প্ৰথমখন মেচত আমেৰিকাক পৰাস্ত কৰাৰ পিছত ভাৰতৰ আত্মবিশ্বাস তুংগত আছে যদিও দ্বিতীয়খন মেচৰ পূৰ্বে মূল একাদশ সন্দৰ্ভত কিছু বিভ্ৰান্তিৰ সৃষ্টি হৈছে ।

টি-২০ বিশ্বকাপৰ বিজয়ী আৰম্ভণিৰ পিছত টিম ইণ্ডিয়াৰ পৰৱৰ্তী মেচ বৃহস্পতিবাৰে নামিবিয়াৰ বিৰুদ্ধে অনুষ্ঠিত হ’ব । প্ৰথমখন মেচত আমেৰিকাক পৰাস্ত কৰাৰ পিছত ভাৰতীয় দলটোৱে আত্মবিশ্বাস তুংগত আছে যদিও দ্বিতীয়খন মেচৰ পূৰ্বে মূল একাদশ সন্দৰ্ভত কিছু বিভ্ৰান্তিৰ সৃষ্টি হৈছে । ফিটনেছ সম্পৰ্কীয় উদ্বেগে দল পৰিচালনাক শেষ মুহূৰ্তলৈকে অপেক্ষা কৰিবলৈ বাধ্য কৰিব পাৰে ।

অভিষেক শৰ্মাৰ ফিটনেছৰ সিদ্ধান্ত বাকী-

বিস্ফোৰক অ’পেনাৰ অভিষেক শৰ্মা সম্পূৰ্ণ ফিট হৈ উঠা নাই । দলৰ সহায়ক কৰ্মচাৰীয়ে তেওঁৰ অৱস্থা নিৰীক্ষণ কৰি আছে আৰু তেওঁ খেলিব নে নাই সেই সন্দৰ্ভত চূড়ান্ত সিদ্ধান্ত মেচৰ পূৰ্বে লোৱা হ’ব । যদি অভিষেক উপলব্ধ নহয় তেন্তে সঞ্জু চেমচনৰ কথা বিবেচনা কৰা হ’ব পাৰে । চেমছনে বেটিং আৰু উইকেটকিপিং দুয়োটা সুবিধা প্ৰদান কৰে, যিয়ে দলৰ সংমিশ্ৰণত ভাৰসাম্য ৰক্ষা কৰাত সহায় কৰিব পাৰে ।

ঈশান কিষণক লৈয়ো সন্দেহ-

নেট প্ৰেকটিছৰ সময়ত ঈশান কিষণে ভৰিত আঘাতপ্ৰাপ্ত হয় । যশপ্ৰীত বুমৰাহৰ বলিঙত আঘাতপ্ৰাপ্ত হয় তেওঁ । আঘাতৰ পিছত ঈশানক কিছু সময় অস্বস্তিবোধ কৰা যেন দেখা গ’ল আৰু ফিজিঅ’ই খেলপথাৰত হস্তক্ষেপ কৰিবলগীয়া হয় । যদিও পিছত তেওঁক পুনৰ অনুশীলন কৰা দেখা গৈছিল, তথাপিও তেওঁৰ মেচ ফিটনেছৰ সন্দৰ্ভত সম্পূৰ্ণ স্পষ্টতা নাই । যদি ঈশানো বাহিৰ হয় তেন্তে ওপেনিং যুটীৰ পৰিৱৰ্তন অনিবাৰ্য বুলি বিবেচিত হ’ব ।

জিৰণি ল’ব পাৰে বুমৰাহে-

ইফালে যশপ্ৰীত বুমৰাহক কেন্দ্ৰ কৰিও আন এক চৰ্চা চলিছে । দলে তেওঁক ৱৰ্কলোড মেনেজমেণ্টৰ অংশ হিচাপে জিৰণি দিব পাৰে বুলি বাতৰি প্ৰকাশ পাইছে । শেষৰখন খেলত মহম্মদ চিৰাজ আৰু অৰ্শদীপ সিঙে শক্তিশালী বলিঙেৰে দলটোক যথেষ্ট সকাহ প্ৰদান কৰে । গতিকে পৰৱৰ্তী ডাঙৰ মেচখনৰ পূৰ্বে বুমৰাহক সতেজ কৰি ৰখাৰ কৌশল গ্ৰহণ কৰিব পাৰে মেনেজমেন্টে ।

ইনিংছ মুকলি কৰিব নেকি সুন্দৰে ?

