মঙলবাৰে নিশা আমেৰিকাই কেলিফৰ্ণিয়াৰ উপকূলত ডুমছডে বেলিষ্টিক মিছাইল পৰীক্ষা কৰে

মধ্যপ্ৰাচ্যত চলি থকা যুদ্ধৰ মাজতে মঙলবাৰে নিশা আমেৰিকাই কেলিফৰ্ণিয়াৰ উপকূলত ডুমছডে বেলিষ্টিক মিছাইল পৰীক্ষা কৰে । নিউয়ৰ্ক পোষ্টৰ মতে, হিৰোচিমাত নিক্ষেপ কৰা পাৰমাণৱিক বোমাতকৈ ২০ গুণ শক্তিশালী পাৰমাণৱিক ৱাৰহেড কঢ়িয়াই নিব পৰা মিনিটমেন-৩ বেলিষ্টিক মিছাইলটো নিশা ১১ বজাত পৰীক্ষণ কৰা হয় । চান্টা বাৰ্বাৰাৰ ওচৰৰ ভাণ্ডেনবাৰ্গ ঘাটিৰ পৰা কৰা হয় এই পৰীক্ষণ ।

প্ৰকাশিত বাতৰি অনুসৰি জিটি ২৫৪ নামেৰে পৰিচিত এই ৰকেটটোৱে পশ্চিম-মধ্য প্ৰশান্ত মহাসাগৰৰ মাৰ্শ্বেল দ্বীপপুঞ্জৰ ওচৰত নিজৰ লক্ষ্যত আঘাত কৰে । ফৰ্চ গ্ল’বেল ষ্ট্ৰাইক কমাণ্ডৰ মতে, এই মিছাইলটো “কাৰ্যকৰীতা, প্ৰস্তুতি আৰু সঠিকতা পৰীক্ষা কৰিবলৈ” নিক্ষেপ কৰা হৈছিল ।

শেহতীয়াকৈ আমেৰিকা আৰু ইজৰাইলে ইৰাণক আক্ৰমণ কৰি দেশখনৰ সৰ্বোচ্চ নেতা আয়াতুল্লাহ আলী খামেনেইক তেহৰাণত হত্যা কৰিছিল । ইয়াৰ পিছতে সমগ্ৰ মধ্যপ্ৰাচ্য যুদ্ধই আৱৰি ধৰিছে ।

খামেনেইৰ মৃত্যুৰ পিছত ইৰাণে ইজৰাইল আৰু মধ্যপ্ৰাচ্যত থকা আমেৰিকাৰ ঘাটিসমূহত আক্ৰমণ অব্যাহত ৰাখিছে । ইফালে হিজবুল্লাহ সক্ৰিয় হোৱাৰ পাছত ইজৰাইলে লেবাননৰ ৰাজধানী বেইৰুটত ধাৰাবাহিকভাৱে আক্ৰমণ চলাইছে । পৰৱৰ্তী সময়ত ৰাষ্ট্ৰপতি ট্ৰাম্পে ইৰাণৰ ওপৰত আক্ৰমণ তীব্ৰতৰ কৰাৰ হুংকাৰ দি বৃহৎ আক্ৰমণৰ কৰিব বুলিও সকীয়াই দিয়ে ।

মিনিটমেন-৩  আমেৰিকাৰ আটাইতকৈ পুৰণি আইচিবিএম, ১৯৭০ চনৰ পৰাই ব্যৱহৃত হৈ আহিছে । ইয়াৰ ভূভাগৰ পৰা উৎক্ষেপণ কৰা হয় আৰু ইয়াৰ ৰেঞ্জ ১৩,০০০ কিলোমিটাৰ । ইয়াত পাৰমাণৱিক ৱাৰহেড কঢ়িয়াব পাৰি, কিন্তু এই পৰীক্ষাত কোনো অস্ত্ৰ ব্যৱহাৰ কৰা হোৱা নাছিল নাছিল ।

লগতে পঢ়ক : মধ্যপ্ৰাচ্যৰ উত্তেজনাৰ মাজতে ভাৰতীয়ৰ বাবে চৰকাৰৰ নিয়ন্ত্ৰণ কক্ষ স্থাপন; হেল্পলাইন নম্বৰ মুকলি

