• July 19, 2026
Facebook-f Instagram Youtube Linkedin-in

টি-২০ বিশ্বকাপৰ বাবে আহিবই লাগিব ভাৰত, অন্যথা… বাংলাদেশৰ দাবী নাকচ আই চি চিৰ

January 7, 2026 ·

টি-২০ বিশ্বকাপৰ স্থানক লৈ বাংলাদেশে কৰা দাবীক নাকচ কৰিছে আই চি চিয়ে । ইয়াৰ পিছতে এতিয়া বিপদত পৰিছে বাংলাদেশ ক্ৰিকেট দলটো । বিশ্বকাপ খেলিবলৈ ভাৰতলৈ আহিবই লাগিব বুলি আই চি চিয়ে বি চি বিক স্পষ্ট কৰি দিছে ।

টি-২০ বিশ্বকাপৰ স্থান স্থানান্তৰিত কৰাৰ বাংলাদেশৰ দাবী নাকচ কৰিছে আই চি চিয়ে । আন্তঃৰাষ্ট্ৰীয় ক্ৰিকেট পৰিষদ তথা আই চি চিয়ে স্পষ্টকৈ উল্লেখ কৰিছে যে বিশ্বকাপ খেলিবলৈ বাংলাদেশ ভাৰতলৈ আহিবই লাগিব । অন্যথা পইণ্ট হেৰুৱাব লাগিব দলটোৱে ।

জানিব পৰা মতে আই চি চিয়ে ভাৰ্চুৱেল বৈঠকত বাংলাদেশ ক্ৰিকেট ব’ৰ্ডক অৱগত কৰে যে সুৰক্ষাজনিত কাৰণত ভাৰতৰ বাহিৰত মেচ খেলাৰ তেওঁলোকৰ দাবী নাকচ কৰা হৈছে । খবৰ অনুসৰি আই চি চিয়ে বি চি বিক জনাই যে বাংলাদেশে টি-২০ বিশ্বকাপ খেলিবলৈ ভাৰতলৈ আহিব লাগিব, অন্যথা পইণ্ট হেৰুৱাব লগা হ’ব । ইফালে বি চি বিয়ে জনোৱা মতে, আই চি চিয়ে এই অনুৰোধ নাকচ কৰাৰ বিষয়ে তেওঁলোকক অৱগত কৰা নাই ।

উল্লেখ্য যে, বি চি চি আইৰ নিৰ্দেশত শেহতীয়াকৈ আই পি এলৰ দল কলকাতা নাইট ৰাইডাৰ্ছে বাংলাদেশী বেগী বলাৰ মুস্তাফিজুৰ ৰহমানক ৰিলিজ কৰি দিছে । ঘৰুৱা প্ৰতিবাদৰ বাবেই বি চি চি আইয়ে এই সিদ্ধান্ত গ্ৰহণ কৰিছে, কিয়নো বাংলাদেশত হিন্দুসকলৰ ওপৰত চলি থকা অত্যাচাৰক লৈ ভাৰতীয় জনসাধাৰণ ক্ষুব্ধ হৈ পৰিছে । ফলস্বৰূপে আই পি এলত ৰহমানক ক্ৰয় কৰাৰ বিৰোধিতা কৰিছিল ভাৰতীয় জনসাধাৰণে ।

বি চি চি আইয়ে মুস্তাফিজুৰ ৰহমানক ৰিলিজ কৰি দিয়াৰ পিছতে বাংলাদেশ চৰকাৰো এই বিতৰ্কত জপিয়াই পৰে । ৭ ফেব্ৰুৱাৰীৰ পৰা ভাৰতত আৰম্ভ হ’বলগীয়া টি-২০ বিশ্বকাপ বৰ্জন কৰাৰ ভাবুকি দিছিল বাংলাদেশ ক্ৰিকেট ব’ৰ্ডে । আই চি চিলৈ লিখা এখন পত্ৰত বাংলাদেশ ক্ৰিকেট ব’ৰ্ডে ভাৰতত তেওঁলোকৰ মেচ খেলিব নোৱাৰিব বুলি উল্লেখ কৰি সেই মেচসমূহ শ্ৰীলংকালৈ স্থানান্তৰিত কৰিবলৈ দাবী জনায় ।

বাংলাদেশে যুক্তি দিছিল যে তেওঁলোকৰ খেলুৱৈসকলৰ সুৰক্ষাৰ বাবে এই পদক্ষেপ লোৱাটো প্ৰয়োজনীয় । ক্ষোভত বাংলাদেশে আনকি বাংলাদেশত আই পি এল সম্প্ৰচাৰ কৰাতো নিষেধাজ্ঞা আৰোপ কৰে । কিন্তু এতিয়া আই চি চিয়ে স্পষ্টকৈ উল্লেখ কৰিছে যে বিশ্বকাপৰ খেল খেলিবলৈ বাংলাদেশ ভাৰতলৈ আহিবই লাগিব ।

লগতে পঢ়ক : নিউজীলেণ্ডৰ বিৰুদ্ধে এদিনীয়া শৃংখলাৰ পূৰ্বে শ্ৰেয়াছ আয়াৰৰ শক্তিশালী প্ৰত্যাৱৰ্তন…

