ভাৰতীয় বতৰ বিজ্ঞান বিভাগৰ তথ্য অনুসৰি, অভিলেখ সৃষ্টিকাৰী বৰষুণ হোৱাৰ পাছতে সমগ্ৰ অঞ্চলটোত ৰেড আৰু অৰেঞ্জ এলাৰ্ট জাৰি কৰা হৈছে

বৃহস্পতিবাৰে ৰাতিপুৱাৰে পৰা দিল্লী-ৰাষ্ট্ৰীয় ৰাজধানী অঞ্চলত হোৱা ধাৰাসাৰ বৰষুণৰ ফলত জলমগ্ন হৈ পৰিছে সমগ্ৰ অঞ্চল । নেৰানেপেৰা বৰষুণৰ বাবে নয়ডা আৰু গাজিয়াবাদৰ কেইবাটাও অঞ্চল সম্পূৰ্ণৰূপে পানীত বুৰ গৈছে, যাৰ ফলত দৈনন্দিন জীৱন ব্যাহত হোৱাৰ লগতে ৰাতিপুৱাৰ ব্যস্ত সময়ছোৱাত তীব্ৰ যান-জঁটৰ সৃষ্টি হয় ।

দিল্লীত অভিলেখ সৃষ্টিকাৰী বৰষুণ: জাৰি ‘ৰেড’ আৰু ‘অৰেঞ্জ’ এলাৰ্ট

ভাৰতীয় বতৰ বিজ্ঞান বিভাগৰ তথ্য অনুসৰি, দিল্লীত অভিলেখ সৃষ্টিকাৰী ২২৮.১ মিলিমিটাৰ বৰষুণ হোৱাৰ পাছতে সমগ্ৰ অঞ্চলটোত ‘ৰেড’ আৰু ‘অৰেঞ্জ’ এলাৰ্ট জাৰি কৰা হৈছে । অৱশ্যে, দিল্লী প্ৰশাসনৰ আগতীয়া তৎপৰতাৰ বাবে মহানগৰীখনৰ বহু অংশ ডাঙৰ বিপদৰ পৰা ৰক্ষা পৰিছে । কৰ্তৃপক্ষই আগতীয়াকৈ নৰেলা আৰু দ্বাৰকাসহ মুখ্য ধুমুহা-পানী নিষ্কাষণৰ নলাসমূহ পৰিষ্কাৰ কৰাৰ বাবে এন এইচ পি চি চ’কৰ দৰে গুৰুত্বপূৰ্ণ আণ্ডাৰপাছসমূহ মুকলি হৈ থাকে আৰু যান-বাহন চলাচল স্বাভাৱিক হৈ থাকে ।

গীতা কলনীত কঁকাললৈকে পানী, হাই এলাৰ্টত দিল্লী চৰকাৰ

প্ৰশাসনৰ সতৰ্কতাৰ মাজতো দিল্লীৰ গীতা কলনী আদিৰ দৰে কিছুমান অঞ্চলত তীব্ৰ বৰষুণৰ ফলত বুজন পৰিমাণৰ পানী জমা হৈছে । পৰিস্থিতিৰ গুৰুত্ব বুজি দিল্লীৰ মুখ্যমন্ত্ৰী ৰেখা গুপ্তাই পোনপটীয়াভাৱে বুজ লৈ সকলো প্ৰশাসনিক সংস্থাক “হাই এলাৰ্ট”ত থাকিবলৈ নিৰ্দেশ দিছে ।

নয়ডা আৰু গাজিয়াবাদৰ পথত আৱদ্ধ বাহন

এই বৰষুণজাকে তীব্ৰ গৰমৰ পৰা ৰাইজক সকাহ দিছে যদিও নয়ডা আৰু গাজিয়াবাদত পৰিস্থিতি সংকটজনক কৰি তুলিছে । নয়ডাৰ ছেক্টৰ ১১৫ ত পথসমূহ পানীত বুৰ যোৱাৰ বাবে স্থানীয় বাসিন্দাসকলে আঁঠু পৰ্যন্ত পানীৰ মাজেৰে যাতায়ত কৰিবলগীয়া হৈছে । একেদৰে গাজিয়াবাদৰ শাস্ত্ৰীনগৰতো পথসমূহ বুৰ গৈ থকাৰ বাবে কেইবা ঘণ্টাজুৰি যান-বাহন আৱদ্ধ হৈ পৰে ।

