দুদিনীয়া ভ্ৰমণসূচীৰে শনিবাৰে বিয়লি গুৱাহাটীত উপস্থিত হয় গৃহমন্ত্ৰী অমিত শ্বাহ
নিৰ্বাচনী ৰণশিঙা বজাবলৈ দুদিনীয়া ভ্ৰমণসূচীৰে শনিবাৰে বিয়লি গুৱাহাটীত উপস্থিত হয় গৃহমন্ত্ৰী অমিত শ্বাহ । গৃহমন্ত্ৰী শ্বাহ বিমানবন্দৰত উপস্থিত হোৱাৰ পিছতেই মুখ্যমন্ত্ৰী ড০ হিমন্ত বিশ্ব শৰ্মাই তেখেতক আদৰণি জনায় । প্ৰধানমন্ত্ৰী নৰেন্দ্ৰ মোদীৰ দুদিনীয়া অসম ভ্ৰমণৰ সামৰণিৰ পিছতেই অসমত উপস্থিত হয় গৃহমন্ত্ৰীগৰাকী ।
উল্লেখ্য যে, দেওবাৰে বিজেপিৰ যুৱ সন্মিলত অংশগ্ৰহণ কৰিব অমিত শ্বাহে । আগন্তুক বিধানসভা নিৰ্বাচনৰ প্ৰেক্ষাপটত অসমৰ যুৱ প্ৰজন্মক একত্ৰিত কৰাৰ লক্ষ্যৰে গুৱাহাটীৰ খানাপাৰাস্থিত পশু চিকিৎসা মহাবিদ্যালয় খেলপথাৰত অনুষ্ঠিত হ’বলগীয়া যুৱ শক্তি সমাৰোহৰ প্ৰস্তুতি এতিয়া তীব্ৰতৰ হৈ পৰিছে । কেন্দ্ৰীয় গৃহমন্ত্ৰী অমিত শ্বাহে সম্বোধন কৰিবলগীয়া এই বিশাল সমাৱেশত সমগ্ৰ অসমৰ প্ৰায় ১.৫ লাখ যুৱক-যুৱতীয়ে অংশগ্ৰহণ কৰাৰ সম্ভাৱনা আছে ।
এই অনুষ্ঠানৰ পূৰ্বে সংবাদ মাধ্যমৰ আগত ৰাজ্য চৰকাৰৰ মন্ত্ৰী পীযুষ হাজৰীকাই কয় যে এই ৰেলী ৰাজ্যৰ ৰাজনৈতিক ইতিহাসত এক ঐতিহাসিক ক্ষণ হিচাপে পৰিগণিত হোৱাৰ সম্ভাৱনা আছে । তেওঁ উল্লেখ কৰে যে ইমান বৃহৎ সংখ্যক যুৱক-যুৱতীৰ সমাগম অসমত পূৰ্বে খুব কমেইহে দেখা গৈছে ।
মন্ত্ৰী হাজৰীকাই আৰু জনায় যে যুৱ সংগঠনৰ সৈতে তেওঁৰ প্ৰায় তিনি দশকজোৰা জড়িত থকাৰ কালছোৱাত ইমান ব্যাপক পৰিসৰৰ প্ৰস্তুতি তেওঁ কেতিয়াও দেখা নাই । তেওঁৰ মতে, এই পৰিকল্পনা আৰু অংশগ্ৰহণৰ মাত্ৰাই ৰাজ্যখনৰ যুৱ প্ৰজন্মৰ মাজত বৃদ্ধি পোৱা উৎসাহ আৰু ৰাজনৈতিক সজাগতাকে প্ৰতিফলিত কৰিছে ।
ভাৰতীয় জনতা যুৱ মৰ্চাৰ অসম প্ৰদেশ সমিতিৰ উদ্যোগত আয়োজন কৰা হৈছে এই কাৰ্যসূচী । গৃহমন্ত্ৰীগৰাকীৰ উপৰিও এই সমাৱেশত মুখ্যমন্ত্ৰী ড০ হিমন্ত বিশ্ব শৰ্মাৰ লগতে বিজেপি দলৰ কেইবাজনো জ্যেষ্ঠ নেতা উপস্থিত থাকিব ।
লগতে পঢ়ক : কংগ্ৰেছ ভাৰত বিৰোধী শক্তিৰ হাতৰ পুতলা হৈ পৰিছে: শিলচৰত প্ৰধানমন্ত্ৰী মোদী
