কংগ্ৰেছক তীব্ৰ সমালোচনা কৰি প্ৰধানমন্ত্ৰী মোদীয়ে অভিযোগ উত্থাপন কৰে যে দলটোৱে ভাৰত বিৰোধী শক্তিসমূহৰ হাতৰ পুতলা হিচাপে কাম কৰিছে
শনিবাৰে প্ৰধানমন্ত্ৰী নৰেন্দ্ৰ মোদীয়ে শিলচৰত এক জনসভা সম্বোধন কৰি বিৰোধী কংগ্ৰেছক আক্ৰমণৰ লক্ষ্য কৰি লয় । কংগ্ৰেছ দলক তীব্ৰ সমালোচনা কৰি প্ৰধানমন্ত্ৰী মোদীয়ে অভিযোগ উত্থাপন কৰে যে দলটোৱে ভাৰতৰ দ্ৰুত উন্নয়নত অসন্তুষ্ট গোলকীয় শক্তিসমূহৰ “হাতৰ পুতলা” হিচাপে কাম কৰিছে । তেওঁ লগতে অভিযোগ কৰে যে বৰ্ধিত আন্তঃৰাষ্ট্ৰীয় উত্তেজনাৰ মাজত দলটোৱে দেশৰ ভিতৰত আতংক বিয়পোৱাৰ চেষ্টা চলাইছে ।
প্ৰধানমন্ত্ৰীগৰাকীয়ে কয় যে কেন্দ্ৰীয় চৰকাৰে গোলকীয় সংঘাত আৰু অৰ্থনৈতিক বিভ্ৰান্তিৰ বিৰূপ প্ৰভাৱৰ পৰা ভাৰতীয় নাগৰিকক সুৰক্ষিত কৰিবলৈ কাম কৰি আছে । বিপৰীতে বিশ্বৰ বিভিন্ন প্ৰান্তত ভূ-ৰাজনৈতিক অনিশ্চয়তা আৰু যুদ্ধসদৃশ পৰিৱেশ বিৰাজ কৰা সময়ত কংগ্ৰেছে দায়িত্বশীল ভূমিকা পালন কৰাত ব্যৰ্থ হোৱা বুলি তেওঁ সমালোচনা কৰে ।
তেওঁ কয়- “বিশ্বৰ বহু ঠাইত যুদ্ধসদৃশ পৰিস্থিতিৰ সৃষ্টি হৈছে । আমাৰ চৰকাৰে দেশৰ নাগৰিকসকলে যাতে কোনো কষ্টৰ সন্মুখীন নহয় তাৰ বাবে সম্ভৱপৰ সকলো প্ৰচেষ্টা চলাইছে । চৰকাৰৰ লক্ষ্য হৈছে ভাৰতৰ জনসাধাৰণৰ ওপৰত এই গোলকীয় উত্তেজনাৰ প্ৰভাৱ হ্ৰাস কৰা ।”
প্ৰধানমন্ত্ৰীয়ে কয় যে, এনে পৰিস্থিতিয়ে সকলো ৰাজনৈতিক দলৰ পৰা দায়িত্বশীল আচৰণ দাবী কৰে, কিন্তু কংগ্ৰেছে তাৰ পৰিৱৰ্তে ভয় আৰু অস্থিৰতা বিয়পোৱাৰ পথ বাছি লৈছে বুলি তেওঁ অভিযোগ কৰে ।
প্ৰধানমন্ত্ৰীগৰাকীয়ে কয়, “এনে এক সংকটপূৰ্ণ সন্ধিক্ষণত আশা কৰা হৈছিল যে কংগ্ৰেছে এটা দায়িত্বশীল ৰাজনৈতিক দল হিচাপে আচৰণ কৰিব । কিন্তু দলটোৱে ৰাষ্ট্ৰীয় স্বাৰ্থৰ প্ৰতি থকা এই গুৰুত্বপূৰ্ণ কৰ্তব্য পালনত পুনৰবাৰ ব্যৰ্থ হৈছে । কংগ্ৰেছে দেশৰ ভিতৰত আতংক সৃষ্টিৰ চেষ্টা কৰিছে, যাতে দেশখন সমস্যাৰ মাজত সোমাই পৰে আৰু পিছত তেওঁলোকে মোদীক অন্তহীন গালি-গালাজ কৰিব পাৰে ।”
লগতে পঢ়ক : বৰাকত উন্নয়নৰ ধল, শিলচৰত ২৩,৫৫০ কোটিৰ উন্নয়নমূলক প্ৰকল্পৰ শুভাৰম্ভ প্ৰধানমন্ত্ৰীৰ
