নৰেন্দ্ৰ মোদীয়ে ভাৰত ভ্ৰমণলৈ অহা ফ্ৰান্সৰ ৰাষ্ট্ৰপতি মেক্ৰনক ছ’চিয়েল মিডিয়া প্লেটফৰ্ম এক্সত এটা বিশেষ ফোষ্টেৰে আদৰণি জনায় ।

মঙলবাৰে প্ৰধানমন্ত্ৰী নৰেন্দ্ৰ মোদীয়ে ভাৰত ভ্ৰমণলৈ অহা ফ্ৰান্সৰ ৰাষ্ট্ৰপতি মেক্ৰনক ছ’চিয়েল মিডিয়া প্লেটফৰ্ম এক্সত এটা বিশেষ ফোষ্টেৰে আদৰণি জনায় । এক্স পোষ্টত প্ৰধানমন্ত্ৰী মোদীয়ে লিখিছে, “ভাৰতলৈ আপোনাক স্বাগতম! ভাৰত আপোনাৰ ভ্ৰমণ আৰু আমাৰ পাৰস্পৰিক সম্পৰ্কক নতুন উচ্চতালৈ লৈ যোৱাৰ বাবে আগ্ৰহী । মোৰ বিশ্বাস যে আমাৰ আলোচনাই বিভিন্ন খণ্ডত সহযোগিতা আৰু অধিক শক্তিশালী কৰি তুলিব আৰু বিশ্বজুৰি অৰিহণা যোগাব । মুম্বাইত আৰু পিছলৈ দিল্লীত লগ হ’ম মোৰ প্ৰিয় বন্ধু ইমানুৱেল মেক্ৰন ।”

উল্লেখযোগ্য যে ভাৰত ভ্ৰমণৰ বাবে মঙলবাৰে ফ্ৰান্সৰ ৰাষ্ট্ৰপতি মেক্ৰন আৰু ফাৰ্ষ্ট লেডী ব্ৰীজিট মেক্ৰনে মুম্বাইত উপস্থিত হয় । তেওঁলোকৰ এই ভ্ৰমণ ১৯ ফেব্ৰুৱাৰীলৈকে চলিব । ফ্ৰান্সৰ ৰাষ্ট্ৰপতি আৰু ফাৰ্ষ্ট লেডীক মুম্বাই বিমানবন্দৰত আদৰণি জনায় মহাৰাষ্ট্ৰৰ গৱৰ্ণৰ আচাৰ্য দেৱব্ৰত আৰু মুখ্যমন্ত্ৰী দেৱেন্দ্ৰ ফাড়নভিছে ।

উল্লেখ্য যে, ৰাষ্ট্ৰপতি মেক্ৰন আৰু প্ৰধানমন্ত্ৰী মোদীয়ে যৌথভাৱে ভাৰত এআই ইমপেক্ট ছামিটত অংশগ্ৰহণ কৰিব, যিয়ে কৃত্ৰিম বুদ্ধিমত্তা, ডিজিটেল শাসন আৰু চাইবাৰ সুৰক্ষাৰ দৰে বিষয়ত অংশীদাৰিত্ব বৃদ্ধিৰ ওপৰত গুৰুত্ব আৰোপ কৰিব । ভাৰত-ফ্ৰান্স উদ্ভাৱন মঞ্চৰ অধীনত উদ্ভাৱন, ষ্টাৰ্ট-আপ সহযোগিতা, উচ্চ শিক্ষা, আৰু গৱেষণাৰ যৌথ প্ৰকল্পৰ ক্ষেত্ৰতো দুয়োগৰাকী নেতাই সুনিৰ্দিষ্ট সিদ্ধান্ত গ্ৰহণ কৰাৰ সম্ভাৱনা আছে ।

লগতে পঢ়ক : বাংলাদেশে শীঘ্ৰেই লাভ কৰিব নতুন প্ৰধানমন্ত্ৰী, তাৰিক ৰহমানৰ শপতগ্ৰহণৰ পূৰ্বে পদত্যাগ মহম্মদ ইউনুছৰ