ইজৰাইল-আমেৰিকাৰ বিমান আক্ৰমণত ইৰাণৰ সৰ্বোচ্চ নেতা আয়াতুল্লাহ আলী খামেনেইকে ধৰি কেইবাজনো শীৰ্ষ নেতাৰ মৃত্যু হৈছে

ইৰাণৰ ওপৰত ইজৰাইল-আমেৰিকাৰ আক্ৰমণৰ পিছৰে পৰা সমগ্ৰ অঞ্চলটো যুদ্ধৰ কলীয়া ডাৱৰে আগুৰি ধৰিছে । এই আক্ৰমণৰ পিছত ইৰাণে ইজৰাইল, ইৰাক, ইউ এ ইকে ধৰি কেইবাখনো দেশলৈ ক্ষেপণাস্ত্ৰ নিক্ষেপ কৰি প্ৰত্যাক্ৰমণ কৰে । ইফালে ইজৰাইল আৰু আমেৰিকাই ইৰাণৰ ওপৰত এতিয়াও আক্ৰমণ অব্যাহত ৰাখিছে । ইফালে ইজৰাইল-আমেৰিকাৰ বিমান আক্ৰমণত ইৰাণৰ সৰ্বোচ্চ নেতা আয়াতুল্লাহ আলী খামেনেইকে ধৰি কেইবাজনো শীৰ্ষ নেতাৰ মৃত্যু হৈছে ।

কুৱেইটত ধ্বংস হ’ল আমেৰিকাৰ এফ-১৫ যুঁজাৰু বিমান-

ইফালে ইৰাণৰ সংবাদ মাধ্যমে দাবী কৰিছে যে কুৱেইটত আমেৰিকাৰ এখন সামৰিক যুদ্ধ বিমান এফ-১৫ ধ্বংস হৈছে । দুৰ্ঘটনাটোৰ এটা ভিডিঅ’ও প্ৰকাশ পাইছে, য’ত দেখা গৈছে যে আকাশতে বিমানখনত জুই লাগিছে । এফ-১৫ যুদ্ধ বিমানক বিশ্বৰ অন্যতম মাৰাত্মক আৰু উন্নত যুদ্ধ বিমান বুলি গণ্য কৰা হয় । কিন্তু বিমানখনত অগ্নিকাণ্ড সংঘটিত হোৱাৰ লগে লগে পেৰাচুট লৈ পলায়ন কৰে পাইলটে । অৱশ্যে এই খবৰ এতিয়াও কোনেও নিশ্চিত কৰা নাই । আমেৰিকা বা কুৱেইটৰ সেনাবাহিনীৰ কোনোৱে বিবৃতি প্ৰদান কৰা নাই ।

কুৱেইটৰ প্ৰতিৰক্ষা মন্ত্ৰালয়ে এই ঘটনাৰ পিছতে আমেৰিকাৰ কেইবাখনো যুদ্ধ বিমান দুৰ্ঘটনাগ্ৰস্ত হোৱা বুলি জানিবলৈ দিয়ে । এই ঘটনাৰ মুঠ সংখ্যা আৰু সবিশেষ স্পষ্ট হোৱা নাই । ভিডিঅ’ ফুটেজত দেখা গৈছে যে বিমানখন জুইৰ শিখাই আগুৰি ধৰিছে আৰু দ্ৰুতগতিত তললৈ নামি আহিছে ।

লগতে পঢ়ক : ইজৰাইলৰ ওপৰত ইৰাণৰ ভয়ংকৰ প্ৰত্যাক্ৰমণ, প্ৰধানমন্ত্ৰী নেতানিয়াহুৰ কাৰ্যালয়ত মিছাইল নিক্ষেপ

