১৭ বছৰীয়া নিৰ্বাসনৰ অন্ত পেলাই বাংলাদেশলৈ ঘূৰিল খালেদা জিয়াৰ তনয় তাৰিক ৰহমান । ইয়াৰ পিছতে এতিয়া বাংলাদেশৰ ৰাজনীতিত পট পৰিৱৰ্তনৰ সম্ভাৱনাই দেখা দিছে ।
বাংলাদেশৰ ৰাজনীতিয়ে আজি এক নতুন মোৰ লৈছে । ১৭ বছৰ ধৰি গোপনে লণ্ডনত থকাৰ পিছত আজি পুনৰ ঢাকালৈ উভতি আহে বাংলাদেশৰ ‘ক্ৰাউন প্ৰিন্স’ তাৰিক ৰহমান । এই ১৭ বছৰত বাংলাদেশৰ ৰাজনীতিয়ে গণতন্ত্ৰ, উদাৰতাবাদ, মৌলবাদৰ মাজত ভাৰসাম্য ৰক্ষা কৰি আহিছে । ২০০৮ চনত প্ৰাক্তন প্ৰধানমন্ত্ৰী খালেদা জিয়াৰ পুত্ৰ তথা বাংলাদেশ নেশ্যনেলিষ্ট পাৰ্টিৰ নেতা তাৰিক ৰহমানে ঢাকা এৰিছিল ।
তাৰিক ৰহমান তেতিয়াৰ চৰকাৰৰ ৰাডাৰত আছিল । তেওঁ দুৰ্নীতি, উৎকোচ, ধন সৰবৰাহৰ গুৰুতৰ অভিযোগৰ সন্মুখীন হৈছিল । তাৰ পিছত তাৰিক ৰহমানে বাংলাদেশৰ তেতিয়াৰ তত্ত্বাৱধায়ক চৰকাৰক লিখিত নিশ্চয়তা আৰু শপতনামা দিছিল যে তেওঁ দেশৰ ৰাজনীতিলৈ ঘূৰি নাহে । কিন্তু ১৭ বছৰত দেশখনৰ বহু কথাই সলনি হ’ল । ইয়াৰ পিছতে বৃহস্পতিবাৰে তাৰিক ৰহমানে নিজৰ আটাইতকৈ ডাঙৰ শপত ভংগ কৰি বাংলাদেশলৈ উভতি আহিছে ।
তাৰিক ৰহমানক আদৰিবলৈ ঢাকাৰ ৰাজপথত লাখ লাখ লোকক দেখা গ’ল । ২০২৬ চনৰ ১২ ফেব্ৰুৱাৰীত দেশখনত সাধাৰণ নিৰ্বাচন অনুষ্ঠিত হ’ব, এইবাৰ জনসাধাৰণে বি এন পিক ক্ষমতা অৰ্পণ কৰিব বুলি বহু আনুমানত প্ৰকাশ পাইছে ।
উল্লেখ্য যে, ২০০১ চনৰ পৰা ২০০৬ চনৰ ভিতৰত বাংলাদেশত বি এন পি ক্ষমতাত আছিল । খালেদা জিয়া প্ৰধানমন্ত্ৰী আছিল যদিও তেওঁৰ পুত্ৰ তাৰিক ৰহমানক দেশৰ বাস্তৱিক নেতা হিচাপে গণ্য কৰা হৈছিল । এই সময়ছোৱাত ২০০৪ চনত, সেই সময়ত বিৰোধী দলত থকা শ্বেখ হাছিনাই অংশগ্ৰহণ কৰা এক সভাত গ্ৰেনেড আক্ৰমণ সংঘটিত হৈছিল । এই আক্ৰমণত কেইবাজনো ভি আই পি নিহত হৈছিল । এই আক্ৰমণত তাৰিক ৰহমানক মুখ্য অভিযুক্ত কৰা হৈছিল আৰু ঢাকাৰ আদালতে তেওঁক যাৱজ্জীৱন কাৰাদণ্ডৰ শাস্তি প্ৰদান কৰিছিল ।
২০০৬ চনৰ পিছত বাংলাদেশে ৰাজনৈতিক অস্থিৰতাৰ সন্মুখীন হয় । ২০০৬ চনৰ অক্টোবৰ মাহত খালেদা জিয়াৰ চৰকাৰৰ অন্ত পৰাৰ পিছত ২০০৭ চনৰ জানুৱাৰী মাহত নিৰ্বাচনী বিবাদৰ বাবে জৰুৰীকালীন অৱস্থা ঘোষণা কৰা হয় । ফখৰুদ্দিন আহমেদৰ নেতৃত্বত সামৰিক সমৰ্থিত অন্তৱৰ্তীকালীন চৰকাৰে দুৰ্নীতি বিৰোধী অভিযান আৰম্ভ কৰি শ শ ৰাজনীতিবিদ, ব্যৱসায়ী আৰু বিষয়াক গ্ৰেপ্তাৰ কৰে যিটো “মাইনাছ টু” ফৰ্মূলা বুলি জনা গৈছিল ।