ভাৰত কেৱল এক প্ৰধান গ্ৰাহক নহয়, বিশ্ব শক্তি বজাৰখন সুস্থিৰ কৰি তোলাতো গুৰুত্বপূৰ্ণ ভূমিকা পালন কৰে । আমি বহু দেশৰ পৰা শক্তি ক্ৰয় কৰো ।

ভাৰতৰ খাৰুৱা তেল ক্ৰয় সন্দৰ্ভত বৈদেশিক সচিব বিক্ৰম মিশ্ৰীয়ে সোমবাৰে উল্লেখ কৰে যে ভাৰতে ৰাষ্ট্ৰীয় স্বাৰ্থৰ ভিত্তিত শক্তি ক্ৰয়ৰ উৎস নিৰ্ধাৰণ কৰিব । ভাৰত-আমেৰিকাৰ বাণিজ্যিক চুক্তি ঘোষণা কৰি মাৰ্কিন ৰাষ্ট্ৰপতি ড’নাল্ড ট্ৰাম্পে দাবী কৰিছিল যে ভাৰতে ৰাছিয়াৰ পৰা তেল ক্ৰয় নকৰি আমেৰিকা আৰু ভেনিজুৱেলাৰ পৰা খাৰুৱা তেল ক্ৰয় কৰিবলৈ সন্মত হৈছে । বৈদেশিক সচিবগৰাকীয়ে উল্লেখ কৰে যে ভাৰতৰ কৌশল হৈছে শক্তি ক্ৰয়ৰ বাবে একাধিক উৎস ৰক্ষণাবেক্ষণ কৰা ।

“সকলো দেশতে শক্তিৰ নিৰাপদ যোগান থাকিব লাগে”

বৈদেশিক সচিব বিক্ৰম মিশ্ৰীয়ে কয়, “বিশ্ব শক্তি বজাৰত মূল্য সুস্থিৰ কৰাৰ ক্ষেত্ৰত ভাৰতে গুৰুত্বপূৰ্ণ ভূমিকা পালন কৰে । শক্তিৰ সুস্থিৰ মূল্য আৰু সকলো দেশলৈ শক্তিৰ নিৰাপদ আৰু নিৰ্ভৰযোগ্য যোগান নিশ্চিত কৰাৰ ক্ষেত্ৰত ভাৰত আৰু আন বহু চুবুৰীয়া দেশৰ অংশীদাৰিত্ব আছে ।” তেওঁ লগতে কয় যে তেল কোম্পানীসমূহে প্ৰকৃততে তেল ক’ৰ পৰা ক্ৰয় কৰিব সেইটো নিৰ্ণয় কৰে আৰু এই সিদ্ধান্তসমূহ মূলতঃ বজাৰৰ পৰিস্থিতিৰ ওপৰত ভিত্তি কৰি লোৱা হয় ।

ৰাছিয়াৰ তেল ক্ৰয়ৰ ক্ষেত্ৰত ভাৰতৰ স্থিতি-

ৰাছিয়াৰ পৰা ভাৰতে তেল ক্ৰয় কৰাৰ পৰিকল্পনা সন্দৰ্ভত সোধা প্ৰশ্নৰ উত্তৰত বৈদেশিক সচিব বিক্ৰম মিশ্ৰীয়ে কয়, “আমি এখন উন্নয়নশীল অৰ্থনীতি । আমি আমাৰ সম্পদৰ উপলব্ধতাৰ প্ৰতি সচেতন হ’ব লাগিব । যেতিয়া আমি ৮০-৮৫ শতাংশ আমদানিৰ ওপৰত নিৰ্ভৰশীল, তেতিয়া আমি অধিক মূল্যৰ প্ৰতি সংবেদনশীল হ’ব লাগিব । শক্তিৰ ক্ষেত্ৰত আমাৰ শীৰ্ষ অগ্ৰাধিকাৰ ভাৰতীয় গ্ৰাহকৰ স্বাৰ্থ ৰক্ষা কৰাটো কোনো আচৰিত কথা নহয় ।”

