কংগ্ৰেছ দলে ৰাইজৰ দলক ঠগিলে আৰু সেই কথা কংগ্ৰেছে এই সময়ত বুজি নুঠাটোৱেই এক ঐতিহাসিক ভুল বুলি কয় অখিল গগৈয়ে
ঘোষণা কৰা হ’ল ৰাজ্যৰ বিধানসভা নিৰ্বাচনৰ দিন । ৯ এপ্ৰিলত, এটা পৰ্যায়তে অসমত অনুষ্ঠিত হ’ব নিৰ্বাচন আৰু ৪ মে’ত হ’ব ভোটগণনা । ইয়াৰ মাজতে কিন্তু শাসকীয় বিজেপিকে ধৰি মিত্ৰ দলসমূহে পূৰ্ণ গতিৰে নিৰ্বাচনৰ বাবে সাজু হৈছে আনহাতে কংগ্ৰছ আৰু ৰাইজৰ দলৰ মাজত দেখা গৈছে তীব্ৰ অঁৰিয়াঅঁৰি । কংগ্ৰেছ আৰু ৰাইজৰ দলৰ মাজত নিৰ্বাচনকেন্দ্ৰীক মিত্ৰতাক লৈ সৃষ্টি হোৱা দন্দ্বই এতিয়া চূড়ান্ত ৰূপ ধাৰণ কৰিছে । ইয়াৰ মাজতে ৰাইজৰ দলৰ সভাপতি অখিল গগৈয়ে কংগ্ৰেছৰ বিৰুদ্ধে পুনৰ উত্থাপন কৰিলে গুৰুতৰ অভিযোগ ।
ৰাইজৰ দলক ধ্বংস কৰাৰ পৰিকল্পনা কৰিছিল কংগ্ৰেছে-
কংগ্ৰেছ দলে আঞ্চলিক দল ৰাইজৰ দলক ধ্বংস কৰিবলৈ পৰিকল্পনা কৰিছিল বুলি গুৰুতৰ অভিযোগ উত্থাপন কৰে অখিল গগৈয়ে । তেওঁ কয় যে, ৰাইজৰ দলৰ উত্থানলৈ ভীতিৰ্গস্ত হৈয়ে ২০২১ত ৮খন আসন দিয়াৰ পিছতো কংগ্ৰেছে বিশ্বাসঘাতকতা কৰিলে । উপ-নিৰ্বাচনতো আটাইকেইটা সমষ্টিতে কংগ্ৰেছে ৰাইজৰ দলক বিশ্বাসঘাতকতা কৰাৰ অভিযোগ উত্থাপন কৰে অখিল গগৈয়ে ।
ৰাইজৰ দলক ঠগিলে কংগ্ৰেছে-
তেওঁ পুনৰ কয় যে, লোকসভা নিৰ্বাচনতো ৰাইজৰ দলে সম্পূৰ্ণ ত্যাগ কৰিলে । ২০২৬ৰ নিৰ্বাচনৰ বাবেও কংগ্ৰেছৰ পিছত ঘূৰোঁতে ঘূৰোঁতে কেইটামান সমষ্টিতে ৰাইজৰ দল সীমাবদ্ধ হৈ ৰ’ল । শেষত ১৫টা সমষ্টিতো আমাক ৪৫ দিন আৱদ্ধ ৰাখি শেষ সময়ত মিত্ৰতা নহ’ব বুলি কয় কংগ্ৰেছে । গতিকে কংগ্ৰেছ দলে ৰাইজৰ দলক ঠগিলে আৰু সেই কথা কংগ্ৰেছে এই সময়ত বুজি নুঠাটোৱেই এক ঐতিহাসিক ভুল বুলি কয় অখিল গগৈয়ে ।
আঞ্চলিক শক্তিসমূহক আওকাণ কৰিছে কংগ্ৰেছে-
তেওঁ আৰু অভিযোগ কৰে যে কংগ্ৰেছে আঞ্চলিক শক্তিসমূহক আওকাণ কৰিছে আৰু ৰাইজৰ দলক দুৰ্বল কৰাৰ চেষ্টা কৰিছে । গগৈয়ে অভিযোগ কৰে- “কংগ্ৰেছে ভাবে যে তেওঁলোকে অকলেই বিজেপিক পৰাস্ত কৰিব পাৰিব । সেইটোৱেই তেওঁলোকৰ আটাইতকৈ ডাঙৰ ভুল । অসমত বিজেপিৰ আটাইতকৈ শক্তিশালী প্ৰতিদ্বন্দ্বী হ’ল ৰাইজৰ দল ।”