১১ জুলাইলৈকে ধাৰাসাৰ বৰষুণৰ সতৰ্কবাণী

বতৰ বিজ্ঞান বিভাগৰ পূৰ্বানুমান অনুসৰি, দিল্লী-এনচিআৰৰ লগতে হাৰিয়ানা, চণ্ডীগড় আৰু পঞ্জাৱত আগন্তুক দিনকেইটাত বৰষুণৰ প্ৰকোপ আৰু বৃদ্ধি পাব । ৬ আৰু ১০ জুলাইত ঠায়ে ঠায়ে পাতলীয়াৰ পৰা মজলীয়া বৰষুণ হোৱাৰ সম্ভাৱনা আছে । ৭ জুলাইৰ পৰা ৯ জুলাই আৰু ১১ জুলাইত প্ৰায় সমগ্ৰ অঞ্চল জুৰি “ব্যাপক বৰষুণ” হোৱাৰ সম্ভাৱনা আছে ।

বতৰ বিভাগে এই দিনকেইটাত সাধাৰণ ৰাইজক জৰুৰী কাম নহ’লে ঘৰৰ পৰা নোলাবলৈ আৰু যান-বাহন চলাওঁতে সাৱধানতা অৱলম্বন কৰিবলৈ পৰামৰ্শ দিছে ।

লগতে পঢ়ক : অহা ৩-৪ দিন ৰাজ্যত ধাৰাসাৰ বৰষুণৰ সতৰ্কবাণী: হাই এলাৰ্ট জাৰি

দিল্লীৰ মেহৰৌলী অঞ্চলত এটা পাঁচমহলীয়া অট্টালিকা খহি পৰাৰ ফলত সমগ্ৰ অঞ্চলটোত তীব্ৰ চাঞ্চল্যৰ সৃষ্টি হৈছে

শনিবাৰে সন্ধিয়া দক্ষিণ দিল্লীৰ মেহৰৌলী অঞ্চলত এটা পাঁচমহলীয়া অট্টালিকা খহি পৰাৰ ফলত সমগ্ৰ অঞ্চলটোত তীব্ৰ চাঞ্চল্যৰ সৃষ্টি হৈছে । এই দুৰ্ঘটনাৰ পাছতে বহু লোক ধ্বংসাৱশেষৰ তলত আৱদ্ধ হৈ থকাৰ আশংকা প্ৰকাশ পাইছে । বাতৰি লিখা পৰলৈকে উদ্ধাৰকাৰী দলে চাৰিগৰাকী লোকক জীৱন্ত অৱস্থাত উদ্ধাৰ কৰিবলৈ সক্ষম হৈছে যদিও তেওঁলোকৰ স্বাস্থ্যৰ অৱস্থা সংকটজনক বুলি জানিব পৰা গৈছে ।

সন্ধিয়া ৭:৪৪ বজাত সংঘটিত হয় ঘটনা-

জানিব পৰা মতে, চইদুল আজাব অঞ্চলত অৱস্থিত উক্ত অট্টালিকাটো সন্ধিয়া প্ৰায় ৭:৪৪ বজাত হঠাতে খহি পৰে । এক প্ৰচণ্ড শব্দৰ সৈতে অট্টালিকাটো খহি পৰাৰ লগে লগে চৌদিশে ধূলি-বালি আৰু ধ্বংসাৱশেষৰ এক ভয়াৱহ পৰিৱেশৰ সৃষ্টি হয় । স্থানীয় ৰাইজে এই দৃশ্য দেখি আতংকিত হৈ পৰে আৰু লগে লগে আৰক্ষী আৰু অগ্নিনিৰ্বাপক বাহিনীক খবৰ দিয়ে ।