যদি শীৰ্ষ ক্ৰমৰ দুজন খেলুৱৈ উপলব্ধ নহয় তেন্তে দল পৰিচালনা সমিতিয়ে নতুন পৰিকল্পনা ৰচনা কৰিব লাগিব । ৱাশ্বিংটন সুন্দৰকো ইনিংছ মুকলিৰ বাবে বিবেচনা কৰা হৈছে বুলি কিছু ইংগিত পোৱা গৈছে । অৱশ্যে টছৰ পূৰ্বেহে চূড়ান্ত সিদ্ধান্ত স্পষ্ট হ’ব ।

ভাৰতৰ বাবে এই মেচখন কেৱল আন এখন প্ৰতিদ্বন্দ্বিতা নহয়, পইণ্ট টেবুলত নিজৰ স্থান দৃঢ় কৰাৰ এক সুযোগ । গতিকে নিৰ্বাচনত ভাৰসাম্য আৰু ফিটনেছ দুয়োটাকে অগ্ৰাধিকাৰ দিয়া হ’ব ।

ভাৰতীয় দলৰ সাম্ভাব্য মূল একাদশ –

সঞ্জু চেমচন, ঈশান কিষাণ/ৱাশ্বিংটন সুন্দৰ, তিলক বাৰ্মা, সূৰ্যকুমাৰ যাদৱ, শিৱম ডুবে, হাৰ্দিক পাণ্ডিয়া, ৰিংকু সিং, অক্ষৰ পেটেল, বৰুণ চক্ৰৱৰ্তী, যশপ্ৰীত বুমৰাহ, অৰ্শদীপ সিং ।

লগতে পঢ়ক : টীম ইণ্ডিয়াত মোক্ষম আঘাত;চিকিৎসালয়ত ভৰ্তি অ’পেনাৰ অভিষেক শৰ্মা

পুনৰ থমকিল পাকিস্তান । বৰ্জনৰ ভাবুকিৰ পাছত অৱশেষত খেলিবলৈ মান্তি ।

অৱশেষত ভাৰতৰ আগত শিৰনত কৰিলে পাকিস্তানে । মেচ বৰ্জনৰ হুংকাৰ দি অৱশেষত ভাৰতৰ বিৰুদ্ধে টি-২০ বিশ্বকাপৰ গ্ৰুপ পৰ্যায়ৰ মেচ খেলিবলৈ মান্তি হৈছে পাকিস্তান । অহা ১৫ ফেব্ৰুৱাৰীত ভাৰত আৰু পাকিস্তানৰ মাজত অনুষ্ঠিত হ’বলগীয়া বহু প্ৰত্যাশিত আই চি চি পুৰুষ টি-২০ বিশ্বকাপ ২০২৬ৰ খেলখন নিৰ্ধাৰিত অনুসৰি অনুষ্ঠিত হ’ব । পাকিস্তান চৰকাৰে সোমবাৰে পাকিস্তান ক্ৰিকেট ব’ৰ্ডক আনুষ্ঠানিকভাৱে এই মেচখন খেলাৰ অনুমতি প্ৰদান কৰি বিগত কেইবাদিনো ধৰি চলি থকা অচলাৱস্থাৰ অন্ত পেলায় ।