বাংলাদেশত পুনৰ হিন্দু লোকৰ বৰ্বৰ হত্যা… ১৮ দিনত ষষ্ঠটো ঘটনা

January 6, 2026 ·

বাংলাদেশত ধাৰাবাহিকভাৱে হিন্দু লোকসকলক আক্ৰমণৰ লক্ষ্য কৰি লোৱা হৈছে । সোমবাৰে পুনৰ আন এগৰাকী হিন্দু ব্যক্তি হিংসাৰ বলি হয় । বিগত ১৮ দিনত হিন্দু লোকৰ ওপৰত সংঘটিত এইটো ষষ্ঠটো ঘটনা ।

বাংলাদেশত সংখ্যালঘু হিন্দু সম্প্ৰদায়ৰ বিৰুদ্ধে হিংসাত্মক ঘটনা তথা অত্যাচাৰ অব্যাহত আছে । পেছাত এগৰাকী সাংবাদিক ৰাণা প্ৰতাপ বৈৰাগীক গুলীয়াই হত্যা কৰাৰ ২৪ ঘন্টা পাৰ নহওতেই আন এগৰাকী হিন্দু লোক হিংসাৰ বলি হৈছে । শেহতীয়া ঘটনা সংঘটিত হৈছে নৰসিংদ্ধি জিলাত । এই ঘটনাত গেলামালৰ ব্যৱসায়ী মণি চক্ৰৱৰ্তীক দুষ্কৃতিকাৰীয়ে হত্যা কৰে । সোমবাৰে নিশা প্ৰায় ৮ বজাত এই ঘটনা সংঘটিত হোৱা বুলি জানিব পৰা গৈছে ।

খবৰ অনুসৰি মণি চক্ৰৱৰ্তীয়ে বাংলাদেশৰ নৰসিংদ্ধি পলাশ উপ-জিলাৰ অন্তৰ্গত চাৰসিন্দুৰ বজাৰত এখন গেলামালৰ দোকান চলাইছিল । শিবপুৰ মহকুমাৰ সধৰচৰ ইউনিয়নৰ বাসিন্দা আছিল ব্যক্তিজন ।

জানিব পৰা মতে, মণি চক্ৰৱৰ্তী সচৰাচৰৰ দৰে নিজৰ দোকানত বহি থকা অৱস্থাত হঠাতে অচিনাকি দুৰ্বৃত্তই আক্ৰমণ কৰে । এই আক্ৰমণত তেওঁ গুৰুতৰভাৱে আহত হয় ।

ঘটনাৰ পাছতে স্থানীয় ৰাইজ ঘটনাস্থলীত উপস্থিত হৈ মণি চক্ৰৱৰ্তীক উদ্ধাৰ কৰি ততাতৈয়াকৈ চিকিৎসালয়লৈ লৈ যায় যদিও বাটতে তেওঁৰ মৃত্যু হয় । এই ঘটনাই সমগ্ৰ অঞ্চলটোত আতংকৰ সৃষ্টি কৰিছে । স্থানীয় ব্যৱসায়ীসকলে কয় যে মণি চক্ৰৱৰ্তী আছিল এজন শান্ত স্বভাৱৰ ব্যক্তি আৰু তেওঁৰ কাৰো লগত কোনো ধৰণৰ সংঘাত বা শত্ৰুতা নাছিল ।

মুকলি বজাৰত সংঘটিত হোৱা এই নৃশংস হত্যাকাণ্ডই ব্যৱসায়ী আৰু সাধাৰণ জনতাৰ মাজত নিৰাপত্তাহীনতাৰ ভাৱ আৰু গভীৰ কৰি তুলিছে । স্থানীয় সচেতন লোকসকলে এই ঘটনাক লৈ গুৰুতৰ উদ্বেগ প্ৰকাশ কৰিছে । তেওঁলোকে কয় যে সংখ্যালঘু হিন্দু সম্প্ৰদায়ৰ এজন ব্যৱসায়ীক ৰাজহুৱাভাৱে এইদৰে হত্যা কৰাটো অত্যন্ত চিন্তনীয় । প্ৰশাসনে অতি সোনকালে আক্ৰমণকাৰীক গ্ৰেপ্তাৰ কৰিবলৈ দাবী জনাইছে তেওঁলোকে ।

লগতে পঢ়ক : বাংলাদেশত পুনৰ হিন্দু যুৱকক গুলীয়াই হত্যা… বিগত এমাহতে সংখ্যালঘুৰ ওপৰত পঞ্চমটো আক্ৰমণ

বাংলাদেশত পুনৰ হিন্দু যুৱকক  গুলীয়াই হত্যা… বিগত এমাহতে সংখ্যালঘুৰ ওপৰত পঞ্চমটো আক্ৰমণ

January 5, 2026 ·

বাংলাদেশত সংখ্যলঘু হিন্দুৰ ওপৰত হোৱা আক্ৰমণৰ ঘটনা অব্যাহত আছে । সোমবাৰে পুনৰ আন এজন হিন্দু লোকক গুলীয়াই হত্যা কৰে দুৰ্বৃত্তই ।

