কৰ্ণাটকৰ কাৰৱাৰ বন্দৰৰ পৰা ছাবমেৰিনত সাগৰীয় যাত্ৰা কৰিব ৰাষ্ট্ৰপতি দ্ৰৌপদী মুৰ্মুৱে । ৰাষ্ট্ৰপতি মুৰ্মু হ’ব ছাবমেৰিনত যাত্ৰা কৰা দ্বিতীয়গৰাকী ৰাষ্ট্ৰপতি ।

২৮ ডিচেম্বৰত কৰ্ণাটকৰ কাৰৱাৰ বন্দৰৰ পৰা ছাবমেৰিনত সাগৰীয় যাত্ৰা কৰিব ৰাষ্ট্ৰপতি দ্ৰৌপদী মুৰ্মুৱে । শনিবাৰৰ পৰা চাৰিদিনীয়া গোৱা, কৰ্ণাটক আৰু ঝাৰখণ্ড ভ্ৰমণ কৰিব ৰাষ্ট্ৰপতিগৰাকীয়ে । এই ভ্ৰমণৰ সময়তে হ’ব এই যাত্ৰা । শুকুৰবাৰে জাৰি কৰা এক বিবৃতিত ৰাষ্ট্ৰপতি ভৱনে কয় যে ৰাষ্ট্ৰপতি মুৰ্মু ২৭ ডিচেম্বৰৰ সন্ধিয়া গোৱালৈ ৰাওনা হ’ব । তাৰ পিছত ২৮ ডিচেম্বৰত কৰ্ণাটকৰ কাৰৱাৰ বন্দৰৰ পৰা এখন ছাবমেৰিনত ৰাষ্ট্ৰপতিগৰাকীয়ে সাগৰীয় যাত্ৰা কৰিব ।

উল্লেখ্য যে, ৰাষ্ট্ৰপতি মুৰ্মু হ’ব ছাবমেৰিনত যাত্ৰা কৰা দ্বিতীয়গৰাকী ৰাষ্ট্ৰপতি । ইয়াৰ পূৰ্বে ২০০৬ চনৰ ১৩ ফেব্ৰুৱাৰীত বিশাখাপট্টনমৰ পৰা প্ৰাক্তন ৰাষ্ট্ৰপতি এ পি জে আব্দুল কালামে ছাবমেৰিন যাত্ৰা কৰিছিল । এতিয়া শনিবাৰৰ পৰা আৰম্ভ হ’ব লগা চাৰিদিনীয়া গোৱা, কৰ্ণাটক আৰু ঝাৰখণ্ড ভ্ৰমণৰ সময়ত ৰাষ্ট্ৰপতি মুৰ্মুৱে ছাবমেৰিনেৰে সাগৰীয় যাত্ৰাৰ কৰিব ।

ভাৰতীয় বায়ুসেনাৰ দুখনকৈ যুদ্ধ বিমান উৰুওৱা ভাৰতৰ প্ৰথমগৰাকী ৰাষ্ট্ৰপতি ৰাষ্ট্ৰপতি মুৰ্মু । চলিত বৰ্ষৰ ২৯ অক্টোবৰত ৰাফেলত আৰু ২০২৩ চনত চুখয় ৩০ এম কে আইত উৰা মাৰিছিল তেওঁ ।

সোমবাৰে ঝাৰখণ্ডৰ জামছেদপুৰত অল চিকিৰ শতবাৰ্ষিকী উদযাপনত অংশগ্ৰহণ কৰিব ৰাষ্ট্ৰপতি দ্ৰৌপদী মুৰ্মুৱে । একেদিনাই এন আই টি জামছেদপুৰৰ ১৫ সংখ্যক সমাৱৰ্তন অনুষ্ঠানতো ভাষণ দিব বুলি বিবৃতিটোত উল্লেখ কৰা হৈছে । অহা ৩০ ডিচেম্বৰত ঝাৰখণ্ডৰ গুমলাত অনুষ্ঠিত আন্তঃৰাজ্যিক জনসাধাৰণৰ সাংস্কৃতিক সমাৱেশ কাৰ্তিক যাত্ৰাত ভাষণ দিব ৰাষ্ট্ৰপতিগৰাকীয়ে ।

