মহিলা ক্ৰিকেট বিশ্বকাপৰ পইণ্ট টেবুলত ভাৰতৰ আধিপত্য
দেওবাৰে মহিলা ক্ৰিকেট বিশ্বকাপ ২০২৫ৰ এখন মেচত ভাৰতে পাকিস্তানক ৮৮ ৰাণত পৰাস্ত কৰে । এই জয়ে চলিত এই প্ৰতিযোগিতাৰ পইণ্ট তালিকাত টীম ইণ্ডিয়াক অগ্ৰগতি প্ৰদান কৰিছে । এফালে এতিয়ালৈকে অনুষ্ঠিত হোৱা দুয়োখন মেচতে জয়লাভ কৰি পইন্ট টেবুলৰ শীৰ্ষত আছে ভাৰতীয় দল । আনফালে এতিয়ালৈকে অনুষ্ঠিত হোৱা দুয়োখন মেচতে পৰাস্ত হৈ শলঠেকত পৰিছে পাকিস্তান । এই বিশ্বকাপত সকলো দলেই অন্ততঃ এখন মেচ খেলিছে, গতিকে পইণ্ট টেবুলে প্ৰাৰম্ভিক ৰূপ ল’বলৈ আৰম্ভ কৰিছে ।
তালিকাৰ প্ৰথম স্থানত ভাৰত-
প্ৰথমখন খেলত ভাৰতীয় দলটোৱে শ্ৰীলংকাক ৫৯ ৰাণত পৰাস্ত কৰাৰ পাছত দ্বিতীয়খন মেচত পাকিস্তানক ৮৮ ৰাণত পৰাস্ত কৰে । দুটাকৈ ডাঙৰ জয়ৰ অন্তত এতিয়া মহিলা ক্ৰিকেট বিশ্বকাপ ২০২৫ৰ পইন্ট তালিকাৰ শীৰ্ষত আছে ভাৰত । ডিফেণ্ডিং চেম্পিয়ন অষ্ট্ৰেলিয়াই দুখন মেচ খেলিছে, এখনত জয়ী আৰু আনখন ড্ৰ’ হৈছে । তালিকাত অষ্ট্ৰেলিয়া দ্বিতীয় স্থানত থকাৰ বিপৰীতে ২০১৭ চনৰ বিশ্বকাপ বিজয়ী ইংলেণ্ড বৰ্তমান তৃতীয় স্থানত আছে । প্ৰথমখন মেচত পাকিস্তানক ৭ উইকেটত পৰাস্ত কৰা বাংলাদেশ তালিকাৰ চতুৰ্থ স্থানত আছে ।
শলঠেকত পাকিস্তান-
পইণ্ট তালিকাত সংকটত ভুগিছে পাকিস্তানী দলে । দুয়োখন মেচতে প্ৰথমে বাংলাদেশৰ হাতত ৭ উইকেটত, তাৰ পাছত ভাৰতৰ হাতত ৮৮ ৰানত পৰাস্ত হৈছে দলটো । দুয়োখন মেচতে পৰাস্ত হোৱা পাকিস্তান বৰ্তমান টেবুলৰ ষষ্ঠ স্থানত আছে । ক্ৰমে সপ্তম আৰু অষ্টম স্থানত আছে নিউজীলেণ্ড আৰু দক্ষিণ আফ্ৰিকা । মন কৰিবলগীয়া যে এই প্ৰতিযোগিতাত মুঠ আঠটা দলে অংশগ্ৰহণ কৰিছে আৰু ষ্টেণ্ডিঙৰ শীৰ্ষ চাৰিটা দলে ছেমি ফাইনেলত প্ৰৱেশ কৰিব ।
উল্লেখ্য যে, ভাৰতীয় দলৰ পৰৱৰ্তী মেচ ৯ অক্টোবৰত দক্ষিণ আফ্ৰিকাৰ বিৰুদ্ধে হ’ব । ইয়াৰ পিছত ১২ অক্টোবৰত ডিফেণ্ডিং চেম্পিয়ন অষ্ট্ৰেলিয়াৰ মুখামুখি হ’ব টিম ইণ্ডিয়া । ২০২২ চনৰো মহিলা ক্ৰিকেট বিশ্বকাপ ৰাউণ্ড ৰবিন ফৰ্মেটত অনুষ্ঠিত হৈছিল, য’ত পাঁচখন বা তাতকৈ অধিক মেচত জয়ী হোৱা দলসমূহে সহজেই নকআউট পৰ্যায়লৈ যোগ্যতা অৰ্জন কৰিছিল । পৰৱৰ্তী পাঁচখন মেচৰ ভিতৰত যদি ভাৰতীয় দলটোৱে তিনিখন খেলত জয়লাভ কৰে তেন্তে ছেমিফাইনেলত স্থান প্ৰায় নিশ্চিত হ’ব ।
লগতে পঢ়ক : বিশ্ব পেৰা এথলেটিকছ চেম্পিয়নশ্বিপত ভাৰতৰ অভিলেখ ভংগকাৰী প্ৰদৰ্শন…
