মহিলা ক্ৰিকেট বিশ্বকাপ

৩০ ছেপ্টেম্বৰৰ পৰা আৰম্ভ হ’ব মহিলা ক্ৰিকেট বিশ্বকাপ । গুৱাহাটীৰ বৰ্ষাপাৰা ক্ৰিকেট ষ্টেডিয়ামত এই প্ৰতিযোগিতাৰ প্ৰথমখন মেচৰ লগতে অনুষ্ঠিত হ’ব উদ্বোধনী অনুষ্ঠান । এই উদ্বোধনী অনুষ্ঠান উৎসৰ্গিত হ’ব অসমীয়া হিয়াৰ আমঠু শিল্পী জুবিন গাৰ্গৰ নামত ।

জুবিন গাৰ্গলৈ শ্ৰদ্ধাঞ্জলি-

বি চি চি আইৰ সচিব দেবজিৎ শইকীয়াই জনাই যে মহিলা বিশ্বকাপৰ প্ৰথমখন মেচৰ পূৰ্বে উদ্বোধনী অনুষ্ঠান জুবিন গাৰ্গৰ নামত উৎসৰ্গা কৰা হ’ব । ৪০ মিনিট সময় চলিব এই উদ্বোধনী অনুষ্ঠান ।

শইকীয়াই উল্লেখ কৰে যে অসম ক্ৰিকেট সন্থা আৰু বি চি চি আইয়ে একেলগে শিল্পীগৰাকীক শ্ৰদ্ধাঞ্জলি জনাইছে । বি চি চি আইৰ সচিবগৰাকীয়ে উল্লেখ কৰে যে জুবিনৰ স্মৃতিত ৪০ মিনিটৰ কাৰ্যসূচী অনুষ্ঠিত হ’ব আৰু সম্ভৱতঃ এয়া ক্ৰিকেট জগতৰ পৰা জুবিন গাৰ্গক জনোৱা সৰ্ববৃহৎ শ্ৰদ্ধাঞ্জলি হ’ব । তেওঁ লগতে কয় যে এই প্ৰতিযোগিতাখনৰ প্ৰথমখন খেলৰ প্ৰথম ইনিংছৰ পিছত বিৰতিৰ সময়ত শ্ৰেয়া ঘোষালেও অনুষ্ঠান পৰিৱেশন কৰিব ।

প্ৰথমে আড়ম্বৰপূৰ্ণভাৱে এই অনুষ্ঠান হোৱাৰ কথা আছিল যদিও জুবিন গাৰ্গৰ মৃত্যুৰ বাবে এতিয়া অনুষ্টুপীয়াকৈ অনুষ্ঠিত হ’ব উদ্বোধনী অনুষ্ঠান ।

ইফালে এই প্ৰতিযোগিতাৰ উদ্বোধনী অনুষ্ঠানৰ বাবে জুবিন অনুৰাগীক ৫ হাজাৰ টিকট বিনামূলীয়াকৈ অসম ক্ৰিকেট সন্থাই বিতৰণ কৰিব । এই কথা জানিবলৈ দিয়ে অসম ক্ৰিকেট সন্থাৰ সভাপতি তথা বিধায়ক তৰংগ গগৈয়ে । নেহৰু ষ্টেডিয়ামৰ পৰা জুবিন অনুৰাগীসকলে টিকট সংগ্ৰহ কৰিব পাৰিব বুলি জনাই তে্ওঁ ।

উল্লেখ্য যে, ভাৰতীয় মহিলা ক্ৰিকেট দলটোৱে ৩০ ছেপ্টেম্বৰৰ পৰা গুৱাহাটীত আৰম্ভ হ’বলগীয়া বিশ্বকাপ প্ৰতিযোগিতাত খিতাপ জয়ৰ দীৰ্ঘদিনীয়া অপেক্ষাৰ অন্ত পেলোৱাৰ উদ্দেশ্যৰে খেলপথাৰত নামিব ।

এইবাৰ ভাৰত আৰু শ্ৰীলংকাত অনুষ্ঠিত হৈছে মহিলাৰ এদিনীয়া ক্ৰিকেট বিশ্বকাপ । ভাৰতীয় দলটোৱে শ্ৰীলংকাৰ বিৰুদ্ধে প্ৰথমখন খেল খেলিব । ইয়াৰ পূৰ্বে এই প্ৰতিযোগিতাৰ উদ্বোধনী অনুষ্ঠান অনুষ্ঠিত হ’ব ।

ভাৰতে এতিয়ালৈকে মহিলা ক্ৰিকেট বিশ্বকাপ জয় কৰিব পৰা নাই যদিও এইবাৰ এই ট্ৰফী জয়ৰ বাবে ভাৰত শক্তিশালী প্ৰতিদ্বন্দ্বী হিচাপে বিবেচিত হৈছে । পূৰ্বে গুৱাহাটীত আই চি চি (পুৰুষ) বিশ্বকাপৰ অনুশীলন মেচ অনুষ্ঠিত হৈছিল । প্ৰথমবাৰৰ বাবে গুৱাহাটীৰ পৰা আৰম্ভ হ’ব আই চি চি মহিলা ক্ৰিকেট বিশ্বকাপ । উদ্বোধনী মেচ ভাৰত আৰু শ্ৰীলংকাৰ মাজত অনুষ্ঠিত হ’ব ।