লগতে পঢ়ক : ৩৭০ অনুচ্ছেদৰ দেৱাল ভাঙি গৌৰাৱান্বিত বিজেপিঃ প্ৰধানমন্ত্ৰী মোদী

মুম্বাই আক্ৰমণৰ ১৭ বছৰ

২০০৮ চনৰ নৱেম্বৰ মাহত সংঘটিত হোৱা মুম্বাই আক্ৰমণৰ আজি ১৭ বছৰ সম্পূৰ্ণ হ’ল । মুম্বাইৰ গেটৱে অৱ ইণ্ডিয়াত মুম্বাইৰ আক্ৰমণত মৃত্যু হোৱা শ্বহীদসকলৰ স্মৃতিত এক কাৰ্যসূচী অনুষ্ঠিত হয় । ৰাষ্ট্ৰপতি দ্ৰৌপদী মুৰ্মুৱে জনসাধাৰণক সন্ত্ৰাসবাদৰ বিৰুদ্ধে যুঁজ দিয়াৰ প্ৰতিশ্ৰুতি পুনৰ দৃঢ় কৰিবলৈ আহ্বান জনায় । ৰাজ্যসভাৰ সাংসদ উজ্জ্বল নিকামে মুম্বাই আক্ৰমণ সন্দৰ্ভত পাকিস্তানৰ মৌনতাক লৈ প্ৰশ্ন উত্থাপন কৰি আন্তঃৰাষ্ট্ৰীয় সমাজক আৰ্থিক সাহায্য বন্ধ কৰিবলৈ আহ্বান জনায় ।

শ্বহীদক স্মৰণ ৰাষ্ট্ৰপতি মুৰ্মুৰ-

বুধবাৰে ৰাষ্ট্ৰপতি দ্ৰৌপদী মুৰ্মুৱে ২৬/১১ মুম্বাই সন্ত্ৰাসবাদী আক্ৰমণৰ সময়ত দেশ ৰক্ষাৰ বাবে প্ৰাণ আহুতি দিয়া বীৰ জোৱানসকলক শ্ৰদ্ধাঞ্জলি জ্ঞাপন কৰি দেশবাসীক সকলো প্ৰকাৰৰ সন্ত্ৰাসবাদৰ বিৰুদ্ধে যুঁজ দিয়াৰ প্ৰতিশ্ৰুতি পুনৰ দৃঢ় কৰিবলৈ আহ্বান জনায় । ছ’চিয়েল মিডিয়া প্লেটফৰ্মত শ্বেয়াৰ কৰা এটা পোষ্টত মুৰ্মুৱে কয় “২৬/১১ মুম্বাই সন্ত্ৰাসবাদী আক্ৰমণৰ বৰ্ষপূৰ্তিত আমাৰ দেশৰ জনসাধাৰণক ৰক্ষা কৰিবলৈ প্ৰাণ আহুতি দিয়া সাহসী জোৱানসকললৈ মোৰ বিনম্ৰ শ্ৰদ্ধাঞ্জলি জ্ঞাপন কৰিছো । ৰাষ্ট্ৰই তেওঁলোকৰ পৰম ত্যাগক কৃতজ্ঞতাৰে স্মৰণ কৰে । আহক আমি সন্ত্ৰাসবাদৰ সকলো ৰূপৰ বিৰুদ্ধে যুঁজিবলৈ আমাৰ প্ৰতিশ্ৰুতি পুনৰ দৃঢ় কৰোঁ । আহক আমি সকলোৱে একেলগে প্ৰগতিৰ পথত আগবাঢ়ি যাওঁ আৰু শক্তিশালী আৰু সমৃদ্ধিশালী ভাৰত গঢ়াৰ সংকল্প লওঁ ।”

ইফালে ৰাজ্যসভাৰ সাংসদ উজ্জ্বল নিকামে মুম্বাই আক্ৰমণৰ বৰ্ষপূৰ্তি উপলক্ষে কয় যে, “আক্ৰমণৰ ১৭ বছৰ হ’ল । প্ৰতিজন ভাৰতীয়ই এই দিনটো মনত ৰাখে । মোৰ মনত আছে যেতিয়া আমি পাকিস্তানলৈ গৈছিলো তেতিয়া আমাৰ চৰকাৰে মুম্বাই আক্ৰমণৰ বিষয়টো উত্থাপন কৰিছিল । আমি সেই দায়ী আৰু ষড়যন্ত্ৰকাৰীৰ বিৰুদ্ধে লোৱা ব্যৱস্থাৰ বিষয়ে সুধিছিলো । তেওঁলোকে কিছু লোকক গ্ৰেপ্তাৰ কৰিছিল, কিন্তু তেওঁলোকৰ বিৰুদ্ধে গোচৰৰ কোনো প্ৰদান নকৰিলে ।“

