ভাৰত-বাংলাদেশৰ শেহতীয়া উত্তেজনাৰ প্ৰভাৱ আই পি এলতো পৰা দেখা গৈছে । কলকাতা নাইট ৰাইডাৰ্ছে বাংলাদেশী বেগী বলাৰ মুস্তাফিজুৰ ৰহমানক দলৰ পৰা ৰিলিজ কৰিছে ।
কলকাতা নাইট ৰাইডাৰ্ছে বাংলাদেশী বেগী বলাৰ মুস্তাফিজুৰ ৰহমানক দলৰ পৰা ৰিলিজ কৰিছে । ভাৰতীয় ক্ৰিকেট নিয়ন্ত্ৰণ ব’ৰ্ডে (বিচিচিআই) মুস্তাফিজুৰক দলৰ পৰা মুকলি কৰি দিয়াৰ নিৰ্দেশ দিয়ে, তাৰ পিছতে কেকেআৰে এই সিদ্ধান্ত গ্ৰহণ কৰে । আই পি এলৰ মিনি নিলামৰ সময়ত চেন্নাই ছুপাৰ কিংছ (চি এছ কে) আৰু দিল্লী কেপিটেলছ (ডি চি)ৰ সৈতে হোৱা তীব্ৰ নিবিদা যুদ্ধৰ পিছত যোৱা মাহত কেকে আৰ-এ মুস্তাফিজুৰক ৯.২০ কোটি টকাত ক্ৰয় কৰিছিল । আই পি এলৰ ইতিহাসত ৩০ বছৰীয়া বেগী বলাৰগৰাকীৰ বাবে এয়া আটাইতকৈ ব্যয়বহুল চুক্তি বুলি প্ৰমাণিত হৈছিল ।
কলকাতা নাইট ৰাইডাৰ্ছৰ এক আনুষ্ঠানিক বিবৃতিত কোৱা হৈছে যে, ‘কেকেআৰে নিশ্চিত কৰিছে যে আই পি এলৰ শাসকীয় সংস্থা হিচাপে বিচিচিআই/আই পি এলে আগন্তুক ইণ্ডিয়ান প্ৰিমিয়াৰ লীগ (আই পি এল) ছিজনৰ পূৰ্বে মুস্তাফিজুৰ ৰহমানক দলৰ পৰা ৰিলিজ কৰি দিবলৈ ফ্ৰেঞ্চাইজিক নিৰ্দেশ দিছে ।’
বিবৃতিটোত আৰু কোৱা হৈছে যে, “বিচিচিআইৰ নিৰ্দেশ অনুসৰি সকলো প্ৰয়োজনীয় পদ্ধতি আৰু পৰামৰ্শ অনুসৰণ কৰি তেওঁক ৰিলিজ কৰি দিয়াৰ সিদ্ধান্ত লোৱা হৈছে । আই পি এলৰ নিয়ম অনুসৰি বিচিচিআইয়ে কলকাতা নাইট ৰাইডাৰ্ছক প্ৰতিস্থাপন খেলুৱৈক অন্তৰ্ভুক্ত কৰাৰ অনুমতি দিছে । সবিশেষ পৰৱৰ্তী সময়ত শ্বেয়াৰ কৰা হ’ব ।”
শ্বাহৰুখ খানকো সমালোচনা-
বাংলাদেশত হিন্দু হত্যাৰ পিছত ভাৰতে দেশখনত থকা সংখ্যালঘু লোকৰ সুৰক্ষাক লৈ উদ্বেগ প্ৰকাশ কৰে । তেতিয়াৰ পৰাই আই পি এল ২০২৬ত মুস্তাফিজুৰ ৰহমানৰ অংশগ্ৰহণ সন্দৰ্ভত বিচিচিআইৰ ওপৰত হেঁচা বৃদ্ধি হয় । এই বিষয়ত ৰাজনৈতিক বাক্যবাণো তীব্ৰতৰ হৈ পৰিছে । সাম্প্ৰতিক পৰিস্থিতিত বাংলাদেশী খেলুৱৈগৰাকীক অন্তৰ্ভুক্ত কৰাক লৈ একাংশ শাসকীয় দলৰ নেতাই প্ৰশ্ন উত্থাপন কৰিছে । আনকি এই সমালোচনাই কলকাতা নাইট ৰাইডাৰ্ছৰ গৰাকী তথা বলীউড অভিনেতা শ্বাহৰুখ খানকো সাঙুৰি লৈছে ।
লগতে পঢ়ক : নিউজীলেণ্ডৰ বিৰুদ্ধে এদিনীয়া শৃংখলাৰ বাবে ভাৰতীয় দল ঘোষণা… শ্ৰেয়াছ-ঋষভৰ প্ৰত্যাৱৰ্তন
