শুকুৰবাৰে ৰাষ্ট্ৰপতি ড’নাল্ড ট্ৰাম্পে বিশ্বৰ দেশসমূহৰ ওপৰত গধুৰ শুল্ক আৰোপ কৰাৰ সিদ্ধান্ত বাতিল কৰে উচ্চতম ন্যায়ালয়ে ।
শুকুৰবাৰে মাৰ্কিন উচ্চতম ন্যায়ালয়ে শুল্ক সন্দৰ্ভত লোৱা সিদ্ধান্ত সন্দৰ্ভত ভাৰত চৰকাৰে এক বিবৃতি প্ৰকাশ কৰিছে । বিবৃতিত উল্লেখ কৰা হৈছে যে ভাৰতে আমেৰিকাৰ উচ্চতম ন্যায়ালয়ৰ এই সিদ্ধান্তৰ বিকাশ আৰু প্ৰভাৱৰ ওপৰত নিবিড়ভাৱে অধ্যয়ন কৰি আছে । উল্লেখ্য যে, শুকুৰবাৰে ৰাষ্ট্ৰপতি ড’নাল্ড ট্ৰাম্পে বিশ্বৰ দেশসমূহৰ ওপৰত গধুৰ শুল্ক আৰোপ কৰাৰ সিদ্ধান্ত বাতিল কৰে উচ্চতম ন্যায়ালয়ে ।
এই বিষয়টোৰ সন্দৰ্ভত বাণিজ্য মন্ত্ৰী পীয়ুষ গোৱেলে কয়, “আমি কালি শুল্ক সন্দৰ্ভত আমেৰিকাৰ উচ্চতম ন্যায়ালয়ৰ সিদ্ধান্ত লক্ষ্য কৰিলোঁ । আমেৰিকাৰ ৰাষ্ট্ৰপতিয়েও এই বিষয়ত সংবাদমেল অনুষ্ঠিত কৰে । আমেৰিকা প্ৰশাসনেও কিছু সিদ্ধান্ত লৈছে । আমি এই বিষয়ে নিবিড়ভাৱে অধ্যয়ন কৰি আছো ।”
আমেৰিকাৰ আদালতৰ এই সিদ্ধান্ত সন্দৰ্ভত কেন্দ্ৰীয় মন্ত্ৰী প্ৰহ্লাদ যোশীয়ে উল্লেখ কৰে যে ভাৰত চৰকাৰে শুল্ক সন্দৰ্ভত শেহতীয়াকৈ আদালতৰ ৰায়দান অধ্যয়ন কৰিব । বাণিজ্য মন্ত্ৰী পীয়ুষ গোৱেল আৰু বৈদেশিক পৰিক্ৰমা মন্ত্ৰী এছ জয়শংকৰে বিষয়টো তদাৰক কৰি আছে ।
সাংবাদিকৰ সৈতে হোৱা এক সাক্ষাৎকাৰত কেন্দ্ৰীয় মন্ত্ৰীগৰাকীয়ে কয়, “মই সংবাদ মাধ্যমত পঢ়িলোঁ যে এই বিষয়ত আমেৰিকাৰ উচ্চতম ন্যায়ালয়ে এটা নিৰ্দেশ দিছে । ভাৰত চৰকাৰে ইয়াৰ ওপৰত অধ্যয়ন কৰিব । প্ৰয়োজন হ’লে যিকোনো উত্তৰ দিয়া হ’ব । বাণিজ্য মন্ত্ৰালয় আৰু বৈদেশিক পৰিক্ৰমা মন্ত্ৰালয়ে এই বিষয়টো তদাৰক কৰি আছে ।” তেওঁ এই বিষয়ে আন কোনো মন্তব্য দিবলৈ অস্বীকাৰ কৰে ।
উল্লেখ্য যে, শুকুৰবাৰে আমেৰিকাৰ উচ্চতম ন্যায়ালয়ে ট্ৰাম্পৰ শুল্ক অবৈধ বুলি ঘোষণা কৰে । ৬ জনীয়া ন্যায়াধীশে এই সিদ্ধান্তৰ সপক্ষে ভোটদান কৰাৰ বিপৰীতে তিনিজন ন্যায়াধীশে মতানৈক্য প্ৰকাশ কৰে । ইয়াত উল্লেখ কৰা হৈছে যে ট্ৰাম্প প্ৰশাসনে ১৯৭৭ চনৰ আন্তঃৰাষ্ট্ৰীয় জৰুৰীকালীন অৰ্থনৈতিক ক্ষমতা আইন (আই ই ই পি এ)ৰ অধীনত নিজৰ ক্ষমতাৰ অপব্যৱহাৰ কৰি গধুৰ আমদানি শুল্ক আৰোপ কৰিছিল ।
মুখ্য ন্যায়াধীশ জন ৰবাৰ্টছৰ সৈতে ন্যায়াধীশ নীল গ’ৰছুচ আৰু এমি কনি বেৰেট আৰু তিনিজন উদাৰ ন্যায়াধীশে এই ৰায়দান কৰে । উচ্চতম ন্যায়ালয়ে কয় যে আই ই ই পি এয়ে ৰাষ্ট্ৰপতিক শুল্ক আৰোপ কৰিবলৈ অনুমতি নিদিয়ে, যিটো ক্ষমতা সাংবিধানিকভাৱে কংগ্ৰেছক প্ৰদান কৰা হৈছে ।
লগতে পঢ়ক : থেংক ইউ ইণ্ডিয়া… ভাৰত ভ্ৰমণক স্মৰণীয় আখ্যা দি দেশলৈ উভতিল ৰাষ্ট্ৰপতি মেক্ৰন
