বাংলাদেশৰ শেহতীয়া পৰিস্থিক লৈ উদ্বেগ প্ৰকাশ কৰিছে দেশখনৰ ভূতপূৰ্ব প্ৰধানমন্ত্ৰী শ্বেখ হাচিনাই । মহম্মদ ইউনুছক তীব্ৰ সমালোচনা কৰি হাচিনাই কয় যে, তেওঁ কোনো ৰাজনীতিবিদ নহয়, তেওঁৰ জটিল দেশ চলোৱাৰ কোনো অভিজ্ঞতাও নাই ।
বাংলাদেশৰ পৰিস্থিতি পুনৰ অৱনতি ঘটিছে । সংখ্যালঘুৰ বিৰুদ্ধে হিংসা সংঘটিত হৈছে আৰু ঠায়ে ঠায়ে ধ্বংসাত্মক কাৰ্য, অগ্নিসংযোগৰ খবৰ প্ৰকাশ পাইছে । ভাৰত বিৰোধী প্ৰতিবাদো বৃদ্ধি পাইছে । পৰিৱৰ্তিত পৰিস্থিতিৰ মাজতে বাংলাদেশৰ প্ৰাক্তন প্ৰধানমন্ত্ৰী শ্বেখ হাচিনাই কয় যে ইউনুছৰ কাৰ্যকালত আইন-শৃংখলাৰ অৱনতি ঘটিছে, হিংসা সাধাৰণ হৈ পৰিছে । ভাৰত বিৰোধী প্ৰতিবাদ সন্দৰ্ভত তেওঁ কয় যে এইবোৰ দেশৰ স্বাৰ্থত নহয় । ভাৰতৰ সৈতে সুসম্পৰ্কৰ ওপৰত আমাৰ সমৃদ্ধি আৰু নিৰাপত্তা নিৰ্ভৰশীল বুলিও কয় হাচিনাই ।
যোৱা বছৰ ঢাকাত ছাত্ৰ প্ৰতিবাদৰ মাজতে ভাৰতলৈ পলায়ন কৰা বাংলাদেশৰ প্ৰাক্তন প্ৰধানমন্ত্ৰী শ্বেখ হাচিনাই এক সাক্ষাৎকাৰত ইছলামিক প্ৰভাৱ আৰু নিৰাপত্তাজনিত বিষয়ক লৈ উদ্বেগ প্ৰকাশ কৰি কয় যে, “মই এই উদ্বেগ বুজি পাওঁ আৰু সেইদৰে বৃহৎ সংখ্যক বাংলাদেশীয়েও বুজি পায় যিসকলে নিৰাপদ, ধৰ্মনিৰপেক্ষ দেশখনক পছন্দ কৰে ।”
“ইউনুছ কোনো নেতা নহয়, তেওঁৰ দেশ চলোৱাৰ কোনো অভিজ্ঞতা নাই”
শ্বেখ হাচিনাই আৰু কয় যে, “ইউনুছে চৰমপন্থীসকলক কেবিনেটৰ গুৰুত্বপূৰ্ণ পদত ৰাখিছে, আনহাতে দোষী সাব্যস্ত হোৱা সন্ত্ৰাসবাদীসকলক কাৰাগাৰৰ পৰা মুকলি কৰি দিয়া হৈছে আৰু আন্তঃৰাষ্ট্ৰীয় সন্ত্ৰাসবাদী সংগঠনৰ সৈতে জড়িত বহু গোটক ৰাজহুৱা জীৱনত ভূমিকা ল’বলৈ অনুমতি দিয়া হৈছে ।” ইউনুছ সন্দৰ্ভত তেওঁ কয়, “তেওঁ কোনো ৰাজনীতিবিদ নহয়, তেওঁৰ জটিল দেশ চলোৱাৰ কোনো অভিজ্ঞতাও নাই । মোৰ আশংকা যে উগ্ৰপন্থীয়ে তেওঁক আন্তঃৰাষ্ট্ৰীয় সমাজৰ সন্মুখত গ্ৰহণযোগ্য মুখ উপস্থাপন কৰিবলৈ ব্যৱহাৰ কৰিছে, একে সময়তে আমাৰ প্ৰতিষ্ঠানসমূহক ভিতৰৰ পৰা পদ্ধতিগতভাৱে কট্টৰপন্থী কৰি তুলিছে ।”