যুদ্ধকালীন তৎপৰতাৰে উদ্ধাৰ অভিযান-

ঘটনাৰ খবৰ পোৱাৰ লগে লগে অগ্নিনিৰ্বাপক বাহিনীৰ ৬খনকৈ গাড়ী আৰু উদ্ধাৰকাৰী দল ঘটনাস্থলীত উপস্থিত হৈ যুদ্ধকালীন তৎপৰতাৰে উদ্ধাৰ কাৰ্য আৰম্ভ কৰে । পৰিস্থিতিৰ গুৰুত্ব বিবেচনা কৰি আৰক্ষীৰ জ্যেষ্ঠ বিষয়াসকলেও ঘটনাস্থলীত উপস্থিত হৈ উদ্ধাৰ অভিযান তদাৰক কৰিছে । বৰ্তমান ধ্বংসাৱশেষৰ তলত আৰু কিমান লোক আৱদ্ধ হৈ আছে, সেয়া এতিয়াও স্পষ্ট হোৱা নাই । উদ্ধাৰকাৰী দলে অত্যন্ত সাৱধানতাৰে ধ্বংসাৱশেষ আঁতৰাই জীৱিত লোকক বিচাৰি অভিযান চলাই আছে ।

আতংকময় পৰিৱেশ, আৰক্ষীৰ বেষ্টনী-

অট্টালিকাটো খহি পৰাৰ পাছতে স্থানীয় লোকে ঘটনাস্থলীত ভিৰ কৰে । উদ্ধাৰ কাৰ্যত যাতে কোনো ধৰণৰ ব্যাঘাত নজন্মে, তাৰ বাবে আৰক্ষীয়ে সমগ্ৰ অঞ্চলটো ঘেৰাও কৰি ৰাখিছে । অট্টালিকাটো কি কাৰণত খহি পৰিল, সেয়া বৰ্তমানলৈকে পোহৰলৈ অহা নাই । অট্টালিকাটোৰ বয়স কিমান আছিল বা তাত কোনো নিৰ্মাণ কাৰ্য চলি আছিল নেকি, সেয়া তদন্তৰ পিছতহে স্পষ্ট হ’ব ।

বৰ্তমানৰ বাবে উদ্ধাৰকাৰী দলৰ মূল প্ৰাথমিকতা হৈছে ধ্বংসাৱশেষৰ তলত আৱদ্ধ লোকসকলক সুকলমে উদ্ধাৰ কৰা । এই ঘটনাৰ লগত জড়িত অধিক তথ্যৰ বাবে প্ৰশাসনৰ তৰফৰ পৰা আনুষ্ঠানিক বিবৃতিৰ অপেক্ষা কৰা হৈছে ।

লগতে পঢ়ক : প্ৰকৃতিৰ অভাৱনীয় আৰু ভয়ংকৰ ৰূপ, দিনতে হৈ পৰিল ঘোৰ অন্ধকাৰ

দিল্লীৰ বিবেক বিহাৰ অঞ্চলৰ এটা অট্টালিকাত দেওবাৰে পুৱা এক বৃহৎ অগ্নিকাণ্ড সংঘটিত হয়

দিল্লীৰ বিবেক বিহাৰ অঞ্চলৰ এটা অট্টালিকাত দেওবাৰে পুৱা এক বৃহৎ অগ্নিকাণ্ড সংঘটিত হয় । এই ঘটনাত কমেও ৯ জন লোকৰ মৃত্যু হোৱাৰ লগতে অগ্নিদগ্ধ হৈ কেইবাজনো লোক আহত হোৱা বুলি জানিব পৰা গৈছে । বৰ্তমান অগ্নিনিৰ্বাপক বাহিনীয়ে উদ্ধাৰ অভিযানৰ লগতে জুই নিৰ্বাপনৰ কাম যুদ্ধকালীন গতিৰে কৰি আছে । উদ্ধাৰ অভিযান অব্যাহত থকাৰ মাজতে হতাহতৰ সংখ্যা বৃদ্ধি পাব পাৰে বুলি আশংকা কৰা হৈছে ।

