষকসকলৰ মতে, এই প্ৰস্তাৱটো আইনীভাৱে বাধ্যতামূলক নহ’লেও ইয়াৰ ৰাজনৈতিক গুৰুত্ব বহুত বেছি। ইয়াৰ পৰা স্পষ্ট হৈ পৰে যে মাৰ্কিন সংসদত ৰাষ্ট্ৰপতিৰ ইৰাণ নীতিক লৈ মতানৈক্য বৃদ্ধি পাইছে আৰু কংগ্ৰেছে ভৱিষ্যতে যুদ্ধ সম্পৰ্কীয় সিদ্ধান্তত নিজৰ ভূমিকা অধিক শক্তিশালী কৰিব বিচাৰে।

চিনেট আৰু প্ৰতিনিধি সভা দুয়োটাতে প্ৰস্তাৱটো গৃহীত হোৱাটোৱে এই কথাও সূচাইছে যে আমেৰিকাত যুদ্ধ সম্পৰ্কীয় সাংবিধানিক অধিকাৰক লৈ বিতৰ্ক পুনৰ তীব্ৰতৰ হৈ পৰিছে। অনাগত দিনত যদি ইৰাণৰ সৈতে উত্তেজনা বৃদ্ধি পায় বা সামৰিক কাৰ্যকলাপ দীঘলীয়া হয়, তেন্তে অধিকাৰক লৈ কংগ্ৰেছ আৰু ৱাইট হাউচৰ মাজত সংঘাত আৰু অধিক ঘনীভূত হ’ব পাৰে।

লগতে পঢ়ত; ব্ৰিটেইনৰ ৰাজনীতিত ধুমুহা : ১০ বছৰত সলনি হ’ল ৬ গৰাকী প্ৰধানমন্ত্ৰী

আমেৰিকা আৰু ইৰাণৰ মাজত শান্তি সন্দৰ্ভত ছুইজাৰলেণ্ডত অনুষ্ঠিত হোৱা বৈঠকৰ অন্ত পৰিছে।

চুইজাৰলেণ্ডত আমেৰিকা আৰু ইৰাণৰ মাজত প্ৰথম পৰ্যায়ৰ বৈঠক সমাপ্ত হৈছে। কাটাৰৰ বৈদেশিক মন্ত্ৰালয়ে এই কথা সদৰী কৰিছে। বৈদেশিক মন্ত্ৰালয়ে জনোৱা মতে, কাটাৰ আৰু পাকিস্তানৰ মধ্যস্থতাত চুইজাৰলেণ্ডত এই আলোচনা আৰম্ভ হয়। এটা আনুষ্ঠানিক বিবৃতিত মন্ত্ৰালয়ে আশা প্ৰকাশ কৰে যে “এই বৈঠকসমূহৰ পৰিণতিত এক ব্যাপক আৰু স্থায়ী চুক্তি হ’ব, য’ত ‘মেম’ৰেণ্ডাম অৱ আণ্ডাৰষ্টেণ্ডিং’ (বুজাবুজিৰ চুক্তি)-ত অন্তৰ্ভুক্ত সকলো দিশৰ ওপৰত আলোচনা কৰা হ’ব”।

মন্ত্ৰালয়ৰ বিবৃতিত কোৱা হৈছে যে “চূড়ান্ত চুক্তিৰ চৰ্তসমূহৰ ওপৰত আলোচনা কৰিবলৈ বিশেষ কাৰিকৰী আৰু বিশেষজ্ঞ গোট গঠন কৰা হৈছে, যিয়ে আমেৰিকা আৰু ইৰাণৰ মাজৰ ‘মেম’ৰেণ্ডাম অৱ আণ্ডাৰষ্টেণ্ডিং’ৰ সকলো দিশ সামৰি ল’ব”। এই গাঁথনিৰ অধীনত নিৰ্ধাৰণ কৰা চৰ্তসমূহৰ ওপৰত নিৰীক্ষণ বজাই ৰাখিবলৈ, কূটনৈতিক আপডেটত জনোৱা হৈছে যে অতিৰিক্ত নিৰীক্ষণ সংস্থা গঠন কৰা হৈছে। ইয়াত লগতে কোৱা হৈছে, “ইয়াৰ উপৰি, বুজাবুজি চুক্তিৰ ৰূপায়ণৰ তদাৰক কৰিবলৈ, হোৱা প্ৰগতিৰ ওপৰত চকু ৰাখিবলৈ আৰু চূড়ান্ত চুক্তিত উপনীত হোৱাৰ দিশত কাম কৰিবলৈ অনুবৰ্তন গোট গঠন কৰা হৈছে।”