আমি বহু দেশৰ পৰা শক্তি ক্ৰয় কৰোঁ : বৈদেশিক সচিব

বৈদেশিক সচিবগৰাকীয়ে কয়, “বিগত কিছু বছৰত বিশ্ব অৰ্থনীতি যথেষ্ট অনিশ্চয়তাৰ সন্মুখীন হৈছে, যাৰ ফলত বিশ্ব শক্তি বজাৰৰ স্থিতিশীলতাত গভীৰ প্ৰভাৱ পৰিছে । ভাৰত কেৱল এক প্ৰধান গ্ৰাহক নহয়, বিশ্ব শক্তি বজাৰখন সুস্থিৰ কৰি তোলাতো গুৰুত্বপূৰ্ণ ভূমিকা পালন কৰে । আমি বহু দেশৰ পৰা শক্তি ক্ৰয় কৰো । এই ক্ষেত্ৰত আমি যিমানেই বৈচিত্ৰ্যপূৰ্ণ হ’ম সিমানেই নিৰাপদ হ’ম ।”

লগতে পঢ়ক : ৰাছিয়াৰ পৰা তেল ক্ৰয় বন্ধ কৰিব নেকি ভাৰতে ? ট্ৰাম্পৰ দাবীক লৈ বৈদেশিক মন্ত্ৰালয়ৰ স্পষ্টীকৰণ

শনিবাৰে বৈদেশিক পৰিক্ৰমা মন্ত্ৰালয়ে ৰাছিয়াৰ তেল ক্ৰয়ৰ ক্ষেত্ৰত পূৰ্বৰ স্থিতি পুনৰবাৰ প্ৰকাশ কৰে ।

আমেৰিকাৰ ৰাষ্ট্ৰপতি ড’নাল্ড ট্ৰাম্পে আমেৰিকা-ভাৰত বাণিজ্যিক চুক্তিৰ কথা ঘোষণা কৰাৰ সময়ত ভাৰতে ৰাছিয়াৰ পৰা তেল ক্ৰয় বন্ধ কৰিব বুলি দাবী কৰে । ইয়াৰ পিছতে এতিয়া ট্ৰাম্পৰ এই দাবীৰ প্ৰতিক্ৰিয়া প্ৰকাশ কৰিছে ভাৰতৰ বৈদেশিক পৰিক্ৰমা মন্ত্ৰালয়ে । শনিবাৰে বৈদেশিক পৰিক্ৰমা মন্ত্ৰালয়ে ৰাছিয়াৰ তেল ক্ৰয়ৰ ক্ষেত্ৰত পূৰ্বৰ স্থিতি পুনৰবাৰ প্ৰকাশ কৰে । মন্ত্ৰালয়ে উল্লেখ কৰে যে ভাৰতৰ শক্তি সুৰক্ষা চৰকাৰৰ সৰ্বোচ্চ অগ্ৰাধিকাৰ ।

বৈদেশিক পৰিক্ৰমা মন্ত্ৰালয়ে এক বিবৃতিত কয় যে, “ভাৰতৰ শক্তিৰ উৎসসমূহৰ বৈচিত্ৰ্যতা আমাৰ কৌশলৰ বাবে মৌলিক । ভাৰতৰ শক্তিৰ উৎসৰ ক্ষেত্ৰত চৰকাৰে বহুবাৰ ৰাজহুৱাভাৱে উল্লেখ কৰিছে যে ১.৪ বিলিয়ন ভাৰতীয়ৰ শক্তি সুৰক্ষা নিশ্চিত কৰাটো ইয়াৰ সৰ্বোচ্চ অগ্ৰাধিকাৰ ।”

