বিহাৰৰ ৰাজনীতিত এক উল্লেখনীয় পৰিৱৰ্তনৰ মাজতে বৃহস্পতিবাৰে ৰাজ্যখনৰ কেবিনেটৰ এক বৃহৎ সম্প্ৰসাৰণ কৰা হয়

বিহাৰৰ ৰাজনীতিত এক উল্লেখনীয় পৰিৱৰ্তনৰ মাজতে প্ৰাক্তন মুখ্যমন্ত্ৰী নীতিশ কুমাৰ ৰাজ্যসভালৈ নিৰ্বাচিত হোৱাৰ পিছত বৃহস্পতিবাৰে ৰাজ্যখনৰ কেবিনেটৰ এক বৃহৎ সম্প্ৰসাৰণ কৰা হয় । এই নতুন মন্ত্ৰীসভাত বিজেপিয়ে সৰ্বাধিক ১৫ খন আসন লাভ কৰি নিজৰ স্থিতি শক্তিশালী কৰাৰ বিপৰীতে জেডিইউৱে ১৩ খন আসন লাভ কৰিছে । বিশেষকৈ নীতিশ কুমাৰৰ পুত্ৰ নিশান্ত কুমাৰক প্ৰথমবাৰৰ বাবে কেবিনেটত অন্তৰ্ভুক্ত কৰা হৈছে । বিজেপিৰ মন্ত্ৰীসকলৰ তালিকাত ৰাম কৃপাল যাদৱ, কেদাৰ গুপ্তা, নীতিশ মিশ্ৰ, মিথিলেশ তিৱাৰী, বিজয় কুমাৰ সিনহা, আৰু শ্ৰেয়সী সিঙৰ দৰে গুৰুত্বপূৰ্ণ নেতাৰ নাম আছে । আনহাতে জেডিইউৰ হৈ নিশান্ত কুমাৰৰ লগতে শ্ৰৱণ কুমাৰ, মদন চাহনী, লেচী সিং আৰু অশোক চৌধুৰীয়ে শপত লয় ।

এনডিএৰ সহযোগী দলসমূহৰ ভিতৰত লোক জনশক্তি পাৰ্টি (ৰাম বিলাস)ক দুটা মন্ত্ৰীপদ প্ৰদান কৰা হৈছে, য’ত সঞ্জয় পাছোৱান আৰু সঞ্জয় সিঙৰ নাম ঘোষণা কৰা হৈছে । ইয়াৰ উপৰিও হিন্দুস্তানী আৱাম মৰ্চাৰ পৰা সন্তোষ সুমন আৰু ৰাষ্ট্ৰীয় লোক মৰ্চাৰ পৰা দীপক প্ৰকাশে এটাকৈ মন্ত্ৰীপদ লাভ কৰিছে । এই নতুন আৱণ্টনে বিহাৰ চৰকাৰত জেডিইউতকৈ বিজেপিৰ আধিপত্য সামান্য বৃদ্ধি পোৱাটোকে সূচাইছে । যোৱা মাহত সম্ৰাট চৌধুৰীয়ে বিহাৰৰ প্ৰথমগৰাকী বিজেপি মুখ্যমন্ত্ৰী হিচাপে দায়িত্ব গ্ৰহণ কৰাৰ পিছত এই সম্প্ৰসাৰণক দলটোৰ এক বৃহৎ শক্তি প্ৰদৰ্শন হিচাপে দেখা গৈছে ।