কাটাৰৰ কূটনৈতিক সূত্ৰই এই কথাৰ ওপৰত গুৰুত্ব আৰোপ কৰিছে যে বৰ্তমানৰ প্ৰগতিয়ে “এক ব্যাপক আৰু বহনক্ষম চুক্তিত উপনীত হোৱাৰ উদ্দেশ্যেৰে সকলো পক্ষৰ সজ মনোভাৱেৰে আলোচনাৰ প্ৰক্ৰিয়াত আগবাঢ়ি যোৱাৰ প্ৰতিশ্ৰুতিক প্ৰতিফলিত কৰে।” নিজৰ যুটীয়া মধ্যস্থতাৰ প্ৰচেষ্টা অব্যাহত ৰখাৰ কথা নিশ্চিত কৰি মন্ত্ৰালয়ে লগতে কয় যে কাটাৰে পাকিস্তান আৰু “সকলো সংশ্লিষ্ট পক্ষৰ সৈতে মিলি এক ইতিবাচক পৰিৱেশ গঢ়ি তোলাৰ বাবে কাম কৰি যাব, যাতে আলোচনাই নিজৰ লক্ষ্যত উপনীত হ’ব পাৰে। কাটাৰৰ দৃঢ় বিশ্বাস যে আলোচনা আৰু কূটনীতিয়েই সংঘাত আৰু বিবাদ সমাধানৰ সৰ্বোত্তম উপায়।”

এই ঘোষণা এনে এটা সময়ত আহিছে যেতিয়া দেওবাৰে বাৰ্গেনষ্টক ৰিজৰ্টত আমেৰিকা আৰু ইৰাণৰ উচ্চ পৰ্যায়ৰ প্ৰতিনিধি দল উপস্থিত হোৱাৰ পিছত ব্যাপক কূটনৈতিক প্ৰচেষ্টাই যথেষ্ট গতি লাভ কৰিছে। এই কাৰিকৰী পৰ্যায়ৰ আলোচনা ১৭ জুনত আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু ইৰাণৰ ৰাষ্ট্ৰপতি মাছূদ পেজেশ্কিয়ানৰ দ্বাৰা চূড়ান্ত ৰূপ দিয়া ১৪-দফীয়া ‘মেম’ৰেণ্ডাম অৱ আণ্ডাৰষ্টেণ্ডিং’ (MoU)ৰ অধীনত অনুষ্ঠিত হৈছে। এই বুজাবুজি চুক্তিয়ে আলোচনাপন্থীসকলৰ বাবে মুখ্য কাৰ্যবাহী বিবাদসমূহ সমাধান কৰিবলৈ আৰু পশ্চিম এছিয়াত দীৰ্ঘম্যাদী সুস্থিৰতা ঘূৰাই আনিবলৈ ৬০ দিনৰ এক কঠোৰ সময়সীমা নিৰ্ধাৰণ কৰি দিছে।

আলোচনাৰ গুৰুত্বৰ প্ৰতি লক্ষ্য ৰাখি আমেৰিকাৰ উপ-ৰাষ্ট্ৰপতি জে ডি ভেন্স দেওবাৰে চুইজাৰলেণ্ডত উপস্থিত হয়। তেওঁ তাত আমেৰিকাৰ আলোচনাকাৰী — ষ্টিভ উইটকফ আৰু জাৰেড কুশ্নাৰ — ক লগ কৰে, যিসকল ইতিমধ্যে তাত উপস্থিত আছিল আৰু এই চুক্তিৰ কাৰিকৰী দিশসমূহৰ ওপৰত কাম কৰি আছিল। ইয়াৰ সমান্তৰালকৈ তেহৰানৰ চৰ্তসমূহ উপস্থাপন কৰিবলৈ ইৰাণৰ প্ৰতিনিধি দলো তাত উপস্থিত হৈছে। তেহৰানৰ আলোচনাকাৰী দলটোত অৰ্থনৈতিক আৰু বিত্তীয় বিষয়ত গুৰুত্ব দিয়া লোকসকল অন্তৰ্ভুক্ত আছে। ইয়াত সংসদৰ অধ্যক্ষ মহম্মদ বাঘেৰ গালিবাফ আৰু বৈদেশিক মন্ত্ৰী আব্বাছ আৰাগচীৰ লগতে ইৰানৰ কেন্দ্ৰীয় বেংক আৰু তেল মন্ত্ৰালয়ৰ গুৰুত্বপূৰ্ণ বিষয়াসকলো সন্মিলিত হৈছে।

লগতে পঢ়ক: পুনৰ বন্ধ হ’ল হৰমুজ! ইৰাণ-আমেৰিকাৰ চুক্তিলৈ সংকট

আমেৰিকা আৰু ইৰাণৰ মাজত শান্তিৰ প্ৰস্তাৱ সন্দৰ্ভত আজি ছুইজাৰলেণ্ডত আলোচনা হ’ব পাৰে। ইয়াৰ পূৰ্বে আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ উচ্চতম নেতাক তীক্ষ্ণ সমালোচনা কৰে।

