আশা ভোঁছলেৰ নশ্বৰ দেহ শেষকৃত্যৰ বাবে শিৱাজী পাৰ্ক শ্মশানলৈ নিয়াৰ সময়ত সোমবাৰে মুম্বাইৰ ৰাজপথত তেওঁক শেষ বিদায় জনাবলৈ জনসমুদ্ৰৰ সৃষ্টি হয়

কিংবদন্তি কণ্ঠশিল্পী আশা ভোঁছলেৰ নশ্বৰ দেহ শেষকৃত্যৰ বাবে শিৱাজী পাৰ্ক শ্মশানলৈ নিয়াৰ সময়ত সোমবাৰে মুম্বাইৰ ৰাজপথত তেওঁক শেষ বিদায় জনাবলৈ জনসমুদ্ৰৰ সৃষ্টি হয় । ভাৰতৰ অন্যতম শ্ৰেষ্ঠ কণ্ঠশিল্পীগৰাকীক সন্মান জনাবলৈ অনুৰাগী, গুণমুগ্ধ তথা সংগীত আৰু চলচ্চিত্ৰ জগতৰ সদস্যসকল একত্ৰিত হোৱাৰ ফলত চহৰখন এক আৱেগিক পৰিৱেশৰ সাক্ষী হয় ।

প্ৰসিদ্ধ কণ্ঠশিল্পীগৰাকীৰ প্ৰতি শেষ শ্ৰদ্ধা নিৱেদন কৰিবলৈ ৰাজনৈতিক নেতা, অভিনেতা, সংগীতজ্ঞ আৰু ঘনিষ্ঠ সোঁত বয় । ত্ৰিৰংগাৰে আবৃত কৰি তেওঁৰ নশ্বৰ দেহ তেওঁৰ বাসগৃহত ৰাজহুৱা শ্ৰদ্ধাঞ্জলিৰ বাবে ৰখা হয়, য’ত শোকাকুল পৰিৱেশৰ মাজত সকলোৱে কণ্ঠশিল্পীগৰাকীক পুষ্পাঞ্জলি অৰ্পণ কৰি শ্ৰদ্ধাঞ্জলি জ্ঞাপন কৰে ।

আঠ দশকতকৈও অধিক সময় ধৰি বিস্তৃত এক অসাধাৰণ কেৰিয়াৰৰ সমাপ্তি ঘটাই দেওবাৰে ৯২ বছৰ বয়সত ব্ৰীচ কেণ্ডী হাস্পতালত প্ৰবীণ কণ্ঠশিল্পীগৰাকীৰ মৃত্যু হয় । আজি বিয়লি ৪ বজাত মুম্বাইৰ শিৱাজী পাৰ্কত সম্পূৰ্ণ ৰাজ্যিক মৰ্যাদাৰে তেওঁৰ অন্তিম সংস্কাৰ সম্পন্ন কৰা হয় ।

ভাৰতীয় সংগীতৰ অন্যতম বহুমুখী গায়িকা হিচাপে বিবেচিত আশা ভোঁছলেৰ সংগ্ৰহ আছিল ধ্ৰুপদী, গজল, কেবাৰে গীত আৰু সমসাময়িক পপ সংগীতৰ এক মিশ্ৰণ । সৰ্বাধিক ষ্টুডিঅ’ ৰেকৰ্ডিং কৰাৰ বাবে তেওঁ গিনিজ ৱৰ্ল্ড ৰেকৰ্ডত স্থান লাভ কৰিছিল আৰু ভগ্নী লতা মংগেশকাৰৰ সৈতে মিলি হিন্দী চলচ্চিত্ৰ সংগীতৰ সোণালী যুগৰ সংজ্ঞা নিৰূপণত কৰিছিল ।

ধ্ৰুপদী গায়ক তথা নাট্য অভিনেতা পণ্ডিত দীননাথ মংগেশকাৰৰ গৃহত জন্মগ্ৰহণ কৰা তেওঁ সৰু কালতেই নিজৰ সাংগীতিক যাত্ৰা আৰম্ভ কৰিছিল আৰু এক অতুলনীয় উত্তৰাধিকাৰ গঢ়ি তুলিছিল । সুৰকাৰ আৰ ডি বৰ্মনৰ সৈতে তেওঁৰ সহযোগিতা ভাৰতীয় চিনেমাৰ অন্যতম চৰ্চিত অধ্যায় হৈ ৰৈছে, যাৰ সৈতে পৰৱৰ্তী সময়ত তেওঁ বিবাহপাশত আৱদ্ধ হৈছিল ।