অগ্নিনিৰ্বাপক বাহিনীয়ে প্ৰায় ৩:৪৭ বজাত ঘটনাৰ খবৰ লাভ কৰে । উদ্ধাৰকাৰী দলে ১২ জনতকৈ অধিক লোকক জুই-ধোঁৱাৰ মাজৰ পৰা উদ্ধাৰ কৰে । মৃতকৰ সংখ্যা ৮ৰ পৰা ৯লৈ বৃদ্ধি পাইছে আৰু চাৰিজন লোক গুৰুতৰভাৱে অগ্নিদগ্ধ হৈছে বুলি জানিব পৰা গৈছে । আহতসকলক ওচৰৰ চিকিৎসালয়ত ভৰ্তি কৰোৱা হৈছে ।

প্ৰাৰম্ভিক তদন্তত এই অগ্নিকাণ্ডৰ কাৰণ এচি বিস্ফোৰণ বুলি প্ৰকাশ পাইছে । অট্টালিকাটোৰ কোনটো মহলা জুইৰ উৎপত্তি হৈছিল সেই বিষয়ে তদন্ত চলি আছে । জুই নিয়ন্ত্ৰণলৈ অনা হৈছে যদিও এতিয়াও অভিযান অব্যাহত আছে ।

খবৰ অনুসৰি অট্টালিকাৰ দ্বিতীয় মহলাৰ এটা ফ্লেটত এচি বিস্ফোৰণৰ ফলত অগ্নিকাণ্ড সংঘটিত হয়, যিটো তৃতীয় মহলালৈ বিয়পি পৰে । খবৰ পোৱা গৈছে যে জুইৰ শিখাই তৃতীয় মহলা আৱৰি ধৰাৰ পিছত ফ্লেটৰ ভিতৰৰ লোকসকলে নিজকে বচাবলৈ ছাদলৈ দৌৰি যায় যদিও ছাদৰ দুৱাৰখন বন্ধ হৈ থকাৰ ফলত তেওঁলোকৰ মৃত্যু হয় । দ্বিতীয় মহলাতো চাৰিজন লোকে মৃত্যুক সাৱটি লয় ।

আৰক্ষীয়ে জনোৱা মতে, উদ্ধাৰ হোৱা মৃতদেহবোৰ গুৰুতৰভাৱে অগ্নিদগ্ধ হোৱাৰ বাবে নিহতসকলৰ পৰিচয় এতিয়াও উদ্ধাৰ কৰা হোৱা নাই । অগ্নিনিৰ্বাপক বাহিনীয়ে জনোৱা মতে, বিচনাত তিনিজন লোকৰ মৃতদেহ উদ্ধাৰ হৈছে ।

লগতে পঢ়ক : ভয়ংকৰ ঘটনাঃ প্ৰচণ্ড ধুমুহাত নদীত ডুবিল পৰ্যটকেৰে ভৰা ক্ৰুজ

দিল্লী বিধানসভা চৌহদত এখন অচিনাক্ত বাহনে লোহাৰ বেৰিকেড ভাঙি প্ৰৱেশ কৰে

দিল্লী বিধানসভাৰ চৌহদত নিৰাপত্তাত বৃহৎ ত্ৰুটিৰ এক খবৰ পোহৰলৈ আহিছে । প্ৰকাশিত খবৰ অনুসৰি দিল্লী বিধানসভা চৌহদত এখন অচিনাক্ত বাহনে লোহাৰ বেৰিকেড ভাঙি প্ৰৱেশ কৰে । এই ঘটনাই বিধানসভাৰ নিৰাপত্তা ব্যৱস্থাক লৈ গুৰুতৰ প্ৰশ্নৰ উত্থাপন কৰিছে । ইয়াৰ পিছতেই গাড়ীখন কেনেকৈ বিধানসভাত প্ৰৱেশ কৰিলে তাৰ তদন্ত আৰম্ভ কৰা হৈছে আৰু আৰক্ষীয়ে চিচিটিভিৰ ফুটেজ পৰীক্ষা কৰি সন্দেহজনক লোকজনক চিনাক্ত কৰিছে ।