এম ই এৰ মুখপাত্ৰ ৰণধীৰ জয়ছোৱালে কয়, “বজাৰৰ পৰিস্থিতি আৰু পৰিৱৰ্তিত আন্তঃৰাষ্ট্ৰীয় পৰিৱেশৰ লগত সংগতি ৰাখি শক্তিৰ উৎসসমূহৰ বৈচিত্ৰ্যতা আমাৰ কৌশলৰ এটা মূল স্তম্ভ । এই দৃষ্টিভংগীৰে ভাৰতৰ সকলো সিদ্ধান্ত লোৱা হৈছে আৰু লোৱা হ’ব ।”

পুনৰবাৰ নিজৰ স্থিতি স্পষ্ট কৰিলে ভাৰতে-

আমেৰিকাই বিচাৰে ভাৰতে ৰাছিয়াৰ পৰা তেল ক্ৰয় কৰাটো সম্পূৰ্ণৰূপে বন্ধ কৰক । ভাৰতে স্পষ্ট কৰি দিছে যে দেশৰ শক্তিৰ প্ৰয়োজনীয়তাই আন যিকোনো বিবেচনাতকৈ অগ্ৰাধিকাৰ লাভ কৰে । ৰাছিয়াৰ পৰা খাৰুৱা তেল ক্ৰয় সন্দৰ্ভত ভাৰতৰ এয়া ধাৰাবাহিক অৱস্থান । আমেৰিকাৰ অভিযোগ যে ৰাছিয়াই তেলৰ পৰা পোৱা ধন ইউক্ৰেইনৰ যুদ্ধৰ বাবে ব্যৱহাৰ কৰে । অৱশ্যে ৰাছিয়াই এই অভিযোগ সজোৰে অস্বীকাৰ কৰিছে ।

হোৱাইট হাউছৰ দাবীৰ পিছতে বিবৃতি জাৰি বিদেশ মন্ত্ৰালয়ৰ-

ভাৰতে ৰাছিয়াৰ পৰা পোনপটীয়াকৈ বা তৃতীয় দেশৰ জৰিয়তে তেল ক্ৰয় কৰা বন্ধ কৰাৰ লগতে আমেৰিকাৰ পৰা তেল ক্ৰয় কৰাৰ প্ৰতিশ্ৰুতি দিছে বুলি হোৱাইট হাউছে কোৱাৰ পিছতে বৈদেশিক পৰিক্ৰমা মন্ত্ৰালয়ৰ এই বক্তব্য প্ৰকাশ পাইছে । এই বক্তব্য আমেৰিকাই ৰাছিয়াৰ তেল ক্ৰয়ৰ জৰিমনা হিচাপে ভাৰতৰ ওপৰত আৰোপ কৰা অতিৰিক্ত ২৫ শতাংশ শুল্ক আঁতৰোৱাৰ কথা ঘোষণা কৰাৰ সময়ত প্ৰকাশ কৰিছিল ।

কি ক’লে ক্ৰেমলিনে ?

এই বিষয়ে ক্ৰেমলিনে উল্লেখ কৰে যে ভাৰতে য’ৰ পৰাই তেল ক্ৰয় কৰিবলৈ স্বাধীন । ক্ৰেমলিনৰ মুখপাত্ৰ দিমিট্ৰি পেস্কোভে কয় যে ৰাছিয়াই ভালদৰেই জানে যে ভাৰতলৈ তেল আৰু পেট্ৰলিয়াম সামগ্ৰীৰ একমাত্ৰ যোগানকাৰী নহয় । তেওঁ লগতে কয় যে ভাৰতে সদায় এই সামগ্ৰীসমূহ অন্য দেশৰ পৰা ক্ৰয় কৰি আহিছে । সেয়ে ইয়াত নতুন একো নাই ।

লগতে পঢ়ক : ভাৰতীয় কৃষক আৰু উদ্যোগীৰ বাবে মুকলি হ’ব সুযোগঃ বাণিজ্যিক চুক্তিৰ ৰূপৰেখাক লৈ প্ৰধানমন্ত্ৰী মোদীৰ প্ৰতিক্ৰিয়া