হৰমুজ প্ৰণালীত ইৰাণৰ আগ্ৰাসী সামুদ্ৰিক কৌশলৰ মূল স্থপতি হিচাপে গণ্য কৰা হৈছিল টাংছিৰিক

মধ্যপ্ৰাচ্যত চলি থকা সংঘাতৰ মাজতে ইজৰাইলে এক উল্লেখযোগ্য দাবী উত্থাপন কৰিছে । ইজৰাইলৰ এজন বিষয়াৰ মতে ইৰাণৰ ৰিভল্যুচনেৰী গাৰ্ডৰ নৌসেনাৰ অধিনায়ক আলিৰেজা টাংছিৰি ইজৰাইলৰ আক্ৰমণত নিহত হৈছে । ইৰাণৰ কৌশলগত বন্দৰ চহৰ বন্দৰ আব্বাছত সংঘটিত হোৱা আক্ৰমণৰ মাজতে এই বাতৰি প্ৰকাশ পাইছে ।

ইৰাণৰ শক্তিশালী ইছলামিক ৰিভল্যুচনেৰী গাৰ্ড কৰ্পছ (আই আৰ জি চি)ৰ নৌসেনাৰ শাখাৰ নেতৃত্ব দিছিল টাংছিৰীয়ে । এজন বিষয়াই লগতে দাবী কৰে যে হৰমুজ প্ৰণালী বন্ধ কৰাৰ তদাৰকীৰ দায়িত্ব কমোডৰ টাংছিৰিৰ আছিল ।

হৰমুজ প্ৰণালীত ইৰাণৰ আগ্ৰাসী সামুদ্ৰিক কৌশলৰ মূল স্থপতি হিচাপে গণ্য কৰা হৈছিল টাংছিৰিক । সাগৰত আমেৰিকা আৰু ইজৰাইলক তীব্ৰ প্ৰত্যাহ্বান জনোৱাৰ বাবে তেওঁ প্ৰায়ে বাতৰিৰ শিৰোনাম দখল কৰিছিল । যদিহে তেওঁৰ মৃত্যু নিশ্চিত হয় তেন্তে ইৰাণৰ সামৰিক আন্তঃগাঁথনি বিশেষকৈ নৌসেনাৰ শক্তিৰ বাবে এক বৃহৎ ক্ষতি হ’ব ।

এই দাবীৰ পিছতো তেহৰানে এতিয়াও নিজৰ শীৰ্ষ সেনাধ্যক্ষগৰাকী সন্দৰ্ভত কোনো আনুষ্ঠানিক বিবৃতি প্ৰকাশ কৰা নাই । বন্দৰ আব্বাছ হৈছে ইৰাণৰ আটাইতকৈ গুৰুত্বপূৰ্ণ নৌসেনাৰ ঘাটি, ইয়াৰ পৰা সমগ্ৰ পাৰস্য উপসাগৰ নিৰিক্ষণ কৰা হয় ।

উল্লেখ্য যে, এই যুদ্ধত এতিয়ালৈকে আমেৰিকা আৰু ইজৰাইলে তিনি ডজনতকৈও অধিক ইৰাণৰ গুৰুত্বপূৰ্ণ সামৰিক সেনাপতিক লক্ষ্য কৰি লৈছে । এই আক্ৰমণে অঞ্চলটোত উত্তেজনা বৃদ্ধি কৰিব পাৰে । ইৰাণে নিজৰ শীৰ্ষ সামৰিক বিষয়াৰ মৃত্যুৰ প্ৰতিশোধ ল’ব বুলি আশংকা কৰা হৈছে, যিয়ে উপসাগৰীয় দেশ আৰু আন্তঃৰাষ্ট্ৰীয় জলপথৰ নিৰাপত্তা সংকট আৰু অধিক গভীৰ কৰি তুলিব পাৰে ।

লগতে পঢ়ক : শক্তি সংকটৰ মাজতে ভাল খবৰ, ভাৰতৰ বাবে খোলা থাকিব হৰমুজ প্ৰণালী

ড’নাল্ড ট্ৰাম্পৰ এই মক্তব্য সন্দৰ্ভত ইৰাণে কয় যে আমাৰ সতৰ্কবাণীত আমেৰিকাই ভয় খাই নিজৰ পৰিকল্পনা সলনি কৰিলে