কেন্দ্ৰীয় গৃহমন্ত্ৰী অমিত শ্বাহে বুধবাৰে সন্ধিয়া পাটনাত উপস্থিত হৈ মুখ্যমন্ত্ৰী সম্ৰাট চৌধুৰীৰ সৈতে সাক্ষাৎ কৰাৰ লগতে ৰাজবংশী নগৰৰ হনুমান মন্দিৰত আশীৰ্বাদ গ্ৰহণ কৰে । তেওঁৰ সৈতে বিজেপিৰ ৰাষ্ট্ৰীয় সভাপতি নিতিন নবীন আৰু বি এল সন্তোষো উপস্থিত থাকে । গান্ধী ময়দানত আয়োজিত এই ভব্য অনুষ্ঠানত প্ৰধানমন্ত্ৰী নৰেন্দ্ৰ মোদী, অমিত শ্বাহ, ৰাজনাথ সিং, জে পি নাড্ডা আৰু চিৰাগ পাছোৱানৰ দৰে শীৰ্ষ নেতাৰ লগতে এনডিএ শাসিত বিভিন্ন ৰাজ্যৰ মুখ্যমন্ত্ৰীসকলৰ উপস্থিতিয়ে বিহাৰৰ ৰাজনীতিত এক নতুন যুগৰ ইংগিত বহন কৰিছে ।

লগতে পঢ়ক : মোক বৰ্খাস্ত কৰক, কিন্তু মই পদত্যাগ নকৰোঃ শোচনীয় পৰাজয়ৰ পাছতো নাচোৰবান্দা মমতা বেনাৰ্জী

ভাৰতীয় জনতা পাৰ্টিৰ নেতা সম্ৰাট চৌধুৰীয়ে বুধবাৰে বিহাৰৰ মুখ্যমন্ত্ৰী হিচাপে শপত গ্ৰহণ কৰে

বিহাৰ ৰাজনীতিত আজিৰে পৰা আৰম্ভ হ’ল এক নতুন অধ্যায়ৰ । ভাৰতীয় জনতা পাৰ্টিৰ নেতা সম্ৰাট চৌধুৰীয়ে বুধবাৰে বিহাৰৰ মুখ্যমন্ত্ৰী হিচাপে শপত গ্ৰহণ কৰে । ৰাজ্যসভাৰ সাংসদ হোৱাৰ সিদ্ধান্ত লোৱাৰ পূৰ্বে এক দশকতকৈও অধিক সময় ধৰি ৰাজ্যখনৰ নেতা হিচাপে কাৰ্যনিৰ্বাহ কৰা নীতিশ কুমাৰৰ উত্তৰাধিকাৰী হিচাপে শপত ল’বলৈ চৌধুৰীয়ে পুৱাই ৰাজ্যপালৰ বাসভৱন বিহাৰ লোক ভৱনত উপস্থিত হয় ।

বিহাৰৰ ৰাজ্যপাল ছৈয়দ আতা হাছনানে পাটনাস্থিত লোক ভৱনত সম্ৰাট চৌধুৰীক পদ আৰু গোপনীয়তাৰ শপত বাক্য পাঠ কৰোৱায় । নীতিশ কুমাৰৰ পদত্যাগৰ পাছত তেওঁ বিহাৰৰ প্ৰথমগৰাকী বিজেপিৰ মুখ্যমন্ত্ৰী হিচাপে পৰিগণিত হয় ।

৫৭ বছৰীয়া চৌধুৰীৰ সন্মুখত এতিয়া এক গুৰু দায়িত্ব, কাৰণ তেওঁ নীতিশ কুমাৰৰ স্থলাভিষিক্ত হৈছে, যিয়ে ২০২৫ চনৰ বিধানসভা নিৰ্বাচনত এন ডি এ-ৰ ঐতিহাসিক জয়ৰ পাছত অভিলেখ সংখ্যক দশমবাৰৰ বাবে মুখ্যমন্ত্ৰী হিচাপে শপত লৈছিল । তেওঁৰ এই উত্তৰণে নীতিশ কুমাৰৰ ‘সুশাসন’ৰ আধিপত্য থকা এটা যুগৰ অন্ত পেলাইছে আৰু বিহাৰত এন ডি এ-ৰ বাবে এক নতুন অধ্যায়ৰ সূচনা কৰিছে ।