প্ৰধানমন্ত্ৰী শ্বাহবাজ শ্বৰীফক পিচিবিৰ অধ্যক্ষ মহছিন নাকৱীয়ে আইচিচি, বাংলাদেশ ক্ৰিকেট ব’ৰ্ড (বিচিবি), আৰু অন্যান্য সদস্য দেশৰ সৈতে হোৱা উচ্চ পৰ্যায়ৰ আলোচনাৰ বিষয়ে অৱগত কৰে । ইয়াৰ পিছতে চৰকাৰে সকলো দিশ বিবেচনা কৰি পাকিস্তান দলটোক খেলপথাৰত নামিবলৈ নিৰ্দেশ দিয়ে ।

সমগ্ৰ প্ৰতিযোগিতাখনৰ ওপৰত প্ৰভাৱ পেলোৱা চৰকাৰৰ পৰামৰ্শ মতে পাকিস্তানে ভাৰতৰ বিৰুদ্ধে খেলখন খেলিব নোৱাৰিব বুলি প্ৰথমে উল্লেখ কৰিছিল । কিন্তু আইচিচিৰ দৃঢ় স্থিতি, বাংলাদেশৰ আবেদন আৰু অব্যাহত আলোচনাৰ পিছত পাকিস্তান এই সিদ্ধান্তৰ পৰা পিছুৱাই যায় ।

লাহোৰত অনুষ্ঠিত হোৱা বৈঠক কেইবা ঘন্টা ধৰি চলিছিল যদিও পাকিস্তানে দিয়া প্ৰায়বোৰ দাবী আই চি চিয়ে নাকচ কৰে । ইয়াৰ পিছতে পিচিবিয়ে বৰ্জনৰ স্থিতি নৰম কৰি মেচখন খেলাৰ পথ মুকলি কৰে ।

ভাৰত-পাকিস্তান খেলখন ক্ৰিকেট জগতৰ আটাইতকৈ ডাঙৰ আৰু লাভজনক মেচ বুলি গণ্য কৰা হয় । ফলস্বৰূপে এই মেচ বাতিলৰ ফলত আইচিচি, সম্প্ৰচাৰক আৰু সকলো সদস্য ব’ৰ্ডৰ যথেষ্ট লোকচান হোৱাৰ সম্ভাৱনা আছিল । এতিয়া নিৰ্ধাৰিত সময়ত খেলখন অনুষ্ঠিত হ’ব বুলি সিদ্ধান্ত লোৱাৰ লগে লগে প্ৰতিযোগিতাখনে যথেষ্ট সকাহ লাভ কৰিছে ।

উল্লেখ্য যে লাহোৰ বৈঠকত পাকিস্তানে কেইবাটাও চৰ্ত ৰাখিছিল, য’ত ভাৰতৰ সৈতে দ্বিপাক্ষিক শৃংখলা, ভাৰত, বাংলাদেশ আৰু পাকিস্তানৰ মাজত ত্ৰিপাক্ষিক শৃংখলা, হেণ্ডশ্বেক বিতৰ্কক সমাধান কৰা, ৰাজহ বৃদ্ধি আদি আছিল । অৱশ্যে পাকিস্তানৰ এই দাবীক গুৰুত্ব দিবলৈ অস্বীকাৰ কৰে আইচিচিয়ে ।

লগতে পঢ়ক : পাকিস্তানৰ জেদ নেওচি আইচিচিৰ কঠোৰ স্থিতি, দিলে চূড়ান্ত সকীয়নি…

আইচিচি টি-২০ বিশ্বকাপ ২০২৬ত ভাৰত-পাকিস্তানৰ খেলখনক লৈ চলি থকা বিতৰ্কৰ মাজতে আইচিচিয়ে বাংলাদেশ আৰু পাকিস্তানৰ মাজত যোগাযোগৰ চৰ্ত সন্দৰ্ভত নিজৰ স্থিতি স্পষ্ট কৰিছে ।