সোমবাৰে দুপৰীয়া ২:০৫ বজাত উত্তৰ প্ৰদেশৰ পঞ্জীয়ন প্লেট থকা এখন বগা টাটা ছিয়েৰা গাড়ীয়ে মল ৰোডৰ বন্ধ গেট ভাঙি ভিআইপি প্ৰৱেশদ্বাৰেৰে প্ৰৱেশ কৰে । অধ্যক্ষৰ কোঠাৰ বাহিৰত এটি ফুলৰ থোপা এৰি পলায়ন কৰে লোকজনে । এই ঘটনাই হুলস্থুলীয়া পৰিৱেশৰ সৃষ্টি কৰে আৰু বিধানসভা চৌহদত উপস্থিত হয় দিল্লী আৰক্ষীৰ জ্যেষ্ঠ বিষয়া ।

দুজন প্ৰত্যক্ষদৰ্শীয়ে জনোৱা মতে, তেওঁলোকে ২ নং গেটৰ ওচৰত থিয় হৈ থকা অৱস্থাত হঠাতে এটা ডাঙৰ শব্দ শুনে । তেওঁলোকে গেটখন ভাঙি এখন বগা টাটা ছিয়েৰা গাড়ী সোমাই যোৱা প্ৰত্যক্ষ কৰে । গাড়ীখন কিছু সময় চৌহদতে ঘূৰি ফুৰে যাৰ ফলত তাত উপস্থিত লোকসকলৰ মাজত আতংকৰ সৃষ্টি হয় । ৰিক্সাচালক আৰু ওচৰৰ আন লোকসকলো সেই স্থানত উপস্থিত হয় ।

প্ৰত্যক্ষদৰ্শীৰ মতে, গাড়ীখনে কিছু সময়ৰ পিছতে একে দিশলৈ উভতি যায়, তাৰ পিছত গেটখন খুন্দা মাৰি বেগেৰে গুচি যায় । সমগ্ৰ ঘটনাটোত তীব্ৰ শব্দ শুনা গৈছিল, যাৰ ফলত অঞ্চলটোত আতংকৰ সৃষ্টি হয় ।

খবৰ অনুসৰি ভিআইপি গেটত চিআৰপিএফ নিয়োজিত হৈ থকাৰ পিছতো এই ঘটনা সংঘটিত হয় । ফুলৰ থোপাটোত কোনো সন্দেহজনক বস্তু পোৱা হোৱা নাই । প্ৰায় পাঁচ মিনিটৰ ভিতৰতে সমগ্ৰ ঘটনা সংঘটিত হোৱাৰ পিছত সন্দেহজনক গাড়ীখন বিধানসভাৰ ২ নং গেটৰ পৰা ওলাই যায় ।

ইতিমধ্যে দিল্লী আৰক্ষীয়ে টাটা ছিয়েৰা গাড়ীখন উদ্ধাৰ কৰাৰ লগতে গাড়ী চালকজনকো জিম্মাত লৈছে বুলি জানিব পৰা গৈছে । সম্প্ৰতি আৰক্ষীয়ে ঘটনা সন্দৰ্ভত তদন্ত অব্যাহত ৰাখিছে ।

লগতে পঢ়ক : কংগ্ৰেছে অনুপ্ৰৱেশকাৰীক সুৰক্ষা দি খিলঞ্জীয়াক বিপদত পেলাইছে : বৰপেটাৰ পৰা প্ৰধানমন্ত্ৰী মোদীৰ গৰ্জন