শনিবাৰে দুপৰীয়া প্ৰকৃতিৰ এক অভাৱনীয় আৰু ভয়ংকৰ ৰূপ দেখা গ’ল
ৰাজস্থানৰ সীমান্তৱৰ্তী জিলাসমূহত শনিবাৰে দুপৰীয়া প্ৰকৃতিৰ এক অভাৱনীয় আৰু ভয়ংকৰ ৰূপ দেখা গ’ল । চুৰু আৰু শ্ৰীগংগানগৰত বতৰৰ হঠাতে হোৱা পৰিৱৰ্তনে জনজীৱন ব্যাহত কৰি তোলে । দুপৰীয়া প্ৰায় ২ বজাত আকাশত ধূলি আৰু বালিৰ এক বিশাল ধুমুহা উঠি সূৰ্যক সম্পূৰ্ণৰূপে ঢাকি পেলোৱা পৰিলক্ষিত হয় ।
শূন্য দৃশ্যমানতা, স্তব্ধ পৰিবহণ-
বালিৰ ধুমুহা ইমানেই ঘন আছিল যে দুপৰীয়াৰ সময়তো চাৰিওফালে ঘোৰ আন্ধাৰ নামি আহে । দৃশ্যমানতা (Visibility) প্ৰায় শূন্যৰ ওচৰ পোৱাত ৰাস্তাত চলি থকা বাহনসমূহৰ গতি স্তব্ধ হৈ পৰে । চালকসকলে নিজৰ বাহনৰ হেডলাইট জ্বলাই সাৱধানে আগুৱাবলগীয়া হয় ।
৭০ কিমি গতিবেগ আৰু ৩০ মিনিটৰ তাণ্ডৱ-
বতৰ বিজ্ঞান কেন্দ্ৰৰ তথ্য অনুসৰি, এই বালিময় চক্ৰবাতটো সাধাৰণ ধুমুহা নাছিল । বতাহৰ গতিবেগ প্ৰায় ৭০ কিলোমিটাৰ প্ৰতি ঘণ্টা পোৱা গৈছে । প্ৰায় ৩০ মিনিট ধৰি বালিৰ এই বিশাল দেৱালখন আকাশত আগুৱাই যোৱাৰ ফলত স্থানীয় বাসিন্দাসকলে নিজৰ ঘৰৰ খিৰিকী-দৰ্জা বন্ধ কৰি ভিতৰত আশ্ৰয় লবলৈ বাধ্য হয় ।
ৰাইজৰ বাবে সকাহৰ বৰষুণ-
ধূলিৰ ধুমুহাৰ প্ৰকোপ শান্ত হোৱাৰ লগে লগে আকাশত ডাঠ মেঘ জমা হয় আৰু বিভিন্ন অঞ্চলত বৰষুণ আৰম্ভ হয় । এই বৰষুণে যোৱা কেইদিনমান ধৰি ৪৫ ডিগ্ৰী চেলচিয়াছৰ ওপৰত চলি থকা তাপমাত্ৰাক হঠাতে তললৈ নমাই আনে । বতৰ বিজ্ঞান বিভাগৰ তথ্য অনুসৰি, তাপমাত্ৰাত পোনপটীয়াকৈ ৮ ডিগ্ৰী চেলচিয়াছৰ হ্ৰাস পোৱাৰ ফলত স্থানীয় লোকসকলে প্ৰচণ্ড গৰম আৰু ‘লু‘ৰ পৰা যথেষ্ট সকাহ লাভ কৰিছে ।
এই ঘটনাৰ পিছত বৰ্তমান পৰিস্থিতি স্বাভাৱিক বুলি জানিব পৰা গৈছে যদিও প্ৰশাসনে স্থানীয় লোকসকলক সতৰ্ক হৈ থাকিবলৈ পৰামৰ্শ দিছে ।
লগতে পঢ়ক : পশ্চিম এচিয়াৰ সংঘাতৰ আশংকাৰ মাজতো ভাৰতৰ অৰ্থনীতিৰ বাবে আশাব্যঞ্জক খবৰ