ৰাজনীতিক চৌধুৰীৰ ক্ষমতাৰ উত্থান মন কৰিবলগীয়া, কিয়নো তেওঁ অতি সাধাৰণভাৱে ৰাজনীতি আৰম্ভ কৰিছিল । তেওঁ ৯০ৰ দশকত ৰাষ্ট্ৰীয় জনতা দলৰ (আৰ জে ডি) পৰা কেৰিয়াৰ আৰম্ভ কৰিছিল আৰু পাছলৈ ২০১৮ চনত বিজেপিত যোগদান কৰিছিল ।

১৯৬৮ চনত জন্মগ্ৰহণ কৰা সম্ৰাট চৌধুৰী এক ৰাজনৈতিক পৰিয়ালৰ সন্তান । তেওঁৰ পিতৃ শকুনী চৌধুৰী তাৰাপুৰ সমষ্টিৰ পৰা ছয়বাৰৰ বিধায়ক আছিল । তেওঁৰ মাতৃ পাৰ্বতী দেৱীয়ে ১৯৯৮ চনত বৰ্তমান বিলুপ্ত সমতা পাৰ্টিৰ পৰা একেখন আসনতে জয়লাভ কৰিছিল ।

২০২৪ চনত বিজেপি আৰু জে ডি ইউ (জে ডি ইউ)-ৰ মিত্ৰতা নৱীকৰণ হোৱাৰ পূৰ্বে চৌধুৰী নীতিশ কুমাৰৰ আটাইতকৈ কঠোৰ সমালোচক আছিল । ২০২২ চনত তেওঁ ৰাজহুৱাকৈ ঘোষণা কৰিছিল যে নীতিশ কুমাৰক ক্ষমতাৰ পৰা অপসাৰণ নকৰা পৰ্যন্ত তেওঁ নিজৰ গেৰুৱা পাগুৰি নোখোলে ।

২০২৩ চনত তেওঁক বিজেপিৰ ৰাজ্যিক সভাপতি হিচাপে নিযুক্তি দিয়া হৈছিল আৰু পৰৱৰ্তী সময়ত ২০২৪ চনত তেওঁ বিহাৰৰ উপ-মুখ্যমন্ত্ৰী হৈছিল । ২০২৫ চনৰ বিধানসভা নিৰ্বাচনত এন ডি এ-ই নিজৰ শাসন অক্ষুণ্ণ ৰখাৰ পাছত নীতিশ কুমাৰ ৰাজ্যিক ৰাজনীতিৰ পৰা আঁতৰি যোৱাৰ জল্পনা-কল্পনা ক্ৰমান্বয়ে তীব্ৰতৰ হৈ পৰিছিল । অ’বিচি সম্প্ৰদায়ৰ মাজত শক্তিশালী প্ৰভাৱ আৰু আক্ৰমণাত্মক ৰাজনৈতিক শৈলীৰ বাবে সম্ৰাট চৌধুৰী সদায় মুখ্যমন্ত্ৰী পদৰ দৌৰত আগশাৰীত আছিল ।

লগতে পঢ়ক : বিহাৰ ৰাজনীতিত নতুন অধ্যায়ৰ সূচনা, আজি মুখ্যমন্ত্ৰী ৰূপে শপত ল’ব সম্ৰাট চৌধুৰীয়ে

২০২৩ চনত তেওঁ বিজেপিৰ ৰাজ্যিক সভাপতি আৰু ২০২৪ চনত বিহাৰৰ উপ-মুখ্যমন্ত্ৰী হিচাপে নিযুক্ত হয়

