বাংলাদেশৰ উগ্ৰবাদী সংগঠনৰ সৈতে জড়িত এটা বৃহৎ নেটৱৰ্ক উৎখাত কৰিছে আৰক্ষীয়ে । অভিযানত ১১টাকৈ বাংলাদেশী জেহাদীক গ্ৰেপ্তাৰ কৰিছে আৰক্ষীয়ে ।

অসম আৰু ত্ৰিপুৰাৰ নিৰাপত্তা সংস্থাই এক বৃহৎ সফলতা লাভ কৰিছে । বাংলাদেশৰ উগ্ৰবাদী সংগঠনৰ সৈতে জড়িত এটা বৃহৎ নেটৱৰ্ক উৎখাত কৰিছে আৰক্ষীয়ে । এক অভিযানত ১১টাকৈ বাংলাদেশী জেহাদীক গ্ৰেপ্তাৰ কৰিছে আৰক্ষীয়ে । মঙলবাৰে গুৱাহাটী আৰক্ষী আয়ুক্ত পাৰ্থসাৰথি মহন্তই কয় যে কেন্দ্ৰীয় চোৰাংচোৱা সংস্থাৰ তথ্যৰ ভিত্তিত বিশেষ টাস্ক ফ’ৰ্চে গ্ৰেপ্তাৰ কৰিছে এই বাংলাদেশী জেহাদীকেইটাক ।

আৰক্ষী আয়ুক্তৰ মতে, সোমবাৰে নিশা অসমৰ বৰপেটা, চিৰাং, বাক্সা আৰু দৰং জিলাৰ লগতে চুবুৰীয়া ৰাজ্য ত্ৰিপুৰাত বৃহৎ তালাচী অভিযান চলোৱা হয় । এই অভিযানৰ সময়ত বাংলাদেশৰ উগ্ৰবাদী সংগঠনৰ নিৰ্দেশত পোনপটীয়াকৈ কাম কৰা মুঠ ১১ টা বাংলাদেশী জেহাদীক গ্ৰেপ্তাৰ কৰা হয় । গ্ৰেপ্তাৰ হোৱা জেহাদীৰ ১০ টা অসমৰ বুলি জানিব পৰা গৈছে ।

ইয়াৰে এটা অভিযুক্ত জাগীৰ মিঞাক ত্ৰিপুৰাৰ পৰা গ্ৰেপ্তাৰ কৰে আৰক্ষীয়ে । আৰক্ষীয়ে দাবী কৰিছে যে ধৃত জেহাদী কেইটা “ইমাম মাহমুদ কাফিলা” (IMK) মডিউলৰ সদস্য । তদন্তত প্ৰকাশ পাইছে যে বাংলাদেশী জেহাদী কেইটাৰ প্ৰধান উদ্দেশ্য আছিল অসমকে ধৰি সমগ্ৰ উত্তৰ-পূবক অস্থিৰ কৰি তোলা । এই অভিযুক্ত কেইটাই অঞ্চলটোত “মুছলমান আধিপত্য” প্ৰতিষ্ঠা কৰিব বিচাৰিছিল আৰু “গাজৱাতুল হিন্দ”ৰ মতাদৰ্শ বিয়পাইছিল ।

বাংলাদেশত চৰকাৰ সলনি হোৱাৰ পিছতে সক্ৰিয় সন্ত্ৰাসবাদী-

অভিযানৰ সময়ত আৰক্ষীয়ে কেইবাটাও সন্দেহজনক সামগ্ৰী জব্দ কৰে যদিও কোনো ধৰণৰ অস্ত্ৰ-শস্ত্ৰ বা গোলা-বাৰুদ উদ্ধাৰ হোৱা নাই । আৰক্ষী আয়ুক্তগৰাকীয়ে এক প্ৰকাশ কৰি কয় যে ২০২৪ চনৰ আগষ্ট মাহত বাংলাদেশত চৰকাৰ সলনি হোৱাৰ পিছত সন্ত্ৰাসবাদী কাৰ্যকলাপ বৃদ্ধি পাইছে । ইয়াত কেইবাটাও নতুন আৰু পুৰণি সন্ত্ৰাসবাদী সংগঠন সক্ৰিয় হৈ পৰিছে ।

 ‘পূৰ্ব আকাশ’ গোটৰ জৰিয়তে চলি আছিল সমগ্ৰ নিযুক্তি অভিযান-

জামাত-উল-মুজাহিদিন বাংলাদেশ, আনছাৰুল্লাহ বাংলা টিম (এবিটি) আৰু আল কায়দা (এ কিউ আই এছ)ৰ জ্যেষ্ঠ নেতাসকলে ভাৰতীয় মডিউল সক্ৰিয় কৰাৰ বাবে নিৰ্দেশনা দিছিল । শ্বেখ হাছিনা চৰকাৰৰ পতনৰ পিছত আই এম কেৰ আমিৰক কাৰাগাৰৰ পৰা মুকলি কৰি দিয়া হয়, যাৰ ফলত ভাৰত বিৰোধী ষড়যন্ত্ৰ তীব্ৰতৰ হৈ পৰে । এই সমগ্ৰ ছিণ্ডিকেটটোৱে এটা ছ’চিয়েল মিডিয়া প্লেটফৰ্মৰ জৰিয়তে কাম কৰিছিল ।

লক্ষ্যত অসম, পশ্চিম বংগ, ত্ৰিপুৰাৰ যুৱক-

“পূৰ্ব আকাশ” নামৰ এটা গোটৰ সহায়ত নতুন সদস্য নিযুক্তি, উগ্ৰবাদ বিয়পাই দিয়া, ধন সংগ্ৰহ কৰা হৈছিল । অসম, পশ্চিম বংগ, ত্ৰিপুৰাৰ যুৱকক লক্ষ্য কৰি লোৱা হৈছিল । বাংলাদেশী নাগৰিক উমৰ আৰু খালিদক বৰপেটাৰ পৰা অহা তামিমৰ নেতৃত্বত চলা অসম কোষৰ সমন্বয়ৰ দায়িত্ব দিয়া হৈছিল । এই জেহাদীটোৰ লগত আন কেইবাটাও সক্ৰিয় আছিল ।

অসমত জেহাদী কাৰ্যকলাপত চোৰাংচোৱাৰ নজৰ-

অসমত গ্ৰেপ্তাৰ হোৱা জেহাদী কেইটা হ’ল নাছিম উদ্দিন ওৰফে তামিম (২৪), জুনব আলী (৩৮), আফ্ৰাহিম হুছেইন (২৪), মিজানুৰ ৰহমান (৪৬), চুলতান মাহমুদ (৪০), মহম্মদ ছিদ্দিক আলী (৪৬), ৰাছিদুল আলম (২৮), মহিবুল খান (২৫), শ্বৰুক হুছেইন (২২), মহম্মদ দিলবৰ ৰাজাক (২৬)। ভাৰতীয় নিৰাপত্তা সংস্থাসমূহে অসমত জেহাদী কাৰ্যকলাপৰ ওপৰত তীক্ষ্ণ দৃষ্টি ৰাখিছে ।

লগতে পঢ়ক : বাংলাদেশত পুনৰ হিন্দু যুৱকক হত্যা… মুছলমান বন্ধুৱে চলালে গুলী