লগতে পঢ়ক : আশা ভোছলেক শ্ৰদ্ধাঞ্জলি জনাবলৈ পত্নীৰ সৈতে উপস্থিত শচীন তেণ্ডুলকাৰ…

ভাৰতীয় সংগীত জগতৰ এগৰাকী কিংবদন্তি কণ্ঠশিল্পী আশা ভোছলেৰ ৯২ বছৰ বয়সত দেহৱসান ঘটে। আজি শিৱাজী পাৰ্কত তেওঁৰ শেষকৃত্য সম্পন্ন কৰা হ’ব।

নিজৰ সময়ৰ অন্যতম প্ৰভাৱশালী কণ্ঠশিল্পীৰ অন্যতম আশা ভোছলেৰ দেওবাৰে ৯২ বছৰ বয়সত শেষ নিশ্বাস ত্যাগ কৰে। ১৩ এপ্ৰিল সোমবাৰে সন্ধিয়া ৪ বজাত শিৱাজী পাৰ্কত তেওঁৰ শেষকৃত্য সম্পন্ন কৰা হ’ব। ইয়াৰ পূৰ্বে চেলিব্ৰিটি আৰু তেওঁৰ অনুৰাগীসকলক কিংবদন্তি গায়িকাগৰাকীক শ্ৰদ্ধাঞ্জলি জনোৱাৰ সুযোগ দিয়া হ’ব।ইফালে পত্নী অঞ্জলিৰ সৈতে শচীন তেণ্ডুলকাৰেও আশা ভোছলেক শ্ৰদ্ধাঞ্জলি জনাবলৈ উপস্থিত হয়।যাৰ ভিডিঅ’ এতিয়া ভাইৰেল হৈ পৰিছে।

ভিডিঅ’টোত শ্ৰদ্ধাঞ্জলি জনোৱাৰ সময়ত শচীন তেণ্ডুলকাৰক আৱেগিক হোৱা দেখিবলৈ পোৱা গৈছিল।চলিত বৰ্ষৰ ৫ মাৰ্চত শচীন তেণ্ডুলকাৰৰ পুত্ৰ অৰ্জুন তেণ্ডুলকাৰ আৰু সান্যা চান্দোকৰ বিয়াত শেষবাৰৰ বাবে আশা ভোছলেক ৰাজহুৱা স্থানত দেখিবলৈ  পোৱা গৈছিল। দম্পতীহালক আশীৰ্বাদ দিবলৈ তেওঁ এখন বগা শাৰী পৰিধান কৰি উপস্থিত হৈছিল। আশা ভোছলেৰ মৃত্যুত বলীউড, ৰাজনৈতিক মহল আৰু খেলৰ জগতটো শোকৰ ছাঁ পৰিছে।

লগতে পঢ়ক: আশা ভোছলেৰ মৃত্যুত শোকস্তব্ধ বলীউড; শ্বাহৰুখ খান, অনু মালিকৰ শোক প্ৰকাশ

বলীউডৰ কিংবদন্তি গায়িকা আশা ভোছলেৰ মৃত্যুত শোকত ভাগি পৰিছে সমগ্ৰ বলীউড। শ্বাহৰুখ খান, ৰাজপাল যাদৱে আশা ভোছলেক জনালে শ্ৰদ্ধাঞ্জালি।

কিংবদন্তি গায়িকা আশা ভোছলে ৯২ বছৰ বয়সত শেষ নিশ্বাস ত্যাগ কৰে। তেওঁক শনিবাৰে বুকুৰ সংক্ৰমণ আৰু ভাগৰুৱা অৱস্থাৰ বাবে ব্ৰিচ কেণ্ডি হাস্পতালত ভৰ্তি কৰোৱা হয়। আশা ভোছলেৰ মৃত্যুত এতিয়া সমগ্ৰ বলীউড শোকস্তব্ধ হৈ পৰিছে।

আশা ভোছলেৰ মৃত্যুত শ্বাহৰুখ খানে শ্ৰদ্ধাঞ্জলি জ্ঞাপন কৰে। তেওঁ ইনষ্টাগ্ৰাম পোষ্টত লিখিছে,আশা টাইৰ কথাটো শুনি দুখ লাগিল।তেওঁৰ কণ্ঠ ভাৰতীয় চিনেমাৰ এক স্তম্ভ। তেওঁৰ প্ৰতিভা বহুতৰ মাজত জীয়াই থাকিব।তেওঁৰ পৰা মই সদায় আশীৰ্বাদ পাইছিলোঁ।

