ড’নাল্ড ট্ৰাম্পক মুকলি প্ৰত্যাহ্বান জনালে কলম্বিয়াৰ ৰাষ্ট্ৰপতিয়ে । তেওঁ যদি আমেৰিকাই আক্ৰমণ কৰে তেন্তে পৰিস্থিতি নিয়ন্ত্ৰণৰ বাহিৰলৈ যাব বুলি ট্ৰাম্পক সকীয়াই দিয়ে ।

ভেনিজুৱেলাত আমেৰিকাৰ সামৰিক পদক্ষেপৰ পিছত লেটিন আমেৰিকাত উত্তেজনা অধিক গভীৰ হৈ পৰিছে । চৰ্চা চলিছে এতিয়া আমেৰিকাৰ পৰৱৰ্তী লক্ষ্য কলম্বিয়া হ’ব পাৰে । কলম্বিয়াৰ ৰাষ্ট্ৰপতি গুস্তাভো পেট্ৰ’ই নিজেই এই দাবী কৰিছে । তেওঁ আমেৰিকাৰ ৰাষ্ট্ৰপতি ড’নাল্ড ট্ৰাম্পক সকীয়াই দি কয় যে, “যদি সাহস আছে, তেন্তে আহক, মই আপেক্ষা কৰি আছো ।”

ভেনিজুৱেলা অভিযানৰ পিছত ড’নাল্ড ট্ৰাম্পে এক বিবৃতিত কয় যে কলম্বিয়াক এজন অসুস্থ নেতাই চলাই আছে, যিয়ে আমেৰিকালৈ ককেইন পঠায় । আনকি ট্ৰাম্পে কলম্বিয়াৰ বিৰুদ্ধে সামৰিক ব্যৱস্থা গ্ৰহণ কৰাটো এটা ভাল পদক্ষেপ হ’ব পাৰে বুলিও মন্তব্য দিছিল । এই মন্তব্যই বগোটা (কলম্বিয়াৰ ৰাজধানী)ত ৰাজনৈতিক তৎপৰতা তীব্ৰ কৰি তুলিছিল ।

যদি আক্ৰমণ হয় তেন্তে সংঘাত হ’ব- পেট্ৰ’

কলম্বিয়াৰ ৰাষ্ট্ৰপতি গুস্তাভো পেট্ৰ’ই ট্ৰাম্পক কয় যে যদিহে আমেৰিকাই আক্ৰমণ কৰে তেন্তে পৰিস্থিতি নিয়ন্ত্ৰণৰ বাহিৰলৈ গতি কৰিব । তেওঁ সকীয়াই দিয়ে যে আমেৰিকাৰ আক্ৰমণত দেশখনে অস্ত্ৰ তুলি ল’বলৈ বাধ্য হ’ব পাৰে আৰু পূৰ্ণাংগ গেৰিলা সংঘাতৰ সূচনা কৰিব পাৰে । পেট্ৰ’ই লগতে কয় যে যদি কোনো জনপ্ৰিয় ৰাষ্ট্ৰপতিক গ্ৰেপ্তাৰ কৰাৰ চেষ্টা কৰা হয় তেন্তে জনতাৰ ক্ষোভ জাগুৱাৰৰ দৰে ফাটি পৰিব ।

অস্ত্ৰ ত্যাগ কৰা পেট্ৰ’ৰ ডাঙৰ মন্তব্য-

প্ৰাক্তন বাওঁপন্থী গেৰিলা পেট্ৰ’ই কয় যে তেওঁ দশক পূৰ্বে অস্ত্ৰ ত্যাগ কৰাৰ প্ৰতিশ্ৰুতি দিছিল যদিও দেশৰ সাৰ্বভৌমত্বৰ প্ৰতি ভাবুকি আহিলে তেওঁ সংঘাতলৈ ঘূৰি আহিবলৈ সাজু হ’ব । কলম্বিয়াৰ ৰাষ্ট্ৰপতিৰ এই বক্তব্য আন্তঃৰাষ্ট্ৰীয় পৰ্যায়ত বহুলভাৱে চৰ্চিত হৈছে ।

