সন্ধিয়া হঠাতে অহা প্ৰচণ্ড ধুমুহাৰ ফলত পানীত অস্থিৰ হৈ পৰা ক্ৰুজ জাহাজখন ডুব যায়
বৃহস্পতিবাৰে জব্বলপুৰত সংঘটিত হয় এক ভয়াৱহ দুৰ্ঘটনা । এই ঘটনাত হঠাৎ ধুমুহাৰ ফলত নৰ্মদা নদীৰ বৰগী বান্ধত চলি থকা এখন ক্ৰুজ ডুব যায় । জানিব পৰা মতে দুৰ্ঘটনাৰ সময়ত ক্ৰুজখনত প্ৰায় ৩১ জন লোক আছিল । এই ঘটনাত ৪ জন লোকৰ মৃত্যু হোৱাৰ বিপৰীতে ১৫ জন লোকক উদ্ধাৰ কৰা হৈছে; ইফালে আন ১২ জনৰ সন্ধানত অভিযান চলি আছে ।
জব্বলপুৰৰ জিলা আয়ুক্তই উল্লেখ কৰে যে বৰগী বান্ধত এখন ক্ৰুজ ডুব যোৱাৰ ফলত চাৰিজন লোকে প্ৰাণ হেৰুৱাইছে; ১৫ জন ব্যক্তিক উদ্ধাৰ কৰা হৈছে আৰু বাকী ১২ জনক উদ্ধাৰৰ বাবে অভিযান চলি আছে । বৰ্তমানেও অনুসন্ধান আৰু উদ্ধাৰ অভিযান চলি আছে ।
জানিব পৰা মতে ধুমুহাৰ ফলত এই দুৰ্ঘটনা সংঘটিত হয় । সন্ধিয়া হঠাতে অহা প্ৰচণ্ড বতাহৰ ফলত পানীত অস্থিৰ হৈ পৰা ক্ৰুজ জাহাজখন ডুব যায় । উল্লেখ্য যে এই ক্ৰুজখন মধ্যপ্ৰদেশ পৰ্যটন নিগমৰ দ্বাৰা পৰিচালিত ।
এই দুৰ্ঘটনা সন্দৰ্ভত ছ’চিয়েল মিডিয়াত প্ৰতিক্ৰিয়া প্ৰকাশ কৰিছে মুখ্যমন্ত্ৰী মোহন যাদৱে । ৰাজ্যখনৰ মুৰব্বীগৰাকীয়ে লিখিছে, “জব্বলপুৰৰ বৰগী বান্ধত আজি সংঘটিত হোৱা ভয়াৱহ ধুমুহাৰ ফলত সংঘটিত হোৱা কৰুণ ক্ৰুজ দুৰ্ঘটনাৰ সৈতে জড়িত স্থানীয় প্ৰশাসন আৰু উদ্ধাৰ বাহিনীৰ অভিযান অবিৰতভাৱে চলি আছে ।”
তেওঁ লিখিছে- “মন্ত্ৰী ৰাকেশ সিং, পৰ্যটন মন্ত্ৰী ধৰ্মেন্দ্ৰ সিং লোধি, বিভাগীয় প্ৰভাৰী এচিএছ, এডিজি আৰু স্থানীয় জনপ্ৰতিনিধিসকলক অনতিপলমে ঘটনাস্থলীত উপস্থিত হ’বলৈ নিৰ্দেশ জাৰি কৰা হৈছে । দ্ৰুত উদ্ধাৰ অভিযানৰ ফলত ১৫ জন নাগৰিকক নিৰাপদে উদ্ধাৰ কৰা হৈছে । সন্ধানহীন হোৱা লোকসকলক অতি সোনকালে বিচাৰি উলিয়াবলৈ চেষ্টা অব্যাহত আছে । এই সংকটৰ সময়ত ৰাজ্য চৰকাৰে ক্ষতিগ্ৰস্ত পৰিয়ালসমূহৰ সৈতে সম্পূৰ্ণ সংবেদনশীলতাৰে থিয় দিছে, আৰু সকলো সম্ভাৱ্য সহায় নিশ্চিত কৰা হৈছে ।“
লগতে পঢ়ক : মেঘালয় আৰক্ষীৰ ভুলৰ বাবে সোণম ৰঘুবংশীয়ে পালে জামিন; আদালতৰ ধমক