আমেৰিকা আৰু ইৰাণৰ মাজত শান্তি চুক্তিৰ সন্দৰ্ভত পৰৱৰ্তী আলোচনা শনিবাৰে চুইজাৰলেণ্ডত হ’ব পাৰে। ইয়াৰ বাবে ট্ৰাম্পৰ দূত ষ্টিভ ভিটকাফ চুইজাৰলেণ্ড অভিমুখে ৰাওনা হৈছে। ইয়াৰ লগতে ইৰাণৰ বৈদেশিক মন্ত্ৰী আব্বাছ আৰাঘচীও আলোচনাৰ বাবে আজি তালৈ যাব। অৱশ্যে, তথ্য অনুসৰি ইয়াত এতিয়াও সালসলনি হ’ব পাৰে। আমেৰিকা আৰু ইৰাণৰ মাজত আলোচনাৰ প্ৰস্তুতি আৰম্ভ হোৱাৰ লগে লগে কাটাৰৰ প্ৰধানমন্ত্ৰী মহম্মদ বিন আব্দুল ৰহমান আল-থানী ইতিমধ্যে চুইজাৰলেণ্ডত উপস্থিত হৈছে। ৱাশ্বিংটন আৰু তেহৰানৰ মাজত আলোচনা সম্ভৱ কৰি তোলাৰ ক্ষেত্ৰত কাটাৰ অন্যতম গুৰুত্বপূৰ্ণ দেশ হিচাপে আত্মপ্ৰকাশ কৰিছে।

আনহাতে, আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ সৰ্বোচ্চ নেতা মুজতবা খামেইনীৰ সেই বক্তব্যৰ তীব্ৰ প্ৰতিক্ৰিয়া প্ৰকাশ কৰিছে, য’ত তেওঁ কৈছিল যে আমেৰিকা শান্তি চুক্তিৰ বাবে ব্যাকুল হৈ আছিল। ট্ৰাম্পে ছচিয়েল মিডিয়াত লিখিছে, “যুদ্ধই ইৰাণক দুৰ্বল কৰি পেলাইছে! আমি তেওঁলোকক কোনো বাধ্যবাধকতাত লগ কৰা নাছিলোঁ, ইৰাণেহে লগ কৰিছিল। তেওঁলোক শেষ হৈ গৈছে! আমি ৬০ দিন অপেক্ষা কৰিম। তেওঁলোকে কোনো পইচা নাপায়, এটকাও নাপায়!” ইয়াৰ লগতে ট্ৰাম্পে তেহৰানে এই চুক্তিৰ পৰা আৰ্থিকভাৱে লাভৱান হ’ব বুলি ওলোৱা খবৰো নাকচ কৰে।

লগতে পঢ়ক: হৰমুজ প্ৰণালীক লৈ নতুন নিৰ্দেশনা; ৪৮ ঘণ্টাৰ পূৰ্বেই সকলো জাহাজে দিব লাগিব অনুমতি পত্ৰ  

আমেৰিকা আৰু ইৰাণৰ শান্তি চুক্তিৰ মাত্ৰ দুদিন পিছতে অনুষ্ঠিত হ’বলগীয়া প্ৰথমখন উচ্চ পৰ্যায়ৰ পাৰমাণৱিক আলোচনা স্থগিত ৰখা হৈছে।

আমেৰিকা আৰু ইৰাণৰ মাজত শান্তি চুক্তিত স্বাক্ষৰ হোৱাৰ মাত্ৰ দুদিন পাছতেই পৰমাণু আলোচনাত প্ৰথমটো আঘাত লাগিছে। ছুইজাৰলেণ্ডত এই সপ্তাহান্তত হ’বলগীয়া দুয়োখন দেশৰ প্ৰথমখন উচ্চস্তৰীয় বৈঠক হঠাতে স্থগিত ৰখা হৈছে। ইয়াৰ লগতে আমেৰিকাৰ উপ-ৰাষ্ট্ৰপতি জেডি ভেঞ্চৰ ভ্ৰমণসূচীও বাতিল কৰা হৈছে। এতিয়া সকলোৰে দৃষ্টি পৰৱৰ্তী ৬০ দিনৰ সেই আলোচনাৰ ওপৰত থিতাপি লৈছে, য’ত ইৰাণৰ পৰমাণু কাৰ্যসূচী আৰু আঞ্চলিক উত্তেজনাৰ ওপৰত এক স্থায়ী চুক্তিত উপনীত হোৱাৰ চেষ্টা কৰা হ’ব।