অনু মালিক আৰু আবু মালিকে আশা ভোছলেৰ মৃত্যুত শোক প্ৰকাশ কৰে। অনু মালিকে আশা ভোছলেক মা বুলি সম্বোধন কৰি কয় যে, ‘মোৰ মাতৃৰ বিয়োগ হৈছে। আশা জীৰ বিয়োগ সকলোৰে বাবে দুখৰ খবৰ।সমগ্ৰ চলচ্চিত্ৰ জগতৰ বাবে, সংগীত জগতৰ বাবে, দেশ আৰু বিশ্বৰ বাবে এয়া এক কৰুণ খবৰ।এইটো মোৰ পৰিয়ালৰ বাবে, দেশৰ বাবে, আৰু বিশ্বৰ বাবে এক বৃহৎ ক্ষতি।মোৰ শৈশৱ আশা জীৰ ঘৰত পাৰ হৈছিল।মই বহত দুখী।আজি মোৰ এটা শ্ব’ আছে, কিন্তু কেনেকৈ পৰিবেশন কৰিবলৈ সক্ষম হ’ম নাজানো।২০২১ চনত মোৰ মাতৃৰ দেহাৱসান হৈছিল, কিন্তু আজি পুনৰবাৰ মোৰ মাতৃ নোহোৱা হোৱাৰ দৰে লাগিছে।

আশা ভোছলেৰ মৃত্যুত ৰাজপাল যাদৱে কয়—মংগেশকাৰ পৰিয়ালে জাতিটোক যি সাংস্কৃতিক উত্তৰাধিকাৰ অৰ্পণ কৰিছে,তাক শব্দৰে বন্দী কৰাটো অসম্ভৱ।আশা টাইৰ মৃত্যু কেৱল এটা পৰিয়ালৰ বাবে ক্ষতি নহয়,বৰং সমগ্ৰ বিশ্বৰ বাবে ই এক অপূৰণীয় ক্ষতি।আপোনাৰ কণ্ঠ অমৰ আৰু আগন্তুক যুগ ধৰি প্ৰতিধ্বনিত হৈ থাকিব।

লগতে পঢ়ক: কিংবদন্তী কণ্ঠশিল্পী আশা ভোছলেৰ বিয়োগত শোক প্ৰকাশ প্ৰধানমন্ত্ৰী মোদীৰ

১৯৩৩ চনত জন্মগ্ৰহণ কৰা আশা ভোছলেয়ে অতি কম বয়সৰ পৰাই সংগীতৰ যাত্ৰা আৰম্ভ কৰিছিল

ভাৰতীয় সংগীত জগত উকা কৰি চিৰ বিদায় ল’লে প্ৰসিদ্ধ কণ্ঠশিল্পী আশা ভোছলেই । ১২ এপ্ৰিল, দেওবাৰে ৯২ বছৰ বয়সত দেহাৱসান ঘটে কিংবদন্তি কণ্ঠশিল্পীগৰাকীৰ । তেওঁৰ দেহাৱসানৰ লগে লগে ভাৰতীয় চিনেমা আৰু সংগীত জগতৰ আঠ দশকজোৰা এটা যুগৰ অৱসান ঘটিল । মুম্বাইৰ ব্ৰীচ কেণ্ডী হাস্পতালৰ শেষ নিশ্বাস ত্যাগ কৰে প্ৰসিদ্ধ কণ্ঠশিল্পীগৰাকীয়ে । হৃদযন্ত্ৰৰ সংক্ৰমণৰ বাবে তেওঁক শনিবাৰে সন্ধিয়া চিকিৎসালয়ত ভৰ্তি কৰোৱা হৈছিল ।

১৯৩৩ চনত জন্মগ্ৰহণ কৰা আশা ভোছলেয়ে অতি কম বয়সৰ পৰাই সংগীতৰ যাত্ৰা আৰম্ভ কৰিছিল আৰু ১৯৫০ চনৰ পৰা এগৰাকী আগশাৰীৰ নেপথ্য গায়িকা হিচাপে বিশ্বজুৰি খ্যাতি লাভ কৰিছিল । তেওঁৰ আবেগিক তথা শক্তিশালী কণ্ঠস্বৰে ভাৰত আৰু বিদেশৰ কেইবাটাও প্ৰজন্মৰ সংগীতপ্ৰেমীক মোহিত কৰি ৰাখিছিল । নিজৰ সুদীৰ্ঘ কেৰিয়াৰত তেওঁ বিভিন্ন ভাৰতীয় ভাষাত হাজাৰ হাজাৰ গীত বাণীবদ্ধ কৰিছিল, য’ত শাস্ত্ৰীয় সংগীত, গজলৰ পৰা আৰম্ভ কৰি পপ আৰু লোকগীতলৈকে সকলো সমানেই জনপ্ৰিয় আছিল ।