কিন্তু ৰাষ্ট্ৰপতিগৰাকীৰ এই চোকা বক্তব্যৰ পিছতে কলম্বিয়াৰ বৈদেশিক মন্ত্ৰালয়ে পৰিস্থিতি নিয়ন্ত্ৰণৰ চেষ্টা চলায় । মন্ত্ৰালয়ে স্পষ্ট কৰি দিয়ে যে কলম্বিয়াই আলোচনা আৰু পাৰস্পৰিক সন্মানৰ ওপৰত ভিত্তি কৰি আন্তঃৰাষ্ট্ৰীয় সম্পৰ্ক বিচাৰে আৰু কোনো ধৰণৰ ভাবুকি বা বল প্ৰয়োগ গ্ৰহণ নকৰে ।

পূৰ্বেও আমেৰিকা-কলম্বিয়াৰ সম্পৰ্কত আহি পৰিছিল তিক্ততা-

ট্ৰাম্প আৰু পেট্ৰ’ৰ মাজত এয়াই প্ৰথম সংঘাত নহয় । অক্টোবৰ মাহত আমেৰিকাই ড্ৰাগছ সৰবৰাহৰ অভিযোগত পেট্ৰ’ আৰু তেওঁৰ পৰিয়ালৰ একাংশ সদস্যৰ ওপৰত নিষেধাজ্ঞা আৰোপ কৰিছিল । কলম্বিয়াক বিশ্বৰ সৰ্ববৃহৎ কোকেইন উৎপাদন কেন্দ্ৰ হিচাপে গণ্য কৰা হয়, যিটো পৰিস্থিতিয়ে দীৰ্ঘদিন ধৰি আমেৰিকাক ক্ষুব্ধ কৰি আহিছে ।

লগতে পঢ়ক : ডেনমাৰ্কক ভেনিজুৱেলা বুলি ভুল নকৰিব… ৰাষ্ট্ৰপতি ট্ৰাম্পক সকীয়নি মেট ফ্ৰেডেৰিকচনৰ

ভেনিজুৱেলাৰ অন্তৱৰ্তীকালীন চৰকাৰে আমেৰিকাক ৩০ৰ পৰা ৫০ মিলিয়ন বেৰেল তেল বিক্ৰী কৰিব বুলি ঘোষণা কৰিছে মাৰ্কিন ৰাষ্ট্ৰপটি ড’নাল্ড ট্ৰাম্পে । তেওঁ শক্তি সচিব ক্ৰীছ ৰাইটক এই পৰিকল্পনা তৎকালীনভাৱে কাৰ্যকৰী কৰিবলৈ নিৰ্দেশ দিছে ।

মঙলবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে ভেনিজুৱেলা সন্দৰ্ভত এক বৃহৎ ঘোষণা কৰে । তেওঁ নিজৰ ছ’চিয়েল মিডিয়া প্লেটফৰ্ম ট্ৰুথ ছ’চিয়েলত উল্লেখ কৰে যে ভেনিজুৱেলাৰ অন্তৱৰ্তীকালীন চৰকাৰে আমেৰিকাক ৩০ৰ পৰা ৫০ মিলিয়ন বেৰেল উচ্চমানৰ তেল বিক্ৰী কৰিব । ট্ৰাম্পৰ মতে এই তেল বজাৰ মূল্যত লাভ কৰিব আমেৰিকা ।

ড’নাল্ড ট্ৰাম্পে কয় যে তেওঁ তেল বিক্ৰীৰ পৰা পোৱা ধনৰ ওপৰত নিয়ন্ত্ৰণ ৰাখিব আৰু এই ধন দুয়োখন দেশৰ জনসাধাৰণৰ হিতৰ বাবে ব্যৱহাৰ কৰা হ’ব । তেওঁ লগতে কয় যে তেওঁ শক্তি সচিব ক্ৰীছ ৰাইটক এই পৰিকল্পনা তৎকালীনভাৱে কাৰ্যকৰী কৰিবলৈ নিৰ্দেশ দিছে । ষ্ট’ৰেজ জাহাজৰ জৰিয়তে পোনপটীয়াকৈ আমেৰিকাৰ আনলোডিং ডক আৰু বন্দৰলৈ তেল পৰিবহণ কৰা হ’ব ।