হোৱাইট হাউচৰ মতে, জেডি ভেঞ্চ আৰু তেওঁৰ প্ৰতিনিধি দলটো আলোচনাৰ বাবে সম্পূৰ্ণ সাজু আছিল, কিন্তু ব্যৱস্থাপনাজনিত কাৰণত বৈঠকখন নিশ্চিত কৰিব পৰা নগ’ল। সেইবাবেই তেওঁ আজি ছুইজাৰলেণ্ডলৈ নোযোৱাকৈ আমেৰিকাতে থাকিব।

মুখপাত্ৰগৰাকীয়ে কয় যে আমেৰিকাৰ প্ৰতিনিধি দলটো আলোচনাৰ বাবে সম্পূৰ্ণ সাজু হৈ আছে আৰু তাৰিখ তথা ব্যৱস্থাসমূহ চূড়ান্ত হোৱাৰ লগে লগেই ৰাওনা হ’বলৈ প্ৰস্তুত থাকিব। অৱশ্যে তেওঁ স্বীকাৰ কৰে যে আমেৰিকা আৰু ইৰাণৰ মাজত হ’বলগীয়া এই কাৰিকৰী আলোচনাসমূহৰ ব্যৱস্থাপনা কেতিয়াও সহজ বা পূৰ্বনিৰ্ধাৰিত নাছিল। বিবৃতিত কোৱা হৈছে “এই বৈঠকসমূহৰ ব্যৱস্থাপনা কেতিয়াও সৰল নাছিল।”

লেবাননত ইজৰাইলৰ সামৰিক অভিযানৰ বাবে ইৰাণে ছুইজাৰলেণ্ডলৈ নিজৰ প্ৰতিনিধি দল প্ৰেৰণ কৰাত পলম কৰিছে বুলি দাবী কৰা বাতৰিৰ পাছতেই এই সিদ্ধান্ত গ্ৰহণ কৰা হৈছে।

বুধবাৰে ভাৰ্চাই পেলেচত এক নৈশভোজৰ সময়ত আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু ফ্ৰান্সৰ ৰাষ্ট্ৰপতি ইমানুৱেল মেক্ৰঁৰ মাজত প্ৰাৰম্ভিক চুক্তিত স্বাক্ষৰ হৈছিল, আনহাতে ইৰাণেও সুকীয়া নথি-পত্ৰত স্বাক্ষৰ কৰিছিল। চুক্তি অনুসৰি ইৰাণে আন্তঃৰাষ্ট্ৰীয় পৰ্যবেক্ষণৰ অধীনত নিজৰ উচ্চ সমৃদ্ধ ইউৰেনিয়ামৰ ভাণ্ডাৰ হ্ৰাস কৰিব লাগিব। পৰমাণু অস্ত্ৰ বিকশিত নকৰাৰ প্ৰতিশ্ৰুতি পুনৰবাৰ দোহাৰিব লাগিব।

অৱশ্যে আন কেইবাটাও বিষয়ত এতিয়াও আলোচনা হ’বলৈ বাকী আছে। খবৰ অনুসৰি, ইৰাণৰ সৰ্বোচ্চ নেতা আয়াতুল্লাহ মজাতবা খামেইনী আমেৰিকাৰ সৈতে প্ৰত্যক্ষ আলোচনাৰ প্ৰতি সমৰ্থন আগবঢ়াইছে।

বিশ্লেষকসকলৰ মতে, শেহতীয়া ঘটনাৱলীয়ে ইৰাণক আলোচনাত তুলনামূলকভাৱে শক্তিশালী স্থিতিত ৰাখিছে, কিয়নো ইৰাণে হৰমুজ প্ৰণালীৰ মাধ্যমৰ সৈতে জড়িত পৰিস্থিতিক প্ৰভাৱিত কৰি গোলকীয় অৰ্থনৈতিক চাপ সৃষ্টি কৰিছে।

আনহাতে, আমেৰিকাত এই চুক্তিক লৈ ৰাজনৈতিক মতভেদো প্ৰকাশ পাইছে। একাংশ ৰিপাব্লিকান সাংসদে আশংকা ব্যক্ত কৰিছে যে এই চুক্তিৰ জৰিয়তে ইৰাণক বৃহৎ অৰ্থনৈতিক ৰেহাই দিয়া হৈছে। বিশেষজ্ঞসকলে কৈছে যে অনাগত সপ্তাহসমূহত হ’বলগীয়া এই আলোচনাই আমেৰিকা-ইৰাণ সম্পৰ্কৰ দিশ নিৰ্ধাৰণ কৰাত গুৰুত্বপূৰ্ণ ভূমিকা পালন কৰিব।

লগতে পঢ়ক: ‘সন্ত্ৰাসবাদ আৰু সহযোগিতা একেলগে চলিব নোৱাৰে’; ৰাষ্ট্ৰসংঘত পাকিস্তানক তীব্ৰ সমালোচনা ভাৰতৰ