পাকিস্তানৰ কৰাচী চহৰত হিংসাত্মক পৰিস্থিতিৰ সৃষ্টি হৈছে

ইৰাণৰ সৰ্বোচ্চ নেতা খামেনেইৰ মৃত্যুৰ পিছতে বিভিন্ন দেশত আমেৰিকাৰ বিৰুদ্ধে প্ৰতিবাদৰ সূত্ৰপাত ঘটিছে । ইফালে পাকিস্তানৰ পৰা প্ৰকাশ পাইছে এক উল্লেখযোগ্য খবৰ । পাকিস্তানৰ কৰাচী চহৰত হিংসাত্মক পৰিস্থিতিৰ সৃষ্টি হৈছে । খামেনেইৰ মৃত্যুত ক্ষুব্ধ হৈ একাংশই প্ৰথমে ব্যাপক প্ৰতিবাদ সাব্যস্ত কৰে আৰু তাৰ পিছত আমেৰিকাৰ দূতাবাসত আক্ৰমণ কৰে । প্ৰতিবাদকাৰীয়ে দূতাবাসটো লণ্ড-ভণ্ড কৰে আৰু তাৰ পিছত জুই লগাই দিয়ে । তথ্য লাভ কৰাৰ লগে লগে বৃহৎ আৰক্ষী বাহিনী ঘটনাস্থলীত উপস্থিত হৈ বল প্ৰয়োগ কৰি প্ৰতিবাদকাৰীক ছত্ৰভংগ দিয়াৰ চেষ্টা কৰে ।

প্ৰতিবাদকাৰীয়ে প্ৰথমে শিলগুটি নিক্ষেপ কৰিবলৈ আৰম্ভ কৰিছিল । দৈনিক পাকিস্তানী সংবাদ মাধ্যমৰ বাতৰি অনুসৰি আৰক্ষীৰ প্ৰত্যুত্তৰত ৮ জন প্ৰতিবাদকাৰী নিহত হয় । অৱশ্যে এই কথা এতিয়াও নিশ্চিত কৰা নাই প্ৰশাসনে । দূতাবাসৰ আশে-পাশে লোকৰ ভিৰ পৰিলক্ষিত হয় । পৰৱৰ্তী জাননী নিদিয়ালৈকে কৰাচীত হাই এলাৰ্ট জাৰি কৰা হৈছে । এই বিক্ষোভৰ কেইবাটাও ভিডিঅ’ ছ’চিয়েল মিডিয়াত ভাইৰেল হৈ পৰিছে, য’ত প্ৰতিবাদকাৰীয়ে খামেনেইৰ ফটো হাতত লৈ আমেৰিকাৰ বিৰুদ্ধে শ্ল’গান দিয়া দেখা গৈছে ।

সংবাদ মাধ্যমৰ খবৰ অনুসৰি পৰিস্থিতি নিয়ন্ত্ৰণৰ বাবে আৰক্ষীয়ে কন্দুৱা গেছ আৰু লাঠিচাৰ্জ কৰে । এই ঘটনাত কেইবাজনো লোক আহত হয় । আহতসকলক এম্বুলেন্সেৰে কৰাচীৰ অসামৰিক চিকিৎসালয়লৈ লৈ যোৱা হয় ।

দৈনিক পাকিস্তান মিডিয়াৰ বাতৰি অনুসৰি আৰক্ষীৰ প্ৰত্যুত্তৰত ৮ জন প্ৰতিবাদকাৰী নিহত হয় । পৰিস্থিতিৰ ওপৰত নজৰ ৰাখিছে প্ৰশাসনে ।

লগতে পঢ়ক : মধ্যপ্ৰাচ্যৰ উত্তেজনাক লৈ কাশ্মীৰত প্ৰতিবাদ, ৰাজপথলৈ ওলাই আহিল ছিয়া মুছলমান

মোজতাবা খেমেইনীক ইৰাণৰ নতুন সৰ্বোচ্চ নেতা হিচাপে নিৰ্বাচিত কৰা হৈছে

ইৰাণৰ সৰ্বোচ্চ নেতা আলী খেমেইনী ইজৰাইল আৰু আমেৰিকাৰ বিমান আক্ৰমণত মৃত্যু হৈছে । ইয়াৰ পিছতে তেওঁৰ পুত্ৰ মোজতাবা খেমেইনীক দেশখনৰ নতুন সৰ্বোচ্চ নেতা হিচাপে নিৰ্বাচিত কৰা হৈছে । চৰকাৰী সংবাদ মাধ্যমৰ মতে, ২৮ ফেব্ৰুৱাৰীত তেহৰাণত বিমান আক্ৰমণত আলী খেমেইনীৰ কাৰ্যালয়ক লক্ষ্য কৰি লোৱা হৈছিল, য’ত ৮৬ বছৰীয়া খেমেইনীৰ মৃত্যু হৈছিল । চৰকাৰে উল্লেখ কৰিছে যে এই আক্ৰমণ বিশেষভাৱে চৰকাৰী লক্ষ্যক কৰি কৰা হৈছিল ।