আন এক মোক্ষম আঘাতৰ সন্মুখীন হৈছে পাকিস্তান । আইচিচি টি-২০ বিশ্বকাপ ২০২৬ত ভাৰত-পাকিস্তানৰ খেলখনক লৈ চলি থকা বিতৰ্কৰ মাজতে আন্তঃৰাষ্ট্ৰীয় ক্ৰিকেট পৰিষদ চমুকৈ আইচিচিয়ে বাংলাদেশ আৰু পাকিস্তানৰ মাজত যোগাযোগৰ চৰ্ত সন্দৰ্ভত নিজৰ স্থিতি স্পষ্ট কৰিছে । এই ঘটনাৰ বাবে বাংলাদেশক কোনো ধৰণৰ শাস্তি দিয়া নহ’ব আৰু আইচিচিৰ ৰাজহৰ উচিত অংশ লাভ কৰি যাব বুলি আইচিচিয়ে উল্লেখ কৰিছে ।

জানিব পৰা মতে আই চি চিয়ে নিজাববীয়াকৈ এই সিদ্ধান্ত লৈছিল আৰু আন কোনো ব’ৰ্ডৰ দ্বাৰা প্ৰভাৱিত হোৱা নাছিল । চলিত বিশ্বকাপৰ পৰা বাংলাদেশ হয়তো বাহিৰ হ’ল, কিন্তু তথাপিও দলটো কোনো ধৰণৰ আৰ্থিক ক্ষতিৰ সন্মুখীন নহয় ।

দেশত চলি থকা হিংসাত্মক পৰিস্থিতি তথা ৰাজনৈতিক অস্থিৰতাৰ বাবে এই প্ৰতিযোগিতাখন বাংলাদেশৰ পৰা ডুবাইলৈ স্থানান্তৰিত হোৱাৰ বাবে যোৱা বছৰ মহিলা টি-২০ বিশ্বকাপ আয়োজন কৰাৰ পৰা বাংলাদেশ বঞ্চিত হোৱা বুলিও আইচিচিয়ে স্বীকাৰ কৰে ।

ইয়াৰ প্ৰতি লক্ষ্য ৰাখিয়েই এতিয়া আইচিচিয়ে বাংলাদেশক পৰৱৰ্তী চক্ৰত এখন ডাঙৰ প্ৰতিযোগিতা আয়োজন কৰাৰ অধিকাৰ প্ৰদান কৰাৰ কথা চিন্তা কৰিছে । প্ৰকাশিত খবৰ অনুসৰি বাংলাদেশক পূৰ্বৰ লোকচানৰ আংশিক ক্ষতিপূৰণৰ বাবে ১৯ বছৰ অনুৰ্ধ বিশ্বকাপৰ দৰে আইচিচিৰ ইভেণ্টৰ আয়োজকৰ দায়িত্ব প্ৰদান কৰা হ’ব পাৰে ।

পাকিস্তানৰ দাবী নাকচ কৰিলে আইচিচিয়ে-

বৈঠকৰ সময়ত বাংলাদেশ আৰু পাকিস্তানে আইচিচিয়ে ভাৰতক পাকিস্তানৰ সৈতে দ্বিপাক্ষিক ক্ৰিকেট খেলিবলৈ ক’বলৈ দাবী জনায় । কিন্তু আইচিচিয়ে এই দাবীক স্পষ্টভাৱে নাকচ কৰে ।

আইচিচিয়ে কয় যে দ্বিপাক্ষিক শৃংখলা ইয়াৰ অধীনত নপৰে । এই কাৰণেই ই এনেবোৰ বিষয়ত হস্তক্ষেপ নকৰে, আনকি বিশ্ব টেষ্ট চেম্পিয়নশ্বিপৰ দৰে আই চি চি টুৰ্ণামেণ্টৰ চক্ৰৰ সময়তো ।

ভাৰত, পাকিস্তান, বাংলাদেশৰ মাজত ত্ৰিকোণীয় শৃংখলা অনুষ্ঠিত কৰাৰ বাবেও একেধৰণৰ প্ৰস্তাৱ দিয়া হৈছিল যদিও একেটা ভিত্তিতে সেই শৃংখলাৰ দাবীও নাকচ কৰা হয় ।

