১৭ বছৰৰ নিৰ্বাসনৰ অন্তত শুকুৰবাৰে ঢাকালৈ উভতি আহে তাৰিক ৰহমান । তাৰিক ৰহমান পৰৱৰ্তী প্ৰধানমন্ত্ৰীৰ পদৰ বাবে আটাইতকৈ শক্তিশালী প্ৰতিদ্বন্দ্বী হিচাপে বিবেচিত হৈছে ।
বাংলাদেশ নেচনেলিষ্ট পাৰ্টিৰ অধ্যক্ষ তাৰিক ৰহমানে ১৭ বছৰৰ অন্তত ২৫ ডিচেম্বৰ, শুকুৰবাৰে ঢাকালৈ উভতি আহে । প্ৰাক্তন প্ৰধানমন্ত্ৰী খালেদা জিয়াৰ জ্যেষ্ঠ পুত্ৰ তাৰিকক বি এন পিৰ বাস্তৱিক নেতা হিচাপে গণ্য কৰা হয় । ২০২৬ চনৰ ১২ ফেব্ৰুৱাৰীত অনুষ্ঠিত হ’বলগীয়া সংসদীয় নিৰ্বাচনৰ পূৰ্বে তেওঁৰ উভতি অহাটো উল্লেখযোগ্য বুলি বিবেচিত হৈছে, কিয়নো বি এন পিয়ে সৰ্বাধিক আসন লাভ কৰাৰ সম্ভাৱনা আছে ।
কাৰাগাৰৰ পৰা মুক্তিৰ পিছত গৈছিল লণ্ডনলৈ-
তাৰিক ৰহমানে ২০০৮ চনত চিকিৎসাৰ অজুহাতত লণ্ডনলৈ গুচি যায় । ৰাজনৈতিক সংকটৰ মাজতে তেওঁ কাৰাগাৰৰ পৰা মুক্তি লাভ কৰিছিল । লণ্ডনত থকাৰ সময়ত তেওঁ দলৰ দায়িত্ব লয়, অনলাইন সভা আৰু ৰেলীৰ জৰিয়তে বি এন পিক একত্ৰিত কৰি ৰাখে । ২০০৯ চনৰ পৰা তেওঁ দলৰ জ্যেষ্ঠ উপ-সভাপতি আৰু পিছলৈ ভাৰপ্ৰাপ্ত সভাপতি হয় । তাত তেওঁ এটা ব্যক্তিগত জনসংযোগ কোম্পানীও আৰম্ভ কৰিছিল ।
ধন সৰবৰাহ আৰু হত্যাৰ ষড়যন্ত্ৰৰ অভিযোগ-
শ্বেখ হাছিনাৰ চৰকাৰৰ দিনত তাৰিক ৰহমান ধন সৰবৰাহ আৰু হত্যাৰ ষড়যন্ত্ৰকে ধৰি কেইবাটাও গুৰুতৰ অভিযোগৰ সন্মুখীন হৈছিল । তেওঁক দোষী সাব্যস্ত কৰা হয় যদিও হাছিনাৰ চৰকাৰ উৎখাত হোৱাৰ পিছত তেওঁৰ বিৰুদ্ধে থকা সকলো গোচৰ বাতিল কৰা হয় । ২০২৫ চনৰ জুলাই মাহত ব্যাপক প্ৰতিবাদৰ পিছত শ্বেখ হাছিনাই পদত্যাগ কৰিবলৈ বাধ্য হৈছিল আৰু ভাৰতলৈ পলায়ন কৰিছিল । তেতিয়াৰ পৰাই দেশখনত বি এন পিৰ স্থিতি অধিক শক্তিশালী হৈ উঠিছে ।
তাৰিকৰ প্ৰত্যাৱৰ্তনত লাভৱান হ’ব বি এন পি ?
