বাংলাদেশত হিন্দু যুৱকৰ হত্যাক লৈ দেশখনৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছক ককৰ্থনা কৰে ভাৰতে । ভাৰতে দেশখনত সংখ্যালঘুৰ ওপৰত চলি থকা হিংসা এক চিন্তনীয় বিষয় বুলি কয় ।
বাংলাদেশত চলি থকা ৰাজনৈতিক সংকট আৰু সংখ্যালঘু হিন্দুৰ ওপৰত চলি থকা অত্যাচাৰ সন্দৰ্ভত ভাৰত চৰকাৰে এক বিবৃতি প্ৰকাশ কৰিছে । শুকুৰবাৰে বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালে কয় যে বাংলাদেশত সংখ্যালঘু লোকৰ ওপৰত চলি থকা হিংসাত্মক ঘটনা এক চিন্তনীয় বিষয় । তেওঁ কয়, “দীপু দাসৰ হত্যাকাণ্ডক আমি গৰিহণা দিছো । দোষীক ন্যায়ৰ কাঠগঢ়ালৈ আনিব বুলি আমি আশা কৰিছো ।”
‘বাংলাদেশত হিংসাক আওকাণ কৰিব নোৱাৰি’
বৈদেশিক পৰিক্ৰমা মন্ত্ৰালয়ে কয় যে, “দেশখনত বৰ্তমানৰ অন্তৱৰ্তীকালীন চৰকাৰৰ কাৰ্যকালত হত্যা, অগ্নিসংযোগ, ভূমি দখলকে ধৰি ২৯০০টা কাণ্ডৰ বাতৰি পোৱা গৈছে । এই প্ৰতিবেদনসমূহক ৰাজনৈতিক হিংসা বুলি উলাই কৰিব নোৱাৰি ।”
২০২৫ চনৰ ফেব্ৰুৱাৰী মাহত দেশখনত সাধাৰণ নিৰ্বাচন অনুষ্ঠিত হোৱাৰ কথা । বাংলাদেশ নেশ্যনেলিষ্ট পাৰ্টি সক্ৰিয় হৈ পৰিছে আৰু সক্ৰিয়ভাৱে প্ৰচাৰ চলাই আছে । এই সন্দৰ্ভত বি এন পিৰ কাৰ্যবাহী অধ্যক্ষ তথা প্ৰাক্তন প্ৰধানমন্ত্ৰী খালেদা জিয়াৰ পুত্ৰ তাৰিক ৰহমান ১৭ বছৰৰ নিৰ্বাসনৰ পিছত ঢাকাত উপস্থিত হৈছে । বিমানবন্দৰত উপস্থিত হোৱাৰ লগে লগে প্ৰধানমন্ত্ৰীৰ পদৰ আগশাৰীৰ প্ৰতিদ্বন্দ্বী ৰহমানে দেশৰ মাটিত খালী ভৰিৰে থিয় হৈ প্ৰতীকীভাৱে ৰাজনীতিলৈ পুনৰ উভতি অহাটো চিহ্নিত কৰে ।
বাংলাদেশৰ নিৰ্বাচন সন্দৰ্ভত বৈদেশিক মন্ত্ৰালয়ৰ বিবৃতি-
তাৰিক ৰহমানৰ প্ৰত্যাৱৰ্তন আৰু আগন্তুক নিৰ্বাচন সন্দৰ্ভত বৈদেশিক পৰিক্ৰমা মন্ত্ৰালয়ৰ মুখপাত্ৰই কয়, “ভাৰতে বাংলাদেশত মুক্ত, নিকা আৰু সৰ্বাংগীন নিৰ্বাচনক সমৰ্থন কৰে । ভাৰত দেশখনৰ জনসাধাৰণৰ সৈতে সুসম্পৰ্ক স্থাপনৰ বাবে প্ৰতিশ্ৰুতিবদ্ধ । আমি দেশখনত শান্তি আৰু স্থিতিশীলতাৰ আশা কৰিছো । সকলো শ্ৰেণীৰ লোকে অংশগ্ৰহণ কৰা উচিত আৰু জনসাধাৰণৰ কণ্ঠ বৃদ্ধি কৰা উচিত ।”
উল্লেখ্য যে, বাংলাদেশত ওচমান হাদীৰ হত্যাকাণ্ডৰ পিছত চৰমপন্থীয়ে সংখ্যালঘু হিন্দুসকলক অত্যাচাৰ কৰিবলৈ আৰম্ভ কৰিছে । এটা দলে প্ৰথমে দীপু দাস নামৰ হিন্দু যুৱক এজনক হত্যা কৰাৰ পিছত গছত ওলোমাই থৈ মৃতদেহ জ্বলাই দিয়ে । ইয়াৰ পিছতে ৰাজবাৰীত এটা দলে সম্ৰাট নামেৰে পৰিচিত অমৃত মণ্ডলক প্ৰহাৰ কৰি হত্যা কৰে । ইয়াৰ ফলত ভাৰতৰ লগতে অন্যান্য দেশত ইউনুছ চৰকাৰৰ বিৰুদ্ধে প্ৰতিবাদৰ সৃষ্টি হৈছে ।
লগতে পঢ়ক : শ্বেখ হাছিনাৰ আতংক নে শাস্তিৰ ভয় ? কিয় বাংলাদেশৰ পৰা পলায়ন কৰিছিল তাৰিক ৰহমানে ?