বাংলাদেশত সংখ্যালঘু হিন্দুৰ ওপৰত ধাৰাবাহিকভাৱে সংঘটিত হৈ আছে আক্ৰমণৰ ঘটনা । শেহতীয়াকৈ দেশখনৰ সংখ্যালঘু হিন্দুৰ বিৰুদ্ধে আন এক হিংসাৰ ঘটনা পোহৰলৈ আহিছে । জেছৌৰ জিলাৰ মণিৰামপুৰ মহকুমাৰ এক ৰাজহুৱা স্থানত দুৰ্বৃত্তই গুলীয়াই হত্যা কৰিলে এজন হিন্দু যুৱকক । মৃত যুৱকজন কেশবপুৰ মহকুমাৰ আৰুৱা গাঁৱৰ ৪৫ বছৰীয়া ৰাণা প্ৰতাপ বৈৰাগী বুলি জানিব পৰা গৈছে ।

সোমবাৰে সন্ধিয়া প্ৰায় ৫:৪৫ বজাত মণিৰামপুৰৰ ১৭ নং ৱাৰ্ডৰ কোপালিয়া বজাৰ অঞ্চলত সংঘটিত হয় এই ঘটনা । প্ৰত্যক্ষদৰ্শী আৰু আৰক্ষীৰ সূত্ৰৰ পৰা জানিব পৰা মতে, বজাৰত উপস্থিত থকা ৰাণা প্ৰতাপক লক্ষ্য কৰি কোনো অচিনাকি আক্ৰমণকাৰীয়ে গুলীচালনা কৰে । গুলীৰ আঘাতত ৰাণা প্ৰতাপৰ থিতাতে মৃত্যু হয় ।

ঘটনাৰ পিছতে বজাৰ আৰু ইয়াৰ আশে-পাশে আতংকৰ সৃষ্টি হয় । তথ্য লাভ কৰাৰ লগে লগে মণিৰামপুৰ আৰক্ষী ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে । আৰক্ষীয়ে ঘটনাস্থলী ঘেৰাও কৰি তদন্ত আৰম্ভ কৰে ।

মণিৰামপুৰ থানাৰ ভাৰপ্ৰাপ্ত বিষয়াই ঘটনাস্থলীত আৰক্ষী উপস্থিত থকাৰ লগতে মৃতদেহটো উদ্ধাৰ কৰি মৰণোত্তৰ পৰীক্ষাৰ প্ৰস্তুতি চলোৱা বুলি জানিবলৈ দিয়ে । তেওঁ লগতে কয় যে এই গোচৰৰ তদন্ত চলি আছে আৰু আক্ৰমণকাৰীক চিনাক্ত কৰাৰ প্ৰচেষ্টা অব্যাহত আছে ।

উল্লেখ্য যে, বাংলাদেশত হিন্দু সম্প্ৰদায়ৰ বিৰুদ্ধে কেইবাটাও হিংসাত্মক ঘটনা সংঘটিত হোৱাৰ সময়তে ৰাণা প্ৰতাপ বৈৰাগীৰ হত্যাকাণ্ড সংঘটিত হৈছে । ইয়াৰ পূৰ্বে দীপু চন্দ্ৰ দাস নামৰ হিন্দু যুৱকক ৰাইজে প্ৰহাৰ কৰি হত্যা কৰিছিল । আন এজন হিন্দু যুৱক অমৃত মণ্ডলকো শেহতীয়াকৈ হত্যা কৰা হৈছিল ।

লগতে পঢ়ক : ভেনিজুৱেলাৰ পিছত এইবাৰ গ্ৰীণলেণ্ডৰ পাল ! ভাবুকি নিদিবলৈ ট্ৰাম্পক সকীয়নি ডেনমাৰ্কৰ

বাংলাদেশ চৰকাৰৰ ডাঙৰ সিদ্ধান্ত; অনিৰ্দিষ্টকাললৈ নিষিদ্ধ IPL ৰ টেলিকাষ্ট

January 5, 2026 ·

কলকাতা নাইট ৰাইডাৰ্ছৰ পৰা বেগী বলাৰ মুস্তাফিজুৰ ৰহমানক বাহিৰ কৰি দিয়াৰ পিছতে বাংলাদেশে ডাঙৰ সিদ্ধান্ত লৈছে। বাংলাদেশত অনিৰ্দিষ্টকাললৈ নিষিদ্ধ হ’ল IPL ৰ টেলিকাষ্ট

শেহতীয়াকৈ BCCI এ IPL ৰ ফ্ৰেঞ্চাইজি কলকাতা নাইট ৰাইডাৰ্ছক বাংলাদেশৰ বেগী বলাৰ মুস্তাফিজুৰ ৰহমানক নিজৰ দলৰ পৰা বাহিৰ কৰি দিবলৈ নিৰ্দেশ দিছিল।

ইয়াৰ পিছত অলপ সময়ৰ ভিতৰতে কেকেআৰে নিজৰ দলৰ পৰা মুস্তাফিজুৰ ৰহমানক দলৰ পৰা বহিষ্কাৰ কৰিছিল। ইয়াৰ বাবে ক্ষুব্ধ হৈ বাংলাদেশে এতিয়া এটা ডাঙৰ পদক্ষেপ লৈছে।

