আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণক ৪৮ ঘণ্টাৰ সময়সীমা জাৰি কৰিছিল, যিটোৰ ম্যাদ উকলি যোৱাৰ উপক্ৰম হৈছে
বিগত ৬টা সপ্তাহ ধৰি চলি আছে ইৰাণ যুদ্ধ । এই যুদ্ধ কেৱল মধ্য প্ৰাচ্যতে নহয় বিশ্বৰ আন আন প্ৰান্ততো প্ৰভাৱ পেলাইছে । আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণক ৪৮ ঘণ্টাৰ সময়সীমা জাৰি কৰিছিল, যিটোৰ ম্যাদ উকলি যোৱাৰ উপক্ৰম হৈছে । কিন্তু তাৰ পূৰ্বে ট্ৰাম্পে ইৰাণক এতিয়ালৈকে দিয়া আটাইতকৈ ডাঙৰ ভাবুকিৰ প্ৰদান কৰিছে । যিয়ে এতিয়া ফদ্বেগৰ সৃষ্টি কৰাৰ লগতে আমেৰিকাৰ পৰৱৰ্তী পদক্ষেপক লৈ কৌতুহলৰ সৃষ্টি কৰিছে ।
ট্ৰাম্পে ইৰাণক ভাবুকি দি কয় যে, “আজি নিশা এটা সম্পূৰ্ণ সভ্যতাৰ অন্ত পৰিব, যাক কেতিয়াও পুনৰ ঘূৰাই আনিব পৰা নাযাব । মই এনে হোৱাটো নিবিচাৰো, কিন্তু সেয়া সম্ভৱতঃ হ’ব ।”
ছ’চিয়েল মিডিয়াত পোষ্ট কৰি ট্ৰাম্পে কয় যে, “আমি এতিয়া ইৰাণৰ শাসন ব্যৱস্থা সলনি কৰিছো । তাত পূৰ্বতকৈ স্মাৰ্ট আৰু কম উগ্ৰ মানুহ আছে । কোনে জানে, হয়তো কিবা এটা বৈপ্লৱিক পদক্ষেপ লোৱা হ’ব পাৰে ? আমি আজি নিশা গম পাম । এইটো বিশ্ব ইতিহাসৰ আটাইতকৈ গুৰুত্বপূৰ্ণ মুহূৰ্ত হ’ব পাৰে । ৪৭ বছৰীয়া ধন দাবী, দুৰ্নীতি, মৃত্যুৰ অন্ত পৰিব । ভগৱান মহান । অনুগ্ৰহ কৰি ইৰাণৰ জনসাধাৰণক আশীৰ্বাদ কৰক ।”
উল্লেখ্য যে ইৰাণত আবদ্ধ হৈ থকা আমেৰিকান পাইলটগৰাকীৰ উদ্ধাৰ অভিযানৰ বিশদ বিৱৰণ দি সংবাদমেল অনুষ্ঠিত কৰাৰ মাত্ৰ এদিন পিছতে ট্ৰাম্পে এই বক্তব্য প্ৰকাশ কৰিছে । ট্ৰাম্পে ইৰাণক হৰমুজ প্ৰণালী মুকলি কৰি চুক্তিত উপনীত হ’বলৈও ৪৮ ঘণ্টাৰ সময় দিছিল, যাৰ ম্যাদ অতি সোনকালে শেষ হ’ব ।
ট্ৰাম্পে প্ৰথমে ইৰাণক ৪৮ ঘণ্টাৰ সময় দিছিল আৰু সেই সময়ৰ ভিতৰত ইৰাণে প্ৰণালী মুকলি নকৰিলে আক্ৰমণৰ সকীয়নি দিছিল । কিন্তু বিশ্বই এই সংঘাতৰ ফলাফলৰ বাবে অপেক্ষা কৰি থকাৰ সময়তে ট্ৰাম্পে উত্তেজনা ম্লান কৰি সময়সীমা বৃদ্ধি কৰে ।
এতিয়ালৈকে ট্ৰাম্পে তিনিবাৰকৈ এই সময়সীমা বৃদ্ধি কৰিছে আৰু নতুন সময়সীমা ৭ এপ্ৰিলত শেষ হ’ব । প্ৰথম সতৰ্কবাণী ৪৮ ঘণ্টাৰ বাবে দিয়া হৈছিল, যিটো পিছত পাঁচ দিন আৰু তাৰ পিছত আৰু ১০ দিন বৃদ্ধি কৰা হৈছিল । এইদৰে মূল ৪৮ ঘণ্টাৰ সময়সীমা এতিয়া মুঠ ৪০৮ ঘণ্টালৈ বৃদ্ধি হৈছে ।
লগতে পঢ়ক : নামানিলে হ’ব মহাবিপৰ্যয়… হৰমুজক লৈ পুনৰ ইৰাণক ৪৮ ঘন্টাৰ সময়সীমা ট্ৰাম্পৰ