এই ঘটনাৰ পিছতে ইৰাণে ৪০ দিনৰ ৰাষ্ট্ৰীয় শোক ঘোষণা কৰাৰ লগতে ৭ দিনৰ ৰাজহুৱা বন্ধৰ ঘোষণা কৰে । লগতে সমগ্ৰ দেশতে নিৰাপত্তা বৃদ্ধি কৰা হৈছে, বৃহৎ চহৰ আৰু চৰকাৰী ভৱনৰ বাহিৰত অতিৰিক্ত নিৰাপত্তা বাহিনী মোতায়েন কৰা হৈছে ।

কোন হয় মোজতাবা খেমেইনী ?

মোজতাবা খেমেইনীৰ জন্ম হৈছিল ১৯৬৯ চনত মাছহাদ চহৰত । তেওঁ ধৰ্মীয় শিক্ষা লাভ কৰিছিল । ইৰাণ-ইৰাক যুদ্ধৰ অন্তিম পৰ্যায়ত তেওঁ ৰিভল্যুচনেৰী গাৰ্ডতো সেৱা আগবঢ়াইছিল । দীৰ্ঘদিন ধৰি তেওঁক পিতৃৰ ঘনিষ্ঠ বুলি গণ্য কৰা হৈছিল । বহু ডাঙৰ সিদ্ধান্তত তেওঁ পৰ্দাৰ আঁৰৰ ভূমিকা পালন কৰা বুলি কোৱা হয় ।

যদিও তেওঁ কেতিয়াও কোনো ডাঙৰ চৰকাৰী পদত অধিষ্ঠিত নাছিল, তথাপিও তেওঁ আছিল পিতৃৰ বিশ্বাসযোগ্য উপদেষ্টা । সামৰিক আৰু অৰ্ধসামৰিক বাহিনীৰ সৈতে তেওঁৰ ভাল সম্পৰ্ক আছে বুলি কোৱা হয় ।

২০০৯ চনৰ প্ৰতিবাদৰ সময়তো তেওঁৰ নাম চৰ্চালৈ আহিছিল । একাংশই অভিযোগ উত্থাপন কৰে যে বিক্ষোভৰ কঠোৰ দমনত তেওঁৰ ভূমিকা আছিল ।

এতিয়া তেওঁক সৰ্বোচ্চ নেতাৰ পদত অধিষ্ঠীত কৰাই দেশখনত নতুন ৰাজনৈতিক বিতৰ্কৰ সূচনা কৰিছে । ১৯৭৯ চনৰ বিপ্লৱৰ সময়ত বংশৰ ভিত্তিত ক্ষমতা হস্তান্তৰৰ বিৰোধিতা হৈছিল । সেয়ে তেওঁৰ নিৰ্বাচনক লৈ একাংশই প্ৰশ্ন উত্থাপন কৰিছে ।

এতিয়াৰ বাবে মোজতাবা খেমেইনীক সামৰিক সহযোগিতাৰ বাবে শক্তিশালী নেতা হিচাপে গণ্য কৰা হয় । আগন্তুক দিনত তেওঁৰ নেতৃত্বই দেশক কেনে দিশ লৈ যায় তাকে লৈ সমগ্ৰ বিশ্বৰে দৃষ্টি নিবদ্ধ থাকিব ।

লগতে পঢ়ক : ছুপ্ৰিম লীডাৰ আলী খেমেইনীৰ মৃত্যু, ইৰাণৰ সেনাই নিশ্চিত কৰিছে তথ্য

ইৰাণৰ সামৰিক বাহিনী, ৰাষ্ট্ৰীয় সংবাদ সংস্থা ই আৰ এন এ আৰু মূল বাতৰি চেনেল প্ৰেছ টিভিয়ে এতিয়া আনুষ্ঠানিকভাৱে আয়াতুল্লাহ আলী খেমেইনীৰ মৃত্যু নিশ্চিত কৰিছে