বিশ্বৰ বিখ্যাত ক্ৰিকেট লীগ ইণ্ডিয়ান প্ৰিমিয়াৰ লীগ (আই পি এল)ৰ টেলিকাষ্টত বাংলাদেশে অনিৰ্দিষ্টকাললৈ নিষেধাজ্ঞা আৰোপ কৰিছে।

বাংলাদেশৰ IPL অনুৰাগীৰ বাবে এই ঘটনাই ডাঙৰ আঘাতৰ দিছে। যোৱা মাহত আবুধাবিত অনুষ্ঠিত মিনি নিলামত কেকেআৰে মুস্তাফিজুৰক ৯.২০ কোটি টকাত ক্ৰয় কৰিছিল।

বাংলাদেশৰ তথ্য আৰু সম্প্ৰচাৰ মন্ত্ৰালয়ে ৫ জানুৱাৰীত টেলিভিছন চেনেলসমূহক ইণ্ডিয়ান প্ৰিমিয়াৰ লীগ (আই পি এল)ৰ সম্প্ৰচাৰ তৎকালীনভাৱে বন্ধ কৰিবলৈ নিৰ্দেশ দিছে।

এই নিৰ্দেশনা টেলিভিছন চেনেলসমূহক চৰকাৰী পত্ৰযোগে দিয়া হৈছিল। পত্ৰখনত কোৱা হৈছে যে আগন্তুক আই পি এল ছিজনৰ বাবে কলকাতা নাইট ৰাইডাৰ্ছ দলৰ পৰা বি চি চি আইয়ে বাংলাদেশৰ তাৰকা ক্ৰিকেটাৰ মুস্তাফিজুৰ ৰহমানক বাদ দিয়াৰ পিছতে এই সিদ্ধান্ত লোৱা হৈছে।

বিচিচিআইৰ এই সিদ্ধান্তৰ কোনো বৈধ কাৰণ উল্লেখ কৰা হোৱা নাই বুলিও পত্ৰখনত উল্লেখ কৰা হৈছে, যাৰ বাবে বাংলাদেশৰ জনসাধাৰণ অতি দুখী আৰু উত্তেজিত হৈ আছে।

এই পৰিস্থিতিৰ প্ৰতি লক্ষ্য ৰাখি মন্ত্ৰালয়ে সকলো টেলিভিছন চেনেলৰ বিষয়াক নিৰ্দেশ দিছে যে, পৰৱৰ্তী নিৰ্দেশ নোহোৱালৈকে আই পি এলৰ সকলো মেচ আৰু আনুষংগিক অনুষ্ঠানৰ সম্প্ৰচাৰ তৎক্ষণাত বন্ধ কৰিব লাগে।

ইয়াৰ পূৰ্বে বাংলাদেশে আনুষ্ঠানিকভাৱে টি-২০ বিশ্বকাপ ২০২৬ৰ বাবে ভাৰতলৈ নহাৰ সিদ্ধান্ত লৈছে।

লগতে পঢ়ক: পুনৰ প্ৰস্তুত কৰা হ’ব T20 WC 2026 ৰ সূচী; BCB ৰ স্থান সলনিৰ দাবী সন্দৰ্ভত ICC ৰ বৃহৎ সিদ্ধান্ত

টি-২০ বিশ্বকাপৰ বাবে ভাৰতলৈ নাহে বাংলাদেশী দল; IPL ৰ বিতৰ্কৰ মাজতে BCB ৰ সিদ্ধান্ত

January 4, 2026 ·

IPL ৰ বিতৰ্কৰ মাজতে BCB এ এক সিদ্ধান্ত গ্ৰহণ কৰিছে। টি-২০ বিশ্বকাপ ২০২৬ খেলিবলৈ ভাৰতলৈ নাহে বাংলাদেশৰ দল।

IPL ৰ বিতৰ্কৰ মাজতে BCB এ এটা সিদ্ধান্ত গ্ৰহণ কৰিছে। আইচিচি পুৰুষৰ টি-২০ বিশ্বকাপ ২০২৬ খেলিবলৈ ভাৰতলৈ নাহে বাংলাদেশৰ দল।

বাংলাদেশৰ ক্ৰীড়া উপদেষ্টা আছিফ নজৰুলে ৪ জানুৱাৰী (দেওবাৰ)ত সামাজিক মাধ্যমত এটা পোষ্টৰ জৰিয়তে এই কথা নিশ্চিত কৰিছে।নজৰুলে কৈছে যে, বাংলাদেশ ক্ৰিকেট ব’ৰ্ডে বৈঠকৰ অন্তত এই সিদ্ধান্ত গ্ৰহণ কৰিছে।

এতিয়া প্ৰশ্ন উত্থাপন হৈছে এই বিষয়ত আন্তঃৰাষ্ট্ৰীয় ক্ৰিকেট পৰিষদে কি ব্যৱস্থা গ্ৰহণ কৰে কাৰণ এই বৃহৎ অনুষ্ঠানৰ বাবে আই চি চিয়ে সূচী প্ৰস্তুত কৰে।