বিহাৰৰ পৰৱৰ্তী মুখ্যমন্ত্ৰী হিচাপে নিৰ্বাচিত হৈছে বিজেপি নেতা সম্ৰাট চৌধুৰী । ইয়াৰ লগে লগে ৰাজ্যখনৰ ইতিহাসত প্ৰথমবাৰৰ বাবে এজন বিজেপি নেতাই এই পদত অধিষ্ঠিত হ’ব । এই নিযুক্তি অ’বিচি (OBC) সম্প্ৰদায়, বিশেষকৈ কুশৱাহা গোটৰ মাজত দলৰ স্থিতি শক্তিশালী কৰাৰ এক কৌশলগত পদক্ষেপ হিচাপে গণ্য কৰা হৈছে । ৫৭ বছৰীয়া চৌধুৰীয়ে নীতিশ কুমাৰৰ উত্তৰাধিকাৰী হিচাপে এক গুৰুত্বপূৰ্ণ দায়িত্ব লাভ কৰিছে, যিয়ে ২০২৫ চনৰ বিধানসভা নিৰ্বাচনত এনডিএৰ ঐতিহাসিক বিজয়ৰ পাছত অভিলেখ সংখ্যক দশমবাৰৰ বাবে মুখ্যমন্ত্ৰী হিচাপে শপত গ্ৰহণ কৰিছিল । তেওঁৰ এই নিযুক্তিয়ে নীতিশ কুমাৰৰ “সুশাসন”ৰ যুগৰ সমাপ্তি আৰু বিহাৰত এনডিএৰ এক নতুন অধ্যায়ৰ সূচনা কৰিছে ।

ৰাজনীতিত সম্ৰাট চৌধুৰীৰ উত্থান উল্লেখনীয় । ৯০ৰ দশকত ৰাষ্ট্ৰীয় জনতা দলৰ (RJD) জৰিয়তে কেৰিয়াৰ আৰম্ভ কৰা চৌধুৰীয়ে ২০১৮ চনত বিজেপিত যোগদান কৰিছিল । ১৯৬৮ চনত জন্মগ্ৰহণ কৰা সম্ৰাট চৌধুৰীৰ পৰিয়ালটো ৰাজনীতিৰ সৈতে ওতপ্ৰোতভাৱে জড়িত । তেওঁৰ পিতৃ শকুনি চৌধুৰী তাৰাপুৰ সমষ্টিৰ পৰা ছয়বাৰৰ বিধায়ক আছিল আৰু তেওঁৰ মাতৃ পাৰ্বতী দেৱীয়ে ১৯৯৮ চনত একেটা সমষ্টিৰ পৰাই সমতা পাৰ্টিৰ হৈ জয়লাভ কৰিছিল ।

সম্ৰাট চৌধুৰীয়ে ১৯৯০ চনত ৰাজনীতিত প্ৰৱেশ কৰিছিল আৰু পিতৃৰ দৰেই তেওঁৰ যাত্ৰাইও বিভিন্ন ৰাজনৈতিক দল অতিক্ৰম কৰিছে । বিজেপিত যোগ দিয়াৰ পূৰ্বে তেওঁ আৰজেডি আৰু জেডিইউৰ (JD-U) সৈতে জড়িত আছিল । ১৯৯৯ চনত ৰাবড়ী দেৱীৰ চৰকাৰত তেওঁ কৃষি মন্ত্ৰী হিচাপে কাৰ্যনিৰ্বাহ কৰিছিল । ২০০০ চনত পৰবত্তা বিধানসভা আসনত জয়লাভ কৰি তেওঁ নিজৰ দক্ষতা প্ৰমাণ কৰে আৰু ২০০৫ চনত পুনৰ সেই আসনখন দখল কৰে । ২০১৪ চনত তেওঁ আৰজেডি ত্যাগ কৰি জেডিইউৰ সৈতে হাত মিলায় আৰু জীতন ৰাম মাঝী চৰকাৰৰ অধীনত নগৰ উন্নয়ন আৰু গৃহ নিৰ্মাণ বিভাগৰ মন্ত্ৰী হিচাপে নিযুক্তি লাভ কৰে । অৱশ্যে নীতিশ কুমাৰ পুনৰ মুখ্যমন্ত্ৰী হোৱাৰ লগে লগে চৌধুৰীয়ে মন্ত্ৰিত্ব হেৰুৱায় ।