এই পৰিস্থিতি কেৱল ভাৰতৰ বাবেই নহয়, দক্ষিণ এছিয়া অঞ্চলত স্থিতিশীলতাৰ ক্ষেত্ৰত মনোনিৱেশ কৰা প্ৰতিখন দেশৰ বাবেও চিন্তাৰ বিষয় হ’ব লাগে বুলি ভূতপূৰ্ব প্ৰধানমন্ত্ৰীগৰাকীয়ে কয় । বাংলাদেশৰ ৰাজনীতিৰ ধৰ্মনিৰপেক্ষ চৰিত্ৰ আমাৰ অন্যতম ডাঙৰ শক্তি আছিল আৰু দুই এজন মূৰ্খ চৰমপন্থীৰ দ্বাৰা আমি ইয়াক ধ্বংস হ’বলৈ দিব নোৱাৰো বুলি কয় হাচিনাই ।
‘চিকেন নেক’ৰ ওপৰত দিয়া বক্তব্য দায়িত্বহীন-
ভাৰতৰ উত্তৰ-পূব ৰাজ্য আৰু “চিকেন নেক” সন্দৰ্ভত শ্বেখ হাচিনাই কয় যে, “এনে বক্তব্য অত্যন্ত বিপজ্জনক আৰু সম্পূৰ্ণ দায়িত্বহীন । ইয়াত ইউনুছৰ জৰিয়তে নিজৰ প্ৰভাৱ বিস্তাৰ কৰা উগ্ৰপন্থী উপাদানসমূহ প্ৰতিফলিত হৈছে । কোনো নেতাই এনে চুবুৰীয়া দেশক ভাবুকি নিদিয়ে, যাৰ ওপৰত বাংলাদেশ বাণিজ্য, ট্ৰেনজিট আৰু আঞ্চলিক স্থিতিশীলতাৰ বাবে নিৰ্ভৰশীল ।”
তেওঁ কয়, “এই বক্তব্যই কেৱল মতাদৰ্শগত কল্পনাৰ সেৱা কৰে, বাংলাদেশৰ ৰাষ্ট্ৰীয় স্বাৰ্থৰ সেৱা নহয় । ভাৰতৰ এনে বক্তব্যক চিন্তাৰে চোৱাৰ সম্পূৰ্ণ অধিকাৰ আছে । এনে কণ্ঠই বাংলাদেশী জনসাধাৰণক প্ৰতিনিধিত্ব নকৰে, যিসকলে বুজি পায় যে তেওঁলোকৰ সমৃদ্ধি আৰু নিৰাপত্তা ভাৰতৰ সৈতে শক্তিশালী সম্পৰ্কৰ ওপৰত নিৰ্ভৰশীল । দেশত গণতন্ত্ৰ পুনৰুদ্ধাৰ হ’লে আৰু এখন দায়িত্বশীল চৰকাৰ ঘূৰি আহিলেই এনে অসাৱধানতাপূৰ্ণ বাক্যবাণৰ অন্ত পৰিব ।”
‘হাদী হত্যাকাণ্ডই আইন-শৃংখলাৰ অৱনতি প্ৰতিফলিত কৰিছে’
যুৱ নেতা ওছমান হাদী হত্যাকাণ্ডৰ সন্দৰ্ভত শ্বেখ হাচিনাই কয়, “এই কৰুণ হত্যাকাণ্ডই মোৰ চৰকাৰক উৎখাত কৰা আইন-শৃংখলা ভংগৰ কথাও প্ৰতিফলিত কৰিছে আৰু ইউনুছৰ শাসনত অধিক ভয়াৱহ হৈ পৰিছে । হিংসা সাধাৰণ কথা হৈ পৰিছে, আনহাতে অন্তৱৰ্তীকালীন চৰকাৰে হয় স্বীকাৰ কৰিবলৈ অস্বীকাৰ কৰিছে নহয় ইয়াক ৰোধ কৰাত ব্যৰ্থ হৈছে । এনে ঘটনাই আভ্যন্তৰীণভাৱে বাংলাদেশক অস্থিৰ কৰি তোলে আৰু চুবুৰীয়া দেশৰ সৈতে থকা আমাৰ সম্পৰ্ককো ক্ষতিগ্ৰস্ত কৰে ।”