দাদাচাহেব ফাল্কে বঁটা আৰু পদ্ম বিভূষণৰ দৰে সন্মানীয় বঁটাৰে বিভূষিত হোৱা আশা ভোছলেৰ নাম ২০১১ চনত গিনিজ ৱৰ্ল্ড ৰেকৰ্ডছত বিশ্বৰ সৰ্বাধিক গীত বাণীবদ্ধ কৰা শিল্পী হিচাপে অন্তৰ্ভুক্ত কৰা হৈছিল । ‘দিল চিজ ক্যা হ্যায়’ৰ দৰে মৰ্মস্পৰ্শী গজলৰ পৰা ‘পিয়া তু অব তো আজা’ৰ দৰে চঞ্চল গীতলৈকে তেওঁৰ কণ্ঠ আছিল অপ্ৰতিৰোধ্য । তেওঁৰ বিয়োগত দেশজুৰি শোকৰ ছাঁ পৰিছে আৰু অনুৰাগীসকলৰ লগতে বিভিন্ন ক্ষেত্ৰৰ বিশিষ্ট ব্যক্তিয়ে এই মহান শিল্পীগৰাকীলৈ শ্ৰদ্ধাঞ্জলি জ্ঞাপন কৰিছে ।

লগতে পঢ়ক : হঠাৎ অসুস্থ কিংবদন্তি কণ্ঠশিল্পী আশা ভোছলে, চিকিৎসালয়ত ভৰ্তি

আশা ভোছলেৰ অনুৰাগীসকল এই খবৰত গভীৰ চিন্তিত হৈ পৰিছে

হঠাৎ অসুস্থ হৈ পৰিছে কিংবদন্তি কণ্ঠশিল্পী আশা ভোছলে । হাৰ্ট এটেকত আক্ৰান্ত হৈ অসুস্থ হৈ পৰিছে প্ৰখ্যাত কণ্ঠশিল্পীগৰাকী । শেহতীয়া তথ্য অনুসৰি অসুস্থ হৈ পৰাৰ পিছতে তেওঁক মুম্বাইৰ ব্ৰিচ কেণ্ডি হাস্পতালত ভৰ্তি কৰা হৈছে । কণ্ঠশিল্পীগৰাকীৰ অৱস্থা সন্দৰ্ভত বৰ্তমান কোনো আপডেট প্ৰকাশ কৰা নাই চিকিৎসালয়খনে ।

যাদুকৰী কণ্ঠৰে দশক দশক ধৰি অগণন অনুৰাগীক মোহিত কৰি ৰখা কণ্ঠশিল্পীগৰাকীৰ এই অসুস্থতাৰ খবৰ ব্ৰিচ কেণ্ডি হাস্পতালৰ চিকিৎসকে নিশ্চিত কৰিছে । অৱশ্যে এই বিষয়ে কোনো সবিশেষ প্ৰকাশ কৰা নাই ।

ইতিমধ্যে চিকিৎসালয়ৰ বাহিৰত অনুৰাগীৰ লগতে সংবাদদাতা উপস্থিত হৈছে যদিও পৰিয়ালৰ কোনো সদস্যই এই সন্দৰ্ভত কোনো তথ্য প্ৰকাশ কৰা নাই । আশা ভোছলেৰ অনুৰাগীসকল এই খবৰত গভীৰ চিন্তিত হৈ পৰিছে । কণ্ঠশিল্পীগৰাকীয়ে সংগীত জগতত যথেষ্ট খ্যাতি অৰ্জন কৰিছে, তেওঁৰ গীতসমূহ যথেষ্ঠ জনপ্ৰিয় । বিগত ৭০ বছৰতকৈও অধিক সময় ধৰি উদ্যোগটোত নিজৰ যাদুকৰী কণ্ঠৰে অসংখ্য অনুৰাগীৰ হৃদয়ত আধিপত্য বিস্তাৰ কৰি আহিছে বৰ্ষীয়ান কণ্ঠশিল্পীগৰাকীয়ে ।

আশা ভোছলে ১৯৪৮ চনত চুনাৰীয়া ছবিৰ “সাৱন আয়া হ্যেয়” গীতটিৰে নিজৰ সংগীত যাত্ৰা আৰম্ভ কৰিছিল । সমগ্ৰ কেৰিয়াৰত তেওঁ প্ৰায় ১৬ হাজাৰ গীত গাইছে । কেৱল হিন্দীতে নহয়, মাৰাঠী, বাংলা, গুজৰাটী, পাঞ্জাবী, ভোজপুৰী, তামিল, মালয়ালম, ইংৰাজী, ৰাছিয়ান আদি ভাষাতো গীত গাইছে তেওঁ ।

লগতে পঢ়ক : ভক্তিত নিমগ্ন ‘ধুৰন্ধৰ’ৰ অভিনেত্ৰী ছাৰা অৰ্জুন; মহাকালেশ্বৰ মন্দিৰ পৰিদৰ্শন