মহিলা ক্ৰিকেটে আজি লাভ কৰিব নতুন বিশ্ব চেম্পিয়ন

আজি মহিলা ক্ৰিকেটে লাভ কৰিব নতুন বিশ্ব চেম্পিয়ন । আই চি চি মহিলা বিশ্বকাপ ২০২৫ৰ আজি অনুষ্ঠিত হ’ব ৰোমাঞ্চকৰ ফাইনেল মেচ । এই হাই ভল্টেজ মেচত মুখামুখি হ’ব ভাৰত-দক্ষিণ আফ্ৰিকা । এতিয়া প্ৰথমবাৰৰ বাবে এদিনীয়া বিশ্বকাপৰ খিতাপ দখলৰ অপেক্ষাত আছে দুয়োটা দল ।

ইফালে সপোনক বাস্তবায়িত কৰাৰ সুযোগ লাভ কৰিছে হৰমনপ্ৰীত কৌৰ নেতৃত্বাধীন ভাৰতীয় দলে । এই মেচত জয়লাভ কৰি ইতিহাস ৰচনাৰ সুযোগ হৰমনপ্ৰীত বাহিনীৰ হাতত । দেশক বিশ্ব চেম্পিয়ন কৰা হৰমনপ্ৰীত কৌৰ বাহিনীৰ বহুদিনীয়া সপোন । দেওবাৰে ডি ৱাই পাটিল ষ্টেডিয়ামত মহিলা এদিনীয়া বিশ্বকাপৰ ফাইনেলত দক্ষিণ আফ্ৰিকাৰ মুখামুখি হ’ব ভাৰতীয় দলটো । ভাৰতীয় দলটোৰ লক্ষ্য হ’ব এই প্ৰতিযোগিতাত প্ৰথমবাৰৰ বাবে বিশ্ব চেম্পিয়ন হোৱা । বিয়লি ৩ বজাৰ পৰা আৰম্ভ হ’ব এই মেচ ।

তৃতীয়বাৰৰ বাবে এদিনীয়া বিশ্বকাপৰ ফাইনেলত প্ৰৱেশ কৰি প্ৰথমটো খিতাপ দখলৰ অপেক্ষাত আছে ভাৰতীয় দল । ২০০৫ চনত অষ্ট্ৰেলিয়াই ভাৰতৰ চেম্পিয়ন হোৱাৰ সপোন চূৰমাৰ কৰিছিল আৰু ২০১৭ চনত ইংলেণ্ডে ভাঙিছিল ভাৰতীয় দলৰ এই সপোন । অষ্ট্ৰেলিয়া আৰু ইংলেণ্ড অবিহনে মহিলাৰ এদিনীয়া বিশ্বকাপৰ ইতিহাসত এইখন হ’ব প্ৰথমখন ফাইনেল । মহিলা ক্ৰিকেটত এইবাৰ নতুন বিশ্ব চেম্পিয়ন হোৱাটোও নিশ্চিত, কিয়নো দক্ষিণ আফ্ৰিকাও প্ৰথমবাৰৰ বাবে ফাইনেলত প্ৰৱেশ কৰিছে ।

ছেমি ফাইনেলত ৭ বাৰৰ চেম্পিয়ন আৰু ১৫খন মেচৰ অপৰাজিত বিশ্বকাপ দল অষ্ট্ৰেলিয়াক পৰাস্ত কৰাৰ পাছত ভাৰতীয় দলটোৱে উচ্চ মনোবলেৰে ফাইনেলত প্ৰৱেশ কৰিব ।

লগতে পঢ়ক : ইতিহাস সৃষ্টি: অষ্ট্ৰেলিয়াক পৰাস্ত কৰি ফাইনেলত প্ৰৱেশ ভাৰতীয় মহিলা ক্ৰিকেট দলৰ..