আছিফ নাজৰুলে নিজৰ ফেচবুক একাউণ্টত লিখিছে, ‘বাংলাদেশে বিশ্বকাপ খেলিবলৈ ভাৰত ভ্ৰমণ নকৰে। বাংলাদেশ ক্ৰিকেট ব’ৰ্ডে আজি (৪ জানুৱাৰী) এই সিদ্ধান্ত গ্ৰহণ কৰিছে।’

‘আমি এই সিদ্ধান্তক আদৰণি জনাইছো, যিটো ভাৰতৰ ক্ৰিকেট নিয়ন্ত্ৰণ ব’ৰ্ডৰ আক্ৰমণাত্মক সাম্প্ৰদায়িক নীতিৰ প্ৰতি সঁহাৰি জনাই গ্ৰহণ কৰা হৈছে।’

BCB ৰ এই সিদ্ধান্ত বাংলাদেশৰ বেগী বলাৰ মুস্তাফিজুৰ ৰহমানক ইণ্ডিয়ান প্ৰিমিয়াৰ লীগ (আই পি এল)ত নিষিদ্ধ কৰাৰ পিছতে লৈছে।

দৰাচলতে ভাৰত ক্ৰিকেট নিয়ন্ত্ৰণ ব’ৰ্ড (বিচিচিআই) এ কলকাতা নাইট ৰাইডাৰ্ছক নিৰ্দেশ দিছিল যে, তেওঁলোকে মুস্তাফিজুৰক নিজৰ দলৰ পৰা বাহিৰ কৰি দিব লাগে।

বিচিচিআইৰ নিৰ্দেশনা অনুসৰি কেকেআৰে মুস্তাফিজুৰক বাহিৰ কৰি দিয়ে। বাংলাদেশৰ অন্তৱৰ্তীকালীন চৰকাৰে মুস্তাফিজুৰ ৰহমানক আই পি এল দলৰ পৰা বাদ দিয়াৰ সিদ্ধান্তত তীব্ৰ আপত্তি প্ৰকাশ কৰিছে।

লগতে পঢ়ক: বিচিচিআইৰ নিৰ্দেশত কলকাতা নাইট ৰাইডাৰ্ছৰ এক্সন… বাংলাদেশী ক্ৰিকেটাৰ মুস্তাফিজুৰ ৰহমানক ৰিলিজ

বাংলাদেশী খেলুৱৈৰ সন্দৰ্ভত এক্সন মুডত BCCI; মুস্তাফিজুৰ ৰহমানক অপসাৰণৰ নিৰ্দেশ

January 3, 2026 ·

কলকাতা নাইট ৰাইডাৰ্ছক BCCI এ দিছে নিৰ্দেশ। বাংলাদেশৰ বেগী বলাৰ মুস্তাফিজুৰ ৰহমানক KKR ৰ পৰা বাহিৰ কৰিব লাগিব ।

ভাৰতীয় ক্ৰিকেট নিয়ন্ত্ৰণ ব’ৰ্ডে কলকাতা নাইট ৰাইডাৰ্ছক বাংলাদেশৰ বেগী বলাৰ মুস্তাফিজুৰ ৰহমানক তেওঁলোকৰ দলটোৰ পৰা বাহিৰ কৰিবলৈ নিৰ্দেশ দিছে।

বাংলাদেশত এজন হিন্দু লোকক নৃশংসভাৱে হত্যা কৰা ঘটনাৰ পিছত এই বিতৰ্ক ভাৰতীয় ক্ৰিকেট জগতত এক প্ৰধান বিষয় হৈ পৰিছিল।

এতিয়া পোহৰলৈ আহিছে যে BCCI এ KKR ক নিৰ্দেশ দিছে যে,তেওঁলোকে মুস্তাফিজুৰ ৰহমানক দলৰ পৰা বাদ দিব লাগে।অৰ্থাৎ মুস্তাফিজুৰ ৰহমান আৰু আইপিএল ২০২৬ৰ অংশ নহ’ব।

BCCI ৰ সচিব দেৱজিৎ শইকীয়াই কয় যে,”শেহতীয়াকৈ যিবোৰ ঘটনা সংঘটিত হৈ আছে,ইয়াৰ প্ৰতি লক্ষ্য ৰাখি বিচিচিআইয়ে কেকেআৰক বাংলাদেশৰ খেলুৱৈ গৰাকীক দলৰ পৰা বাদ দিবলৈ নিৰ্দেশ দিছে।

মুস্তাফিজুৰ ৰহমান বাংলাদেশৰ অন্যতম শ্ৰেষ্ঠ বেগী বলাৰ। ২০১৬ চনৰ পৰাই মুস্তাফিজুৰ ৰহমানে আই পি এলত খেলি আহিছে ।

এতিয়ালৈকে এই বাংলাদেশী খেলুৱৈগৰাকীয়ে ছানৰাইজাৰ্ছ হায়দৰাবাদ, মুম্বাই ইণ্ডিয়ানছ, ৰাজস্থান ৰয়েলছ, দিল্লী কেপিটেলছ আৰু চি এছ কেৰ হৈ খেলিছে।

