বৰ্তমান ভাৰত ভ্ৰমণত আছে ফুটবল সম্ৰাট লিয়নেল মেছি । আজি কলকাতাৰ ছল্ট লেক ষ্টেডিয়ামত খেলুৱৈগৰাকী উপস্থিত আছিল যদিও এই অনুষ্ঠানত এক অনাহূক পৰিস্থিতিৰ সৃষ্টি হয় ।

কলকাতাৰ ছল্ট লেক ষ্টেডিয়ামত আৰ্জেণ্টিনাৰ ফুটবল কিংবদন্তি, ফুটবল সম্ৰাট লিয়নেল মেছিৰ অনুষ্ঠানত এক উত্তপ্ত পৰিস্থিতিৰ সৃষ্টি হয় । ক্ষুব্ধ অনুৰাগীয়ে ভাঙি লণ্ডভণ্ড কৰে ষ্টেডিয়াম । এই ঘটনাৰ কেইবাটাও ভিডিঅ’ ছচিয়েল মিডিয়াত ভাইৰেল হৈ পৰিছে । অনুৰাগীৰ ক্ষোভ ইমানেই তীব্ৰ আছিল যে সমগ্ৰ ষ্টেডিয়ামখন ধ্বংস কৰি পেলায় । ইফালে কলকাতা আৰক্ষীয়ে প্ৰাৰম্ভিক ব্যৱস্থা গ্ৰহণ কৰি অনুষ্ঠানৰ মূল আয়োজকক গ্ৰেপ্তাৰ কৰিছে ।

অনুষ্ঠানৰ মূল আয়োজকক গ্ৰেপ্তাৰ-

ফুটবল সম্ৰাট মেছিৰ অনুষ্ঠানত হোৱা বিশৃংখলতা সন্দৰ্ভত আইন আৰু শৃংখলাৰ অতিৰিক্ত সঞ্চালক প্ৰধান জাভেদ ছামিমে কয় যে, “এতিয়া পৰিস্থিতি স্বাভাৱিক । তদন্তৰ দ্বিতীয় পৰ্যায় চলি আছে । এজাহাৰ দাখিল কৰা হৈছে আৰু মূল আয়োজকক গ্ৰেপ্তাৰ কৰা হৈছে । আয়োজকসকলে ধন ঘূৰাই দিয়াৰ প্ৰতিশ্ৰুতি দিছে (অনুৰাগীসকলক টিকটৰ মাচুল) ।”

এই ঘটনা ছল্ট লেক ষ্টেডিয়ামতে আবদ্ধ হৈ থাকেঃ কলকাতা আৰক্ষী

জাভেদ ছামিমে আৰু কয়, “অনতিপলমে শান্তি ঘূৰাই আনিব লাগিব । ইয়াৰ যত্ন লোৱা হৈছে । যাতায়ত স্বাভাৱিক হৈ আছে । সকলোৱে নিজৰ ঘৰলৈ উভতি গৈছে । এই ঘটনাটো ছল্ট লেক ষ্টেডিয়ামতে আবদ্ধ হৈ আছে । এইটো এটা ডাঙৰ ঘটনা । আমি এই বিষয়টো সক্ৰিয়ভাৱে তদন্ত কৰি আছো আৰু আজি ছল্ট লেক ষ্টেডিয়ামত যিটো ঘটিল তাৰ বাবে দায়বদ্ধসকলক শাস্তি দিয়াটো নিশ্চিত কৰিম আৰু সংশ্লিষ্টৰ বিৰুদ্ধে সকলো উপযুক্ত ব্যৱস্থা গ্ৰহণ কৰা হ’ব ।”

ঘটনাৰ তদন্তৰ বাবে গঠন কৰা হৈছে কমিটী-

ইয়াৰ পূৰ্বে পশ্চিম বংগৰ ডিজিপি ৰাজীৱ কুমাৰে উল্লেখ কৰিছিল যে অনুৰাগীসকলৰ মাজত কিছু ক্ষোভ বা উদ্বেগ আছে কাৰণ তেওঁলোকে মেছি গুছি যোৱা বুলি অভিযোগ কৰিছিল । পৰিকল্পনা আছিল যে তেওঁ আহি হাত জোকাৰি দুই এজনক লগ পাব, তাৰ পিছত গুচি যাব । এতিয়া চৰকাৰে এখন কমিটী গঠন কৰি আয়োজকৰ ফালৰ পৰা কিবা অন্যায় কৰা হৈছে নে নাই সেইকে ধৰি সকলো দিশৰ তদন্ত কৰিব । উদ্যোক্তাসকলে সংশ্লিষ্ট পক্ষক লিখিত আশ্বাস দিছে যে তেওঁলোকে বিক্ৰী হোৱা টিকটৰ ধন ঘূৰাই দিব । পৰিস্থিতি এতিয়া নিয়ন্ত্ৰণত আছে ।

কি হৈছিল ?

উল্লেখ্য যে, ফুটবল সম্ৰাট লিয়নেল মেছিয়ে “GOAT India Tour 2025″ৰ প্ৰথম কাৰ্যসূচীৰ বাবে কলকাতাত উপস্থিত হয় । শনিবাৰে তেওঁ ছল্ট লেক ষ্টেডিয়াম ভ্ৰমণ কৰাৰ কথা আছিল । অৱশ্যে তাত তেওঁক দেখা নাপায় অনুৰাগীসকল হতাশ হৈ পৰে । ইয়াৰ পিছতে সমগ্ৰ ষ্টেডিয়ামতে বিশৃংখল পৰিস্থিতিৰ সৃষ্টি হয় । অনুৰাগীয়ে মেছিক চাবলৈ নাপায় তাণ্ডৱ সৃষ্টি কৰে । মেছিয়ে মাত্ৰ ১০ মিনিট সময়হে তাত থাকে । মুঠতে চিটি অৱ জয়ৰ ফুটবল অনুৰাগীৰ বাবে যিটো দিন স্মৰণীয় হ’ব লাগিছিল, সেয়া দুঃস্বপ্নলৈ পৰিণত হ’ল ।

ফুটবল সম্ৰাটগৰাকী টিউনেলৰ পৰা ওলাই অহাৰ কিছু মুহূৰ্তৰ পিছতে পৰিস্থিতি নিয়ন্ত্ৰণৰ বাহিৰলৈ যায় । এই বিশেষ অনুষ্ঠানৰ বাবে কলকাতালৈ অহা বলীউডৰ ছুপাৰষ্টাৰ শ্বাহৰুখ খানৰ লগতে ভাৰতৰ প্ৰাক্তন অধিনায়ক সৌৰভ গাংগুলী আৰু মুখ্যমন্ত্ৰী মমতা বেনাৰ্জীও বিশৃংখলতাৰ বাবে উপস্থিত থাকিব নোৱাৰিলে, কিয়নো অনুষ্ঠানটো সামৰিব লগা হয় । পৰিস্থিতি ইমানেই ভয়াৱহ আছিল যে “GOAT Tour”ৰ আয়োজক তথা প্ৰমোটাৰ শতদ্ৰু দত্তই নিৰাপত্তাৰক্ষীৰ সৈতে মেছিক লৈ যাব লগা হৈছিল ।

লগতে পঢ়ক : ডুবাইত বৈভৱ সূৰ্য্যবংশীৰ বেটিং ধুমুহা; নতুন ইতিহাস সৃষ্টি