মহিলা ক্ৰিকেট বিশ্বকাপৰ বহু প্ৰতীক্ষিত ফাইনেল

দেওবাৰে নৱী মুম্বাইৰ ডি ৱাই পাটিল স্প’ৰ্টছ একাডেমীত ভাৰত আৰু দক্ষিণ আফ্ৰিকাৰ মাজত অনুষ্ঠিত হ’ব আই চি চি মহিলা ক্ৰিকেট বিশ্বকাপ ২০২৫ৰ ফাইনেল মেচ । এই মেচৰ জৰিয়তে ইতিহাস ৰচিবলৈ সাজু হৈছে ভাৰতীয় মহিলা ক্ৰিকেট দল । ভাৰতীয় মহিলা দলটোৱে এই মেচত জয়লাভ কৰি প্ৰথমবাৰৰ বাবে বিশ্বকাপৰ ট্ৰফী দখল কৰাৰ লক্ষ্য ৰাখিছে । ইফালে দক্ষিণ আফ্ৰিকাইও তেওঁলোকৰ প্ৰথমটো খিতাপ দখলৰ বাবে চকু মৰণপণ যুঁজত অৱতীৰ্ণ হ’ব । যিটো দলে এই মেচত জয়ী হ’ব সেই দলেই ইতিহাসৰ সৃষ্টি কৰিব ।

শনিবাৰৰ খিতাপ মেচৰ পূৰ্বে সংবাদমেলত অংশগ্ৰহণ কৰে ভাৰতীয় অধিনায়ক হৰমনপ্ৰীত কৌৰে । হৰমনপ্ৰীতে কয় যে তেওঁৰ দলটোৱে বহুবাৰ পৰাজয়ৰ যন্ত্ৰণা ভোগ কৰিছে, কিন্তু এতিয়া সেই আখ্যান সলনি কৰাৰ সময় আহি পৰিছে । হৰমনপ্ৰীতে কয় যে দলটোৱে এতিয়া বিজয়ৰ আনন্দ অনুভৱ কৰিবলৈ সম্পূৰ্ণৰূপে সাজু হৈছে । তেওঁ লগতে কয় যে ভাৰতীয় দলটোৱে বিগত কেইমাহমানৰ পৰা আত্মবিশ্বাস, ঐক্য আৰু কঠোৰ পৰিশ্ৰমৰ জৰিয়তে এই সফলতা লাভ কৰিছে ।

হৰমনপ্ৰীত কৌৰে কয়, “আমি জানো পৰাজয় অনুভৱ কেনেকুৱা, কিন্তু এতিয়া আমি জানিব বিচাৰিছো যে জয়ৰ অনুভৱ কেনেকুৱা হয় । আমি বহুত কষ্ট কৰিছো আৰু এতিয়া আমি দলৰ বাবে সকলো দিব লাগিব । আশাকৰোঁ, ২ নৱেম্বৰ আমাৰ বাবে এক অতি বিশেষ দিন হ’ব । আমি যেতিয়াই খেলপথাৰত মুক্তভাৱে খেলো আৰু খেল উপভোগ কৰো, তেতিয়াই ফলাফল সদায় আমাৰ মতে যায় । যোৱা দুখন মেচত দলটোৱে শক্তিশালী প্ৰদৰ্শন আগবঢ়াইছে আৰু এইটো দলটোৰ বাবে সমগ্ৰ দেশৰ বাবে গৌৰৱৰ বিষয় ।”

তৃতীয় বাৰৰ বাবে ফাইনেল খেলিব টিম ইণ্ডিয়াই-

তৃতীয়বাৰৰ বাবে এদিনীয়া বিশ্বকাপৰ ফাইনেলত অংশগ্ৰহণ কৰিছে ভাৰতীয় মহিলা দলটোৱে । ২০০৫ চনৰ ফাইনেলত অষ্ট্ৰেলিয়াৰ হাতত ৯৮ ৰানত পৰাস্ত হৈছিল ভাৰত । ২০১৭ চনত ৰোমাঞ্চকৰ ফাইনেলত ইংলেণ্ডে ভাৰতক ৯ ৰানত পৰাস্ত কৰিছিল । ২০২২ চনৰ কমনৱেলথ গেমছৰ ফাইনেলতো অষ্ট্ৰেলিয়াই ভাৰতক পৰাস্ত কৰিছিল । এই পৰাজয়ৰ যন্ত্ৰণা এতিয়াও দলৰ খেলুৱৈৰ হৃদয়ত সতেজ হৈ আছে যদিও এইবাৰৰ পৰিস্থিতি বেলেগ । ঘৰুৱা মাটিত ইতিহাস ৰচনা কৰিবলৈ সাজু হৈছে ভাৰত ।

লগতে পঢ়ক : দুদিনৰ ভিতৰত ভাৰতলৈ আহিব এছিয়া কাপৰ ট্ৰফী;BCCI এ মহচিন নাকভিৰ বিৰুদ্ধে গ্ৰহণ কৰিব ব্যৱস্থা!