বটছৱানাত উপস্থিত ৰাষ্ট্ৰপতি দ্ৰৌপদী মুৰ্মু
আফ্ৰিকাৰ দুখন দেশ ভ্ৰমণৰ অন্তিম পৰ্যায়ত মঙলবাৰে বটছৱানাৰ ৰাজধানী গাব’ৰ’নত উপস্থিত হয় ভাৰতৰ ৰাষ্ট্ৰপতি দ্ৰৌপদী মুৰ্মু । এই দেশলৈ ভাৰতীয় ৰাষ্ট্ৰপতিৰ এয়া প্ৰথম ৰাজকীয় ভ্ৰমণ । গাব’ৰ’নৰ ছাৰ চেৰেন্টচে খামা আন্তঃৰাষ্ট্ৰীয় বিমানবন্দৰত ৰাষ্ট্ৰপতি মুৰ্মুক গাৰ্ড অৱ অনাৰেৰে এক বৃহৎ আদৰণি জনোৱা হয় । বটছৱানাৰ ৰাষ্ট্ৰপতি ডুমা গিডিয়ান বকোৱে ব্যক্তিগতভাৱে তেওঁক আদৰণি জনায় । ৰাষ্ট্ৰপতি দ্ৰৌপদী মুৰ্মুৰ এই ভ্ৰমণ আফ্ৰিকাৰ দুখন দেশ এংগোলা আৰু বটছৱানা ভ্ৰমণৰ অংশ । প্ৰথমে এংগোলা ভ্ৰমণ কৰি দুয়োখন দেশৰ সম্পৰ্ক আৰু অধিক শক্তিশালী কৰাৰ বিষয়ে আলোচনা কৰে ৰাষ্ট্ৰপতিগৰাকীয়ে ।
ভাৰত-বটছৱানাৰ সম্পর্ক সুদৃঢ় কৰাৰ লগতে কালাহাৰী মৰুভূমিৰ পৰা আঠটা চিতা ভাৰতলৈ অনাৰ চুক্তি চূড়ান্ত কৰাৰ লক্ষ্যৰে মুৰ্মুৰ এই ভ্ৰমণ । গাব’ৰ’নৰ পৰা ১০ কিলোমিটাৰ দূৰত্বৰ মক’লোডি প্ৰকৃতি সংৰক্ষিত বনাঞ্চললৈ অনা হয় চিতা কেইটাক, য’ত ৰাষ্ট্ৰপতি মুৰ্মু আৰু বকোৱে কোৱাৰেণ্টাইন এলেকাত মুকলি কৰি দিয়াৰ প্ৰতীকী অনুষ্ঠানৰ সাক্ষী হ’ব । এই পদক্ষেপ ‘প্ৰকল্প চিতা’ আৰু বন্যপ্ৰাণী সংৰক্ষণ সহযোগিতাৰ অংশ ।
তিনিদিনীয়া এই ভ্ৰমণৰ সময়ত ৰাষ্ট্ৰপতি মুৰ্মুৱে ৰাষ্ট্ৰপতি বকোৰ সৈতে প্ৰতিনিধি পৰ্যায়ৰ আলোচনাত মিলিত হ’ব । দুয়োগৰাকী নেতাই কেইবাখনো বুজাবুজি স্মাৰকতো স্বাক্ষৰ কৰাৰ কথা । ইয়াৰ পিছতে বুধবাৰে বটছৱানা সংসদত ভাষণ দিব আৰু তাত থকা ভাৰতীয় সম্প্ৰদায়ৰ সৈতে বৈঠকত মিলিত হ’ব ৰাষ্ট্ৰপতি মুৰ্মু ।
উল্লেখ্য যে, হীৰা, ঔষধ, প্ৰযুক্তি, কৃষি, শক্তি আৰু প্ৰতিৰক্ষা আদি ক্ষেত্ৰত ভাৰত আৰু বটছৱানাৰ মাজত সহযোগিতা বৃদ্ধিৰ ওপৰত গুৰুত্ব আৰোপ কৰা হৈছে । হীৰা ব্যৱসায় দুয়োখন দেশৰ মাজত এক প্ৰধান বাণিজ্য, বটছৱানাই ভাৰতলৈ ৰুক্ষ হীৰা ৰপ্তানি কৰাৰ বিপৰীতে ভাৰতে ঔষধ, যন্ত্ৰপাতি, লোহা, তীখা আৰু বৈদ্যুতিক সঁজুলি ৰপ্তানি কৰে । ২০২৪-২৫ বিত্তীয় বৰ্ষত দুয়োখন দেশৰ মাজত বাণিজ্যৰ পৰিমাণ আছিল ৫০৬ মিলিয়ন মাৰ্কিন ডলাৰ । ভাৰত আৰু বটছৱানাৰ মাজত কূটনৈতিক সম্পৰ্ক স্থাপন হৈছিল ১৯৬৬ চনত আৰু ২০২৬ চনত ৬০ বছৰ সম্পূৰ্ণ হ’ব ।
লগতে পঢ়ক : প্ৰধানমন্ত্ৰী মোদী আৰু ভূটানৰ ৰজাই শুভাৰম্ভ কৰিলে এই বৃহৎ প্ৰকল্পৰ
