মহিলা ক্ৰিকেট বিশ্বকাপ ২০২৫
১৩ ছেপ্টেম্বৰ, মঙলবাৰৰ পৰা আৰম্ভ হব আই চি চি মহিলা ক্ৰিকেট বিশ্বকাপৰ ত্ৰয়োদশ সংস্কৰণ । গুৱাহাটীৰ বৰ্ষাপাৰাত অনুষ্ঠিত হ’বলগা উদ্বোধনী মেচত ভাৰতৰ মুখামুখি হ’ব শ্ৰীলংকা । ২ নৱেম্বৰত মহিলা ক্ৰিকেট বিশ্বকাপৰ ফাইনেল অনুষ্ঠিত হ’ব । প্ৰথমবাৰৰ বাবে গুৱাহাটীৰ বৰ্ষাপাৰা ষ্টেডিয়ামত অনুষ্ঠিত হ’বলৈ গৈ আছে বিশ্বকাপৰ উদ্বোধনী অনুষ্ঠান ।
ভাৰতে এইবাৰ প্ৰথমবাৰৰ বাবে এদিনীয়া বিশ্বকাপৰ খিতাপ দখল কৰাৰ লক্ষ্য ৰাখিব । ২০১৭ চনত ভাৰতীয় দলটোৱে ফাইনেলত প্ৰৱেশ কৰিছিল যদিও ইংলেণ্ডৰ হাতত পৰাস্ত হৈছিল । মহিলা ক্ৰিকেট বিশ্বকাপৰ ডিফেণ্ডিং চেম্পিয়ন অষ্ট্ৰেলিয়া, ২০২২ চনৰ ফাইনেলত ইংলেণ্ডক পৰাস্ত কৰি ট্ৰফী লাভ কৰিছিল দলটোৱে । নিউজীলেণ্ড হৈছে মহিলা বিশ্বকাপ জয় কৰা আন এটা দল । ২৫ বছৰ পূৰ্বে কিৱি দলে এই খিতাপ দখল কৰিছিল ।
৮টা দলৰ মাজত অনুষ্ঠিত হ’ব এই প্ৰতিযোগিতা-
এইবাৰ মহিলা বিশ্বকাপত ৮টা দলে অংশগ্ৰহণ কৰিব : ভাৰত, অষ্ট্ৰেলিয়া, বাংলাদেশ, ইংলেণ্ড, নিউজীলেণ্ড, পাকিস্তান, দক্ষিণ আফ্ৰিকা, আৰু শ্ৰীলংকা ।
এইবাৰ ভাৰত আৰু শ্ৰীলংকাত অনুষ্ঠিত হ’ব এই প্ৰতিযোগিতা । অৱশ্যে ভাৰত আৰু পাকিস্তানৰ অস্বস্তিকৰ ৰাজনৈতিক পৰিস্থিতিৰ বাবে পাকিস্তানে শ্ৰীলংকাৰ কলম্বোত সকলো খেল খেলিব ।
ছেমি ফাইনেলৰ ফৰ্মেট :
শীৰ্ষ চাৰিটা দলে ছেমি ফাইনেলত প্ৰৱেশ কৰিব । ১ নং দলটোৱে ৪ নং আৰু ২ নং দলে ৩ নং দলৰ বিৰুদ্ধে খেলিব ।
যদি পাকিস্তানে ফাইনেলত প্ৰৱেশ কৰে তেন্তে কলম্বোত অনুষ্ঠিত হ’ব ফাইনেল । অন্যথা নৱী মুম্বাইত অনুষ্ঠিত হ’ব এই মেচ । ইয়াৰ পূৰ্বে ভাৰতে তিনিবাৰকৈ মহিলা এদিনীয়া বিশ্বকাপ আয়োজন কৰিছে – ১৯৭৮, ১৯৯৭, আৰু ২০১৩ চনত । প্ৰথমবাৰৰ বাবে শ্ৰীলংকাই আয়োজন কৰিছিল এই প্ৰতিযোগিতা ।
বিশ্বকাপ বিজয়ীৰ পুৰস্কাৰৰ ধন-
এই বছৰ মুঠ পুৰস্কাৰৰ ধন ১৩.৮৮ মিলিয়ন ডলাৰ (প্ৰায় ১২৩.১ কোটি) । এয়া ২০২২ চনৰ বিশ্বকাপতকৈ প্ৰায় চাৰিগুণ বেছি আৰু আনকি ২০২৩ চনৰ পুৰুষৰ বিশ্বকাপতকৈয়ো অধিক ।
ক’ত চাব লাইভ সম্প্ৰচাৰ ?
ভাৰতত জিঅ’ষ্টাৰৰ সৈতে অংশীদাৰিত্বৰে ষ্টাৰ স্প’ৰ্টছ নেটৱৰ্কত টিভিত লাইভ সম্প্ৰচাৰ কৰা হ’ব এই প্ৰতিযোগিতা । জিঅ’হটষ্টাৰৰ জৰিয়তে ডিজিটেল প্লেটফৰ্মত মেচ চাব পাৰিব । বাংলাদেশ, শ্ৰীলংকা, নেপাল,মালদ্বীপ আৰু ভূটানত একে প্লেটফৰ্মতে উপলব্ধ হ’ব এই প্ৰতিযোগিতা । ভাৰতৰ সকলো খেলৰ লগতে ছেমি ফাইনেল আৰু ফাইনেল টিভিত হিন্দী, তামিল, তেলেগু, আৰু কানাড়া ভাষাত লাইভ সম্প্ৰচাৰ কৰা হ’ব ।
লগতে পঢ়ক : নৱমবাৰলৈ এছিয়া কাপত ভাৰতৰ জয়; পাকিস্তানী মন্ত্ৰীৰ পৰা টীম ইণ্ডিয়াই নল’লে ট্ৰফী