এই ফৰ্মূলাৰ উদ্দেশ্য আছিল বাংলাদেশৰ ৰাজনীতিত শ্বেখ হাছিনা আৰু খালেদা জিয়াৰ প্ৰভাৱ হ্ৰাস কৰা । এই সময়ত তাৰিক ৰহমানৰ মাতৃ তথা প্ৰাক্তন প্ৰধানমন্ত্ৰী খালেদা জিয়াক গ্ৰেপ্তাৰ কৰা হৈছিল ।
এই সময়চোৱা বি এন পিৰ বাবে আছিল এক বৃহৎ সংকটৰ সময় । হাৱা ভৱন দুৰ্নীতিৰ গোচৰত তাৰিক ৰহমানৰ বিৰুদ্ধে ২ কোটি ডলাৰ ধন সৰবৰাহৰ অভিযোগ উত্থাপন হোৱাৰ বিপৰীতে জিয়া চেৰিটেবল ট্ৰাষ্টৰ ২ কোটি ১০ লাখ টকাৰ অপব্যৱহাৰৰ গোচৰো ৰুজু হৈছিল ।
ৰাজনীতিলৈ ঘূৰি নহাৰ প্ৰতিশ্ৰুতি-
ইফালে ২০০৮ চনত খালেদা জিয়াক মুকলি কৰি দিয়া হৈছিল । কিন্তু তাৰিক ৰহমানে ইয়াৰ মূল্য দিব লগা হৈছিল । তেওঁ চিকিৎসাৰ বাবে লণ্ডনলৈ যাবলৈ চৰকাৰৰ পৰা অনুমতি বিচাৰিছিল । তেওঁক অনুমতি দিয়া হৈছিল যদিও বাংলাদেশৰ ৰাজনীতিলৈ ঘূৰি নাহে বুলি লিখিত শপতনামা দাখিল কৰিবলগীয়া হৈছিল ।
তাৰিক ৰহমানৰ এই শপতনামা এতিয়া সময়ৰ সোঁতত হেৰাই গৈছে । ২০২৪ চনত শ্বেখ হাছিনাৰ চৰকাৰ উৎখাত হোৱাৰ পিছত তাৰিক ৰহমানৰ বিৰুদ্ধে থকা সকলো অভিযোগ উঠাই লোৱা হয় আৰু তেওঁক দোষমুক্ত কৰা হয় । আনহাতে তেওঁৰ মাতৃ খালেদা জিয়াৰ স্বাস্থ্য অতি দুৰ্বল আৰু ভেণ্টিলেটৰত আছে । এই পৰিস্থিতিত বাংলাদেশে ১৭ বছৰ ধৰি “নিৰ্বাসন”ত থকা নিজৰ “ক্ৰাউন প্ৰিন্স” উভতি অহাৰ বাবে অপেক্ষা কৰি আছে ।
২০০৯ চনৰ ৮ ডিচেম্বৰত ঢাকাত বি এন পিৰ ৫ম ৰাষ্ট্ৰীয় পৰিষদত তাৰিক ৰহমান জ্যেষ্ঠ উপাধ্যক্ষ নিৰ্বাচিত হয় । তেওঁৰ ৰেকৰ্ডিং কৰা ভাষণ দৰ্শকৰ আগত বজোৱা হৈছিল । এই ভাষণত তেওঁ ২০০৭ চনৰ জানুৱাৰী মাহত ক্ষমতালৈ অহা ১/১১ চৰকাৰে তেওঁক আটক কৰি ৰখাৰ সময়ত কৰা গ্ৰেপ্তাৰ আৰু নিৰ্যাতনৰ কথা উল্লেখ কৰে । তেওঁ দাবী কৰে যে তথাকথিত ন্যায়ৰ আৱৰণত তেওঁক নিৰ্যাতন আৰু হত্যাৰ বাবে “ষড়যন্ত্ৰ” ৰচনা কৰা হৈছে ।
লণ্ডনৰ পৰা তাৰিকে তেওঁৰ “ফেচবুক ৰাজনীতি”আৰম্ভ কৰে । এই সময়ছোৱাত তেওঁ দূৰৈৰ পৰা দলীয় কাৰ্যকলাপৰ সৈতে জড়িত হৈ আছিল ।