২০১৭ চনত তেওঁ বিজেপিত যোগদান কৰে আৰু এবছৰৰ ভিতৰতে তেওঁক ৰাজ্যিক উপ-সভাপতিৰ দায়িত্ব দিয়া হয় । তেওঁৰ উত্থান আছিল অতি দ্ৰুত । ২০২১ চনত তেওঁ পঞ্চায়তী ৰাজ মন্ত্ৰী হয় যদিও নীতিশ কুমাৰে বিজেপিৰ সৈতে মিত্ৰতা ভংগ কৰাৰ বাবে তেওঁৰ কাৰ্যকাল চুটি হয় । ২০২৪ চনত বিজেপি আৰু জেডিইউৰ মিত্ৰতা পুনৰ নবীকৰণ হোৱাৰ পূৰ্বে চৌধুৰী আছিল নীতিশ কুমাৰৰ আটাইতকৈ তীব্ৰ সমালোচক । ২০২২ চনত তেওঁ ৰাজহুৱাকৈ ঘোষণা কৰিছিল যে নীতিশ কুমাৰক ক্ষমতাৰ পৰা অপসাৰণ নকৰা পৰ্যন্ত তেওঁ নিজৰ মূৰৰ কেশৰীয়া পাগুৰি নোখোলে । ২০২৪ চনত দুয়োগৰাকী নেতা পুনৰ মিত্ৰতাত আবদ্ধ হ’লেও আজি চৌধুৰীৰ মুখ্যমন্ত্ৰী হিচাপে নিযুক্তি সেই সংকল্পৰে এক প্ৰতীকী পূৰণ হিচাপে বিবেচিত হৈছে ।

২০২৩ চনত তেওঁ বিজেপিৰ ৰাজ্যিক সভাপতি আৰু ২০২৪ চনত বিহাৰৰ উপ-মুখ্যমন্ত্ৰী হিচাপে নিযুক্ত হয় । ২০২৫ চনৰ বিধানসভা নিৰ্বাচনৰ পাছত নীতিশ কুমাৰ ৰাজ্যিক ৰাজনীতিৰ পৰা আঁতৰি যোৱাৰ চৰ্চা চলি থকাৰ মাজতে সম্ৰাট চৌধুৰীৰ নামটোৱেই মুখ্যমন্ত্ৰী পদৰ বাবে আটাইতকৈ আগত আছিল । আজি বিজেপিয়ে তেওঁক বিধানসভাৰ দলীয় নেতা হিচাপে নিৰ্বাচিত কৰি মুখ্যমন্ত্ৰী হোৱাৰ পথ প্ৰশস্ত কৰিছে । নীতিশ কুমাৰে নতুন চৰকাৰখনক “পূৰ্ণ সহযোগিতা আৰু নিৰ্দেশনা” আগবঢ়োৱাৰ প্ৰতিশ্ৰুতি দিছে । কুমাৰে কয় যে তেওঁ বহু বছৰ ধৰি বিহাৰৰ জনসাধাৰণৰ সেৱা কৰিছে আৰু এতিয়া পদত্যাগ কৰি নতুন চৰকাৰক দায়িত্ব অৰ্পণ কৰাৰ সিদ্ধান্ত লৈছে ।

সম্ৰাট চৌধুৰীয়ে কেন্দ্ৰীয় নেতৃত্বক ধন্যবাদ জনাই এই নতুন দায়িত্বক জনসেৱাৰ এক “পৱিত্ৰ সুযোগ” বুলি অভিহিত কৰিছে । তেওঁ নীতিশ কুমাৰৰ ভূমিকাৰ শলাগ লৈ কয় যে তেওঁ বহু কথা শিকিবলৈ পাইছে আৰু প্ৰধানমন্ত্ৰী নৰেন্দ্ৰ মোদীৰ ‘বিকশিত ভাৰত’ তথা নীতিশ কুমাৰৰ ‘সমৃদ্ধ বিহাৰ’ৰ সপোন বাস্তৱায়িত কৰিবলৈ তেওঁ সম্পূৰ্ণ নিষ্ঠাৰে কাম কৰিব ।