উল্লেখ্য যে, ২০০৮ চনৰ ২৬ নৱেম্বৰত পাকিস্তান সমৰ্থিত সন্ত্ৰাসবাদী সংগঠন লস্কৰ-ই-তৈবাৰ দহটা সন্ত্ৰাসবাদীয়ে সাগৰীয় পথেৰে মুম্বাইত প্ৰৱেশ কৰিছিল আৰু ৬০ ঘণ্টীয়া ঘেৰাওৰ সময়ত ১৮ জন নিৰাপত্তাৰক্ষীকে ধৰি ১৬৬ জন লোকক হত্যা কৰিছিল ।

লগতে পঢ়ক : গণতন্ত্ৰ আমাৰ ডি এন এত আছে… ৰাম মন্দিৰৰ ধ্বজাৰোহণ কৰি ক’লে প্ৰধানমন্ত্ৰী মোদীয়ে

দিল্লী বিস্ফোৰণৰ পৰিস্থিতি বুজ ল’লে ৰাষ্ট্ৰপতিয়ে

১০ নৱেম্বৰ সোমবাৰে ৰাজধানী দিল্লীৰ লালকিল্লাৰ সমীপত সংঘটিত হোৱা বিস্ফোৰণৰ পিছত সমগ্ৰ দেশৰ কেইবাখনো ডাঙৰ চহৰ হাই এলাৰ্টত আছে । এই ঘটনাত এতিয়ালৈকে ১২ জন লোকৰ মৃত্যু হৈছে । জানিব পৰা মতে ভাৰতৰ ৰাষ্ট্ৰপতি দ্ৰৌপদী মুৰ্মুৱে এই ঘটনা সন্দৰ্ভত এংগোলাৰ পৰা কেন্দ্ৰীয় গৃহমন্ত্ৰী অমিত শ্বাহৰ সৈতে ফোনযোগে কথা পাতিছে । দিল্লীৰ লালকিল্লাৰ সমীপত সংঘটিত হোৱা বিস্ফোৰণৰ সম্পূৰ্ণ তথ্য লয় ৰাষ্ট্ৰপতিগৰাকীয়ে ।

দেওবাৰে এংগোলাৰ ৰাজধানী লুয়াণ্ডাত উপস্থিত হয় ৰাষ্ট্ৰপতি মুৰ্মু । দক্ষিণ আফ্ৰিকাৰ এই দেশখনলৈ ভাৰতীয় ৰাষ্ট্ৰপতিগৰাকীৰ এয়াই আছিল প্ৰথম ৰাজকীয় ভ্ৰমণ । বৈদেশিক পৰিক্ৰমা মন্ত্ৰালয়ে এক্স হেণ্ডেলত এই কথা ঘোষণা কৰে । ইয়াত উল্লেখ কৰা হৈছে যে এই ভ্ৰমণ ভাৰত আৰু এংগোলাৰ কূটনৈতিক সম্পৰ্কৰ ৪০ বছৰীয়া জয়ন্তীৰ লগত সংগতি ৰাখি কৰা হৈছে ।

ইফালে দিল্লী বিস্ফোৰণ সন্দৰ্ভত গৃহ মন্ত্ৰালয়ত এক বৃহৎ বৈঠক আৰম্ভ হৈছে । তদন্তকাৰী সংস্থাৰ শীৰ্ষ বিষয়াৰ সৈতে বৈঠকত মিলিত হৈছে গৃহমন্ত্ৰী অমিত শ্বাহ । গৃহ সচিব, এন আই এৰ সঞ্চালক প্ৰধান, লগতে তদন্তকাৰী সংস্থাৰ অন্যান্য বিষয়াসকল উপস্থিত থাকে এই বৈঠকত । ইফালে এই বিস্ফোৰণৰ তদন্ত এন আই এৰ হাতত অৰ্পণ কৰা হৈছে ।

উল্লেখ্য যে, দিল্লী বিস্ফোৰণৰ পিছৰে পৰা ৰাজধানী চহৰ হাই এলাৰ্টত আছে । বিভিন্ন স্থানত আৰক্ষীয়ে অভিযান চলাই আছে । সন্দেহযুক্ত লোকৰ সন্ধানত অভিযান অব্যাহত ৰাখিছে সংস্থাসমূহে । লগতে কেইবাটাও স্থানত অভিযান চলোৱা হৈছে ।