লগতে পঢ়ক : এছিয়া কাপত কিমানবাৰ খিতাপ জয় কৰিছে মেন ইন ব্লুৱে ? জানক ভাৰতৰ পৰিসংখ্যা

ভাৰত আৰু পাকিস্তানৰ মাজত অনুষ্ঠিত হ’ব  হাই ভল্টেজ মেচ

৩০ ছেপ্টেম্বৰৰ পৰা আৰম্ভ হ’ব আই চি চি মহিলা ক্ৰিকেট বিশ্বকাপ ২০২৫ । বেংগালুৰুৰ এম চিন্নাস্বামী ষ্টেডিয়ামত শ্ৰীলংকাৰ বিৰুদ্ধে আয়োজক ভাৰতৰ প্ৰথমখন মেচ অনুষ্ঠিত হ’ব । আঠটা দলৰ মাজত অনুষ্ঠিত হ’বলগীয়া এই প্ৰতিযোগিতাখন ৰাউণ্ড ৰবিন ফৰ্মেটত অনুষ্ঠিত হ’ব, য’ত শীৰ্ষ চাৰিটা দল ছেমি ফাইনেলত প্ৰৱেশ কৰিব । ২ নৱেম্বৰত অনুষ্ঠিত হ’ব এই প্ৰতিযোগিতাৰ ফাইনেল । ১ অক্টোবৰত ইন্দোৰৰ হোলকাৰ ক্ৰিকেট ষ্টেডিয়ামত নিউজীলেণ্ডৰ বিৰুদ্ধে অনুষ্ঠিত হ’বলগীয়া মেচখনত মহিলা বিশ্বকাপৰ অভিযান আৰম্ভ কৰিব অষ্ট্ৰেলিয়াই ।

উল্লেখ্য যে পাকিস্তানে নিজৰ সকলো মেচ শ্ৰীলংকাৰ কলম্বোত খেলিব । এই মেচ বি চি চি আই আৰু পি চি বিয়ে সহমতত উপনীত হোৱা হাইব্ৰিড হ’ষ্টিং মডেলৰ অধীনত হ’ব । চলিত বৰ্ষৰ আৰম্ভণিতে ভাৰত আৰু পাকিস্তানৰ মাজত কূটনৈতিক উত্তেজনাৰ প্ৰতি লক্ষ্য ৰাখি এই পদক্ষেপ গ্ৰহণ কৰা হৈছে । ফলত ভাৰতকে ধৰি পাকিস্তানৰ সৈতে খেলা দলসমূহে কলম্বোলৈ গৈ প্ৰতিযোগিতাত অংশগ্ৰহণ কৰিব ।

নিৰপেক্ষ স্থানত অনুষ্ঠিত হ’ব এই মেচ-

৫ অক্টোবৰত অনুষ্ঠিত হ’ব ভাৰত আৰু পাকিস্তানৰ হাই ভল্টেজ মেচ । এই খেলখন কলম্বোত অনুষ্ঠিত হ’ব । বিয়লি ৩ বজাৰ পৰা দুয়োখন দেশৰ মাজত অনুষ্ঠিত হ’ব এই মেচখন ।

মহিলা বিশ্বকাপত ভাৰতৰ খেল-

ভাৰতে ৩০ ছেপ্টেম্বৰৰ পৰা বেংগালুৰুৰ এম চিন্নাস্বামী ষ্টেডিয়ামত শ্ৰীলংকাৰ বিৰুদ্ধে এই প্ৰতিযোগিতাৰ অভিযান আৰম্ভ কৰিব । বাংলাদেশৰ বিৰুদ্ধে দলটোৰ গুৰুত্বপূৰ্ণ গ্ৰুপ মেচখন ২৬ অক্টোবৰত বেংগালুৰুত অনুষ্ঠিত হ’ব, তাৰ পিছত ৫ অক্টোবৰত কলম্বোত ভাৰত আৰু পাকিস্তানৰ মাজত হাই ভল্টেজ মেচ অনুষ্ঠিত হ’ব । তাৰ পিছত ৯ অক্টোবৰত বিশাখাপট্টনমত ভাৰতে দক্ষিণ আফ্ৰিকাৰ বিৰুদ্ধে খেলিব, তাৰ পিছত ১২ অক্টোবৰত একেখন খেলপথাৰত অষ্ট্ৰেলিয়াৰ বিৰুদ্ধে ভাৰতৰ এখন গুৰুত্বপূৰ্ণ মেচ অনুষ্ঠিত হ’ব ।

১৯ অক্টোবৰত ভাৰতীয় দলটোৱে ইন্দোৰত ইংলেণ্ডৰ বিৰুদ্ধে পৰৱৰ্তী মেচ খেলিব । ইয়াৰ পিছত ভাৰতীয় দলটোৱে লীগ পৰ্যায়ৰ অন্তিমখন খেল ২৩ অক্টোবৰত গুৱাহাটীত নিউজীলেণ্ডৰ বিৰুদ্ধে আৰু ২৬ অক্টোবৰত বেংগালুৰুৰ এম চিন্নাস্বামী ষ্টেডিয়ামত বাংলাদেশৰ বিৰুদ্ধে খেলিব ।

লগতে পঢ়ক : ১৫ বছৰৰ পাছত ভাৰতৰ এই ষ্টেডিয়ামত অনুষ্ঠিত হ’ব আন্তঃৰাষ্ট্ৰীয় ক্ৰিকেট