ভাৰতৰ বাংলাদেশ ভ্ৰমণৰ দাবীও নাকচ-

বৈঠকত এইবাৰ ভাৰতৰ বাংলাদেশ ভ্ৰমণৰ বিষয়টোও উত্থাপন কৰা হয় । এই ক্ষেত্ৰত কোনো দেশক আন এখন দেশ ভ্ৰমণ কৰিবলৈ বাধ্য কৰাৰ কোনো কৰ্তৃত্ব নাই বুলি স্পষ্ট কৰি দিয়ে আইচিচিয়ে । এই সিদ্ধান্ত সম্পূৰ্ণৰূপে নিজ নিজ ক্ৰিকেট ব’ৰ্ড আৰু চৰকাৰৰ ওপৰত নিৰ্ভৰশীল বুলি আইচিচিয়ে স্পষ্ট কৰি দিয়ে ।

পাকিস্তানক চূড়ান্ত সকীয়নি আইচিচি-

লাহোৰত দীঘলীয়া বৈঠকৰ অন্তত ১৫ ফেব্ৰুৱাৰীত ভাৰতৰ বিৰুদ্ধে মেচৰ সন্দৰ্ভত পাকিস্তানে তাৎক্ষণিক সিদ্ধান্ত লোৱা নাছিল । পাকিস্তান ক্ৰিকেট ব’ৰ্ডৰ মুৰব্বী মহছিন নাকৱীয়ে কয় যে তেওঁ এই বিষয়ত প্ৰধানমন্ত্ৰী শ্বাহবাজ শ্বৰীফৰ সৈতে আলোচনা কৰিব বিচাৰিছে ।

ইয়াৰ পিছতে আইচিচিয়ে পাকিস্তানক এদিনৰ সময় দিয়ে । জানিব পৰা মতে ভাৰত-পাকিস্তানৰ খেলখনৰ চূড়ান্ত সিদ্ধান্ত যিকোনো সময়তে লোৱা হ’ব পাৰে । আজি নিশা বা বুধবাৰে পুৱা আইচিচিৰ পৰা এই ক্ষেত্ৰত আনুষ্ঠানিক ঘোষণা হোৱাৰ সম্ভাৱনা আছে ।

লগতে পঢ়ক : ৰোহিত-কোহলীক ডিমোশ্যন, বাহিৰ হ’ল ছামী-কিষণ; বিচিচিআইৰ কেন্দ্ৰীয় চুক্তিৰ তালিকা প্ৰকাশ

ভাৰতৰ প্রথমখন মেচৰ ঠিক পূর্বে অসুস্থতাৰ বাবে যশপ্রীত বুমৰাহ মূল একাদশৰ পৰা বাহিৰ হয় যাৰ ফলত মহম্মদ ছিৰাজৰ বাবে প্লেইং এলেভেনত প্রৱেশৰ বাট মুকলি হয় ৷

ভাৰতীয় দলৰ তাৰকা বেগী বলাৰ মহম্মদ ছিৰাজে প্ৰকাশ কৰে যে যেতিয়া তেওঁক টি-২০ বিশ্বকাপ ২০২৬ৰ বাবে দলত যোগদানৰ আহ্বান জনোৱা হৈছিল, তেতিয়া তেওঁ প্ৰথমে ভাবিছিল যে অধিনায়ক সূৰ্যকুমাৰ যাদৱে ধেমালি কৰিছে । দৰাচলতে হৰ্ষিত ৰানাৰ আঘাতপ্ৰাপ্ত হোৱাৰ পিছত তেওঁৰ স্থানত দলত অন্তৰ্ভুক্ত কৰা হৈছিল ছিৰাজক । প্ৰতিযোগিতা আৰম্ভ হোৱাৰ মাত্ৰ এদিন পূৰ্বে এই সিদ্ধান্ত লোৱা হৈছিল । বিচিচিআইয়ে অভিজ্ঞতাক অগ্ৰাধিকাৰ দি ছিৰাজক দলত অন্তৰ্ভূক্ত কৰাৰ সিদ্ধান্ত লয় যাতে অৰ্শদীপ সিং আৰু যশপ্ৰীত বুমৰাহৰ সৈতে বলিং আক্ৰমণ অধিক শক্তিশালী হয় ।