হোৱাইট হাউছে জাৰি কৰিলে বিবৃতি-

ইফালে, শুকুৰবাৰে অ’ভাল অফিচত ভেনিজুৱেলাৰ তেল ব্যৱসায় সন্দৰ্ভত এক গুৰুত্বপূৰ্ণ বৈঠক অনুষ্ঠিত হ’ব বুলি ঘোষণা কৰিছে হোৱাইট হাউছে । এই বৈঠকত এক্সন, চেভ্ৰন, কন’কোফিলিপছৰ দৰে আমেৰিকাৰ প্ৰধান তেল কোম্পানীসমূহৰ জ্যেষ্ঠ বিষয়াসকলে অংশগ্ৰহণ কৰাৰ সম্ভাৱনা আছে । বৈঠকত ভেনেজুৱেলাৰ তেল চুক্তি আৰু ভৱিষ্যতৰ কৌশলৰ বিষয়ে বিতংভাৱে আলোচনা কৰা হ’ব বুলি আশা কৰা হৈছে ।

ভেনিজুৱেলাত বিশাল তেল ভাণ্ডাৰ-

উল্লেখ্য যে, ভেনেজুৱেলাত বিশ্বৰ ভিতৰতে সৰ্বাধিক খাৰুৱা তেলৰ মজুত আছে যদিও ইয়াৰ পিছতো ইয়াৰ পৰা গড়ে প্ৰতিদিনে মাত্ৰ ১০ লাখ বেৰেল তেলহে উৎপাদন হয় । যদি আমেৰিকাৰ সৈতে তুলনা কৰা হয় তেন্তে অক্টোবৰ মাহত প্ৰতিদিনে গড়ে ১ কোটি ৩৯ লাখ বেৰেল উৎপাদন কৰিছিল আমেৰিকাই । ট্ৰাম্পৰ পৰিকল্পনা অনুসৰি আমেৰিকাই যদি প্ৰায় ৫৬ ডলাৰত এক বেৰেল তেল ক্ৰয় কৰে তেন্তে ভেনিজুৱেলাৰ তেলৰ মূল্য হ’ব প্ৰায় ২.৮ বিলিয়ন ডলাৰ ।

লগতে পঢ়ক : গ্ৰীণলেণ্ড বিবাদ… ট্ৰাম্পৰ বিৰুদ্ধে একত্ৰিত ইউৰোপীয় দেশ !

গ্ৰীণলেণ্ডৰ ওপৰত আমেৰিকাৰ নিয়ন্ত্ৰণৰ ইংগিত দিয়া ট্ৰাম্পৰ মন্তব্যক লৈ ইউৰোপৰ কেইবাজনো নেতাই তীব্ৰ আপত্তি প্ৰকাশ কৰে । তেওঁলোকে দ্বীপটো ইয়াৰ জনসাধাৰণৰ বুলি উল্লেখ কৰে ।

আমেৰিকাৰ ৰাষ্ট্ৰপতি ড’নাল্ড ট্ৰাম্পে গ্ৰীণলেণ্ডৰ ওপৰত আমেৰিকাৰ নিয়ন্ত্ৰণৰ ইংগিত দিয়া মন্তব্যক লৈ মঙলবাৰে ইউৰোপৰ কেইবাজনো নেতাই তীব্ৰ আপত্তি প্ৰকাশ কৰে । তেওঁলোকে এক বিবৃতি প্ৰকাশ কৰি কৌশলগতভাৱে গুৰুত্বপূৰ্ণ আৰু খনিজ সমৃদ্ধ আৰ্কটিক দ্বীপটো ইয়াৰ জনসাধাৰণৰ বুলি দৃঢ়তাৰে উল্লেখ কৰে ।