লগতে পঢ়ক: ক্ৰিকেট যুদ্ধত ২০২৬ত কেইবাৰ মুখামুখি হ’ব ভাৰত-পাকিস্তান ?  জানক সকলো মেচৰ তাৰিখ

“মই নহয়, তেওঁ হে মোক লগ কৰিবলৈ আহিছিল…”; জয়শংকৰৰ সৈতে কৰমৰ্দন কৰাক লৈ আয়াজ ছাদিকৰ বিস্ফোৰক মন্তব্য   

January 2, 2026 ·

জয়শংকৰৰ সৈতে কৰমৰ্দন কৰাক লৈ আয়াজ ছাদিকৰ বিস্ফোৰক মন্তব্য । এছ জয়শংকৰেহে প্ৰথমে মিলাইছিল হাত।

ভাৰত আৰু পাকিস্তানৰ মাজত দীৰ্ঘদিনীয়া উত্তেজনাৰ মাজতে ঢাকাৰ এখন ছবিক লৈ পাকিস্তানত বাক্যবাণ তীব্ৰতৰ হৈ পৰিছে।

ভাৰতৰ বৈদেশিক পৰিক্ৰমা মন্ত্ৰী এছ জয়শংকৰৰ সৈতে হাত মিলোৱাক লৈ পাকিস্তানৰ ৰাষ্ট্ৰীয় বিধানসভাৰ অধ্যক্ষ আয়াজ ছাদিকে ৰাজহুৱাভাৱে অস্বীকাৰ কৰিছে।ছাদিকে দাবী কৰিছে যে ঢাকাৰ এই বৈঠকৰ সময়ত জয়শংকৰ নিজেই তেওঁৰ ওচৰলৈ আহিছিল।

বাংলাদেশৰ প্ৰাক্তন প্ৰধানমন্ত্ৰী খালেদা জিয়াৰ অন্ত্যেষ্টিক্ৰিয়াত অংশগ্ৰহণ কৰিবলৈ এছ জয়শংকৰ আৰু আয়াজ ছাদিক দুয়োজনেই ঢাকাত উপস্থিত হৈছিল।সাক্ষাৎ সময়ত দুয়োজন নেতাই ইজনে সিজনৰ লগত হাত মিলাইছিল।

মে’ মাহত সংঘটিত সামৰিক সংঘৰ্ষৰ পিছত ভাৰত আৰু পাকিস্তানৰ শীৰ্ষ নেতাসকলৰ এইখন প্ৰথম ৰাজহুৱা সভা বুলি বিবেচিত হৈছে।

ছাদিকে কয় যে,জয়শংকৰৰ নেতৃত্বত ভাৰতীয় প্ৰতিনিধি দল উপস্থিত হৈ সংসদৰ অপেক্ষা কক্ষত আছিল আৰু জয়শংকৰে নিজেই আহি তেওঁক লগ ধৰিলে।

ছাদিকৰ মতে,সেই সময়ত পাকিস্তানৰ বাহিৰেও মালদ্বীপ, নেপাল, ভূটান, বাংলাদেশৰ বিষয়াসকল ইতিমধ্যে অপেক্ষা কক্ষত উপস্থিত আছিল।ভিতৰলৈ অহাৰ লগে লগে জয়শংকৰে সকলো প্ৰতিনিধিক সম্ভাষণ জনালে।

তেওঁ আৰু কয়, সকলোকে লগ পোৱাৰ পিছত জয়শংকৰে তেওঁলোকৰ ওচৰলৈ আহি হাত মিলাই।সেই সময়ত তেওঁ পাকিস্তানৰ উচ্চায়ুক্তৰ লগত কথা পাতি আছিল।

ছাদিকৰ মতে, যেতিয়া পৰিচয় দিয়ে তেতিয়া এছ জয়শংকৰে কয় যে, ‘ আপোনাক মই চিনি পাওঁ,পৰিচয় দিয়াৰ প্ৰয়োজন নাই।

পাকিস্তানী বক্তাগৰাকীয়ে কয় যে,জয়শংকৰে তেওঁক গোপনে লগ কৰিবলৈ অহা নাছিল।তেওঁলোকৰ লগত কেমেৰা আছিল আৰু তেওঁলোকে ভালদৰেই জানিছিল যে এই কথা-বতৰা ৰেকৰ্ডিং কৰি সংবাদ মাধ্যমত দেখুওৱা হ’ব।

ছাদিকে দাবী কৰে যে জয়শংকৰে এই মুহূৰ্তৰ গুৰুত্ব আৰু ইয়াৰ ৰাজনৈতিক প্ৰভাৱৰ বিষয়ে ভালদৰেই জানিছিল।

লগতে পঢ়ক: ‘আমি সকলোৱে আপোনাৰ কথা ভাবি আছো’; নিউয়ৰ্কৰ মেয়ৰ জোহৰাণ মামদানীৰ উমৰ খালিদলৈ পত্ৰ