কিন্তু বিপদ ইয়াতেই শেষ নোৱা নাছিল । ভাৰতৰ প্রথমখন মেচৰ ঠিক পূর্বে অসুস্থতাৰ বাবে যশপ্রীত বুমৰাহ মূল একাদশৰ পৰা বাহিৰ হয় যাৰ ফলত মহম্মদ ছিৰাজৰ বাবে প্লেইং এলেভেনত প্রৱেশৰ বাট মুকলি হয় ৷ শুকুৰবাৰে সন্ধিয়া ছিৰাজে দলত যোগদান কৰি কোনো ধৰণৰ প্ৰস্তুতি নোহোৱাকৈ পোনে পোনে মেচখনত প্ৰৱেশ কৰে ।

২০২৪ চনৰ জুলাই মাহৰ পিছত ছিৰাজৰ এইখন আছিল প্ৰথম আন্তঃৰাষ্ট্ৰীয় টি-২০ মেচ । নতুন বলৰ সৈতে তেওঁ শক্তিশালী বলিং কৰে ।  প্ৰথম অভাৰতে তেওঁ বিধ্বংসী ৰূপ ধাৰণ কৰে । ছিৰাজে ৪ অভাৰত ২৯ ৰানৰ বিনিময়ত ৩ উইকেট দখল কৰে । তেওঁৰ শক্তিশালী বলিঙৰ বাবে চতুৰ্থ অভাৰত ১৩ ৰানত ৩ উইকেট হেৰুৱাই আমেৰিকাই আৰু ইয়াৰ পিছত দলটোৱে পুনৰ মূৰ দাঙি উঠিবলৈ সক্ষম নহ’ল ।

মেচৰ পিছতে এই কথা প্ৰকাশ কৰে ছিৰাজে-

মেচৰ পিছত মহম্মদ ছিৰাজে কয়, “মেচৰ দুদিন পূৰ্বে সূৰ্য ভাইৰ ফোন আহিল । তেওঁ ক’লে, ‘মীয়া, সাজু হোৱা, বেগ পেক কৰা আৰু আহা । মই ক’লোঁ, ‘সূৰ্য ভাই, এতিয়া ধেমালি নকৰিব । আপুনি বহুত ধেমালি কৰে কিন্তু এই বিষয়ত নকৰিব । তাৰ পিছত তেওঁ কয় মই ছিৰিয়াছ । তাৰ পিছত ওজা ভাইৰ ফোন আহিল, তেতিয়াহে মই  এই কথা বিশ্বাস কৰিলোঁ ।”

ছিৰাজৰ আৰম্ভণিৰ মাৰাত্মক বলিং আৰু অধিনায়ক সূৰ্যকুমাৰ যাদৱৰ চমৎকাৰ বেটিঙৰ বাবেই ভাৰতে আমেৰিকাক ২৯ ৰাণত পৰাস্ত কৰে যদিও ভাৰতৰ বাবে খেলখন সহজ নাছিল ।

মহম্মদ ছিৰাজে আৰু কয়, “বিশ্বকাপত খেলাটো প্ৰতিজন খেলুৱৈৰ সপোন । ঈশ্বৰে যি লিখিছে সেয়া হ’ব, কিন্তু কঠোৰ পৰিশ্ৰমো অতি প্ৰয়োজনীয় । সততাৰে কাম কৰিলে নিশ্চিতভাৱে ফলাফল পাব ।”

লগতে পঢ়ক : জয়েৰে অভিযান আৰম্ভ ভাৰতৰ : মেচৰ নায়ক এই তিনিগৰাকী খেলুৱৈ…