ট্ৰাম্প আৰু ইজৰাইলৰ দাবীৰ পিছত ইৰাণৰ সামৰিক বাহিনী, ৰাষ্ট্ৰীয় সংবাদ সংস্থা ই আৰ এন এ আৰু মূল বাতৰি চেনেল প্ৰেছ টিভিয়ে এতিয়া আনুষ্ঠানিকভাৱে আয়াতুল্লাহ আলী খেমেইনীৰ মৃত্যু নিশ্চিত কৰিছে । শনিবাৰে আক্ৰমণৰ সময়ত খেমেইনী নিজৰ কাৰ্যালয়ত আছিল ।

ইছলামিক ৰিভল্যুচনেৰী গাৰ্ড কৰ্পছে এক বিবৃতিত খেমেইনীৰ মৃত্যুত শোক প্ৰকাশ কৰাৰ লগতে শ্ৰদ্ধাঞ্জলি জ্ঞাপন কৰে । সংগঠনটোৱে তেওঁৰ মৃত্যুক “সন্মানজনক শ্বহীদ” বুলি অভিহিত কৰি তেওঁৰ পথ অব্যাহত থাকিব বুলি কয় । বিবৃতিটোত আমেৰিকা আৰু “জায়নিষ্ট শাসন”ক দোষাৰোপ কৰি কঠোৰ ব্যৱস্থা আৰু প্ৰতিশোধৰ সতৰ্কবাণী দিয়া হৈছে । লগতে জনসাধাৰণক ৰাষ্ট্ৰীয় ঐক্য আৰু শক্তি প্ৰদৰ্শন কৰিবলৈ আহ্বান জনায় ।

প্ৰেছ টিভিয়ে পূৰ্বে প্ৰকাশ কৰিছিল যে, “ইছলামিক বিপ্লৱৰ সৰ্বোচ্চ নেতা আয়াতুল্লাহ আলী খেমেইনী আমেৰিকা আৰু ইজৰাইলৰ যৌথ বিমান আক্ৰমণত নিহত হয় ।” খেমেইনীৰ মৃত্যুৰ পিছত ইৰাণে এসপ্তাহজোৰা চৰকাৰী বন্ধ আৰু ৪০ দিন ৰাজহুৱা শোক ঘোষণা কৰে ।

উল্লেখ্য যে, ৮৬ বছৰীয়া আয়াতুল্লাহ আলী খেমেইনীৰ কাৰ্যকালতেই ইৰাণে নিজৰ পাৰমাণৱিক কাৰ্যসূচী আগুৱাই লৈ গৈছিল আৰু আমেৰিকা আৰু ইজৰাইলৰ সৈতে সংঘাত বৃদ্ধি কৰিছিল । তেওঁ ৰিভল্যুচনেৰী গাৰ্ড আৰু আঞ্চলিক প্ৰক্সি নেটৱৰ্ক শক্তিশালী কৰিছিল যদিও অৰ্থনৈতিক সংকট আৰু দমনৰ ফলত দেশত বৃহৎ প্ৰতিবাদৰ সৃষ্টি হয় । ২০২২ চনৰ মাহছা আমিনী আন্দোলনকে ধৰি বহু আন্দোলন কঠোৰভাৱে দমন কৰা হৈছিল । ১৯৮৯ চনত আয়াতুল্লাহ ৰুহোল্লাহ খেমেইনীৰ মৃত্যুৰ পিছত খেমেইনীয়ে ক্ষমতা দখল কৰি ইছলামিক ৰিপাব্লিকক নতুন ৰূপ দিয়ে । তেওঁ ছিয়া ধৰ্মগুৰু আৰু ৰিভল্যুচনেৰী গাৰ্ডৰ ক্ষমতা বৃদ্ধি কৰিছিল, যিটো পিছলৈ সামৰিক আৰু অৰ্থনৈতিকভাৱে এক অতি প্ৰভাৱশালী প্ৰতিষ্ঠানত পৰিণত হৈছিল ।

লগতে পঢ়ক : ইতিহাসৰ আটাইতকৈ নিষ্ঠুৰ শাসক খামেইনীৰ মৃত্যুঃ ড’নাল্ড ট্ৰাম্পৰ দাবী