এই যৌথ বিবৃতিত স্বাক্ষৰ কৰে ইটালীৰ প্ৰধানমন্ত্ৰী জৰ্জিয়া মেল’নি, ফ্ৰান্সৰ ৰাষ্ট্ৰপতি ইমানুৱেল মেক্ৰন, জাৰ্মান চেন্সেলৰ ফ্ৰেড্ৰিখ মেৰ্জ, পোলেণ্ডৰ প্ৰধানমন্ত্ৰী ড’নাল্ড টাস্ক, স্পেইনৰ প্ৰধানমন্ত্ৰী পেড্ৰ’ ছানচেজ, ব্ৰিটিছ প্ৰধানমন্ত্ৰী কেইৰ ষ্টাৰমাৰ আৰু ডেনমাৰ্কৰ প্ৰধানমন্ত্ৰী মেট ফ্ৰেডেৰিকচেনে । ডেনমাৰ্কৰ স্ব-শাসিত ভূখণ্ড গ্ৰীণলেণ্ডৰ বিষয়ে ট্ৰাম্পে কৰা মন্তব্যৰ পিছতে ইউৰোপীয় নেতাসকলে দ্বীপ ৰাষ্ট্ৰখনৰ সাৰ্বভৌমত্ব ৰক্ষা কৰাৰ বাবে উঠি-পৰি লাগিছে ।

যৌথ বিবৃতিটোত কোৱা হৈছে যে আৰ্কটিক অঞ্চলৰ নিৰাপত্তা কেৱল সামূহিকভাৱেহে নিশ্চিত কৰিব পৰা যাব—নাটোৰ মিত্ৰ দেশসমূহৰ (আমেৰিকাকে ধৰি) সহযোগিতাত—ৰাষ্ট্ৰসংঘৰ চনদৰ নীতিসমূহ ৰক্ষা কৰি । ইয়াৰ ভিতৰত সাৰ্বভৌমত্ব, ভূখণ্ডৰ অখণ্ডতা, আৰু সীমান্তৰ লংঘন নকৰা আদি অন্তৰ্ভুক্ত আছে । এইবোৰ সাৰ্বজনীন নীতি আৰু আমি ইয়াৰ ৰক্ষা কৰাটো কেতিয়াও বন্ধ নকৰো । এই প্ৰচেষ্টা আমেৰিকা অপৰিহাৰ্য অংশীদাৰ, নাটোৰ মিত্ৰ হিচাপে আৰু ১৯৫১ চনত ডেনমাৰ্ক আৰু আমেৰিকাৰ মাজত হোৱা প্ৰতিৰক্ষা চুক্তিৰ অধীনত । গ্ৰীণলেণ্ড ইয়াৰ জনসাধাৰণৰ । ডেনমাৰ্ক আৰু গ্ৰীণলেণ্ড সম্পৰ্কীয় বিষয়ত সিদ্ধান্ত লোৱাৰ অধিকাৰ কেৱল ডেনমাৰ্ক আৰু গ্ৰীণলেণ্ডৰ ।

ইয়াৰ পূৰ্বে হোৱাইট হাউছৰ ডেপুটী চীফ অব্ ষ্টাফ ষ্টিফেন মিলাৰে সোমবাৰে কয় যে ফ্ৰেডেৰিকচেনে সকীয়াই দিছিল যে আমেৰিকাৰ গ্ৰীনলেণ্ড দখল কৰাটো নাটোৰ সামৰিক মিত্ৰতাৰ অন্ত পৰাৰ দৰে হ’ব । মিলাৰে কয় যে ৰাষ্ট্ৰপতিয়ে কেইবামাহো ধৰি স্পষ্ট কৰি আহিছে যে আমেৰিকা সেইখন দেশ হ’ব লাগে যাৰ সামগ্ৰিক নিৰাপত্তা ব্যৱস্থাৰ অংশ গ্ৰীণলেণ্ড ।

লগতে পঢ়ক : ডেনমাৰ্কক ভেনিজুৱেলা বুলি ভুল নকৰিব… ৰাষ্ট্ৰপতি ট্ৰাম্পক সকীয়নি মেট ফ্ৰেডেৰিকচনৰ

ভেনিজুৱেলাত আমেৰিকাৰ আক্ৰমণৰ পিছত পুনৰ চৰ্চালৈ আহিছে গ্ৰীণলেণ্ড । ৰাষ্ট্ৰপতি ট্ৰাম্পে অঞ্চলটো দখলৰ ভাবুকি প্ৰদান কৰিছে । ৰাষ্ট্ৰীয় সুৰক্ষাৰ বাবে গ্ৰীণলেণ্ড আমেৰিকাক প্ৰয়োজন বুলি দাবী কৰিছে ট্ৰাম্পে ।