সংখ্যালঘুৰ বিৰুদ্ধে হোৱা হিংসাক লৈ হতাশা প্ৰকাশ কৰি শ্বেখ হাচিনাই কয়, “ভাৰত এই বিশৃংখলতা, সংখ্যালঘুৰ ওপৰত অত্যাচাৰ আৰু আমি একেলগে গঢ়ি তোলা সকলো বস্তু ধ্বংস হোৱাৰ সাক্ষী হৈ আছে । যেতিয়া আপুনি নিজৰ সীমাৰ ভিতৰত মৌলিক শৃংখলা বজাই ৰাখিব নোৱাৰে, তেতিয়া আন্তঃৰাষ্ট্ৰীয় মঞ্চত বিশ্বাসযোগ্যতা হেৰুৱাই পেলায় । এয়াই হৈছে ইউনুছৰ বাংলাদেশৰ বাস্তৱতা ।”
‘ভাৰতে প্ৰকাশ কৰা উদ্বেগ ন্যায্য’
ইউনুছক আক্ৰমণ কৰি তেওঁ কয়, “ইউনুছৰ চৰকাৰে উৎসাহিত কৰা চৰমপন্থীয়ে এইবোৰ সৃষ্টি কৰিছিল । এইসকল সেই একেই লোক যিয়ে ভাৰতীয় দূতাবাসত বিক্ষোভ প্ৰদৰ্শন কৰি আমাৰ সংবাদ মাধ্যমৰ কাৰ্যালয়ত আক্ৰমণ কৰিছিল, যিয়ে নিৰ্ভয়ে সংখ্যালঘুসকলক আক্ৰমণ কৰিছিল আৰু যিসকলে মোৰ পৰিয়াল আৰু মোক আমাৰ পলায়ন কৰিবলৈ বাধ্য কৰাইছিল । ইউনুছে এনে ব্যক্তিক গুৰুত্বপূৰ্ণ আৰু শক্তিশালী পদত ৰাখি দোষী সাব্যস্ত হোৱা চৰমপন্থীক জেলৰ পৰা মুকলি কৰি দিছে ।”
তেওঁ আৰু কয়, “মই এই কথা কবলৈ দুখ পাইছো যে ভাৰতে নিজৰ কৰ্মচাৰীৰ সুৰক্ষাৰ প্ৰতি প্ৰকাশ কৰা উদ্বেগ ন্যায্য । এখন দায়িত্বশীল চৰকাৰে কূটনৈতিক মিছনক সুৰক্ষা দিব আৰু তেওঁলোকক ভাবুকি দিয়াসকলক গোচৰ চলাব । ইয়াৰ পৰিৱৰ্তে ইউনুছে দুৰ্বৃত্তক মুকলিকৈ ঘূৰিবলৈ অনুমতি দিছে আৰু তেওঁলোকক যোদ্ধা বুলি অভিহিত কৰিছে ।”
বাংলাদেশৰ আগন্তুক নিৰ্বাচন সন্দৰ্ভত শ্বেখ হাচিনাই কয়, “আৱামী লীগ অবিহনে নিৰ্বাচন নিৰ্বাচন নহয়, ৰাজ অভিষেক হ’ব । বৰ্তমান ইউনুছে বাংলাদেশৰ জনসাধাৰণৰ পৰা এটাও ভোট নোপোৱাকৈয়ে শাসন কৰি আছে আৰু এতিয়া তেওঁ ৰাইজে ৯ বাৰ নিৰ্বাচন কৰা দলটোক নিষিদ্ধ কৰিব বিচাৰিছে । বাস্তৱত বাংলাদেশীয়ে যদি নিজৰ প্ৰিয় দলক ভোট দিব নোৱাৰে তেন্তে তেওঁলোকে একেবাৰে ভোট নিদিয়ে । সেয়েহে, যদি আৱামি লীগৰ ওপৰত এই নিষেধাজ্ঞা অব্যাহত আছে, লাখ লাখ লোক ভোটাধিকাৰৰ পৰা বঞ্চিত হ’ব ।”
লগতে পঢ়ক : সংখ্যালঘুৰ ওপৰত চলি থকা অত্যাচাৰৰ বিৰুদ্ধে ঢাকাত হিন্দু সংগঠনৰ ব্যাপক প্ৰতিবাদ