লগতে পঢ়ক : অন্ত পৰিল নীতিশ কুমাৰ যুগৰ, বিহাৰৰ নতুন মুখ্যমন্ত্ৰী হ’ল সম্ৰাট চৌধুৰী

বিহাৰৰ উপ-মুখ্যমন্ত্ৰী সম্ৰাট চৌধুৰীয়ে বিহাৰৰ মুখ্যমন্ত্ৰী হিচাপে দায়িত্ব গ্ৰহণ কৰিবলৈ সাজু হৈছে

বিহাৰৰ বিজেপি বিধায়িনী দলৰ নৱ-নিৰ্বাচিত নেতা সম্ৰাট চৌধুৰীয়ে মঙলবাৰে লোকভৱনত ৰাজ্যপাল লেফটেনেণ্ট জেনেৰেল চৈয়দ আতা হাছনাইন (অৱসৰপ্ৰাপ্ত)ক সাক্ষাৎ কৰে আৰু ৰাজ্যত চৰকাৰ গঠনৰ দাবী উত্থাপন কৰে ।

উল্লেখ্য য়ে, বিহাৰৰ উপ-মুখ্যমন্ত্ৰী সম্ৰাট চৌধুৰীয়ে বিহাৰৰ মুখ্যমন্ত্ৰী হিচাপে দায়িত্ব গ্ৰহণ কৰিবলৈ সাজু হৈছে । তেওঁ হ’ব ৰাজ্যখনৰ প্ৰথমজন বিজেপি মুখ্যমন্ত্ৰী । তেওঁ জেডি-ইউৰ নীতিশ কুমাৰৰ স্থান ল’ব, যিয়ে দিনৰ ভাগত মুখ্যমন্ত্ৰী পদৰ পৰা পদত্যাগ কৰিছিল । নীতিশ কুমাৰে ১০ এপ্ৰিলত ৰাজ্যসভাৰ সদস্য হিচাপে শপত গ্ৰহণ কৰিছিল । বিজেপি আৰু জেডি-ইউ ৰাজ্যখনৰ মিত্ৰজোঁট চৰকাৰৰ মুখ্য অংশীদাৰ ।

বিহাৰৰ মন্ত্ৰী দিলীপ জয়ছোৱালে মঙলবাৰে ঘোষণা কৰে যে শীঘ্ৰেই ৰাষ্ট্ৰীয় গণতান্ত্ৰিক মিত্ৰজোঁটৰ এখন বিধায়িনী বৈঠক অনুষ্ঠিত হ’ব । বিজেপি বিধায়িনী দলৰ নেতা হিচাপে নিৰ্বাচিত হোৱাৰ পিছত সম্ৰাট চৌধুৰীয়ে দলৰ কেন্দ্ৰীয় নেতৃত্বৰ প্ৰতি গভীৰ কৃতজ্ঞতা প্ৰকাশ কৰে আৰু তেওঁৰ নতুন ভূমিকাক ৰাজ্যখনৰ জনসাধাৰণৰ সেৱা কৰাৰ এক “পবিত্ৰ সুযোগ” বুলি বৰ্ণনা কৰে ।

তেওঁ নীতিশ কুমাৰৰ ভূমিকাৰ প্ৰশংসা কৰি কয় যে তেওঁ শাসনৰ ক্ষেত্ৰত বহু কথা শিকাইছে আৰু প্ৰধানমন্ত্ৰী নৰেন্দ্ৰ মোদীৰ ‘বিকশিত ভাৰত’ৰ দৃষ্টিভংগী আৰু নীতিশ কুমাৰৰ ‘সমৃদ্ধ বিহাৰ’ৰ সপোনে ৰাজ্যখনক সমৃদ্ধিশালী কৰি তুলিব । এক্সৰ এটা পোষ্টত চৌধুৰীয়ে কয় যে তেওঁ বিহাৰৰ জনসাধাৰণৰ বিশ্বাস আৰু সপোন পূৰণ কৰিবলৈ চেষ্টা কৰিব ।