ভেনিজুৱেলাৰ বিৰুদ্ধে সামৰিক পদক্ষেপৰ পিছতে আমেৰিকাৰ ৰাষ্ট্ৰপতি ড’নাল্ড ট্ৰাম্পে দক্ষিণ আমেৰিকাৰ পৰা কেৰিবিয়ানলৈকে দেশসমূহক মুকলিকৈ ভাবুকি প্ৰদান কৰিছে । ইয়াৰ মাজতে ড’নাল্ড ট্ৰাম্পে কয় যে ৰাষ্ট্ৰীয় নিৰাপত্তাৰ বাবে আমেৰিকাক গ্ৰীণলেণ্ডৰ প্ৰয়োজন । তেওঁৰ এই বক্তব্যই পুনৰবাৰ আৰ্কটিক দ্বীপ গ্ৰীনলেণ্ডক চৰ্চালৈ আনিছে ।

ড’নাল্ড ট্ৰাম্পৰ এই বক্তব্যৰ পিছতে ছ’চিয়েল মিডিয়াত তেওঁৰ সমৰ্থকসকলে কৰা মন্তব্যই গ্ৰীনলেণ্ড আমেৰিকাৰ পৰৱৰ্তী লক্ষ্য হিচাপে পৰিগণিত হোৱাৰ উদ্বেগ বৃদ্ধি কৰিছে । ডেনমাৰ্কৰ প্ৰধানমন্ত্ৰী মেটে ফ্ৰেডেৰিকচেনে ট্ৰাম্পৰ এই বক্তব্যৰ তীব্ৰ প্ৰতিক্ৰিয়া প্ৰকাশ কৰি গ্ৰীনলেণ্ড নিয়ন্ত্ৰণ কৰাৰ ভাবুকি বন্ধ কৰিবলৈ মাৰ্কিন ৰাষ্ট্ৰপতিগৰাকীক সকীয়াই দিয়ে ।

ট্ৰাম্পক সকীয়নি ডেনমাৰ্কৰ-

ডেনমাৰ্কৰ প্ৰধানমন্ত্ৰীয়ে ট্ৰাম্পক স্পষ্টকৈ কয় যে, “ডেনমাৰ্ক আৰু গ্ৰীণলেণ্ড নাটোৰ অংশ । ফলত তেওঁলোক মিত্ৰজোঁটৰ নিৰাপত্তা নিশ্চয়তাৰ অধীনত পৰে । ডেনমাৰ্কৰ সৈতে আমেৰিকাৰ ইতিমধ্যেই এক প্ৰতিৰক্ষা চুক্তি আছে যিয়ে আমেৰিকাক গ্ৰীণলেণ্ডত ব্যাপক প্ৰৱেশৰ সুবিধা প্ৰদান কৰে ।” তেওঁ লগতে কয়, “এই ভিত্তিত মই আমেৰিকাক আহ্বান জনাইছো যে ঐতিহাসিকভাৱে ঘনিষ্ঠ মিত্ৰ, দেশ আৰু লোকক তেওঁলোকে ভাবুকি দিয়া বন্ধ কৰক, যিয়ে স্পষ্টভাৱে তেওঁলোক বিক্ৰী নহয় বুলি কৈছে ।”

ভেনিজুৱেলাৰ আক্ৰমণৰ পিছতে চৰ্চাত গ্ৰীনলেণ্ড-

ভেনিজুৱেলাত আমেৰিকাৰ আক্ৰমণৰ মাত্ৰ কেইঘণ্টামানৰ পিছতে বিশ্বৰ দৃষ্টি গ্ৰীণলেণ্ডত কেন্দ্ৰীভূত হয় । ইয়াৰ পোনপটীয়া কাৰণ আছিল ড’নাল্ড ট্ৰাম্পৰ বক্তব্য তথা ভাবুকি । দৰাচলতে পূৰ্বৰ কাৰ্যকালত ড’নাল্ড ট্ৰাম্পে গ্ৰীণলেণ্ড ক্ৰয় কৰাৰ প্ৰস্তাৱ দিছিল । গ্রীনলেণ্ড এটা উল্লেখযোগ্য কৌশলগত গুৰুত্বৰ অঞ্চল ৷ ইয়াৰ জনসংখ্যা মাত্ৰ ৫৬ হাজাৰ ।