বাংলাদেশত পুনৰ হিন্দু যুৱকক হত্যা… মুছলমান বন্ধুৱে চলালে গুলী

December 30, 2025 ·

হিংসাজৰ্জৰ বাংলাদেশত সংখ্যলঘু হিন্দুৰ ওপৰত হোৱা নিৰ্যাতন অব্যাহত আছে । সোমবাৰে পুনৰ আন এজন হিন্দু যুৱকক গুলীয়াই হত্যা কৰা হয় দেশখনত ।

বাংলাদেশত পুনৰ হত্যা কৰা হৈছে আন এজন হিন্দু যুৱকক । এই ঘটনা একেখন মইমনসিং জিলাত সংঘটিত হৈছিল য’ত ১৮ ডিচেম্বৰত দিপু চন্দ্ৰ দাসক প্ৰহাৰ কৰি হত্যা কৰা হৈছিল আৰু তাৰ পিছত তেওঁৰ মৃতদেহ জ্বলাই দিছিল । বাংলাদেশত যোৱা ১৫ দিনত এইটো তৃতীয়টো হিন্দু যুৱকক হত্যা কৰাৰ ঘটনা । ইয়াৰ পূৰ্বে ঢাকাত অমৃত মণ্ডলক গুলীয়াই হত্যা কৰা হৈছিল । তেওঁৰ বিৰুদ্ধে ধন দাবীৰ অভিযোগ উত্থাপন কৰা হৈছিল ।

সোমবাৰে (২৯ ডিচেম্বৰ, ২০২৫) সন্ধিয়া ৬:৪৫ বজাত লাবিব গ্ৰুপ গাৰ্মেণ্টছৰ ভালুকা মহকুমা অঞ্চলত অৱস্থিত চুলতান চুৱেটাৰ লিমিটেডৰ এটা কাৰখানাত সংঘটিত হয় এই ঘটনা । নিহত যুৱকজনৰ নাম বজেন্দ্ৰ বিশ্বাস । তেওঁ মুছলমান বন্ধু নোমন মিয়াৰ লগত আছিল । নোমনে গুলী চলোৱাত উৰুত আঘাতপ্ৰাপ্ত হৈ বজেন্দ্ৰৰ মৃত্যু হয় । ইতিমধ্যে আৰক্ষীয়ে গ্ৰেপ্তাৰ কৰিছে নোমনক । বজেন্দ্ৰ আনছাৰৰ সদস্য আছিল । কাৰখানাৰ নিৰাপত্তাৰ বাবে মোতায়েন কৰা হৈছিল বিশজন আনছাৰ সদস্য । বজেন্দ্ৰ বিশ্বাসৰ বয়স ৪২ বছৰ আৰু নোমন মিয়াৰ বয়স ২৯ বছৰ ।

আৰক্ষী আৰু প্ৰত্যক্ষদৰ্শীৰ মতে, বজেন্দ্ৰ আৰু নোমনক কাৰখানাটোত নিৰাপত্তাৰক্ষী হিচাপে নিযুক্তি দিয়া হৈছিল আৰু কাৰখানাৰ ভিতৰত থকা আনছাৰ বেৰেকত বাস কৰিছিল । কথা-বতৰাৰ মাজতে নোমনে বজেন্দ্ৰ বিশ্বাসৰ ফালে বন্দুক টোঁৱাই । কোৱা হৈছে যে তেওঁ ধেমালি কৰিছিল, কিন্তু ট্ৰিগাৰ টানে, গুলী বজেন্দ্ৰৰ বাওঁ উৰুত আঘাত কৰে ।

বাজেন্দ্ৰ বিশ্বাসৰ মৃত্যুত বাংলাদেশত পুনৰ উত্তেজনা সৃষ্টি হোৱাৰ সম্ভাৱনাই দেখা দিছে । ইতিমধ্যে তাত পৰিস্থিতি অতি উত্তেজিত, সংখ্যালঘুৰ বিৰুদ্ধেও হিংসাৰ ঘটনা নিয়মীয়াকৈ সংঘটিত হৈছে । ১৮ ডিচেম্বৰত দিপু দাসৰ হত্যাকাণ্ডৰ পিছত পৰিস্থিতি তীব্ৰতৰ হৈ পৰে । ভাৰতেও তেওঁৰ হত্যাক লৈ ক্ষোভ প্ৰকাশ কৰে । বিগত এটা বছৰত বাংলাদেশত হিন্দুৰ ওপৰত আক্ৰমণ আৰু হিংসা যথেষ্ট বৃদ্ধি পাইছে ।

লগতে পঢ়ক : অসুস্থতাৰ সৈতে যুঁজি অৱশেষত শেষ নিশ্বাস ত্যাগ খালেদা জিয়াৰ… ৭ দিনীয়া শোক ঘোষণা

খালেদা জিয়াৰ মৃত্যুত শোক প্ৰকাশ প্ৰধানমন্ত্ৰী মোদীৰ… ২০১৫ৰ সাক্ষাৎ স্মৰণ

December 30, 2025 ·

বাংলাদেশৰ প্ৰথমগাৰীক মহিলা প্ৰধানমন্ত্ৰী খালেদা জিয়াৰ মৃত্যুত শোক প্ৰকাশ প্ৰধানমন্ত্ৰী মোদীৰ । পৰিয়াল তথা বাংলাদেশৰ জনসাধাৰণক সমাবেদনা জ্ঞাপন প্ৰধানমন্ত্ৰীৰ ।