তেওঁ কয়, “বিজেপি বিহাৰ বিধায়িনী দলৰ নেতাৰ দায়িত্ব অৰ্পণ কৰি মোৰ ওপৰত আস্থা প্ৰকাশ কৰাৰ বাবে মই ভাৰতীয় জনতা পাৰ্টিৰ কেন্দ্ৰীয় নেতৃত্বৰ প্ৰতি আন্তৰিক কৃতজ্ঞতা জ্ঞাপন কৰিছো । এয়া মোৰ বাবে কেৱল এটা পদ নহয়, বৰঞ্চ বিহাৰৰ জনসাধাৰণৰ সেৱা কৰাৰ, তেওঁলোকৰ বিশ্বাস আৰু সপোন পূৰণ কৰাৰ এক পবিত্ৰ সুযোগ । মই সম্পূৰ্ণ উচৰ্গা, নিষ্ঠা আৰু সততাৰে সকলোৰে আশা-আকাংক্ষা পূৰণ কৰাৰ প্ৰতিশ্ৰুতি দিছো ।”

তেওঁ লগতে কয়, “দেশৰ শ্ৰদ্ধাৰ প্ৰধানমন্ত্ৰী শ্ৰী নৰেন্দ্ৰ মোদী ডাঙৰীয়াৰ সমৰ্থ নেতৃত্বত আৰু মাননীয় ৰাষ্ট্ৰীয় সভাপতি শ্ৰী নিতীন নবীন ডাঙৰীয়াৰ নিৰ্দেশনাত মই বিহাৰক উন্নয়ন, সুশাসন আৰু সমৃদ্ধিৰ নতুন উচ্চতালৈ লৈ যাবলৈ নিৰন্তৰ দায়বদ্ধ হৈ থাকিম । আপোনালোকৰ মৰম, আশীৰ্বাদ আৰু সহযোগিতা মোৰ আটাইতকৈ ডাঙৰ শক্তি। জয় বিহাৰ, জয় ভাৰত !”

চৌধুৰীয়ে সাংবাদিকৰ আগত কয় যে বিজেপিয়ে তেওঁক বহু সুযোগ দিছে । তেওঁ কয়, “মোৰ জীৱনত বিজেপিয়ে মোক সেৱা কৰাৰ বহু সুযোগ দিছে । মই প্ৰায় ৩০ বছৰ ধৰি এজন ৰাজনৈতিক কৰ্মী হিচাপে কাম কৰি আছো, কিন্তু আগতে মোৰ হাতত কোনো আদৰ্শ নাছিল । মই ২০১৫ চনৰ পৰা বিজেপিৰ হৈ কাম কৰি আছো… মই প্ৰধানমন্ত্ৰী, গৃহমন্ত্ৰী, দলৰ ৰাষ্ট্ৰীয় সভাপতি, সাধাৰণ সম্পাদক (সংগঠন) বি.এল. সন্তোষ, শিৱৰাজ সিং চৌহান আৰু দলৰ সভাপতি সঞ্জয় ছাৰাওগীক আশ্বস্ত কৰিছো যে বিজেপিৰ আদৰ্শ আমি সকলোৰে আগতে ভাৰতক স্থান দিয়া আৰু ইয়াক শ্ৰেষ্ঠ বুলি গণ্য কৰা তথা দলক অগ্ৰাধিকাৰ দিয়াৰ কাম কৰি যাম ।”

লগতে পঢ়ক : অন্ত পৰিল নীতিশ কুমাৰ যুগৰ, বিহাৰৰ নতুন মুখ্যমন্ত্ৰী হ’ল সম্ৰাট চৌধুৰী