আৰ্কটিক দ্বীপ গ্ৰীনলেণ্ড ভৌগোলিকভাৱে উত্তৰ আমেৰিকাৰ অংশ । কিন্তু ইউৰোপৰ সৈতে ৰাজনৈতিকভাৱে সংযুক্ত ডেনমাৰ্কৰ ভিতৰৰ ই এক স্বায়ত্তশাসিত ভূখণ্ড । আভ্যন্তৰীণ বিষয়ত গ্ৰীণলেণ্ড স্ব-শাসিত যদিও ইয়াৰ বৈদেশিক আৰু নিৰাপত্তা নীতি ডেনমাৰ্কৰ নিয়ন্ত্ৰণত আছে । কিন্তু ২০০৯ চনৰ আত্মশাসন আইন অনুসৰি ইয়াৰ সম্পূৰ্ণ স্বাধীনতা লাভ কৰাৰ অধিকাৰ আছে, যিটো গণভোটৰ জৰিয়তে গ্ৰীনলেণ্ডৰ জনসাধাৰণে বাছি ল’ব পাৰে ।

কিয় গুৰুত্বপূৰ্ণ গ্ৰীনলেণ্ড ?

ডেনমাৰ্ক আৰু গ্ৰীণলেণ্ডৰ নেতাসকলে আমেৰিকাৰ এই স্থিতিক আন্তঃৰাষ্ট্ৰীয় আইন আৰু সাৰ্বভৌমত্ব উলংঘা কৰা বুলি অভিহিত কৰিছে । গ্রীনলেণ্ডৰ অৰ্থনীতি মূলতঃ মাছ ধৰাৰ ওপৰত ভিত্তি কৰি গঢ় লৈ উঠিছে । শেহতীয়া বছৰবোৰত আমেৰিকাৰ আপুৰুগীয়া খনিজ পদাৰ্থ, ইউৰেনিয়াম, লো খননকে ধৰি গ্ৰীনলেণ্ডৰ প্ৰাকৃতিক সম্পদৰ প্ৰতি আগ্ৰহ বাঢ়িছে ।

দৰাচলতে গোলকীয় উষ্ণতাৰ বাবে গ্রীনলেণ্ডক আবৰি থকা কিছুমান বৰফ গলি এই ঠাইবোৰ অধিক সুলভ কৰি তুলিব পাৰে । শেহতীয়াকৈ ট্ৰাম্পৰ বক্তব্যই ইয়াকেই ইংগিত দিছিল । বিশেষকৈ গলি যোৱা বৰফে নতুন জলপথ আৰু সামৰিক সুযোগ মুকলি কৰাৰ বাবে আৰ্কটিকত ৰাছিয়া আৰু চীনৰ কাৰ্যকলাপ বৃদ্ধি পোৱাৰ বাবে গ্রীনলেণ্ড অতি গুৰুত্বপূৰ্ণ বুলি ট্ৰাম্পে মন্তব্য কৰিছিল ।

আমেৰিকাৰ দীৰ্ঘদিন ধৰি গ্রীনলেণ্ডৰ প্ৰতি নিৰাপত্তাৰ স্বাৰ্থ আছিল । দ্বিতীয় বিশ্বযুদ্ধৰ সময়ত জাৰ্মানীয়ে ডেনমাৰ্কৰ মূল ভূখণ্ড দখল কৰিছিল । ইয়াৰ পিছত আমেৰিকাই গ্ৰীণলেণ্ড আক্ৰমণ কৰি সমগ্ৰ ভূখণ্ডত সামৰিক আৰু ৰেডিঅ’ ষ্টেচন স্থাপন কৰে ।

লগতে পঢ়ক : মাদুৰোক গ্ৰেপ্তাৰৰ পিছত নিৰাপত্তা পৰিষদৰ জৰুৰী বৈঠক আহ্বান…