আমেৰিকা যুক্তৰাষ্ট্ৰৰ আন্তঃৰাষ্ট্ৰীয় ৰিপাব্লিকান ইনষ্টিটিউটৰ এক সমীক্ষা অনুসৰি সংসদত বি এন পিয়ে সৰ্বাধিক আসন লাভ কৰাৰ সম্ভাৱনা আছে । তাৰিক ৰহমান পৰৱৰ্তী প্ৰধানমন্ত্ৰীৰ পদৰ বাবে আটাইতকৈ শক্তিশালী প্ৰতিদ্বন্দ্বী হিচাপে বিবেচিত হৈছে । তেওঁৰ ৮০ বছৰীয়া মাতৃ খালেদা জিয়া অসুস্থ হৈ ঢাকাত চিকিৎসালয়ত ভৰ্তি হৈ আছে । তাৰিক ঘূৰি অহাৰ মূল কাৰণ হিচাপে তেওঁৰ মাতৃৰ স্বাস্থ্যৰ কথা উল্লেখ কৰা হৈছে ।
বগুৰা-৬ সমষ্টিৰ পৰা প্ৰতিদ্বন্দ্বিতা কৰিব তাৰিকে-
উভতি অহাৰ লগে লগে তাৰিক ৰহমানে এক বৃহৎ সমাৱেশত সমৰ্থকসকলক সম্বোধন কৰে । তেওঁ মাতৃক লগ কৰি অতি সোনকালে প্ৰচাৰ অভিযান আৰম্ভ কৰিব । তেওঁ বগুৰা-৬ সমষ্টিৰ পৰা প্ৰতিদ্বন্দ্বিতা কৰাৰ সম্ভাৱনা আছে । তেওঁৰ আগমনে বি এন পিক নতুন শক্তি প্ৰদান কৰিব আৰু যোৱা কেইমাহমানত হিংসা, অস্থিৰতা, সংখ্যালঘুৰ ওপৰত আক্ৰমণ বৃদ্ধি পোৱা দেশখনত ৰাজনৈতিক পৰিৱৰ্তনৰ চিন হিচাপে দেখা গৈছে ।
বাংলাদেশ সকলো ধৰ্মৰ লোকৰঃ তাৰিক
সমাৱেশত সমৰ্থকক সম্বোধন কৰি তাৰিকে কয়, “বাংলাদেশ সকলো ধৰ্মৰ লোকৰ । আজি বাংলাদেশৰ জনসাধাৰণে বাক স্বাধীনতাৰ অধিকাৰ পুনৰ লাভ কৰিব বিচাৰিছে । এতিয়া সময় হৈছে আমি একত্ৰিত হৈ এই দেশখন গঢ়ি তোলাৰ । এই দেশখন পাহাৰ-ভৈয়ামৰ জনসাধাৰণৰ, মুছলমান, হিন্দু, বৌদ্ধ আৰু খ্ৰীষ্টানসকলৰ । আমি এক সুৰক্ষিত বাংলাদেশ গঢ়িব বিচাৰো, য’ত প্ৰতিগৰাকী মহিলা, পুৰুষ আৰু শিশুৱে নিৰাপদে ওলাই আহি ঘৰলৈ উভতি যাব পাৰে ।”
পত্নী আৰু কন্যাৰ সৈতে বাংলাদেশত উপস্থিত তাৰিক-
পত্নী জুবেইদা ৰহমান আৰু কন্যা জাইমা ৰহমানৰ সৈতে লণ্ডনৰ পৰা বৃহস্পতিবাৰে বাংলাদেশত উপস্থিত হয় ৬০ বছৰীয়া তাৰিক ৰহমান । বিমানবন্দৰত তেওঁক আদৰণি জনায় বি এন পিৰ জ্যেষ্ঠ নেতা, স্থায়ী সমিতিৰ সদস্য, মহাসচিব মিৰ্জা ফখৰুল ইছলাম আলমগিৰে । কটকটীয়া নিৰাপত্তাৰ মাজতে তেওঁ এক বৃহৎ অভ্যৰ্থনা অনুষ্ঠানলৈ যায়, য’ত তেওঁক লাখ লাখ সমৰ্থকে আদৰণি জনায় ।
লগতে পঢ়ক : শ্বেখ হাছিনাৰ আৱামি লীগৰ ওপৰত নিষেধাজ্ঞা… অংশগ্ৰহণ কৰিব নোৱাৰিব নিৰ্বাচনত
