ভাৰতে বাংলাদেশৰ পৰিস্থিতিৰ ওপৰত তীক্ষ্ণ দৃষ্টি ৰাখিছে বুলি উল্লেখ কৰিছে বৈদেশিক পৰিক্ৰমা মন্ত্ৰালয়ে । সংখ্যালঘু লোকৰ ওপৰত হোৱা আক্ৰমণক লৈ গভীৰ উদ্বেগ প্ৰকাশ কৰিছে ভাৰতে ।
ভাৰতত বাংলাদেশ উচ্চায়ুক্তৰ বাহিৰত সংঘটিত হোৱা কথিত প্ৰতিবাদ সন্দৰ্ভত বৈদেশিক পৰিক্ৰমা মন্ত্ৰালয়ে নিজৰ স্থিতি স্পষ্ট কৰিছে । বাংলাদেশৰ একাংশ সংবাদ মাধ্যমে বিভ্ৰান্তিকৰ অপপ্ৰচাৰ চলোৱাৰ অভিযোগ উত্থাপন কৰি মন্ত্ৰালয়ে উল্লেখ কৰে যে ২০ ডিচেম্বৰত নতুন দিল্লীত বাংলাদেশ উচ্চায়ুক্তৰ বাহিৰত কোনো নিৰাপত্তাজনিত ভাবুকিৰ সৃষ্টি হোৱা নাই ।
সংবাদ মাধ্যমৰ প্ৰশ্নৰ উত্তৰত বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে উল্লেখ কৰে যে ২০২৫ চনৰ ২০ ডিচেম্বৰত বাংলাদেশ উচ্চায়ুক্তৰ সন্মুখত প্ৰায় ২০–২৫ জনীয়া যুৱক-যুৱতীৰ এটা সৰু দলে বাংলাদেশৰ মৈমনসিঙত হিন্দু যুৱক দিপু চন্দ্ৰ দাসৰ নিৰ্মম হত্যাকাণ্ডৰ বিৰুদ্ধে শ্লোগান দি বাংলাদেশৰ সংখ্যালঘুসকলৰ সুৰক্ষাৰ দাবী জনাইছিল ।
বৈদেশিক মন্ত্ৰালয়ৰ স্পষ্টীকৰণ-
ৰণধীৰ জয়ছোৱালে উল্লেখ কৰে যে কোনো ধৰণৰ বেৰিকেড ভংগ কৰাৰ চেষ্টা কৰা হোৱা নাছিল, কোনো নিৰাপত্তাজনিত পৰিস্থিতিও উদ্ভৱ হোৱা নাছিল । ঘটনাস্থলীত নিয়োজিত আৰক্ষীয়ে কিছু মিনিটৰ ভিতৰতে শান্তিপূৰ্ণভাৱে দলটোক তাৰ পলা আতৰাই পঠাই । এই ঘটনাবোৰৰ দৃশ্যমান প্ৰমাণ ৰাজহুৱাভাৱে উপলব্ধ । তেওঁ লগতে উল্লেখ কৰে যে একাংশ বাংলাদেশী সংবাদ মাধ্যমে এই ঘটনাক অতিৰঞ্জিত আৰু ভুলকৈ উপস্থাপন কৰিছে ।
বিদেশী মিছনৰ নিৰাপত্তা ভাৰতৰ দায়িত্ব-
বৈদেশিক পৰিক্ৰমা মন্ত্ৰালয়ে পুনৰ কয় যে ভাৰতে ভিয়েনা সন্ধিৰ অধীনত নিজৰ ভূখণ্ডত অৱস্থিত সকলো বিদেশী মিছন আৰু কূটনৈতিক প্ৰতিষ্ঠানৰ নিৰাপত্তা নিশ্চিত কৰাৰ বাবে সম্পূৰ্ণৰূপে প্ৰতিশ্ৰুতিবদ্ধ ।
বাংলাদেশৰ পৰিস্থিতিৰ তীক্ষ্ণ নিৰীক্ষণ-
বৈদেশিক পৰিক্ৰমা মন্ত্ৰালয়ে উল্লেখ কৰিছে যে ভাৰতে বাংলাদেশৰ পৰিস্থিতিৰ ওপৰত তীক্ষ্ণ দৃষ্টি ৰাখিছে । বাংলাদেশী কৰ্তৃপক্ষৰ সৈতে সংস্পৰ্শত থকা ভাৰতীয় বিষয়াসকলে সংখ্যালঘু লোকৰ ওপৰত হোৱা আক্ৰমণক লৈ গভীৰ উদ্বেগ প্ৰকাশ কৰিছে । দিপু চন্দ্ৰ দাসৰ হত্যাকাণ্ডৰ বাবে দায়ীসকলক অতি শীঘ্ৰে ন্যায়ৰ কাঠগঢ়ালৈয়ো আনিবলৈ আহ্বান জনায় বৈদেশিক মন্ত্ৰালয়ে ।
লগতে পঢ়ক : বেৰিকেড ভাঙি সংসদ ভৱনত প্ৰৱেশ প্ৰতিবাদকাৰী; ইউনুছ চৰকাৰক দিলে ২৪ ঘণ্টাৰ সময়সীমা