বাংলাদেশৰ প্ৰাক্তন প্ৰধানমন্ত্ৰী খালেদা জিয়াৰ মৃত্যুত আজি প্ৰধানমন্ত্ৰী নৰেন্দ্ৰ মোদীয়ে শোক প্ৰকাশ কৰে । ভাৰতৰ দ্বিপাক্ষিক সম্পৰ্কত তেওঁৰ ভূমিকাক স্মৰণ কৰি প্ৰধানমন্ত্ৰী মোদীয়ে প্ৰায় ১০ বছৰ পূৰ্বে তেওঁলোকৰ প্ৰথম সাক্ষাৎৰ স্মৃতি স্মৰণ কৰে । নিজৰ এক্স হেণ্ডেলত প্ৰধানমন্ত্ৰী মোদীয়ে ২০১৫ চনত খালেদা জিয়াৰ সৈতে হোৱা সাক্ষাৎ আৰু বৈঠকৰ ফটো শ্বেয়াৰ কৰি প্ৰাক্তন প্ৰধানমন্ত্ৰীগৰাকীৰ আপোনজন আৰু পৰিয়ালক সমবেদনা জ্ঞাপন কৰে ।

পৰিয়াল আৰু বাংলাদেশৰ জনসাধাৰণক আন্তৰিক সমবেদনা জ্ঞাপন-

প্ৰধানমন্ত্ৰী মোদীয়ে লিখিছে, “প্ৰাক্তন প্ৰধানমন্ত্ৰী তথা বি এন পিৰ অধ্যক্ষ বেগম খালেদা জিয়াৰ মৃত্যুৰ খবৰ পাই গভীৰ শোক প্ৰকাশ কৰিছো । তেওঁৰ পৰিয়াল আৰু বাংলাদেশৰ জনসাধাৰণলৈ আমাৰ আন্তৰিক সমবেদনা । ভগৱানে তেওঁৰ পৰিয়ালক এই কৰুণ মুহূৰ্ত সহ্য কৰিবলৈ শক্তি প্ৰদান কৰক ।”

২০১৫ত সৌহাৰ্দপূৰ্ণ সাক্ষাৎ-

দুয়োখন দেশৰ মাজত দ্বিপাক্ষিক সম্পৰ্কত খালেদা জিয়াৰ অৱদান সন্দৰ্ভত প্ৰধানমন্ত্ৰী মোদীয়ে লিখিছে, “বাংলাদেশৰ প্ৰথমগৰাকী মহিলা প্ৰধানমন্ত্ৰী হিচাপে বাংলাদেশৰ উন্নয়ন আৰু ভাৰত-বাংলাদেশৰ সম্পৰ্কত তেওঁৰ উল্লেখযোগ্য অৱদান সদায় স্মৰণীয় হৈ থাকিব । ২০১৫ চনত ঢাকাত তেওঁৰ সৈতে আমাৰ আন্তৰিক সাক্ষাৎৰ কথা মই স্মৰণ কৰিছো । আমি আশা কৰিছো যে তেওঁৰ দৃষ্টিভংগী আৰু উত্তৰাধিকাৰে আমাৰ অংশীদাৰিত্বক পথ প্ৰদৰ্শন কৰি যাব । তেওঁৰ আত্মাই শান্তি লাভ কৰক ।”

দীৰ্ঘদিন ধৰি অসুস্থ হৈ আছিল প্ৰাক্তন প্ৰধানমন্ত্ৰীগৰাকী-

মঙলবাৰে পুৱা প্ৰায় ৬ বজাত খালেদা জিয়াৰ দেহাৱসান ঘটে । তেওঁৰ দল বি এন পিয়ে পুৱা ৬ বজাত ছ’চিয়েল মিডিয়াত পোষ্ট কৰি তেওঁৰ মৃত্যুৰ খবৰ নিশ্চিত কৰে । ঢাকাৰ এভাৰকেয়াৰ হাস্পতালত চিকিৎসাধীন হৈ আছিল তেওঁ । ২৩ নৱেম্বৰত ভৰ্তি হোৱাৰ পিছত ১১ ডিচেম্বৰত ভেণ্টিলেটৰত ৰখা হয় । ১৭ বছৰৰ পাছত লণ্ডনৰ পৰা বাংলাদেশলৈ উভতি অহা পুত্ৰ আতিক ৰহমানে এতিয়া নিজৰ ৰাজনৈতিক উত্তৰাধিকাৰক আগুৱাই নিব । শেহতীয়াকৈ তেওঁ ২০২৬ চনৰ ফেব্ৰুৱাৰী মাহৰ নিৰ্বাচনৰ বাবে মনোনয়ন দাখিল কৰে ।

লগতে পঢ়ক : অসুস্থতাৰ সৈতে যুঁজি অৱশেষত শেষ নিশ্বাস ত্যাগ খালেদা জিয়াৰ… ৭ দিনীয়া শোক ঘোষণা