লগতে পঢ়ক : বিস্ফোৰণত জড়িত কাকো ৰেহাই দিয়া নহ’ব… ভূটানৰ পৰাই প্ৰধানমন্ত্ৰী মোদীৰ হুংকাৰ

ৰাফেল যুদ্ধ বিমান উৰুৱালে ৰাষ্ট্ৰপতি দ্ৰৌপদী মুৰ্মুৱে

বুধবাৰে হাৰিয়ানাৰ আম্বালা বায়ুসেনা ষ্টেচনত ভাৰতীয় বায়ুসেনাৰ অত্যাধুনিক যুদ্ধ বিমান ৰাফেল যুদ্ধ বিমান উৰুৱাই ইতিহাস ৰচনা কৰে ৰাষ্ট্ৰপতি দ্ৰৌপদী মুৰ্মুৱে । ৰাষ্ট্ৰপতি দ্ৰৌপদী মুৰ্মু দেশৰ সৰ্বোচ্চ সাংবিধানিক পদত অধিষ্ঠিত । ভাৰতৰ ৰাষ্ট্ৰপতি তিনিওটা সশস্ত্ৰ বাহিনীৰ মুখ্য সেনাধ্যক্ষও । উল্লেখযোগ্য যে ৰাষ্ট্ৰপতি দ্ৰৌপদী মুৰ্মুৱে ইয়াৰ পূৰ্বে ছুখয়-৩ এম কে আই যুদ্ধ বিমান উৰুৱাইছিল । ২০২৩ চনৰ ৮ এপ্ৰিলত অসমৰ তেজপুৰ বায়ুসেনা ষ্টেচনৰ পৰা এই বিমান উৰুৱাইছিল ৰাষ্ট্ৰপতি মুৰ্মুৱে ।

বুধবাৰে পুৱা আম্বালা বায়ুসেনা ঘাটিত উপস্থিত হয় ৰাষ্ট্ৰপতিগৰাকী, য’ত বায়ুসেনাৰ মুখ্য বায়ু প্ৰধান মাৰ্শ্বাল এ.পি.সিং আৰু জ্যেষ্ঠ বিষয়াসকল উপস্থিত থাকে । ৰাফেলত তেওঁৰ ছ’ৰ্টী ভাৰতীয় বায়ুসেনাৰ প্ৰযুক্তিগত দক্ষতা আৰু আধুনিকতাৰ প্ৰতীক ।

উল্লেক্য যে, ফ্ৰান্সৰ কোম্পানী ডাছল্ট এভিয়েশনে নিৰ্মাণ কৰা ৰাফেল যুদ্ধ বিমান ২০২০ চনৰ ছেপ্টেম্বৰ মাহত ভাৰতীয় বায়ুসেনাত অন্তৰ্ভূক্ত কৰা হৈছিল । আম্বালা এয়াৰবেছত আছে ৰাফেল স্কোৱাড্ৰন “গোল্ডেন এৰোছ” । শেহতীয়াকৈ এই ৰাফেলে “অপাৰেচন সিন্দুৰ”ৰ সময়ত সন্ত্ৰাসবাদী লক্ষ্যত নিখুঁত আক্ৰমণ চলাই নিজৰ শক্তি প্ৰদৰ্শন কৰিছে ।

নৌসেনাৰ বাবে ২৬খন ৰাফেল মেৰিন বিমানৰ বাবে ভাৰত আৰু ফ্ৰান্সৰ মাজৰ চুক্তিত অনুমোদন জনোৱাৰ সময়তে ৰাষ্ট্ৰপতিগৰাকীয়ে এই বিমান উৰুৱাইছে । ইয়াৰ ভিতৰত থাকিব ২২খন একক আসনৰ আৰু চাৰিখন টুইন আসনৰ ট্ৰেইনাৰ জেট । এই চুক্তিত প্ৰধানমন্ত্ৰী নৰেন্দ্ৰ মোদীৰ অধ্যক্ষতাত নিৰাপত্তা সম্পৰ্কীয় কেবিনেট কমিটীয়ে অনুমোদন জনাইছিল ।

লগতে পঢ়ক : প্ৰতিটো মুহূৰ্ততে যুদ্ধৰ বাবে সাজু থাকিব লাগিব দেশঃ ৰাজনাথ সিঙৰ মন্তব্য