আফগানিস্তানৰ ৰাজধানী কাবুলস্থিত ইৰাণৰ দূতাবাসে দাবী কৰিছে যে ইৰাণৰ পৰা তীব্ৰ সতৰ্কবাণী পোৱাৰ পিছত আমেৰিকাই শক্তিৰ আন্তঃগাঁথনি আক্ৰমণৰ পৰিকল্পনা পিছুৱাই দিছে । ড’নাল্ড ট্ৰাম্পৰ এই মক্তব্য সন্দৰ্ভত ইৰাণে কয় যে আমাৰ সতৰ্কবাণীত আমেৰিকাই ভয় খাই নিজৰ পৰিকল্পনা সলনি কৰিলে । দূতাবাসৰ মতে, ড’নাল্ড ট্ৰাম্পে এই আক্ৰমণ পিছুৱাই দিয়াৰ নিৰ্দেশ দিয়ে । ইৰাণে স্পষ্ট কৰি দিছিল যে যদি তেওঁলোকৰ শক্তি আন্তঃগাঁথনি আক্ৰমণ কৰা হয় তেন্তে ই সমগ্ৰ অঞ্চলটোৰ শক্তি আন্তঃগাঁথনিক লক্ষ্য কৰি ল’ব । ইফালে সংবাদ সংস্থা এ পিৰ এক প্ৰতিবেদন অনুসৰি ইৰাণৰ চৰকাৰী টেলিভিছনত কোৱা হৈছে যে ‘ইৰাণৰ তীব্ৰ সতৰ্কবাণীৰ পিছত আমেৰিকাৰ ৰাষ্ট্ৰপতি পিছুৱাই যায় ।’

উল্লেখ্য য়ে, ড’নাল্ড ট্ৰাম্পে ইৰাণ সন্দৰ্ভত এক উল্লেখযোগ্য বক্তব্য আগবঢ়াইছে । তেওঁ আমেৰিকাৰ প্ৰতিৰক্ষা বিভাগক ইৰাণৰ বিদ্যুৎ কেন্দ্ৰ আৰু শক্তি আন্তঃগাঁথনিৰ বিৰুদ্ধে যিকোনো সম্ভাৱ্য সামৰিক ব্যৱস্থা পাঁচ দিনৰ বাবে বন্ধ কৰিবলৈ নিৰ্দেশ দিছে । বিগত দুদিন ধৰি আমেৰিকা আৰু ইৰাণৰ মাজত হোৱা ইতিবাচক আৰু গঠনমূলক আলোচনাৰ পিছত এই সিদ্ধান্ত লোৱা হৈছে ।

ট্ৰাম্পে নিজৰ ছ’চিয়েল প্লেটফৰ্ম “ট্ৰুথ ছ’চিয়েল”ত লিখিছে যে মধ্যপ্ৰাচ্যত চলি থকা উত্তেজনা সমাধানৰ বাবে দুয়োখন দেশৰ মাজত আলোচনা চলি আছে । তেওঁ কয় যে আলোচনা ইতিবাচক আৰু ইয়াৰ বাবে আক্ৰমণ সাময়িকভাৱে পিছুৱাই দিয়াৰ সিদ্ধান্ত লোৱা হৈছে ।

আলোচনাৰ অগ্ৰগতিৰ ওপৰত ভিত্তি কৰি পৰৱৰ্তী পদক্ষেপ নিৰ্ধাৰণ কৰা হ’ব বুলিও তেওঁ স্পষ্ট কৰে । উল্লেখ্য যে, এদিন পূৰ্বে ট্ৰাম্পে ইৰাণক কঠোৰ সতৰ্কবাণী দিছিল যে যদিহে ৪৮ ঘণ্টাৰ ভিতৰত হৰমুজ প্ৰণালী সম্পূৰ্ণৰূপে মুকলি কৰা নহয় তেন্তে দেশখনৰ শক্তিৰ আন্তঃগাঁথনি লক্ষ্য কৰি লোৱা হ’ব পাৰে ।

লগতে পঢ়ক : হৰমুজ পাৰ হৈ ভাৰত অভিমুখে আৰু দুখন জাহাজ, ইৰাণে দিলে সেউজ সংকেত