২০২৬ৰ বাবে নিৰ্বাচন খেলা নাই গৌৰৱ গগৈয়ে-
অখিল গগৈয়ে ২০২৬ চনৰ বাবে গৌৰৱ গগৈৰ নিৰ্বাচনী কৌশলৰ ওপৰতো সন্দেহ প্ৰকাশ কৰি অভিযোগ কৰে যে কংগ্ৰেছে ২০৩১ চনৰ পৰিকল্পনাৰ অংশ হিচাপে নেতাৰ পুত্ৰসকলক টিকট বিতৰণ কৰিছে । আগন্তুক নিৰ্বাচনক লৈ গৌৰৱ গগৈ কিমান ছিৰিয়াছ, সেই লৈ তেওঁ প্ৰশ্ন উত্থাপন কৰি অভিযোগ কৰে যে দলটোৱে বিজেপিক পৰোক্ষভাৱে “ৱাকঅভাৰ” দিব পাৰে । তেওঁ লুৰীণজ্যোতি গগৈকো সমালোচনা কৰি সম্ভাৱ্য মিত্ৰজোঁটৰ পতন ৰোধ কৰাত ব্যৰ্থ হোৱা আৰু নিজৰ দলৰ স্বাৰ্থত কাম কৰাৰ অভিযোগ উত্থাপন কৰে ।
ইফালে ৰাইজৰ দলৰ সভাপতি অখিল গগৈয়ে যোৰহাটত কংগ্ৰেছ সাংসদ গৌৰৱ গগৈৰ বিৰুদ্ধে প্ৰাৰ্থী প্ৰক্ষেপ নকৰিবলৈ নিজৰ দলক আহ্বান জনোৱা বুলিও উল্লেখ কৰে । সংবাদ মাধ্যমৰ মাধ্যমৰ সৈতে হোৱা বাৰ্তালাপত অখিল গগৈয়ে কয় যে ৰাইজৰ দলে অতি সোনকালে প্ৰাৰ্থীৰ তৃতীয়খন তালিকা আৰু তাৰ পিছত চূড়ান্ত তালিকাখন প্ৰকাশ কৰিব । অৱশ্যে তেওঁ প্ৰকাশ কৰে যে তেওঁ দলীয় নেতৃত্বৰ ওচৰত এক লিখিত অনুৰোধ দাখিল কৰিছে য’ত তেওঁ যোৰহাটৰ পৰা গৌৰৱ গগৈৰ বিৰুদ্ধে ৰাইজৰ দলৰ কোনো প্ৰাৰ্থী থিয় নকৰাবলৈ পৰামৰ্শ দিছে ।
যোৰহাটত শক্তিশালী নহয় কংগ্ৰেছ-
তেওঁ লগতে কয় যে যোৰহাটত কংগ্ৰেছৰ অৱস্থান “শক্তিশালী নহয়” আৰু দাবী কৰে যে সেই সমষ্টিত ৰাইজৰ দলৰ সাংগঠনিক ভেটি অধিক শক্তিশালী । তেওঁৰ মতে, কিছুমান দলীয় কৰ্মীয়ে পৰামৰ্শ দিছিল যে গৌৰৱ গগৈয়ে যোৰহাটৰ পৰিৱৰ্তে তিতাবৰ বা মাহমৰাৰ পৰা প্ৰতিদ্বন্দ্বিতা কৰিব লাগিছিল । তেওঁ স্পষ্ট কৰি দি কয়, “এইটো চূড়ান্ত নহয় । মই কেৱল এটা পৰামৰ্শ দিছোঁ । আমাৰ দলীয় নেতৃত্বই মিলিত হৈ এটা চূড়ান্ত সিদ্ধান্ত ল’ব ।”
লগতে পঢ়ক : নিৰ্বাচনৰ পূৰ্বে কেইবাখনো জিলাৰ SSPক বদলিৰ নিৰ্দেশ নিৰ্বাচন আয়োগৰ
